ବିଷୟ ପ୍ରବେଶ -

******************

ମହାତ୍ମା ଗାନ୍ଧୀ , ଦେଶରୁ ଇଂରେଜ ଶାସନ ର ସମୁଳ ବିନାଶ ନିମନ୍ତେ ଅନେକ ଆନ୍ଦୋଳନ ମାନ ସଂଗଠିତ କରିଥିଲେ। ବିଭିନ୍ନତାମୟ ମଞ୍ଜିକୁ ନେଇ ଏକତା ର ବୃକ୍ଷ ରୋପଣ କରିବାରେ ସକ୍ଷମ ହୋଇପାରିଥିଲେ ସେ।ସେ ପ୍ରାଥମିକ ସ୍ତରରେ କ୍ଷୁଦ୍ର ସମସ୍ୟା ମାନ ସମାଧାନ କରୁଥିଲେ , ଯେପରିକି ବିହାର ର ଚମ୍ପାରନ୍ ଆନ୍ଦୋଳନ, ଗୁଜୁରାଟ ର ଖେଡା ଆନ୍ଦୋଳନ ଇତ୍ୟାଦି। ରାଓଲାତ୍ ଆଇନ୍ ବିରୋଧରେ ସେ ପ୍ରଥମ ଥର ଜାତୀୟ ସ୍ତରୀୟ ଆନ୍ଦୋଳନ ସଂଗଠିତ କରିଥିଲେ।‌ ସେ ବୁଝି ପାରିଥିଲେ ଯେ ଦେଶର ବିକାଶ ନିମନ୍ତେ ଇଂରେଜ ଶାସନ ର ପତନ ନିତାନ୍ତ ଆବଶ୍ୟକ। ତେଣୁ ସେ ପ୍ରଥମ ଥର ଗଣ ଆନ୍ଦୋଳନ ସଂଗଠିତ କରିଥିଲେ ଯାହା ଥିଲା ଅସହଯୋଗ ଆନ୍ଦୋଳନ। ଏହା ସମଗ୍ର ଦେଶବ୍ୟାପୀ ଚାଲିଥିଲା ।ଏହା ପରେ ଗାନ୍ଧିଜୀ ଆରମ୍ଭ ଅରିଥିଲେ ଆଇନ୍ ଅମାନ୍ୟ । ଏଥିରେ ସେ ଇଂରେଜ ସରକାର ଙ୍କ ପ୍ରଣୀତ ଲବଣ ଆଇନ୍ କୁ ଭଙ୍ଗ କରି ଲବଣ ସତ୍ୟାଗ୍ରହ ଆରମ୍ଭ କରିଥିଲେ। ଇଂରେଜ ସରକାର ଙ୍କ ଅତ୍ୟାଚାର ଓ ମନମୁଖୀ ଶାସନରେ ଅତିଷ୍ଠ ହୋଇ ଶେଷରେ ସେ ଆରମ୍ଭ କଲେ ଭାରତ ଛାଡ ଆନ୍ଦୋଳନ। ଏହା ଥିଲା ମହାତ୍ମା ଗାନ୍ଧୀ ଙ୍କ ଶେଷ ଗଣ ଆନ୍ଦୋଳନ। ବିଶ୍ବରେ ସଙ୍ଗଠିତ ମହାନ୍ ବିପ୍ଳବ ଯେପରିକି ୧୭୮୯ ର ଫରାସୀ ରାଷ୍ଟ୍ର ବିପ୍ଳବ ଏବଂ ୧୯୧୭ ର ଋଷ୍ ବିପ୍ଳବ ପରି ଏହି ଆନ୍ଦୋଳନ ମଧ୍ୟ ନିଜର ମହାନତା ଏବଂ ସ୍ବତନ୍ତ୍ରତା ବିଶ୍ବ ଦରବାରରେ ପହଞ୍ଚାଇ ପାରିଛି। ଏହା ୧୯୪୨ ମସିହା ଅଗଷ୍ଟ ୮ ତାରିଖରେ ସଂଗଠିତ ହୋଇଥିବାରୁ ଏହାକୁ ଅଗଷ୍ଟ ବିପ୍ଳବ ବୋଲି କୁହାଯାଏ। ଏହି ଆନ୍ଦୋଳନ ଭାରତୀୟ ସ୍ଵାଧୀନତା ସଂଗ୍ରାମରେ ଏକ ନୂତନ ଅଧ୍ୟାୟ ସୃଷ୍ଟି କରିଥିଲା। ଏହି ଆନ୍ଦୋଳନ ରେ ଦେଶ ପରିତ୍ୟାଗ କରିବାକୁ ଇଂରେଜ ସରକାର ଙ୍କୁ ଗାନ୍ଧିଜୀ ଆହ୍ବାନ କରିଥିଲେ।

