ଦଶଲକ୍ଷ ଟଙ୍କାରେ ଘର ଖଣ୍ଡେ ହୋଇଯିବ ନା ? ଆମକୁ ସରକାର ଏ ଭିତରେ ଦଶଲକ୍ଷ ଟଙ୍କା ଦେବେ, ତୁମ ସ୍ଵପ୍ନର ସେଇ ଘରଟି ଆମ ଡିହରେ ବନେଇବ ନିତେଇ । ନିତ୍ୟାନନ୍ଦ ବାବୁ ତାଙ୍କ ସ୍ତ୍ରୀକୁ ମହାଖୁସିରେ କହିଲେ । “ନୀତା ଉଦାସୀ ହସଟିଏ ହସିଲା ହଁ ପାଞ୍ଚଲକ୍ଷ ବେଙ୍କରେ ରଖି ବାକି ପାଞ୍ଚଲକ୍ଷରେ ଘରଟିଏ ତିଆର କରିବା ହେଲେ ଠିକ୍ ହେବ । ନହେଲେ ଘରଟା ସିନା ତିଆରି କରିଦେବା । ତା’ ପରେ ଖାଇବା କ’ଣ ? ତମେ ବ୍ଯସ୍ତ ହଁ ନା ନୀତା ? ସରକାର ପାଦେ ପାଦେ କରି ଆଗଉଛନ୍ତି , ଦେବେ, ଦେବେ, ପେନସନ୍ ବି ଦେବେ । ଛାଡ଼ ଅଧିକ ଆଉ ଆଶା କରନି । ଆଶା ଆଉ ସପନ ଭାଙ୍ଗି ଗଲେ ଭାରି କଷ୍ଟ ହୁଏ । ଛାମୁ ଯାହା ଦେଲେ ହରଷେ….ଦେବେ ବୋଲି କହିଛନ୍ତି ସିନା ହେଲେ ଦେଉ ଦେଉ ପୁଣି କେତେ ଦିନ ଗଡ଼ିବ । ଚକେ ଗଲେ ବାର ହାତ । ସମୟ ଗଡ଼ିବ, ଭୋଟ ସରିଲେ କିଏ କାହାର ? ଭାରି କଠୋର ବାସ୍ତବବାଦୀ ମଣିଷଟାଏ ହୋ ତୁମେ ଟିକେ ଧୈର୍ଯ୍ୟ ଧର ସବୁ ବାଗେଇ ଯିବ ।

