ପୃଥିବୀରେ ହଜାର ହଜାର ଭାଷା, ହଜାର ହଜାର ସଂସ୍କୃତି। କିନ୍ତୁ ଗୋଟିଏ ଜିନିଷ ସବୁଠାରେ ଏକା - ସେହି ହେଉଛି ମାନବିକତାର ମୂଲ୍ୟ। ଏହି ମାନବିକତାକୁ ସମ୍ମାନ ଦେବାର ଦିନଗୁଡ଼ିକ ମଧ୍ୟରେ ଗୋଟିଏ ଅତି ଗୁରୁତ୍ୱପୂର୍ଣ୍ଣ ଦିନ ହେଉଛି "ବିକଳାଙ୍ଗଙ୍କ ଅନ୍ତର୍ଜାତୀୟ ଦିବସ"। ଏହି ଦିନଟି ଡିସେମ୍ବର ୩ ତାରିଖରେ ପାଳନ କରାଯାଏ। ଏହା କେବଳ ଏକ ଦିନ ନୁହେଁ, ଏହା ହେଉଛି ଆମ ସମସ୍ତଙ୍କ ପାଇଁ ଏକ ଜାଗରୁକତାର ସନ୍ଦେଶ।

ଏହି ଦିବସର ମୁଖ୍ୟ ଉଦ୍ଦେଶ୍ୟ ହେଉଛି ସମାଜରେ ସଚେତନତା, ସମାନ ଅଧିକାର, ସହାନୁଭୂତି ଏବଂ ସମାବେଶିତା ବୃଦ୍ଧି କରିବା। ଏହା ଆମକୁ ମନେ ପକାଇ ଦିଏ ଯେ ପ୍ରତ୍ୟେକ ମନୁଷ୍ୟକୁ ମର୍ଯ୍ୟାଦା, ସୁଯୋଗ ଏବଂ ସମାନ ଭାବେ ଆଗେଇବାର ସମତୁଲ୍ୟ ସୁଯୋଗ ଦେବା ଆମ ସମସ୍ତଙ୍କର ଦାୟିତ୍ୱ।

ଆମ ସମାଜରେ"ବିକଳାଙ୍ଗ" ଶବ୍ଦଟି ଶୁଣୁ। କିନ୍ତୁ ଆଜିର ନୂଆ ସମୟରେ ଏହାକୁ "ଭିନ୍ନକ୍ଷମ ବ୍ୟକ୍ତି" ବୋଲି କୁହାଯାଉଛି। ଏହାର ଅର୍ଥ ହେଉଛି ଯେଉଁମାନଙ୍କର କ୍ଷମତା ଭିନ୍ନ, ସେମାନେ ଅକ୍ଷମ ନୁହଁନ୍ତି। ସେମାନଙ୍କର କିଛି ବିଭିନ୍ନତା ଅଛି, କିନ୍ତୁ ସେଥିରେ ତାଙ୍କର ସାମର୍ଥ୍ୟ କମ୍ ନୁହେଁ। ସମାଜରେ ଥିବା ଅନେକ ବାଧା ଯୋଗୁଁ ସେମାନେ ପଛରେ ରହି ଯାଆନ୍ତି।

ଏକ "ସମାବେଶୀ ସମାଜ" କଣ? ଏହା ହେଉଛି ଏପରି ଏକ ସମାଜ ଯେଉଁଠାରେ ଭିନ୍ନକ୍ଷମତା ଥିବା ଲୋକଙ୍କୁ ପୂରା ସଦସ୍ୟ ଭାବେ ଗ୍ରହଣ କରାଯାଏ। ସେମାନଙ୍କୁ ଦୟା କିମ୍ବା ଭିକ୍ଷା ଦରକାର ନହେଁ, ଦରକାର ହେଉଛି ସମାନ ସୁଯୋଗ। ସମାବେଶୀ ସମାଜରେ ସମସ୍ତେ ଏକାଠି ରହିବେ, ଏକାଠି କାମ କରିବେ ଏବଂ ସମାଜ ଉନ୍ନତି ପାଇଁ ଏକାଠି ପ୍ରୟାସ କରିବେ।