ଅଗଷ୍ଟ ବିପ୍ଳବର ପୃଷ୍ଠଭୂମି -

****************************

୧୯୩୯ ମସିହା ସେପ୍ଟେମ୍ବର ୯ ତାରିଖରେ ଦ୍ବିତୀୟ ବିଶ୍ବଯୁଦ୍ଧ ଆରମ୍ଭରେ ବ୍ରିଟିଶ ସରକାର ଜର୍ମାନୀ ବିରୋଧରେ ଯୁଦ୍ଧ ଘୋଷଣା କରିଥିଲା। ବ୍ରିଟିଶ ସରକାର ମିତ୍ର ଶକ୍ତିର ପକ୍ଷଭୁତ ଥିବା ବେଳେ ଜର୍ମାନୀ କେନ୍ଦ୍ର ଶକ୍ତି ର ଅନ୍ତର୍ଭୁକ୍ତ ଥିଲା।ମାତ୍ର ଭାରତର ତତ୍କାଳିନ ବଡଲାଟ୍ ଲର୍ଡ ଲିନ୍ ଲିଥ୍ ଗୋ ଜାତୀୟ କଂଗ୍ରେସ କିମ୍ବା ଭାରତୀୟ ନେତୃବୃନ୍ଦ ଙ୍କ ସହ କୌଣସି ବିଚାର ବିମର୍ଶ ନ କରି ଭାରତକୁ ମିତ୍ରଶକ୍ତିର ପକ୍ଷଭୁକ୍ତ କରାଇଥିଲେ। କଂଗ୍ରେସ ଏହାକୁ ଦୃଢ ବିରୋଧ କରିଥିଲା ଏବଂ ପୂର୍ଣ୍ଣ ସ୍ବାଧୀନତା ଦାବି କରିଥିଲା। ଯୁଦ୍ଧ ରେ ବ୍ରିଟିଶ ସରକାର ଙ୍କ ଜଟିଳ ପରିସ୍ଥିତି ଦେଖି ଗାନ୍ଧିଜୀ ଙ୍କ ମନରେ ଦୟାଭାବ ସୃଷ୍ଟି ହେଲା ,ତେଣୁ ସେ ଇଂରେଜ ସରକାର ଙ୍କୁ ସାହାଯ୍ୟ ପାଇଁ ରାଜି ହୋଇ ଯାଇଥିଲେ। ଇଂରେଜ ସରକାର ଭାରତକୁ ପୂର୍ଣ୍ଣ ସ୍ବାଧୀନତା ପ୍ରଦାନ ବଦଳରେ କେବଳ କେତେକ ସୁବିଧା ପ୍ରଦାନ କରିଥିଲେ। ଏହାକୁ ଅଗଷ୍ଟ ଦାନ କୁହାଗଲା । ଏହାକୁ ଜାତୀୟ କଂଗ୍ରେସ ଏବଂ ମୁସଲିମ ଲିଗ୍ ଉଭୟ ପ୍ରତ୍ୟାଖ୍ୟାନ କରିଥିଲେ। ଆମେରିକା,ଚୀନ୍ ଓ ଅଷ୍ଟ୍ରେଲିଆ ଭଳି ଦେଶ ମାନେ ଭାରତୀୟ ଦାବି କୁ ଗ୍ରହଣ କରିନେବା ପାଇଁ ବ୍ରିଟିଶ ସରକାର ଙ୍କ ଉପରେ ଚାପ ପକାଇଲେ। ଗାନ୍ଧିଜୀ ସେ ସମୟରେ ବ୍ୟକ୍ତିଗତ ସତ୍ୟାଗ୍ରହ ଆରମ୍ଭ କରିଥିଲେ । ଇଂଲଣ୍ଡ ଜନସାଧାରଣ ମାନେ ଭାରତୀୟ ମାନଙ୍କୁ ସମର୍ଥନ କରୁଥିବା ଦେଖି ଇଂଲଣ୍ଡ ର ତତ୍କାଳିନ ପ୍ରଧାନମନ୍ତ୍ରୀ ଉଇନଷ୍ଟନ୍ ଏସ୍ ଚର୍ଚ୍ଚିଲ୍ ,୧୯୪୨ ମାର୍ଚ୍ଚ ମାସରେ‌ ତାଙ୍କ ମନ୍ତ୍ରିମଣ୍ଡଳର ଜଣେ ସଦସ୍ୟ ଷ୍ଟାଫୋର୍ଡ଼ କ୍ରିପସ୍ ଙ୍କ ନେତୃତ୍ବରେ ଏକ ପ୍ରତନିଧି ଦଳ ଭାରତକୁ ପଠାଇଲେ। ଏହାକୁ କ୍ରିପସ୍ ମିଶନ କୁହାଗଲା। କ୍ରିପସ୍‌ ମିଶନ୍ ର ଉଦ୍ଦେଶ୍ୟ ଥିଲା ଭାରତକୁ ଖଣ୍ଡ ବିଖଣ୍ଡିତ କରିବା ଏବଂ ବ୍ରିଟିଶ ସମ୍ରାଜ୍ୟବାଦ କୁ ଦୃଢ କରିବା । ଏହାକୁ ଭାରତୀୟ ମାନେ ବୁଝିପାରି କ୍ରିପସ୍ ମିଶନ୍ କୁ ଦୃଢ ବିରୋଧ କରିଥିଲେ। ଗାନ୍ଧିଜୀ ବୁଝି ପାରିଥିଲେ ଯେ ଇଂରେଜ ମାନେ ହେଉଛନ୍ତି ସମସ୍ତ ସମସ୍ୟା ର ମୂଳ କାରଣ , ସେମାନଙ୍କ ବିଦାୟ ରେ ହିଁ ସବୁ ସମସ୍ୟାର ସମାଧାନ ହୋଇପାରିବ।୧୯୪୨ ଜୁଲାଇ ୬ ରେ ୱାର୍ଦ୍ଧା ଠାରେ ଆୟୋଜିତ କଂଗ୍ରେସ କାର୍ଯ୍ୟକାରିଣୀ କମିଟିରେ ଭାରତ ଛାଡ ପ୍ରସ୍ତାବ ଗ୍ରହଣ କରାଯାଇଥିଲା।୧୯୪୨ ଅଗଷ୍ଟ ୮ ରେ ମୌଲାନା ଆବୁଲ୍ କାଲାମ ଆଜାଦ୍ ମୁମ୍ବାଇ ଠାରେ ତାଙ୍କ ପ୍ରାରମ୍ଭିକ ଭାଷଣରେ ଭାରତ ଛାଡ ଆନ୍ଦୋଳନର ଅର୍ଥ ବ୍ୟାଖ୍ୟା କରିଥିଲେ।ତା ପରଦିନ ଅର୍ଥାତ୍ ଅଗଷ୍ଟ ୮ ତାରିଖରେ ଭାରତ ଛାଡ ପ୍ରସ୍ତାବ କୁ କଂଗ୍ରେସ ଅନୁମୋଦନ କଲା । ଜବାହରଲାଲ ନେହରୁ ଏହି ପ୍ରସ୍ତାବକୁ ଆଗତ କରିଥିଲେ ଏବଂ ସର୍ଦ୍ଦାର ବଲ୍ଲଭଭାଇ ପଟେଲ ଏହାକୁ ସମର୍ଥନ କରିଥିଲେ।

