ଜୟଶ୍ରୀର ମନ ଶୁଖି ଯାଇଛି। କଲେଜ୍ ରୁ ଆସିବା ବେଳରୁ। ଗୁମ୍ ସୁମ୍ ହୋଇ ନିଜ ପଢ଼ା କାର୍ଯ୍ୟ ଜାରି ରଖିଛି ଷ୍ଟଡ଼ି ରୁମ୍ ରେ। ମା' କେତେବେଳରୁ ମ୍ୟାଗି ବାଢ଼ି ଦେଇ ଯାଇଥିଲେ, ତାଟିଆରେ। ଥଣ୍ଡା ହୋଇଗଲାଣି। ତା'କୁ ଅଣଦେଖା କରି ସେ ପଢ଼ା ଲେଖାରେ ଧ୍ୟାନ ଦେଉଛି। ମଝିରେ ମଝିରେ ଚାହିଁ ମୁହଁ ମୋଡ଼ି ଦେଉଛି। ମାଆ ନାଁ ଉଷୁମ କ୍ଷୀର ଗିଲାସେ ଧରି ଆସିଲେ ଷ୍ଟଡ଼ି ରୁମ୍ କୁ। ସମୟ ୪ଟା ବାଜିଲାଣି।

ମାଆ କହିଲେ, "ମାମା... !! କ'ଣ ହୋଇଛି?! ମ୍ୟାଗି ଖାଇନୁ?" ଜୟଶ୍ରୀ କହିଲା, "ମାଆ.. ତୁମେ ଜାଣିଛ,ଆଜି କଲେଜ୍ ରେ ମୋ ସାଙ୍ଗମାନେ ଆଜି ଭେଜ୍ ଚିଜି ପିଜା ଆଣି ଖାଇଲେ। ମୋତେ ବି ଡ଼ାକିଲେ... କିନ୍ତୁ କ'ଣ କରିବି? ଆମେ ତ ଶୁଦ୍ଧ ନିରାମିଷାସୀ ପୁଣି ବିନା ରସୁଣ ପିଆଜ। ମାଆ ଆମେ କ'ଣ ପିଜା ଖାଇପାରିବାନି କେବେ ବି?!" ମଳିନ ପଡ଼ି ଯାଇଥିବା ଶୁଖିଲା ମୁହଁକୁ ଜୟଶ୍ରୀର ମାଆ ପଣତକାନିରେ ପୋଛିଲେ। ହସ ହସ ମୁହଁରେ ମାଆ କହିଲେ, "ନିଶ୍ଚୟ ଖାଇ ପାରିବା। କାହିଁକି ନୁହଁ!... କାଲି ରବିବାର ମୁଁ ମୋ ସୁନା ପାଇଁ ନିଶ୍ଚୟ ପିଜା କରିଦେବି। କାଲି ସକାଳ ବ୍ରେକ୍ ଫାଷ୍ଟ୍ ରେ ଆମେ ସମସ୍ତେ ପିଜା ଖାଇବା। ଏବେ ମ୍ୟାଗି ଖାଇଦେ। ଆଉ କ୍ଷୀର ପିଇଦେ। ଆଉ ଖେଳିବାକୁ ଯାଇପାରୁ। ସନ୍ଧ୍ୟା ପୂର୍ବରୁ ଫେରି ଆସିବୁ।"