ସମାନ ସୁଯୋଗର ନୂଆ ପରିଭାଷା ସୃଷ୍ଟି ହେବା ଦରକାର। ଏହାର ଅର୍ଥ ହେଉଛି:

· ଶିକ୍ଷା: ଭିନ୍ନକ୍ଷମ ପିଲାମାନେ ଅନ୍ୟ ସମସ୍ତ ପିଲାଙ୍କ ସହିତ ଏକା ଶ୍ରେଣୀଗୃହରେ ପଢ଼ିବେ। ବିଦ୍ୟାଳୟରେ ସେମାନଙ୍କ ପାଇଁ ଜରୁରୀ ସୁବିଧା ଯେପରି ରାମ୍ପ, ବ୍ରେଲ ଲିପିର ପୁସ୍ତକ, ବିଶେଷ ଶିକ୍ଷକ ଇତ୍ୟାଦି ରହିବ।

· ରୋଜଗାର: ଚାକିରି ବା କାମରେ ଭିନ୍ନକ୍ଷମତା ଯୋଗୁଁ କାହାକୁ ଅଟକାଇ ଦେବା ନ୍ୟାୟିକ ନୁହେଁ। ସେମାନଙ୍କ ଦକ୍ଷତା ଅନୁସାରେ ସମସ୍ତଙ୍କୁ କାମର ସୁଯୋଗ ମିଳିବା ଉଚିତ।

· ସାମାଜିକ ଜୀବନ: ସମାଜର ପ୍ରତ୍ୟେକ କାର୍ଯ୍ୟକ୍ରମ, ଉତ୍ସବ, ଖେଳ ଇତ୍ୟାଦିରେ ସେମାନେ ସହଜରେ ଯୋଗ ଦେଇପାରିବେ।

କିନ୍ତୁ କେବଳ ଭୌତିକ ସୁବିଧା ଥିଲେ ହିଁ ସମାବେଶୀ ସମାଜ ଗଠିତ ହୁଏ ନାହିଁ। ଆମର ମନରେ ଥିବା ଭାବନା, ଧାରଣା ବଦଳିବା ଜରୁରୀ। ଆମେ ଯେତେବେଳେ ଜଣେ ଭିନ୍ନକ୍ଷମ ବ୍ୟକ୍ତିଙ୍କୁ ଦେଖୁ, ତାଙ୍କୁ ଦୁର୍ବଳ କିମ୍ବା ଅସହାୟ ଭାବି ଦୟା କରୁ। ଏହା ଭୁଲ ଅଟେ। ସେମାନଙ୍କୁ ସମାନ ଭାବେ ଦେଖିବା, ସେମାନଙ୍କ ସହିତ ସାଧାରଣ ଭାବେ କଥାବାର୍ତ୍ତା ହେବା, ସେମାନଙ୍କ ମତାମତକୁ ଗୁରୁତ୍ୱ ଦେବା - ଏହା ହିଁ ହେଉଛି ପ୍ରକୃତ ସମାବେଶ।

ଶିକ୍ଷା ଏଠାରେ ଗୁରୁତ୍ୱପୂର୍ଣ୍ଣ ଭୂମିକା ଖେଳିପାରେ। ଯେତେବେଳେ ଛୋଟ ବୟସରୁ ସାଧାରଣ ପିଲାଙ୍କ ସହିତ ଭିନ୍ନକ୍ଷମ ପିଲାମାନେ ପଢ଼ିବେ, ତାହା ଉଭୟଙ୍କ ପାଇଁ ଉପକାରୀ। ସାଧାରଣ ପିଲାମାନେ ଶିଖିବେ ସହିଷ୍ଣୁତା, ସହଯୋଗ ଓ ସହାନୁଭୂତି। ଭିନ୍ନକ୍ଷମ ପିଲାମାନେ ଆତ୍ମବିଶ୍ୱାସୀ ହେବେ ଏବଂ ସମାଜର ଅଂଶ ହୋଇପାରିବେ।