ଆନ୍ଦୋଳନ ଆରମ୍ଭ ରେ ଗାନ୍ଧିଜୀ ଦେଶ ବାସୀ ଙ୍କୁ କର ବା ମର "ସ୍ବାଧୀନତା ଆମର ପ୍ରାପ୍ୟ । ଆମେ ଆମ ମାତୃଭୂମିକୁ ସ୍ବାଧୀନ କରିବା କିମ୍ବା ସେଥିପାଇଁ ଯଦି ମରିବାକୁ ପଡେ ,ତେବେ ମରିବା।"ମନ୍ତ୍ର ପ୍ରଦାନ କରିଥିଲେ ଓ କହିଥିଲେ -

ଭାରତଛାଡ ଆନ୍ଦୋଳନ ର କାର୍ଯ୍ୟକ୍ରମ -

*****************************************

* ଦେଶର ସମସ୍ତ ଶ୍ରମିକ ଓ କୃଷକ ମାନେ ଭୂରାଜସ୍ବ ଦେବା ବନ୍ଦ କରିବେ।

* ଦେଶର କୌଣସି ଖାଦ୍ୟ ପଦାର୍ଥ , ଇଂରେଜ ସରକାର ଙ୍କୁ ବିକ୍ରି କରାଯିବ ନାହିଁ।

* ଇଂରେଜ ସରକାର ଙ୍କ ଦ୍ବାରା ପ୍ରଚଳିତ କାଗଜ ନୋଟ୍ କୁ ଗ୍ରହଣ କରାଯିବ ନାହିଁ।

* ରାସ୍ତାଘାଟ, ଯାନବାହାନ, ଟେଲିଗ୍ରାଫ୍ ଓ ରେଳ ବିଭାଗ କୁ ଅଚଳ କରାଯିବ, ଯାହା ଫଳରେ ଇଂରେଜ ସୈନ୍ୟ ମାନଙ୍କୁ ରୋକା ଯାଇ ପାରିବ।

