ନବରାତ୍ରିର ଶେଷ ତିନି ଦିନ ଆମକୁ ଜୀବନର ସର୍ବୋଚ୍ଚ ଲକ୍ଷ୍ୟ - ଜ୍ଞାନ, ଆନ୍ତରିକ ଶାନ୍ତି ଓ ଚରମ ବିଜୟ - କିପରି ଲାଭ କରିବେ ତାହା ଶିଖାଏ।

ପ୍ରେରଣା ୭: କାଳରାତ୍ରିଙ୍କ ସତ୍ୟ - ଆଖରି ଭୟକୁ ଜୟ କରିବା

ମା'କାଳରାତ୍ରି ଅନ୍ଧକାର ଓ ମୃତ୍ୟୁର ଦେବୀ। ତାଙ୍କ ପୂଜାର ଅର୍ଥ ହେଉଛି ଆମକୁ ଆମର ଗଭୀରତମ ଭୟଗୁଡିକୁ ମୁକାବିଲା କରିବା ଉଚିତ। ଏହା ମୃତ୍ୟୁଭୟ, ଅସଫଳତାର ଭୟ, କିମ୍ବା ଭବିଷ୍ୟତର ଭୟ ହୋଇପାରେ। ମା' କାଳରାତ୍ରି ଆମକୁ ଶିଖାନ୍ତି ଯେ ଏହି ଭୟଗୁଡିକୁ ସାହସରେ ଗ୍ରହଣ କଲେ ଏବଂ ସେମାନଙ୍କର ସମ୍ମୁଖୀନ ହେଲେ, ସେଗୁଡିକ ଆମ ଉପରେ କବଳ କରିପାରିବେ ନାହିଁ। ସତ୍ୟକୁ ଜାଣିବା ଓ ଗ୍ରହଣ କରିବା ହେଉଛି ମୁକ୍ତିର ପଥ।

ପ୍ରେରଣା ୮: ମହାଗୌରୀଙ୍କ ପବିତ୍ରତା - ମନ ଓ ଆତ୍ମାକୁ ଶୁଦ୍ଧ କରିବା

ମା'ମହାଗୌରୀ ଅତ୍ୟନ୍ତ ପବିତ୍ର ଓ ଶୁଦ୍ଧ। ତାଙ୍କ ରୂପ ଧଳା ରଙ୍ଗର, ଯାହା ପବିତ୍ରତାର ପ୍ରତୀକ। ଏହି ଦିନ ଆମକୁ ଶିଖାଏ ଯେ ବାହ୍ୟ ସଫଳତା ଓ ସମ୍ପତ୍ତି ଭଲ, କିନ୍ତୁ ଆମର ମନ ଓ ଆତ୍ମା ଯଦି ଶୁଦ୍ଧ ନଥାଏ, ତାହା ହେଲେ ସବୁ ସଫଳତା ବ୍ରଥା। ମା' ମହାଗୌରୀ ଆମକୁ ଶିଖାନ୍ତି ଯେ ସଦ୍ବିଚାର, ସତ୍ୟ ବଚନ ଓ ଭଲ କାର୍ଯ୍ୟଦ୍ୱାରା ଆମର ଅନ୍ତରକୁ ଶୁଦ୍ଧ ରଖିବା ଉଚିତ। ଏକ ଶାନ୍ତ ଓ ପବିତ୍ର ମନ ହେଉଛି ସବୁଠାରୁ ବଡ଼ ସମ୍ପତ୍ତି।

ପ୍ରେରଣା ୯: ସିଦ୍ଧିଦାତ୍ରୀଙ୍କ ସଫଳତା - ଚରମ ଲକ୍ଷ୍ୟ ହେଉଛି ଆତ୍ମ-ସିଦ୍ଧି

ନବମ ଦିନର ଦେବୀମା' ସିଦ୍ଧିଦାତ୍ରୀ ସର୍ବସିଦ୍ଧି ପ୍ରଦାନ କରନ୍ତି। କିନ୍ତୁ ଏଠାରେ ସିଦ୍ଧିର ଅର୍ଥ କେବଳ ଧନ ବା ପଦବୀ ନୁହେଁ। ଏହାର ସବୁଠାରୁ ଗଭୀର ଅର୍ଥ ହେଉଛି "ଆତ୍ମ-ସିଦ୍ଧି" - ନିଜକୁ ଜାଣିବା, ନିଜ ଉପରେ ବିଜୟ ଲାଭ କରିବା, ଏବଂ ଆନ୍ତରିକ ସନ୍ତୁଷ୍ଟି ଲାଭ କରିବା। ମା' ସିଦ୍ଧିଦାତ୍ରୀ ଆମକୁ ଶିଖାନ୍ତି ଯେ ଯେତେବେଳେ ଆମେ ନିଜ ଭିତରର ସର୍ବୋତ୍ତମ ସ୍ୱରୂପକୁ ଚିହ୍ନିପାରିବା, ସେତେବେଳେ ସମସ୍ତ ପ୍ରକାର ସଫଳତା ସ୍ୱୟଂଭାବେ ଆମ ପାଖକୁ ଆସିବ।

