ଶ୍ରୀ ବ୍ରଜଭୂମି ର ଉପାସନା କରୁଥିବା ଶ୍ରୀ ନାରାୟଣ ଭଟ୍ଟଙ୍କୁ ପ୍ରଭୁ ବିଶେଷ ପରିଶ୍ରମ କରିବା ପରେ ହିଁ ସୃଷ୍ଟି କରିଥିବେ । ଶ୍ରୀବରାହ ପୁରାଣରେ ମଥୁରାମଣ୍ତଳର ଯେଉଁ ବର୍ଣ୍ଣନା କରାଯାଇଛି ତାହା କାଳଚକ୍ର ଯୋଗୁଁ ସମସ୍ତ ତୀର୍ଥ ଲୋପ ପାଇ ଯାଇଥିଲା । ଶ୍ରୀନାରାୟଣ ଭଟ୍ଟ ସେହି ଲୁପ୍ତ ପାଇଥିବା ତୀର୍ଥ ଗୁଡିକୁ ପ୍ରକଟ ଏବଂ ପ୍ରସିଦ୍ଧ କଲେ ।ସେ ଭକ୍ତିରସାମୃତ ର ସମୁଦ୍ରଥିଲେ । ସନ୍ଥ ମାନଙ୍କ ମଧ୍ୟରେ ବିରାଜିତ ହୋଇ ସତ୍ସଙ୍ଗ କରୁଥିଲେ । ଶୁଷ୍କ ଜ୍ଞାନ ଏବଂ କର୍ମକାଣ୍ତକୁ ଖଣ୍ତନ କରି ଭକ୍ତି ର ସ୍ଥାପନା କରିବା ପରି ତାଙ୍କରି ସମାନ ଆଉ କେହି ନଥିଲେ । ଶ୍ରୀନାରାୟଣ ଭଟ୍ଟ ବ୍ରଜଭୂମି ର ଅନନ୍ତ ଉପାସକ ଭକ୍ତ ଥିଲେ । ସେ ବ୍ରଜର କୌଣସି ବି ଗ୍ରାମକୁ ଯାଇ । ସେଠାରେ ବ୍ରତ ଉପବାସ ପୂର୍ବକ ଧ୍ୟାନରେ ବସି ଅନୁସନ୍ଧାନ କରୁଥିଲେ ସେଠାରେ କେଉଁ କେଉଁ ତୀର୍ଥ ରହିଛି । ଭଗବାନ ସ୍ବୟଂ ପ୍ରକଟ ହୋଇ ନାରାୟଣ ଭଟ୍ଟ ଙ୍କୁ ପ୍ରତ୍ୟକ୍ଷ ସେଠାରେ ଥିବା ତୀର୍ଥ ଦର୍ଶନ କରାଉଥିଲେ । ଏହାପରେ ସେ ଗ୍ରାମବାସୀଙ୍କୁ ଡକାଇ ଜଣାଇ ଦେଉଥିଲେ ଭଗବାନ୍ ଙ୍କ ଏହି ସ୍ବରୂପ ଏଠାରେ ରହିଛି । ଭଗବାନ୍ ଏହି ଲୀଳା ଏହି ସ୍ଥାନରେ କରିଥିଲେ ଓ ଏହି କୁଣ୍ତ ଏଠାରେ ରହିଛି ଏପରି ଲୋକମାନଙ୍କୁ ଜଣାଇ ସେହି ଭୂମିକୁ ଶୋଧନ କରି ସେହି ତୀର୍ଥରେ କୁଣ୍ତ , ଲୀଳା ଏବଂ ସ୍ବରୂପ କୁ ପ୍ରତ୍ୟକ୍ଷ ଦେଖାଇଦେଉଥିଲେ । ଏହା ସହିତ ସେ ନିଜ ରାସ ମଣ୍ତଳି ଦ୍ବାରା ପ୍ରଭୁ କରିଥିବା ଲୀଳା କୁ ଅଭିନୟ କରାଉଥିଲେ ।