* ଥାନା ,କୋର୍ଟ ଓ ଜେଲ୍ ଖାନା କୁ ଭାରତୀୟ ମାନଙ୍କ ଆୟତ୍ତ ରେ ରଖାଯିବ।

* ସାଧାରଣ ଜନତା ଆନ୍ଦୋଳନ କରିବା ନିମନ୍ତେ ଅହିଂସା ମାର୍ଗ ଗ୍ରହଣ କରିବେ।

ଏହି ପ୍ରସ୍ତାବ ଗୁଡିକ ଗୃହିତ ହେବା ପରଦିନ ଇଂରେଜ ସରକାର ମହାତ୍ମାଗାନ୍ଧୀ ଓ ଅନ୍ୟ କର୍ମୀ ମାନଙ୍କୁ ଗିରଫ କରିନେଲେ। ମହାତ୍ମା ଗାନ୍ଧୀ ଙ୍କୁ ପୁନେ ର ଆଗା ଖାଁ ପାଲେସ୍ ରେ ବନ୍ଦୀ କରାଯାଇଥିଲା। ଏବଂ ଅନ୍ୟାନ୍ୟ ନେତା ଯେପରିକି ଜବାହରଲାଲ ନେହେରୁ, ମୌଲାନା ଆବୁଲ୍ କାଲାମ୍ ଆଜାଦ୍ , ଜେ.ବି କୃପାଳିନୀ , ଗୋବିନ୍ଦ ବଲ୍ଲଭ ପନ୍ଥ ଙ୍କୁ ବମ୍ବେର ଅହମ୍ମଦନଗର ଜେଲ୍ ରେ ବନ୍ଦୀ କରି ରଖାଯାଇଥିଲା।ଡକ୍ଟର ରାଜେନ୍ଦ୍ର ପ୍ରସାଦ ଙ୍କୁ ପାଟନା ଠାରେ ବନ୍ଦୀ କରି ରଖାଯାଇଥିଲା। କଂଗ୍ରେସ ଦଳ କୁ ବେଆଇନ୍ ଘୋଷଣା କରି ଦିଆଗଲା । ତାଙ୍କ ଗିରଫ ହେବା ସତ୍ତ୍ୱେ ଅନେକ ସ୍ଥାନୀୟ ନେତା ଆନ୍ଦୋଳନ ପରିଚାଳନା ଭାର ନିଜ କାନ୍ଧ କୁ ନେଇ ଆନ୍ଦୋଳନ କୁ ଗତିଶୀଳ କରାଇଥିଲେ।

ଆନ୍ଦୋଳନ ର‌ ବ୍ୟାପକତା -

*****************************

ମହାରାଷ୍ଟ୍ରରେ ଏହି ଆନ୍ଦୋଳନ ର ଶୁଭାରମ୍ଭ ହୋଇଥିଲା । ସେଠାକାର ଜନସାଧାରଣ ପୋଲିସ୍ ଥାନା ଘେରାଉ କରି , ପୋଲିସ ମାନଙ୍କୁ ନିୟନ୍ତ୍ରଣ କରିଥିଲେ। ସେହିପରି କର୍ଣ୍ଣାଟକ ରେ ସରକାରୀ ଅଫିସ,ରେଳ ଷ୍ଟେସନ, ଡାକଘର ଜନସାଧାରଣଙ୍କ କ୍ରୋଧ ର ଶିକାର ହୋଇଥିଲା। ଗୁଜୁରାଟ ରେ ଶିକ୍ଷାନୁଷ୍ଠାନ ଗୁଡିକ ବନ୍ଦ କରିଦିଆଯାଇଥିଲା।ଏହା ବ୍ୟତୀତ ମଧ୍ୟ ପ୍ରଦେଶ, ଉତ୍ତର ପ୍ରଦେଶ ଓ ବଙ୍ଗଳା ପ୍ରଦେଶ ରେ ମଧ୍ୟ ଆନ୍ଦୋଳନ ତୀବ୍ର ବେଗରେ ଗତି କରିଥିଲା। ସମସ୍ତେ ଗାନ୍ଧିଜୀ ଙ୍କ କର ବା ମର ମନ୍ତ୍ର ରେ ମନ୍ତ୍ରମୁଗ୍ଧ ହୋଇ ଆନ୍ଦୋଳନ କୁ ଚାଲୁ ରଖିଥିଲେ।ଆସାମ୍ ର ବିପ୍ଳବୀ ମାନେ ଇଂରେଜ ସରକାର ଙ୍କ ଖାଦ୍ୟ ଦ୍ରବ୍ୟ ଗୁଡିକୁ ନଷ୍ଟ କରି ଦେଇଥିଲେ। ଏହା ଦିଲ୍ଲୀ, ରାଜସ୍ଥାନ,ପଞ୍ଜାବ , କରାଚୀ ଓ ସିନ୍ଧୁ ପ୍ରଦେଶ କୁ ବ୍ୟାପି ଯାଇଥିଲା। ସମଗ୍ର ଦେଶ ରେ ହରତାଳ ଓ ଶୋଭାଯାତ୍ରା କରାଯାଇ ବ୍ରିଟିଶ ସରକାର ଙ୍କ ବିରୋଧ ରେ ଜନମତ ପ୍ରକାଶ ପାଇଥିଲା।