ଜୟଶ୍ରୀର ବାପା ସରକାରୀ ସ୍କୁଲ୍ ରେ ଶିକ୍ଷକ। ସ୍କୁଲ୍ କାମ ସାରି ସେ ଘରକୁ ଫେରିଲେ ସନ୍ଧ୍ୟା ୫ଟାରେ। ନିଜ ପୋଷାକ ପତ୍ର ଓହ୍ଲାଇ ହ୍ୟାଙ୍ଗର୍ ରେ ଟାଙ୍ଗି ଦେଲେ। ଗାମୁଛା ପାଲଟି ଗାଧୁଆ ଘରକୁ ଯାଇ ଭଲସେ ଗାଧୁଆ ପାଧୁଆ ସାରି ଆସିଲେ। ନାଇଟ୍ ପ୍ୟାଣ୍ଟ୍ ଟିଏ ଓ ଟି-ସାର୍ଟ ଟିଏ ପିନ୍ଧିଲେ। ଟି.ଭି. ଓ ପଙ୍ଖା ଚାଲୁ କରି ସୋଫା ସେଟ୍ ଉପରେ ବସିଗଲେ। ଓଟିଭି ଲଗାଇ ନିଉଜ୍ ଦେଖିବାରେ ଲାଗିଲେ। ଏହି ସମୟରେ ଜୟଶ୍ରୀଙ୍କ ମାଆ ଚାହା କପେ ଓ ଚାରି-ପାଞ୍ଚଟା ବିସ୍କେଟ୍ ପ୍ଲେଟ୍ ରେ ନେଇ ଆସିଗଲେ। ଆଉ ପାଖରେ ବସିପଡ଼ି କହିଲେ, "ପିଲାଟା ପିଜା ଖାଇବାକୁ ହଟୁଛି। ଏ... ତୁମେ ବଜାରରୁ ଯାଇ କିଛି କିଣା କିଣି କରି ଆଣିଲେ କାଲି ସକାଳୁ ପିଜା ବନେଇଥାନ୍ତି।" ଜୟଶ୍ରୀର ବାପା ଖୋଲା ହସଟିଏ ମାରିଦେଇ ତାଳି ମାରି ହସି ହସି ଗଡ଼ିଗଲେ। ଆରେ ଯାହାକୁ ରୋଷେଇ ଆସୁ ନଥିଲା ବୋଲି ମୁଁ ବିବାହ ପରେ ଶିଖାଇଛି, ସିଏ ଏବେ ପୁଣି ମାଷ୍ଟର୍ ଚେଫ୍! ଜୟଶ୍ରୀର ମାଆ ଗାଲଟାକୁ ମୋଡ଼ି ଦେଇ କହିଲେ, "ହେଉ... ହେଉ... ଏବେ ଯାଇ ସାମଗ୍ରୀ ବଜାରରୁ ଧରି ଆସ।" ଜୟଶ୍ରୀର ବାପା କହିଲେ, "ହେଉ ତେବେ କ'ଣ କ'ଣ ସାମଗ୍ରୀ ଅଣାଯିବ, ଏକ ଲିଷ୍ଟ୍ କର।" ଜୟଶ୍ରୀର ମାଆ, "ଏକ ଧଳା ଚଟି ଖାତାର ପେଜ୍ ରେ ଲେଖିଲେ ନିମ୍ନ ଲିଖିତ ସାମଗ୍ରୀ।"

୧. ସୁଜି - ୧୫୦ ଗ୍ରାମ୍

୨. ଦହି - ୧ ଛୋଟ ପ୍ୟାକେଟ୍

୩. ବଟର୍(ଲହୁଣୀ) - ୧ ପ୍ୟାକେଟ୍

୪. ଟମାଟ - ୧୦୦ ଗ୍ରାମ୍

୫. ବିନ୍ - ୧୫୦ ଗ୍ରାମ୍

୬. କଞ୍ଚା ଲଙ୍କା - ୫୦ ଗ୍ରାମ୍

୭. ଧନିଆପତ୍ର - ୧ ବିଡ଼ା

୮. ଭୃଷଙ୍ଗ ପତ୍ର କିଛି

୯. ମକା(ସୁଇଟ୍ କର୍ଣ୍ଣ୍) - ୩ଟି

୧୦. କ୍ୟାପ୍ସିକମ୍ (ନାଲି, ହଳଦୀଆ ଓ ସବୁଜ) - ୨୫୦ ଗ୍ରାମ୍

୧୧. ପନିର୍ - ୨୫୦ ଗ୍ରାମ୍

୧୨. ଗାଜର - ୧୦୦ ଗ୍ରାମ୍

୧୩. ବେକିଙ୍ଗ୍ ସୋଢ଼ା କ୍ଷାର - ୫୦ ଗ୍ରାମ୍

୧୪. ଚିନି - ୫୦ ଗ୍ରାମ୍

୧୫. ଚିନାବାଦାମ୍ ମଞ୍ଜି - ୨୫୦ ଗ୍ରାମ୍

୧୬. ଚାରୁ ମଗଜ - ୫୦ ଗ୍ରାମ୍

୧୭. ବାଦାମ୍ - ୫୦ ଗ୍ରାମ୍

୧୮. ବଡ଼ ପାଉଁରୁଟି - ୪ଟି

୧୯. ଆଳୁ - ୨୫୦ ଗ୍ରାମ୍

୨୦. ଲେମ୍ବୁ - ୧ଟି

ଜୟଶ୍ରୀର ବାପା ଏହା ଦେଖି ହସି ହସି ଗଡ଼ିଗଲେ। ତାତ୍ସଲ୍ୟ କରି କହିଲେ, "ହେଉ ମୁଁ ଆଣିଦେଉଛି। ଦେଖିବା କେମିତି କରୁଛ?!" ଯାହା ଯାହା ଲେଖିଥିଲେ ଜୟଶ୍ରୀର ମାଆ, ସେ ଗୋଟି ଗୋଟି କରି ସବୁ ଆଣି ଯୋଗାଇ ଦେଲେ।

