"YOUTH HAVE THE POWER TO MAKE OR BREAK THE SOCIETY."

ପ୍ରତ୍ୟେକ ରାଷ୍ଟ୍ରର ଯୁବଶକ୍ତି ସେହି ରାଷ୍ଟ୍ରର ମୂଲ୍ୟବାନ ରାଷ୍ଟ୍ରୀୟ ସମ୍ପଦ ଭାବରେ ଅଭିହିତ। ସେହିମାନେ ଦେଶର ବିଭିନ୍ନ ଉନ୍ନୟମୂଳକ କାର୍ଯ୍ୟକ୍ରମରେ ସଦାସର୍ବଦା ଭାଗ ନେଇଥାନ୍ତି।ସେହିମାନଙ୍କ କାନ୍ଧରେ ଦେଶର ଅଭିବୃଦ୍ଧି,ବିକାଶ ଏବଂ ପରିବର୍ତ୍ତନ ସବୁକିଛି ଲଦା ହୋଇଥାଏ। ଯୁବଶକ୍ତି ଚାହିଁଲେ ଗୋଟିଏ ସମାଜକୁ ଧ୍ଵଂସ କରିଦେବେ,ନତୁବା ଗଢିଦେବେ। ସେମାନଙ୍କ ଶକ୍ତିକୁ ଠିକ୍ ଭାବରେ ବିନିଯୋଗ କରିବା ଉଚିତ୍।

ଏଠି ସ୍ମରଣ ରଖିବା ଉଚିତ୍ ଯେ ସ୍ଵାଧୀନତା ସଂଗ୍ରାମରେ ଆମ ଦେଶର ଯୁବଶକ୍ତି ହିଁ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିଥିଲେ। ରାଜନୀତିକ ନେତାମାନେ ଛାତ୍ରମାନଙ୍କୁ ନେତୃତ୍ୱ ଦେଇଥିଲେ,ଯାହାର ଫଳସ୍ୱରୂପ ବହୁସଂଖ୍ୟାରେ ଯୁବନେତାମାନେ ସଂଗ୍ରାମରେ ଯୋଗଦାନ କରିଥିଲେ। ସେହିଦିନର ଦୃଶ୍ୟପଟ୍ଟ ଆଜି ନାହିଁ। କିନ୍ତୁ ସେହିଦିନ ଠାରୁ ଦେଶର ଯୁବଶକ୍ତିରେ ଯେ କ୍ରମେ ଶିଥିଳତା ଆସିଯାଇଛି ତାହା ସହଜରେ ଅନୁମେୟ। ଅବଶ୍ୟ ଜାତୀୟ ନେତାମାନେ ଦେଶର ଶକ୍ତିକୁ ନିଜ ନିଜ ଦାୟିତ୍ୱରେ ପରିପ୍ରକାଶ କରିବା ଫଳରେ ସେମାନେ ସମକାଳୀନ ଜାତୀୟ ସମସ୍ୟା ଠାରୁ ବିଚ୍ଛିନ୍ନ ହୋଇଯିବା ସ୍ଵାଭାବିକ ମନେ ହୋଇଛି।