ସରକାର ଏହାକୁ ଦମନ କରିବା ପାଇଁ ଵହୁ ପଦକ୍ଷେପ ମାନ ଗ୍ରହଣ କରିଥିଲେ। ସରକାର ସଭା ଓ ଶୋଭାଯାତ୍ରା କୁ ବେଆଇନ୍ ଘୋଷଣା କରିଥିଲେ ଏବଂ ସାଧାରଣ ନିରିହ ଜନତା ଙ୍କ ଉପରେ ଲାଠି ପ୍ରହାର ସହ ଗୁଳି ଚାଳନା ମଧ୍ୟ କରିଥିଲେ। ଏହା ଫଳରେ ଶତ ଶତ ସତ୍ୟାଗ୍ରହୀ ପ୍ରାଣ ତ୍ୟାଗ କଲେ। ୧୯୪୨ ସେପ୍ଟେମ୍ବର ୧୦ ସୁଦ୍ଧା ଏହାକୁ ନିୟନ୍ତ୍ରଣ କରାଯାଇଥିଲା। ଏହା ପ୍ରଶମିତ ହେବାର ଅନେକ କାରଣ ରହିଛି।ଏହାର ପ୍ରଥମ କାରଣ ହେଊଛି ନେତୃତ୍ବ ଓ ସଂଗଠନ ର ଅଭାବ। ଏହା ଦ୍ବାରା ନିଜ ଚିନ୍ତାଧାରା ଅନୁସାରେ ଆନ୍ଦୋଳନ ଚାଲୁ ରଖିଲେ ଯାହା ବେଶି ଦିନ ତିଷ୍ଠି ପାରିଲା ନାହିଁ। ବିଭିନ୍ନ ପ୍ରାନ୍ତରେ ଆନ୍ଦୋଳନ କରୁଥିବା କଂଗ୍ରେସ କର୍ମୀ ଙ୍କ ମଧ୍ୟରେ ସମନ୍ବୟ ରହିଲା ନାହିଁ। ଏହା ଛଡା ଏହି ଆନ୍ଦୋଳନ କୁ ଦେଶୀୟ ରାଜା ମାନେ , ଜମିଦାର ଓ ଧନୀ ବ୍ୟବସାୟୀ ମାନେ ସମର୍ଥନ କରିନଥିଲେ । ଏହି ସବୁ କାରଣ ଭାରତଛାତ ଆନ୍ଦୋଳନ ପ୍ରଶମନର ମୁଖ୍ୟ କାରଣ ସାଜିଥିଲା।