ରୋଜଗାରରେ ଭିନ୍ନକ୍ଷମତା ଏକ ପ୍ରତିବନ୍ଧକ ନ ହେବା ଦରକାର। ଅନେକ ଭିନ୍ନକ୍ଷମ ବ୍ୟକ୍ତି ଅତି ମେଧାବୀ, କର୍ମନିଷ୍ଠ ଓ ଦକ୍ଷ। ସେମାନଙ୍କୁ ସୁଯୋଗ ମିଳିଲେ ସେମାନେ ଦେଶ ଓ ସମାଜ ପାଇଁ ବହୁତ କିଛି କରିପାରିବେ। ସେମାନଙ୍କର ଅନୁଭୂତି ଭିନ୍ନ ହୋଇଥିବାରୁ ସେମାନେ ନୂଆ ଦିଗ ଓ ନୂଆ ଆବିଷ୍କାର କରିପାରିବେ।

ତେଣୁ, ବିକଳାଙ୍ଗଙ୍କ ଅନ୍ତର୍ଜାତୀୟ ଦିବସ ଆମକୁ ଏକ ସନ୍ଦେଶ ଦେଇଥାଏ:

· ଆସନ୍ତୁ, ଆମେ ଭିନ୍ନକ୍ଷମ ସାଥୀଙ୍କୁ ସମ୍ପୂର୍ଣ୍ଣ ସମ୍ମାନ ଦେଇଥାଉ।

· ଆମେ ଆମର ଚିନ୍ତାଧାରା ବଦଳାଇବା, ଦୟା ନ କରି ସମାନତା ଦେବା।

· ଆମେ ସେମାନଙ୍କ ପାଇଁ ସହଜ ପହଞ୍ଚ ଥିବା ପରିବେଶ ସୃଷ୍ଟି କରିବାର ଚେଷ୍ଟା କରିବା।

· ଆମେ ସେମାନଙ୍କ କଥା ଶୁଣିବା, ସେମାନଙ୍କ ମତ ନେବା ଏବଂ ସେମାନଙ୍କୁ ସହାୟତା କରିବା।

ଏକ ସମାବେଶୀ ସମାଜ ଗଠନ କେବଳ ଭିନ୍ନକ୍ଷମ ଲୋକଙ୍କ ପାଇଁ ଭଲ ନୁହେଁ, ଏହା ସମଗ୍ର ସମାଜ ପାଇଁ ଭଲ। ଯେତେବେଳେ ସମାଜର ପ୍ରତ୍ୟେକ ସଭ୍ୟ ନିଜ ଦକ୍ଷତା ଦେଖାଇ ପାରିବ, ସେତେବେଳେ ସମାଜ ଅଧିକ ଶକ୍ତିଶାଳୀ, ସୃଜନଶୀଳ ଓ ଉନ୍ନତ ହୋଇଥାଏ।

ଏହି ଦିବସ ହେଉଛି ନୂଆ ଆରମ୍ଭର ଦିନ। ଆମେ ପ୍ରତିଜ୍ଞା କରିବା ଯେ ଆମେ ଏକ ଏପରି ସମାଜ ଗଠନ କରିବା ଯେଉଁଠାରେ କେହି ପଛରେ ରହିବେ ନାହିଁ, ପ୍ରତ୍ୟେକର ଆଗେଇବାର ସୁଯୋଗ ରହିବ। ଭିନ୍ନକ୍ଷମତା ମାନବିକତାର ମାପ ନୁହେଁ, ସମାନତା ଓ ସମ୍ମାନ ହିଁ ମାନବିକତାର ପ୍ରକୃତ ମାପଦଣ୍ଡ। ଆଉ ଏହି ମାପଦଣ୍ଡ ଉପରେ ସ୍ବର ଉଠିବା ଦରକାର, ଯାହା ସମସ୍ତଙ୍କୁ ସମାନ ଆଲୋକ ଦେବ।

!! ସୁଶାନ୍ତ କୁମାର ସାସମଲ

ହନୁମାନ ନଗର ଆସ୍କା ରୋଡ଼

ବ୍ରହ୍ମପୁର ଗଞ୍ଜାମ !!

ଭିନ୍ନକ୍ଷମ ସମାବେଶୀ ସମାଜ: ସମାନ ସୁଯୋଗର ନୂଆ ପରିଭାଷା

ଭିନ୍ନକ୍ଷମ ସମାବେଶୀ ସମାଜ: ସମାନ ସୁଯୋଗର ନୂଆ ପରିଭାଷା