ଭାରତର ସମୁଦାୟ ଜନସଂଖ୍ୟାର ୩୪ ପ୍ରତିଶତ ହେଉଛନ୍ତି ଯୁବଗୋଷ୍ଠୀ। ସେମାନେ ଆଜି ଦେଶର ବରିଷ୍ଠ ନାଗରିକମାନଙ୍କ ସହ ଠିକ୍ ବୁଝାମଣାରେ ପହଞ୍ଚିବାକୁ ସମର୍ଥ ହେଉନାହାନ୍ତି। ଏହାର କାରଣ ହେଲା ପରମ୍ପରା ଏବଂ ଅଧୁନିକବାଦ ମଧ୍ୟରେ ସଂଘର୍ଷ। ବରିଷ୍ଠମାନେ ଯୁବଶକ୍ତିକୁ ଅପରିପକ୍ବ ଏବଂ ଅନଭିଜ୍ଞ ବୋଲି ଅନୁଭବ କରୁଛନ୍ତି। ବଂଶଧରମାନଙ୍କ ସହ ବିବିଧ ଆକାରରେ ବ୍ୟବଧାନରେ ରହିବା ଫଳରେ ଯୁବପିଢି ନିଜକୁ ଅଲଗା ଭାବିବା ସ୍ଵାଭାବିକ। ଜନସଂଖ୍ୟା ହାରରେ ବୃଦ୍ଧି ବେକାରୀ ସମସ୍ୟାକୁ ବଢାଇ ଚାଲିଛି। ସରଂକ୍ଷଣ ବ୍ୟବସ୍ଥା ଏବଂ ପ୍ରୀୟାପ୍ରୀତି ତୋଷଣ ନୀତିରେ ଆହୁରି ଅଧିକ ସମସ୍ୟା ସୃଷ୍ଟି ହୋଇଛି। ବିଦ୍ୟାଳୟ ଏବଂ ମହାବିଦ୍ୟାଳୟର ଶିକ୍ଷା ପଦ୍ଧତି ସେମାନଙ୍କ ଭବିଷ୍ୟତ ଗଢିବାରେ ସହାୟକ ହୋଇପାରୁନାହିଁ। ଏହିସବୁ କାରଣରୁ ଯୁବଗୋଷ୍ଠୀ କେବଳ ହତାଶାବାଦର ବାୟୁମଣ୍ଡଳରେ ଘୁରି ବୁଲିବା ବ୍ୟତୀତ ଅନ୍ୟ କିଛି ଉପାୟ ନାହିଁ।

ସମାଜରେ ଯୁବଗୋଷ୍ଠୀ ଅଧିକାଂଶ ପରିମାଣ ହେଉଛନ୍ତି ଛାତ୍ରଗୋଷ୍ଠୀ। ଦେଶର ବହୁ ବିଦ୍ୟାଳୟ,ମହାବିଦ୍ୟାଳୟ ଏବଂ ବିଶ୍ଵବିଦ୍ୟାଳୟର ଛାତ୍ରଛାତ୍ରୀମାନେ ବିଶୃଙ୍ଖଳା ଜନିତ ଏବଂ ବିଦ୍ରୋହାତ୍ମକ କାର୍ଯ୍ୟକଳାପରେ ଲିପ୍ତ ଥିବାର ଦେଖାଯାଏ। ଫଳରେ ସେମାନଙ୍କର ଧୀ ଶକ୍ତି ଏବଂ ଆଗ୍ରହ ଏହିଭଳି ନକରାତ୍ମକ କାର୍ଯ୍ୟରେ କୁପଥରେ ବିନିଯୋଗ ହେବାରୁ ତାହାର ମୂଲ୍ୟହ୍ରାସ ହେଉଛି। ସେମାନେ ବିଭିନ୍ନ ସମୟରେ ଆନ୍ଦୋଳନ,ବନ୍ଦ ପାଳନ,ଭଙ୍ଗାରୁଜା ଆଦି ମୂଲ୍ୟହୀନ କାର୍ଯ୍ୟରେ ଲିପ୍ତ ରହି ନିଜର ଅମୂଲ୍ୟ ସମୟକୁ ନଷ୍ଟ କରିଦେଇଛନ୍ତି। ଏହା ବାସ୍ତବରେ ଉପଯୁକ୍ତ ଦିଗ୍ ଦର୍ଶନ ଏବଂ ଉତ୍ତମ ନେତୃତ୍ବର ଅଭାବ ଯୋଗୁଁ ଘଟେ ବୋଲି ଅନେକ ଜାଣିପାରୁଥିଲେ ମଧ୍ୟ ସେଥିପାଇଁ ସକାରାତ୍ମକ ଭୂମିକା ଗ୍ରହଣ କରିବାକୁ କେହି ଆଗେଇ ଆସନ୍ତି ନାହିଁ। ଏବେ ବିଳମ୍ବରେ ହେଲେ ସୁଦ୍ଧା ସମାଜର ସଚେତନଶୀଳ ବ୍ୟକ୍ତିମାନେ ଉଚ୍ଛୃଙ୍ଖଳ ଛାତ୍ରସମାଜ କୁ ଠିକ୍ ଦିଗ୍ ଦର୍ଶନ ଦେଇପାରିଲେ ଅବସ୍ଥା ସୁଧୁରିବାର ଆଶା ଉଜ୍ଜ୍ବଳ ହୋଇ ଉଠନ୍ତା।