ଭାରତ ଛାଡ ଆନ୍ଦୋଳନରେ ଓଡିଶା ର ଭୂମିକା -

*****************************************

ଆନ୍ଦୋଳନ ଯେତେବେଳେ ତିବ୍ର ବେଗରେ ସମଗ୍ର ଦେଶରେ ବ୍ୟାପିଥିଲା ସେଥିରୁ ଓଡିଶା ମଧ୍ୟ ବାଦ୍ ପଡିନଥିଲା। ଅଗଷ୍ଟ ୮ ରେ ଆନ୍ଦୋଳନ ର ଶୁଭାରମ୍ଭ ହୋଇଥିଲା । ଅଗଷ୍ଟ ୧୧ ରେ ଓଡ଼ିଶାର ମାଳତୀ ଚୌଧୁରୀ ଓ ସୁରେନ୍ଦ୍ର ନାଥ ଦ୍ବିବେଦୀ ମୁମ୍ବାଇର କଂଗ୍ରେସ ଅଧିବେସନରେ ଯୋଗ ଦେଇ ଓଡ଼ିଶା ଫେରିଥିଲେ। ଏହି ମାନେ ଅନ୍ୟ ନେତୃବୃନ୍ଦ ଙ୍କ ସହ ସାମିଲ୍ ହୋଇ ଓଡ଼ିଶାରେ ଆନ୍ଦୋଳନ କୁ ତୀବ୍ରତର କରାଇଥିଲେ। କଟକର ରେଭେନ୍ସା କଲେଜର ଅନେକ ଛାତ୍ର ନେତା କଲେଜ୍ ଅଫିସ କୁ ପୋଡି ପକାଇଥିଲେ। ପୋଲିସର ମୁକାବିଲା କରିବା ପାଇଁ ମରଣ ବାହିନୀ, ସଂଗ୍ରାମ ବାହିନୀ ଓ ରକ୍ତ ବାହିନୀ ଗଢି ଉଠିଥିଲା। କଟକର ବରୀ ଅଞ୍ଚଳ ର ଲୋକମାନେ ରମାଦେବୀ ଓ ଗୋପବନ୍ଧୁ ଚୌଧୁରୀଙ୍କ ଗିରଫ ଖବର ଶୁଣି ଉତ୍ୟକ୍ତ ହୋଇ କାଇପଦର ଡାକଘରେ ନିଆଁ ଲଗାଇଦେଇଥିଲେ । ପୋଲିସ୍ ଗୁଳି ଚାଳନା ରେ ୩ ଜଣ ମୃତ ଓ ୭ ଜଣ ଆହତ ହୋଇଥିଲେ।ଭଦ୍ରକ ର ଭଣ୍ଡାରୀପୋଖରୀ ଠାରେ ୫୦୦୦ ଲୋକ ଥାନା ଘେରାଉ କରି ସରକାରୀ କାଗଜପତ୍ର ନଷ୍ଟ କରିଦେଇଥିଲେ। ସେଠାରେ ଥିବା ପୋଲ ଭାଙ୍ଗି ଦିଆ ଯାଇଥିଲା। ଏହା ଫଳରେ ସରକାର ୧୨ ଟି ଗ୍ରାମକୁ ୨୦୦୦ ଟଙ୍କାର ଜୋରିମାନା ଦଣ୍ଡାଦେଶ ଦେଇଥିଲେ‌। ଶ୍ରୀଜଙ୍ଗ ଗ୍ରାମରେ ଚୌକିଦାରୀ ପୋଷାକ ପୋଡି ପକାଇବାରୁ ପୋଲିସ୍ ଗୁଳି ଚାଳନା କରିଥିଲା । ଯାହା ଫଳରେ ୧୧ ଜଣ ବ୍ୟକ୍ତି ପ୍ରାଣ ହରାଇଥିଲେ। ବାସୁଦେବ ପୁର ଇରମ୍ ଠାରେ ମେଳନ ପଡିଆରେ ଲୋକ ମାନେ ସଭା କରୁଥିଲେ , ସେଠାକାର ଡି ଏସ୍ ପି ସେଠାରେ ପହଞ୍ଚି ଲୋକଙ୍କ ଉପରେ ଗୁଳି ଚାଳନା କରିଥିଲେ। ଏହି ଗୁଳି ଚାଳନା ରେ ୨୮ ଜଣ ମୃତ ଏବଂ ୫୫ ଜଣ ବ୍ୟକ୍ତି ପ୍ରାଣ ହରାଇଥିଲେ।ଏଠାରେ ହୋଇ ଥିବା ହତ୍ୟାକାଣ୍ଡ ଜାଲିଆନାୱାଲାବାଗ ହତ୍ୟାକାଣ୍ଡ ପରି ହୋଇଥିବାରୁ ଏହାକୁ ଦ୍ବିତୀୟ ଜାଲିଆନାୱାଲାବାଗ ହତ୍ୟାକାଣ୍ଡ କୁହାଯାଏ। ଭାରତଛାଡ ଆନ୍ଦୋଳନ ରେ ଅଧିକ ବିପ୍ଳବୀ ମୃତ୍ୟୁ ବରଣ କରିଥିବାରୁ ଏହାକୁ ରକ୍ତ ତୀର୍ଥ କୁହାଯାଏ।ପୁରୀ ଜିଲ୍ଲାର ନିମାପଡା ରେ ସରକାର ଖଜଣାକୁ ବିରୋଧ କରାଯାଇଥିଲା। ପୋଲିସ୍ ର ଗୁଳି ଚାଳନା ରେ ଉତ୍ସବ ମଲ୍ଲିକ ନାମକ ଜଣେ ସତ୍ୟାଗ୍ରହୀ ପ୍ରାଣ ହରାଇଥିଲେ। କୋରାପୁଟ ଜିଲ୍ଲାର ବୈପାରିଗୁଡା ଥାନା ଅର୍ନ୍ତଗତ ତେନ୍ତୁଳିଗୁମ୍ମା ଗ୍ରାମରେ ଜଣେ ଜଙ୍ଗଲ ରକ୍ଷୀ ଙ୍କୁ ପିଟି ପିଟି ହତ୍ୟା କରାଯାଇଥିବା ଅଭିଯୋଗରେ ଫାଶୀ ଦଣ୍ଡର ଶୁଣାଣି ହୋଇଥିଲା। ଏବଂ ତାଙ୍କୁ ବ୍ରହ୍ମପୁର ଜେଲ୍ ରେ ଫାଶୀ ଦିଆ ଯାଇଥିଲା। ଏହା ବ୍ୟତୀତ ଓଡ଼ିଶାର ଅନ୍ୟାନ୍ୟ ସ୍ଥାନରେ ମଧ୍ୟ ଆନ୍ଦୋଳନ ବ୍ୟାପିଥିଲା।