ଜୟଶ୍ରୀର ମାଆ ଚାରୁ ମଗଜ ଓ ବାଦାମ୍ କୁ ରାତିରେ ଏକ ପାତ୍ରରେ ଭିଜାଇ ରଖିଲେ।

ପର ଦିନ ସକାଳୁ ଗାଧୁଆ ସାରି। ରୋଷେଇ ପାଇଁ ପ୍ରସ୍ତୁତ ହୋଇଗଲେ। ତେବେ ଆସନ୍ତୁ ଜାଣିବା 'ବିନା ରସୁଣ ପିଆଜ ମୁଢ଼ି ପିଜା' କେମିତି କରାଯାଏ?

ବିନା ରସୁଣ ପିଆଜ ମୁଢ଼ି ପିଜା ପ୍ରସ୍ତୁତ କରିବାକୁ ଆବଶ୍ୟକୀୟ ସାମଗ୍ରୀ

୧. ମୁଢ଼ି ଏକ ପାତ୍ରରେ ୧୦ ତାଟିଆ(ମଧ୍ୟମ ଧରଣର ତାଟିଆ)

୨. ସୁଜି ୧୦୦ ଗ୍ରାମ୍

୩. ଚାରିରୁ ପାଞ୍ଚ ବଡ଼ ଚାମଚ୍ ଦହି

୪. ଚିନି ୨ ବଡ଼ ଚାମଚ୍

୫. ବଟର୍ ଏକ ପ୍ୟାକେଟ୍ ର ଅଧା

୬. ଟମାଟ ୧୦୦ ଗ୍ରାମ୍ ଚୁନା ଚୁନା କରି ଓ କିଛି ଚପ୍ ଚପ୍ କରି କଟା ହୋଇଥିବା ଦରକାର

୭. ବିନ୍ ୧୦୦ ଗ୍ରାମ୍ ଛୋଟ ଛୋଟ ଚପ୍ ଚପ୍ କରି କଟା ହୋଇଥିବା ଦରକାର

୮. କ୍ୟାପ୍ସିକମ୍ ୧୫୦ ଗ୍ରାମ୍ (ନାଲି, ହଳଦିଆ ଓ ସବୁଜ)

୯. ପନିର୍ ୨୫୦ ଗ୍ରାମ୍ କୋରିକି ହେଉ ବା ଗୁଣ୍ଡ ଗୁଣ୍ଡ କରି ରଖା ଯାଇଥିବା ଦରକାର

୧୦. ଅଦା ବଡ଼ ଖଣ୍ଡେ କୋରିକି ରଖା ଯାଇଥିବା ଦରକାର

୧୧. ପାଉଁରୁଟି ବଡ଼ ବଡ଼ ୪ଟି ୪ଖଣ୍ଡ କରି ରଖାଯିବା ଦରକାର

୧୨. ଚିନାବାଦାମ୍ ମଞ୍ଜି ୧୫୦ ଗ୍ରାମ୍ କୁ ଦରଦରା କରି ପେଶା ହୋଇଥିବା ଦରକାର ଯେପରି ଦାନା ଦାନା ରହିବ