ସମାଜରେ ଛାତ୍ରମାନଙ୍କୁ ବିଶୃଙ୍ଖଳ କହି ନୀରବଦ୍ରଷ୍ଟା ହେବ ଦ୍ଵାରା ଦିନକୁ ଦିନ ଯୁବଶକ୍ତି ନିଜର କର୍ମପଥରୁ ବିଚ୍ୟୁତ ହୋଇଚାଲିଛନ୍ତି। ରାଜନେତାମାନେ ସେମାନଙ୍କ ସ୍ୱାର୍ଥ ସିଦ୍ଧି ନିମନ୍ତେ ଛାତ୍ରଶକ୍ତିକୁ ବିନିଯୋଗ କରିଥାନ୍ତି। ଭଲ ନେତାମାନେ ଯଦି ଛାତ୍ରସମାଜକୁ ଉତ୍ତମ ଦୃଷ୍ଟିଭଙ୍ଗୀ ମାଧ୍ୟମରେ ଦିଗ୍ ଦର୍ଶନ ଦେଇପାରନ୍ତେ ତେବେ ସମାଜର ବିଭିନ୍ନ କ୍ଷେତ୍ରରେ ଉନ୍ନତି ସାଧିତ ହୋଇପାରନ୍ତା। ଦେଶର ନିରାପତ୍ତା ରକ୍ଷା ଦିଗରେ ସେନା ଭାବରେ ଯୁବଶକ୍ତିକୁ ବିନିଯୋଗ କରିବାରେ କିଏ ବା ବିରୋଧ କରିପାରିବ ?

ଆମର ଏ ବିଶାଳ ଭାରତବର୍ଷ ଏବେ ସମାଜର ବିଭିନ୍ନ ସମସ୍ୟାର ଭାରାକ୍ରାନ୍ତ। ଜନସଂଖ୍ୟା ବୃଦ୍ଧିହାର,ଦୁର୍ନୀତି,ଯୌତୁକ, ନିଶା, ନିରକ୍ଷରତା,ବଳାତ୍କାର,କନ୍ୟାଭ୍ରୂଣ ହତ୍ୟା ପ୍ରଭୃତି ବିଭିନ୍ନ ସମସ୍ୟା ବୋଝରେ ଚାପି ହୋଇ ଦେଶର ଉନ୍ନତି ବାଧାପ୍ରାପ୍ତ ହେଉଛି। ଏସବୁ ଦୂରୀକରଣ ନିମନ୍ତେ ଯୁବଗୋଷ୍ଠୀଙ୍କ ସଚେତନ ହେବା ଏକାନ୍ତ ଆବଶ୍ୟକ। ସ୍ବାଧୀନତାର ବହୁବର୍ଷ ପରେ ମଧ୍ୟ ଦେଶରେ ଦୁର୍ନୀତିର ଚେର ଯେଉଁପରି ଭାବରେ ଗଭୀରତମ ପ୍ରଦେଶକୁ ଲମ୍ବିଚାଲିଛି ଏହାର ମୂଳୋତ୍ପାଟନ ର ସୂତ୍ର କେବଳ ଯୁବଶକ୍ତି ର ସଚ୍ଚୋଟ ମନୋବୃତ୍ତି ରେ ନିହିତ ରହିଛି। ଆଜିର ଯୁବଶକ୍ତି ନିରକ୍ଷରତା ଦୂରୀକରଣ ଦିଗରେ ପ୍ରତି ସ୍ତରରେ ସଚେତନ କରିପାରିଲେ ଶିଶୁ ଠାରୁ ପ୍ରୌଢ଼ ପର୍ଯ୍ୟନ୍ତ ଶିକ୍ଷାର ମୂଲ୍ୟକୁ ବୁଝିପାରିବେ। ସେମାନଙ୍କ ସହଯୋଗରେ ଯୌତୁକ ବିଷ ସମାଜପୃଷ୍ଠରୁ ଲୋପ ପାଇପାରିବ। ସେହିପରି ଯୁବଗୋଷ୍ଠୀ ଚାହିଁଲେ ସମାଜର ଅନ୍ୟାନ୍ୟ ସମସ୍ୟା ଗୁଡ଼ିକ ସହଜରେ ଦୁରେଇଯିବ।

ଜାତୀୟ ଏକତା ବଜାୟ ରଖିବା ଦିଗରେ ଯୁବଶକ୍ତି ଙ୍କର ସହଯୋଗ ନିତ୍ୟାନ୍ତ ଆବଶ୍ୟକ। ସେମାନେ କୌଣସି ପରିସ୍ଥିତିରେ ମଧ୍ୟ ସାମ୍ପ୍ରଦୟିକତା,ଅଞ୍ଚଳିକବାଦ,ଭାଷାଗତ ବିଭେଦ ପ୍ରଭୃତି ପ୍ରଶ୍ରେୟ ଦେବା ଉଚିତ୍ ନୁହେଁ।

ଭାରତରେ ସରକାର ଯୁବଶକ୍ତି ପ୍ରତି ସଦାସର୍ବଦା ସଚେତନ ରହିଛନ୍ତି। ରାଜନୀତିକ ଦୃଷ୍ଟିକୋଣରୁ ଭୋଟ ଅଧିକାରରେ ଯୁବ ବାୟସସୀମା ୧୮ ବର୍ଷକୁ ହ୍ରାସ କରାଯାଇଛି। ଏହାସହ ଯୁବ ସଶକ୍ତିକରଣ ନିମନ୍ତେ ଅନେକ ଯୋଜନା ତଥା ବୃତ୍ତି ଯୋଗାଇ ଦିଆଯାଉଛି। ଓଡ଼ିଶା ସରକାର ବେକାର ଯୁବଯୁବତୀଙ୍କ ନିମନ୍ତେ ବିଭିନ୍ନ ଯୋଜନା କରି ସେମାନଙ୍କୁ ରୋଜଗାରକ୍ଷମ କରାଇଛନ୍ତି। ଯୁବଗୋଷ୍ଠୀ ସେହି ସବୁ ଯୋଜନା ର ସଦୁପଯୋଗ କରିପାରିଲେ ଦେଶ ଏବଂ ସମାଜର ଉନ୍ନତି ଅଚିରେ ସମ୍ଭବ ହେବ।

ଯୁବଶକ୍ତିକୁ ଏଡାଇ ଦେଶର ବିକାଶ ଚିନ୍ତା କରିବା ଅରଣ୍ୟ ରୋଦନ ସହ ସମାନ।

" ଯୁବକଙ୍କର ଶକ୍ତି ଭାରତୀୟ ବ୍ରହ୍ମାଣ୍ଡର ପୁନର୍ଜନ୍ମ ର ମୁଖ୍ୟ ଉତ୍ସ।"

..............................ସମାପ୍ତ.....................................

#cetadelxtasy2024#

ଭାରତ ଏବଂ ଏହାର ଯୁବଶକ୍ତି

ଏକ ନୂତନ ଭାରତର ନିର୍ମାଣ ଅଭିମୁଖେ......