ହାତରେ ତାଙ୍କର ଖବର କାଗଜ, ଖବରଟି ପଢ଼ି ଶୁଣାଇଥିଲେ ସେ ତାଙ୍କ ଧର୍ମ ପତ୍ନୀଙ୍କୁ । ନୀତା ନିରେଖି ଦେଖିଲା ତା’ ସ୍ୱାମୀର ଆଖି ଦୁଇଟାରେ ସୁଖର ସ୍ୱପ୍ନ ଝଲସୁ ଥିଲା । ଆହା ! କେତେ ଆଶାବାଦୀ ମଣିଷଟାଏ ଇଏ ? କେଉଁ ଉପାଦାନରେ ଗଢ଼ା କେଜାଣି ? ସବୁବେଳେ ସବୁ କଥାରେ ମୁଠା ମୁଠା ବିଶ୍ଵାସ ମୁଠେଇ ଧରନ୍ତି । ତାଙ୍କ ବିଶ୍ୱାସକୁ ଭାଙ୍ଗିବାକୁ ମନ କଲା ନାଇଁ ନୀତାର, ମନେ-ମନେ ଭାବିଲା ଏଇ ସରକାର ହିଁ ତ ପ୍ରତିଶୃତି ଦେଇଥିଲା ଜି.ଆଇ.ଏ. ର ସରକାରଙ୍କ କଥା ପାଣିର ଗାର । ତାଙ୍କ ପଡ଼ୋଶୀ ପ୍ରଫେସର ସାମନ୍ତରାୟ ସେଇ ଦିନ ହିଁ ଉପହାସ କରି କହିଥିଲେ - “ଭୋଟ ସରିଗଲେ କିଏ କାହାର ?” ନେତାମାନେ ଥରେ ଭୋଟରେ ଜିତି ଗଲେ ତାଙ୍କର ପେନସନ୍, ଆଉ ଯଦି ଦୁଇଥର ତାହା ହେଲେ ଦୁଇଟା ପେନସନ୍ । ଶିକ୍ଷାଗତ ଯୋଗ୍ୟ ନଥାଇ , ଗୁଣ୍ଡାମୀ-ଭଣ୍ଡାମୀ କରି ପେନସନ । ଆଉ ନିଜେ ପାଠ ପଢ଼ି ପାଠ ପଢ଼ାଇ ଭବିଷ୍ଯତ ନାଗରୀକକୁ ଗଢ଼ିଦେବା ପାଇଁ ଜୀବନର ପୁରା ଅସଲ ସମୟଟାକୁ କାଟି ଦେଇଥିବା ମଣିଷମାନଙ୍କ ପାଇଁ ଚିନ୍ତା କରିବାର ସମୟ କ’ଣ କାହାର ଅଛି ? ସପନ ଦେଖିବା ପାଇଁ ଅନେଇ ଅଛି, ହେଲେ ରାତିର ଅନ୍ଧକାରରେ ନିଦଟା ଯେ ହଜି ଗଲାଣି, ସପନ ଆସିବ କେଉଁ ଆଖିକୁ ? ଏମିତି ସମୟ ଗଡ଼ି ଚାଲିଲା । ସେଦିନ ଅଧ୍ୟକ୍ଷ ଫୋନ୍ କରି ପାସବୁକ୍ ର ପ୍ରଥମ ପୃଷ୍ଠା ମାଗିଲେ । ନିତ୍ୟାନନ୍ଦ ବାବୁ ଖୁସିରେ କୁରୁଲେଇ ଗଲେ, କହିଲେ- “ତାଙ୍କ ସ୍ତ୍ରୀଙ୍କୁ ହେଇଟି ଆମ ପଇସା ଦେଇ ଦେବେ ହୋ ସରକାର , ନ ହେଲା ନାଇଁ ସେ ପେନସନ୍ ଦଶଲକ୍ଷ ଟଙ୍କାରେ ଟଳିଯିବ ଆମର ବାକି ଜୀବନ ଦେଖୁ ଦେଖୁ ତ ପୁଣି ତିନି-ଚାରି ବରଷ କଟି ଗଲାଣି ଅବସର ନେବାର I ବିନା ଦରମା ଆଉ ବିନା ପେନସନରେ ଇ ପି.ଏଫ୍. ପଇସାରେ….ନାଚି ଉଠୁଥାଏ ତାଙ୍କର ଆଶାବାଦୀ ମନଟା l ହେଲେ ନୀତାର ସେଇ ଉଦାସିଭାବ । ପ୍ରତିକ୍ରିୟା ଶୂନ୍ୟ ମଣିଷଟାଏ ଧୋଇ ମରୁଡ଼ି ସବୁ ସମାନ ତା’ ପାଇଁ । ଦେଖୁ ଦେଖୁ ବିତିଗଲା କିଛି ସପ୍ତାହ । ପୁଣି ସରକାରୀ ତାଲିକାଟାଏ ବାହାରିଲା ପଇସା ପାଇବା ଯୋଗ୍ୟ ଲୋକଙ୍କର । ସେଥିରେ ବି ଥାଏ ନିତ୍ୟାନନ୍ଦ ବାବୁଙ୍କ ନାଁ । ପୁଣି ଥରେ ଖୁସିର ଲହର ତାଙ୍କ ମନରେ ଖେଳି ଗଲା l ଆସିଯିବ ତା’ ହେଲେ ଦଶଲକ୍ଷ ଟଙ୍କା ହାତକୁ ଯାହା ହେଉ….l କିଛି ଦିନ ନ ଯାଉଣୁ ଭୋଟ ତାରିଖ ଘୋଷଣା ଆଉ ତା’ ସାଙ୍ଗକୁ ଆଚରଣ ବିଧି…l ପଦ୍ମ ଘୁଞ୍ଚି ଘୁଞ୍ଚି ଯାଉଛି । ହଉ ସରକାର କହିଛନ୍ତି ଯେତେବେଳେ ହେଲେ ଦେବେ ନିଶ୍ଚୟ I ନୀତା ମନେ ପକେଇଦେଲା ଗତ ଥର ସରକାରଙ୍କର ଘୋଷଣାକୁ । ନିଜ କଥାକୁ ନିଜେ ଭାଙ୍ଗିବାରେ ଓସ୍ତାଦ ଏ ସରକାର । ପଡ଼ିଶା ଘର ଟି.ଭି. ରୁ ଭାସି ଆସୁଥିଲା ଖୋ-ଖା ଭାଇଙ୍କର ପ୍ରସିଦ୍ଧ ଗୀତି । ନିତି ଗଢ଼େ ନିତି ଭାଙ୍ଗେ ସ୍ୱପ୍ନର ବାଲି ଘର ….ଯାଯାବର ମନ ମୋର ।

ଓଡ଼ିଶା ରାଜ୍ୟ ମୁକ୍ତ ବିଶ୍ୱବିଦ୍ୟାଳୟ, ମୁଖ୍ୟ କାର୍ଯ୍ୟାଳୟ, ସମ୍ବଲପୁର,ବିଭାଗୀୟ ମୁଖ୍ୟ ଓଡ଼ିଆ

ଠିକଣା-:କୁଲିତାପଡ଼ା

ପୋଷ୍ଟ ଅଫିସ:-ମୋଦିପଡ଼ା

ଜିଲ୍ଳା:-ସମ୍ବଲପୁର

ପିନ୍ କୋଡ଼-୭୬୮୦୦୨

ଯୋଗାଯୋଗ

-୭୯୭୮୮୬୪୬୧୨

ଭାଙ୍ଗିଗଲା ମୋ’ ସ୍ଵପ୍ନର ବାଲିଘର

ଡକ୍ଟର ଶ୍ରୀମତୀ ସଙ୍ଗୀତା ନାଏକ ପୁରୋହିତ