ବାଚଃ ପଲ୍ଲବୟତ୍ୟୁମା ପତିଧରଃ ସନ୍ଦର୍ଭ-ଶୁଦ୍ଧିଂ ଗିରାଂ।

ଜାନୀତେ ଜୟଦେବ ଏବ ଶରଣଃ ଶ୍ଲାଘ୍ୟୋ ଦୁରୂହ-ଦ୍ରୁତେ।

ଶୃଙ୍ଗାରୋତ୍ତର-ସ୍ୟତ୍-ପ୍ରମେୟ-ରଚନୈରାଚାର୍ଯ୍ୟ ଗୋବର୍ଦ୍ଧନଃ।

ସ୍ପର୍ଦ୍ଧୀ କୋଽପି ନ ବିଶ୍ରୁତଃ ଶ୍ରୁତିଧରୋ ଧୋୟୀ କବି-କ୍ଷ୍ମା-ପତିଃ।୪।

#ପଦ୍ୟାନୁବାଦ :-

ଉମାପତିଧର ଏକ ହିଁ ବ୍ୟକ୍ତି।

ବଚନପଲ୍ଲବେ ଅଟେ ତା ଶକ୍ତି।।

କଠିନ ଦୁର୍ବୋଧ୍ୟ ଶୀଘ୍ର ରଚନା।

ଶରଣ କେବଳ ଜାଣନ୍ତି ସିନା ।।

ଶୃଙ୍ଗାରରସ ରଚନାରେ କେହି।

ଗୋବର୍ଦ୍ଧନାଚାର୍ଯ୍ୟ ସମାନ ନାହିଁ।।

କବି ଭୂପତି ଧୋୟୀ ନାମେ ରାଜା।

ଶ୍ରୁତିଧର ବୋଲି ଲୋକେ ତା ପୂଜା।।

ବଚନମାନଙ୍କ ସନ୍ଦର୍ଭଶୁଦ୍ଧି।

ଜୟଦେବ ଏକା ଜାଣେ ସୁବୁଦ୍ଧି।।

#ଗଦ୍ୟାନୁବାଦ :-

ଉମାପତିଧର ନାମକ କବି କେବଳ ପଦଗୁଡ଼ିକୁ ପଲ୍ଲବିତ କରାଇ ଅନାବଶ୍ୟକ ଭାବରେ ବିସ୍ତାର କରାଇଥା’ନ୍ତି। କିନ୍ତୁ ପଦ ମଧ୍ୟରେ ଥିବା ଧ୍ୱନି ଓ ରସ ଆଦି ପ୍ରତି ସେ ଆଦୌ ସଚେତନ ନୁହନ୍ତି । ତେଣୁ ତାଙ୍କ କବିତା ମାଧୁର୍ଯ୍ୟପୂର୍ଣ୍ଣ ହୁଏନାହିଁ। ଶରଣ ନାମକ କବି ଯେଉଁ କବିତା ରଚନା କରନ୍ତିସେଥିରେ ଗୁଢ଼ ଅର୍ଥଯୁକ୍ତ ପଦମାନ ରହିଥାଏ। ତେଣୁ ତାହା ସହଜରେ ଶ୍ରୋତାମାନଙ୍କ ପକ୍ଷରେ ବୋଧଗମ୍ୟ ହୁଏନାହିଁ। ଆହୁରି ମଧ୍ୟ ସେଥିରେ ପ୍ରସାଦ ଆଦି ଗୁଣ ନ ଥିବାରୁ ତାହା ପାଠକ ଓ ଶ୍ରୋତାମାନଙ୍କ ମଧ୍ୟରେ ଆଦୃତ ହୋଇ ନ ଥାଏ। ସେହିପରି ଆଚାର୍ଯ୍ୟ ଗୋବର୍ଦ୍ଧନ ନାମକ କବି କେବଳ ଶୃଙ୍ଗାରରସପ୍ରଧାନ କାବ୍ୟକବିତାଦି ରଚନାରେ ପ୍ରବୀଣ ଅଟନ୍ତି। ଅନ୍ୟାନ୍ୟ ରସରେ ରସାଣିତ କବିତା ରଚନା କରିବାରେ ସେ ପାରଦର୍ଶିତା ଦେଖାଇନାହାନ୍ତି । ତେଣୁ ତାଙ୍କ ରଚନା ସବୁଶ୍ରେଣୀର ପାଠକ ଓ ଶ୍ରୋତାମାନଙ୍କୁ ଆନନ୍ଦ ଦେଇ ନ ଥାଏ। କାରଣ ଶୃଙ୍ଗାର ଭିନ୍ନ ହାସ୍ୟ, ବୀର ଓ କରୁଣ ରସାଦି ଯୁକ୍ତ କବିତା ହିଁ ସତ୍କାବ୍ୟ ରୂପେ ବିବେଚିତ ହୋଇଥାଏ। କବି ଗୋବର୍ଦ୍ଧନ ଆଚାର୍ଯ୍ୟ କେବଳ ଉତ୍କଟ ଶୃଙ୍ଗାରରସମୂଳକ କବିତା ରଚନା କରୁଥିବାରୁ ତାଙ୍କ କବିତାଗୁଡ଼ିକ ବିଦ୍ୱତ୍ ସମାଜରେ ସେପରି ଆଦୃତ ହୁଏନାହିଁ। ଧୋୟୀ (ପବନଦୂତ ନାମକ ଖଣ୍ଡକାବ୍ୟର ପ୍ରଣେତା) ନାମକ କବି, ଯଦିଓ କବିମଣ୍ଡଳୀରେ ଶ୍ରେଷ୍ଠ ରୂପେ ପରିଗଣିତ ହୁଅନ୍ତି ତାଙ୍କ କବିତାଗୁଡ଼ିକ କେବଳ ଶୁଣିବାକୁ ଭଲଲାଗେ ସିନା, ସେଥିରେ ଉନ୍ନତ କାବ୍ୟକୌଶଳ ପରିଲକ୍ଷିତ ହୁଏନାହିଁ। କିନ୍ତୁ ବିଷୟବସ୍ତୁ ଉତ୍ତମରୂପେ ପରିଚିତ କରାଇ, କାନ୍ତକୋମଳ ତଥା ମଧୁର ପଦାବଳୀ ଯୁକ୍ତ ବହୁରସ ସମାଶ୍ରିତ କାବ୍ୟ କବିତାଦି ରଚନା କରିଥିବାରୁ, କବି ଜୟଦେବଙ୍କ କାବ୍ୟରେ ‘ସନ୍ଦର୍ଭଶୁଦ୍ଧି’ ରୂପକ ଚମତ୍କାରିତା ପରିଲକ୍ଷିତ ହୋଇଥାଏ।

Umāpatidhara might be famous for free flowing diction, Śaraṇa’s sense of sound

might be superb, Dhoẏi might have a musical ear, Ācārya Govardhana might excel in eroticism, but no one can surpass Jayadeva as a poet because of his pure design of words and felicity ।

କ୍ରମଶଃ....

ଓଡ଼ିଆ ପଦ୍ୟାନୁବାଦ- ଧରଣୀଧର ଦାସ (ମିଶ୍ର )

ଓଡିଆ ଗଦ୍ଯାନୁବାଦ - ନିଳମଣି ମିଶ୍ର

ଭକ୍ତକବି ଶ୍ରୀ ଜୟଦେବ ଙ୍କ କୃତ ଶ୍ରୀ ଗୀତଗୋବିନ୍ଦ ମହାକାବ୍ୟ ପ୍ରଥମ ସର୍ଗଃ ଭାଗ - ୪ (gita govinda lyrics odia)

ଭକ୍ତକବି ଶ୍ରୀ ଜୟଦେବ ଙ୍କ କୃତ ଶ୍ରୀ ଗୀତଗୋବିନ୍ଦ ମହାକାବ୍ୟ ପ୍ରଥମ ସର୍ଗଃ ଭାଗ - ୪ (gita govinda lyrics odia)