ବିଷୟ ପ୍ରସ୍ଥାନ-

****************

ଅସହଯୋଗ ଆନ୍ଦୋଳନ ହେଉ ବା ଆଇନ୍ ଅମାନ୍ୟ ଆନ୍ଦୋଳନ ହେଉ କିମ୍ବା ଭାରତଛାଡ ପରି ମହାନ ଗଣ ଆନ୍ଦୋଳନ ହେଉ, ପ୍ରତିଟି ଆନ୍ଦୋଳନ ଫଳପ୍ରଦ ନହୋଇଥିଲେ ମଧ୍ୟ ଇଂରେଜ ମାନଙ୍କୁ ଭୟଭୀତ କରାଇବାରେ ବିଶେଷ ସହାୟକ ହୋଇଥିଲା। ଏହା ବ୍ୟତୀତ ବିଭିନ୍ନତା ମୟ ଦେଶରେ ଏକତା ସୃଷ୍ଟି କରିବାରେ ସହାୟକ ହୋଇଥିଲା। ଇଂରେଜ ମାନେ ମଧ୍ୟ ବୁଝି ସାରିଥିଲେ , ଭାରତୀୟ ମାନଙ୍କୁ ବେଶି ଦିନ ପରାଧିନତା ର ବନ୍ଧନ ରେ ବାନ୍ଧି ରଖି ହେବ ନାହିଁ। ଏହି ଆନ୍ଦୋଳନ ର ମହାନ୍ ନୀତି , ଗାନ୍ଧିଜୀ ଙ୍କ ଅହିଂସା ଆଦର୍ଶ ଏବଂ କର ବା ମର ର ମନ୍ତ୍ର ପାଇଁ ଏହା ବିଶ୍ବର ସଂଗଠିତ ହୋଇଥିବା ଫରାସୀ ବିପ୍ଳବ ଓ ଋଷ୍ ବିପ୍ଳବ ସହ ସମକକ୍ଷ।

******************************************

ପ୍ରସ୍ତୁତି-ସୌମ୍ୟ ରଞ୍ଜନ ରାୟ

ଭୂୟାଁ ଉଆସ, ଗୁଆମାଳ, ଭଦ୍ରକ

ଫୋ- ୯୩୩୭୬୧୪୩୬୩

ଭାରତ ଛାଡ଼ ଆନ୍ଦୋଳନ | Quit India Movement

Quit India Movement:A Decisive Turning Point in the Freedom Struggle