ଦଶମୀ: ବିଜୟା ଦଶମୀର ମୁଖ୍ୟ ପ୍ରେରଣା

ଦଶମୀଦିନ ମା' ଦୁର୍ଗାଙ୍କ ବିଜୟ ଉତ୍ସବ ପାଳନ କରାଯାଏ। ଏହି ବିଜୟ ଆମକୁ ଶିଖାଏ ଯେ ଜୀବନର ଯୁଦ୍ଧ ବାହ୍ୟ ଶତ୍ରୁଙ୍କ ସହିତ ନୁହେଁ, ବରଂ ଆମ ଭିତରର ଦୁର୍ବଳତା, ଭୟ ଓ ଇଚ୍ଛାଗୁଡିକ ସହିତ। ନବରାତ୍ରିର ଏହି ନଅ ଦିନର ଯାତ୍ରା ଶେଷରେ ଆମେ ଯେତେବେଳେ ନିଜ ଉପରେ ବିଜୟ ଲାଭ କରିପାରିବା, ସେହି ଦିନ ହିଁ ଆମର ପ୍ରକୃତ "ବିଜୟା ଦଶମୀ"।

ନବରାତ୍ରି ହେଉଛି ଏକ ଅନନ୍ୟ ଆଧ୍ୟାତ୍ମିକ ଯାତ୍ରା, ଯାହା ଆମକୁ ଶିଖାଏ ଯେ ପରିବର୍ତ୍ତନ ବାହାରୁ ଆରମ୍ଭ ହୁଏ ନାହିଁ, ଏହା ଆରମ୍ଭ ହୁଏ ଆମ ଭିତରୁ। ମା' ଦୁର୍ଗା ଆମ ଭିତରେ ବାସ କରୁଛନ୍ତି, ଆମକୁ ଶକ୍ତି, ଜ୍ଞାନ ଓ ବିଜୟ ପ୍ରଦାନ କରିବାକୁ ପ୍ରସ୍ତୁତ। ଆମେ କେବଳ ତାଙ୍କୁ ଜାଗ୍ରତ କରିବାର ପଥଟିକୁ ଅନୁସରଣ କରିବା ଉଚିତ।

ସାହିତ୍ୟିକ ମାନ୍ୟତା

ନବଦୁର୍ଗାଙ୍କ ପ୍ରତ୍ୟେକ ରୂପ ମଣିଷ ଜୀବନର ଏକେକ ପାଟର ଚିତ୍ରଣ କରେ । ସାହସ, ତପସ୍ୟା, ମାତୃତ୍ୱ , ଯୁଦ୍ଧଶୈଳୀ , କରୁଣା ଓ ପବିତ୍ରତା– ସବୁ ଏକାଧାରରେ ମା'ଙ୍କ ରୂପ ମାନଙ୍କୁ ଦର୍ଶାଏ । ଏହିଥରେ ମଣିଷଙ୍କୁ ଶିକ୍ଷା ମିଳେ– ଜୀବନରେ ସଂଘର୍ଷ ଆସିବ, କିନ୍ତୁ ଧୈର୍ଯ୍ୟ, ସାହସ ଓ ଭକ୍ତିରେ ସମସ୍ତ ବିପଦକୁ ଜୟ କରାଯାଇପାରେ ।

"ସର୍ବ ମଙ୍ଗଳ ମାଙ୍ଗଲ୍ୟ ଶିବେ ସର୍ବାର୍ଥ ସାଧିକେ

ଶରଣ୍ୟ ତ୍ରୟମ୍ବୀକେ ଗୌରୀ ନାରାୟଣୀ ନମସ୍ତୁତେ" ।

ଅର୍ଥାତ, ଦେବୀଙ୍କୁ ସମସ୍ତ ମଙ୍ଗଳର ମଙ୍ଗଳମୟୀ ବୋଲି ସ୍ତୁତି କରାଯାଏ ।

ଅତଏବ ଶାରଦୀୟ ନବରାତ୍ରୀ କେବଳ ପୂଜା ପର୍ବ ନୁହେଁ ; ଏହା ଏକ ଆଧ୍ୟାତ୍ମିକ ଯାତ୍ରା । ମା'ଙ୍କ ପ୍ରତ୍ୟେକ ବେଶରେ ରହିଛି ଜୀବନର ଗଭୀର ସତ୍ୟ, ଯାହା ଆମକୁ ନିଜର ଅନ୍ତରାତ୍ମାରେ ଶକ୍ତି, ସାହସ ଓ ପ୍ରେମର ସନ୍ଦେଶ ଦେଇଥାଏ ।

!! ସୁଶାନ୍ତ କୁମାର ସାସମଲ

ହନୁମାନ ନଗର ଆସ୍କା ରୋଡ଼

ବ୍ରହ୍ମପୁର ଗଞ୍ଜାମ !!

ଭାଗ ୩: ଶେଷ ତିନି ଦିନ - ଜ୍ଞାନ, ଶାନ୍ତି ଓ ବିଜୟ ଲାଭ କରିବା

ଶାନ୍ତି ଓ ବିଜୟ ଲାଭ କରିବା