୧୩. ଚାରୁ ମଗଜ ୫୦ ଗ୍ରାମ୍ କୁ ଚିକ୍କଣିଆ ପେଷ୍ଟ୍ କରି ରଖିବା ଦରକାର

୧୪. ବାଦାମ୍ ୫୦ ଗ୍ରାମ୍ କୁ ଚିକ୍କଣିଆ ପେଷ୍ଟ୍ କରି ରଖିବା ଦରକାର

୧୫. ୩ଟି ମକାର ମଞ୍ଜି ବାହାର କରି ସିଝାଇ ରଖିବା ଦରକାର

୧୬. ପାଞ୍ଚଟି ବଡ଼ ସିଝା ଆଳୁ

୧୭. ବେକିଙ୍ଗ୍ ସୋଢ଼ା କ୍ଷାର ୧/୨ ଚାମଚ୍

୧୮. ଦୁଇ ରୁ ତିନି ଚାମଚ୍ ଲେମ୍ବୁ ରସ

୧୯. ୪ଟି ଛୋଟ ଛୋଟ ଚପ୍ ଚପ୍ କରି କଟା ଯାଇଥିବା କଞ୍ଚା ଲଙ୍କା

୨୦. ଗାଜର ୫୦ ଗ୍ରାମ୍ କୋରା ହୋଇଥିବା ଦରକାର

୨୧. କିଛି ଭୃଷଙ୍ଗ ପତ୍ର

୨୨. କିଛି ଧନିଆ ପତ୍ର

୨୩. ତେଲ ବଡ଼ ଚାମଚ୍ ରେ ୮ ଚାମଚ୍

୨୪. ସ୍ବାଦ ଅନୁସାରେ ଲୁଣ

୨୫. ବିନା ରସୁଣ ପିଆଜ ମସଲା

୨୬. ହଳଦୀ ଗୁଣ୍ଡ ୧ ଚାମଚ୍

୨୭. ଲଙ୍କା ଗୁଣ୍ଡ ୧/୨ ଚାମଚ୍

୨୮. ଜିରା ଗୁଣ୍ଡ ୧/୪ ଚାମଚ୍

୨୯. ଧନିଆ ଗୁଣ୍ଡ ୧/୪ ଚାମଚ୍

୩୦. ଟମାଟ ସସ୍

ପ୍ରସ୍ତୁତି ପ୍ରଣାଳୀ :

ଏକ ବଡ଼ ପାତ୍ରରେ ୧୦ ତାଟିଆ ମୁଢ଼ିକୁ କିଛି ସମୟ ପାଇଁ ବତୁରାଇ ଦିଅ। ଏକ ପାତ୍ରରେ ୧୦୦ ଗ୍ରାମ୍ ସୁଜି ସହିତ ଚାରି ଚାମଚ୍ ଦହି ମିଶାଅ। କିଛି ପାଣି ମିଶାଇ ଏକ ଗାଢ଼ା ପିଠଉ ପ୍ରସ୍ତୁତ କର। ଗ୍ରାଇଣ୍ଡର୍ ର ମିକ୍ସର୍ ଜାର୍ ରେ ଭିଜି ଯାଇଥିବା ମୁଢ଼ି, ପାଉଁରୁଟି ଖଣ୍ଡ ମାନ ଓ ଅଳ୍ପ ପାଣି ପକାଇ ଏକ ପେଷ୍ଟ୍ ପ୍ରସ୍ତୁତ କର। ପେଷ୍ଟ୍ ଓ ପିଠଉକୁ ମିଶାଇ, ଏଥିରେ ୧/୨ ଚାମଚ୍ ବେକିଙ୍ଗ୍ ସୋଢ଼ା କ୍ଷାର ଓ ଦୁଇ ଚାମଚ୍ ଲେମ୍ବୁ ରସ ମିଶାଇ ଘାଣ୍ଟି ଦିଅ ଏବଂ ଏହାକୁ ୧୦ ମିନିଟ୍ ଯାଏଁ ଘୋଡ଼ାଇ ଦିଅ।

ଏକ କଢ଼ାଇରେ ଦୁଇ ଚାମଚ୍ ତେଲ ଓ ଅଳ୍ପ ବଟର୍ ପକାଇ ସେଥିରେ କ୍ୟାପ୍ସିକମ୍, କଟା କଞ୍ଚାଲଙ୍କା, କଟା ବିନ୍, ତଡ଼କା ମଞ୍ଜି ବା ବିନ୍ ମଞ୍ଜି, କିଛି ବିରି ଡ଼ାଲି, ଦରଦରା ପେଷା ଚିନାବାଦାମ, ଛୋଟ ଛୋଟ ଖଣ୍ଡ ଫୁଲ କୋବି ଓ ଚୁନ୍ ଚୁନା ହୋଇ କଟା ହୋଇଥିବା ବନ୍ଧା କୋବି ଏସବୁ ପକାଅ ଓ ଏଥିରେ ଲଙ୍କା ଗୁଣ୍ଡ, ଜିରା ଗୁଣ୍ଡ ଓ ଧନିଆ ଗୁଣ୍ଡ ଓ ହଳଦୀ ଗୁଣ୍ଡ ମିଶାଇ ଟିକେ କଷି ଦିଅ। ତା'ପରେ ଟମାଟ କଟା ପକାଅ।ଯେପରି ଦର ସିଝା ରହେ। ଏହାପରେ ଅଳ୍ପ ପାଣି ଦେଇ ସିଝା ଆଳୁକୁ ଚକଟି ମିଶାଅ। ଅଳ୍ପ ବିନା ରସୁଣ ପିଆଜ ମସଲା ଛିଞ୍ଚି ଦିଅ। ସେଥିରେ ବାଦାମ୍ ଓ ଚାରୁ ମଗଜ ପେଷ୍ଟ୍ କୁ ମିଶାଇ ଘାଣ୍ଟି। ଘୋଡ଼ାଇ ଦିଅ। ତରକାରୀ ଗାଢ଼ା ହେବା ଦରକାର। ଜୁସ୍ ନ ରହିବା ଦରକାର ଶୁଖିଲା ପାଗ ରହିବା ଦରକାର। ଚକଟା ଭଳି ଲାଗିବା ଦରକାର।