ଥରେ ଶ୍ରୀନାରାୟଣ ଭଟ୍ଟ ମଥୁରାରେ ବିରାଜିତ ଥିଲେ । ସେତେବେଳେ ମାଘମାସ ର ସମୟ ଥିଲା । ବହୁତ ଲୋକ ତୀର୍ଥରାଜ ପ୍ରୟାଗରେ ତ୍ରିବେଣୀ ସ୍ନାନ ପାଇଁ ଯାଉଥିଲେ । ଏହା ଦେଖି ଶ୍ରୀନାରାୟଣ ଭଟ୍ଟ କହିଲେ ଆପଣ ମାନେ ଅନ୍ୟ ସ୍ଥାନକୁ କାହିଁକି ଯାଉଛନ୍ତି । ତ୍ରିବେଣୀ ତ ଏଠାରେ ଅଛି । ଏହାଶୁଣି ସବୁ ଲୋକମାନେ ଆଶ୍ଚର୍ଯ୍ୟ ଚକିତ ହୋଇ ପଚାରିଲେ ତ୍ରିବେଣୀ କେଉଁଠି ରହିଛି ? ସେ କହିଲେ ଉଚ୍ଚରେ ଥିବା ଗ୍ରାମରେ ଅଛି । ନିଜ ସହିତ ଲୋକ ମାନଙ୍କୁ ନେଇ ସେଇ ସ୍ଥାନରେ ପହଞ୍ଚି ଭୂମିକୁ ଖୋଳି ତ୍ରିବେଣୀ ର ତିନୋଟି ସ୍ରୋତ ପ୍ରତ୍ୟକ୍ଷ ଦେଖାଇଦେଲେ । ବରସାନା ନିକଟରେ ହିଁ ଉଚ୍ଚ ଗ୍ରାମ ରହିଛି । ସେଠାରେ ଶ୍ରୀରାଧାରାଣୀ ଙ୍କ ପ୍ରିୟ ସଖି ଶ୍ରୀଲଳିତା ଙ୍କ ପାଦୁର୍ଭାବ ହୋଇଥିଲା । ସେହି ସମୟରେ ଶ୍ରୀ ତ୍ରିବେଣୀ ଦିବ୍ୟ ଧାରାରେ ଶୋଭିତ ହୋଇ ପର୍ବତ ରୁ ବାହାରି ଶ୍ରୀବଳଦେବ ଙ୍କ ମନ୍ଦିର ପର୍ଯ୍ୟନ୍ତ ପ୍ରବାହିତ ହେବାର ଦେଖାଦେଲେ । ସବୁ ଲୋକ ମାନେ ସେଠାରେ ସ୍ନାନ ଓ ଧ୍ୟାନ କଲେ । ଏହା ଦେଖି ତୀର୍ଥରାଜ ପ୍ରୟାଗ ଗୋଟିଏ ବ୍ରାହ୍ମଣ ବେଶ ଧାରଣ କରି ଶ୍ରୀନାରାୟଣ ଭଟ୍ଟ ଙ୍କ ନିକଟକୁ ପହଞ୍ଚିଗଲେ ଏବଂ କହିଲେ ଆପଣ ଏହି ତୀର୍ଥଯାତ୍ରୀ ମାନଙ୍କୁ ପ୍ରୟାଗ ଯିବା ପାଇଁ କାହିଁକି ମନାକଲେ । ଆପଣ ମୋ ସହିତ ଶାସ୍ତ୍ରାର୍ଥ କରନ୍ତୁ । ବ୍ରଜଭୂମିରେ ଦୁହିଁଙ୍କ ଭିତରେ ମହାନ୍ ଶାସ୍ତ୍ରର୍ଥ ହେଲା । ସାତଦିନ ପର୍ଯ୍ୟନ୍ତ ଏହା ଜାରି ରହିଲା । ତୀର୍ଥରାଜ ପ୍ରୟାଗ ବ୍ରଜର ମହାମହିମା ଆଗରେ ନତମସ୍ତକ ହୋଇଗଲେ । ସେତେବେଳେ ତ୍ରିବେଣୀ ମୂର୍ତ୍ତିମନ୍ତ ହୋଇ ଦର୍ଶନ ଦେଇ କହିଲେ -- ଯେତେବେଳେ ଶ୍ରୀକୃଷ୍ଣ ଙ୍କ ଆଜ୍ଞା ଅନୁସାରେ ରାଧା କୁଣ୍ତରେ ସମସ୍ତ ତୀର୍ଥର ଆଗମନ ହୋଇଥିଲା ସେତେବେଳ ଠାରୁ ମୁଁ ମଧ୍ୟ ବ୍ରଜଭୂମି ଛାଡି ଆଉ କୁଆଡେ ଯାଇନାହିଁ ଏବଂ ମୁଁ ଏଠାରେ ନିତ୍ୟ ନିବାସ କରୁଛି। ଯେଉଁ ଜନ ଏଠାର ରଜ ଓ ଜଳରେ ସ୍ନାନ ଅଭିଷେକ ଆଦି କରିବେ ସେ ତ୍ରିବେଣୀ ସ୍ନାନର ଫଳ ପାଇଯିବେ ।

କ୍ରମଶଃ---

ମୂଳଲେଖ ଭକ୍ତମାଳା 🙏

ଓମ୍ ନମଃ ଭଗବତେ ବାସୁଦେବାୟ 🙏

ଭକ୍ତ ନାରାୟଣ ଭଟ୍ଟ ବ୍ରଜରେ ତ୍ରିବେଣୀ ପ୍ରକଟ

ଭକ୍ତ ନାରାୟଣ ଭଟ୍ଟ ବ୍ରଜରେ ତ୍ରିବେଣୀ ପ୍ରକଟ