ଏବେ ଏକ ନନ୍ ଷ୍ଟିକି ପ୍ୟାନ୍ ରେ ତିନି ଚାମଚ୍ ତେଲ ଓ ଅଳ୍ପ ବଟର୍ ପକାଇ ଗରମ କର। ଘୋଡ଼ା ହୋଇଥିବା ପିଠଉରେ ଭୃଷଙ୍ଗ ପତ୍ର, ଅଳ୍ପ କଟା ଧନିଆପତ୍ର, କୋରା ଗାଜର, କୋରା ହୋଇଥିବା ଅଦା, ଦୁଇ ଚାମଚ ଚିନି ଓ ସ୍ଵାଦ ଅନୁସାରେ ଲୁଣ ପକାଇ ଭଲଭାବରେ ଗୋଳାଇ ଦିଅନ୍ତୁ। ଏବେ ପ୍ୟାନ୍ ରେ ଏହି ପିଠଉକୁ ପକାଅ। ଦୁଇ ରୁ ତିନି ମିନିଟ୍ ଘୋଡ଼ାଇ ଦିଅ। ଏହାପରେ ଓଲଟାଇ ପୁଣି ବଟର୍ ଓ ତେଲ ଲଗାଇ ଭଲ ଭାବେ ଘୋଡ଼ାଇ ସେକି ଦିଅ। କିଛି ସମୟ ପରେ ଏହା କେକ୍ ଭଳି ଫୁଲି ଉଠିବ। ଏହା ପରେ ମଝିରୁ ସମାନ ଭାବରେ ଏହି କେକ୍ କୁ ଖଣ୍ଡ କର। ମଝିରେ କଢ଼ାଇରେ ପ୍ରସ୍ତୁତ କରିଥିବା ଗ୍ରେଭି ତରକାରୀ ଚକଟାକୁ ଚାରିଆଡ଼େ ଖେଳାଇ ପକାଅ। ତା' ଉପରେ ପନିର୍ କୋରା, ସିଝା ସୁଇଟ୍ କର୍ଣ୍ଣ୍ ଓ କିଛି କ୍ରିମ୍ ପକାଇ ଆର ପଟ କେକ୍ ଖଣ୍ଡକୁ ଚାପି ରଖ ଓ ସେକି ଦିଅ ଉଭୟ ପଟକୁ। ଆବଶ୍ୟକ ମୁତାବକ ସମାନ ସମାନ ତ୍ରିଭୁଜାକାର ଖଣ୍ଡ କର ଓ ଟମାଟ ସସ୍ ସହ ଗରମା ଗରମ୍ ଖାଅ।

ଏହିପରି ଜୟଶ୍ରୀର ମାଆ ପ୍ରସ୍ତୁତ କରି ସାରିଲା ପରେ ସ୍ବାମୀଙ୍କ ପାଟିରୁ ଲାଳ ବହିବାରେ ଲାଗିଲା। ଗୋଟିଏ ଗୋଟିଏ ଖଣ୍ଡ ବାପା- ଝିଅ ଖାଉ ଖାଉ ପ୍ରଶଂସା କରିବାରେ ଲାଗି ପଡ଼ିଲେ।

ବି.ଦ୍ର. - ଆପଣ ଗ୍ରେଭି ତରକାରୀ ରେ ବିଭିନ୍ନ ଭେଜିଟେବୁଲ୍ ବି ମିଶାଇ ପାରିବେ। ଆପଣଙ୍କ ମନ ପସନ୍ଦର। ଆପଣ ବି କରି ଖାଆନ୍ତୁ। କେମିତି ଲାଗିଲା ମୋତେ ଜଣାଇବେ। ବିନା ରସୁଣ ପିଆଜର ବ୍ୟକ୍ତି ବିଶେଷ ପାଇଁ ଏହା

ଏକ ଉତ୍ତମ ଜଳଖିଆ। ଆପଣମାନେ ପର୍ବ ପର୍ବାଣୀରେ ମଧ୍ୟ ଏହାକୁ କରି ଖାଇ ପାରିବେ।

•=×=•

ବିନା ରସୁଣ-ପିଆଜ ମୁଢ଼ି ପିଜା

ପିଜା ଭିନ୍ନଧରଣ