ପ୍ରକୃତିର ଅନନ୍ୟ ଓ ଶକ୍ତିଶାଳୀ ଜୀବ ହେଉଛି ଗେଣ୍ଡା। ଏହାର ବଡ଼ ଶରୀର, ମୋଟା ଚର୍ମ, ଓ ଆଗ ଭାଗରେ ଥିବା ଶିଙ୍ଗ ଏହାକୁ ଏକ ଅଦ୍ଭୁତ ପ୍ରାଣୀରେ ପରିଣତ କରିଛି। କିନ୍ତୁ ଆଜି ଏହି ଶକ୍ତିଶାଳୀ ପ୍ରାଣୀଟି ବିଲୁପ୍ତ ହେବାର ଭୟଙ୍କର ଭୟ ମଧ୍ୟରେ ଅଛି। ଏହି ସଙ୍କଟକୁ ଧ୍ୟାନରେ ରଖି ପ୍ରତିବର୍ଷ ସେପ୍ଟେମ୍ବର ମାସ ୨୨ ତାରିଖରେ ବିଶ୍ୱ ଗେଣ୍ଡା ଦିବସ ପାଳନ କରାଯାଏ। ଏହି ଦିବସ କେବଳ ଗେଣ୍ଡା ବିଷୟରେ ଚର୍ଚ୍ଚା କରିବା ନୁହେଁ, ବରଂ ଏହାର ସୁରକ୍ଷା ପାଇଁ ଏକ ସଙ୍କଳ୍ପ ନେବାର ଦିବସ।

ବିଶ୍ୱ ଗେଣ୍ଡା ଦିବସର ମୁଖ୍ୟ ଲକ୍ଷ୍ୟ ହେଉଛି ଲୋକଙ୍କ ମଧ୍ୟରେ ଜାଗରଣ ସୃଷ୍ଟି କରିବା। ବହୁ ଲୋକ ଜାଣନ୍ତି ନାହିଁ ଯେ ଗେଣ୍ଡା ଶିଙ୍ଗ ପାଇଁ ଏମାନଙ୍କୁ ଅନେକ ବ୍ୟାଧ ଶିକାର କରନ୍ତି। ଏହି ଶିଙ୍ଗକୁ କେତେକ ସ୍ଥାନରେ ଔଷଧ ଓ ଅଳଙ୍କାର ତିଆରି ପାଇଁ ବ୍ୟବହାର କରାଯାଏ, ଯାହା ବିଜ୍ଞାନ ସମ୍ମତ ନୁହେଁ। ଏହା ଛଡ଼ା, ଗଛ କଟା ଯୋଗୁଁ ଗେଣ୍ଡାମାନଙ୍କର ପ୍ରାକୃତିକ ବାସସ୍ଥଳୀ ନଷ୍ଟ ହେଉଛି। ଫଳରେ ସେମାନଙ୍କୁ ଖାଦ୍ୟ ଓ ରହିବା ପାଇଁ ସ୍ଥାନ ମିଳୁନାହିଁ। ବିଶ୍ୱ ଗେଣ୍ଡା ଦିବସ ଏହି ସବୁ ସମସ୍ୟା ବିଷୟରେ ସବୁ ବୟସର ଲୋକଙ୍କୁ, ବିଶେଷକରି ପିଲାମାନଙ୍କୁ, ଶିଖାଇବା ପାଇଁ ଏକ ମଞ୍ଚ ପ୍ରଦାନ କରେ।

ଏହି ଦିବସ ପାଳନ କିପରି ହୁଏ? ବିଭିନ୍ନ ଚିଡ଼ିଆଖାନା, ବନ୍ୟଜୀବ ସଂରକ୍ଷଣ ସଂସ୍ଥା ଓ ବିଦ୍ୟାଳୟରେ ବିଭିନ୍ନ କାର୍ଯ୍ୟକ୍ରମ ହୁଏ। ଏଥିରେ ଗେଣ୍ଡା ବିଷୟରେ ପ୍ରଦର୍ଶନୀ, ଚିତ୍ରାଙ୍କନ ପ୍ରତିଯୋଗିତା, ଭାଷଣ, ଓ ଡକ୍ୟୁମେଣ୍ଟରୀ ଦେଖାଯାଏ। ଲୋକଙ୍କୁ ଗେଣ୍ଡା ସୁରକ୍ଷା ପାଇଁ ଦାନ କରିବାକୁ ମଧ୍ୟ କୁହାଯାଏ। ସାମାଜିକ ମାଧ୍ୟମରେ ଲୋକେ ଗେଣ୍ଡା ସୁରକ୍ଷା ସନ୍ଦେଶ ଶେୟାର୍ କରି ଅନ୍ୟମାନଙ୍କୁ ଜାଗ୍ରତ କରନ୍ତି। ଏହି ସବୁ କାର୍ଯ୍ୟ ମାଧ୍ୟମରେ ଏକତା ବାନ୍ଧି ହୁଏ ଯେ ଗେଣ୍ଡା ରକ୍ଷା କରିବା ଆମ ସମସ୍ତଙ୍କର ଦାୟିତ୍ୱ।

ଗେଣ୍ଡା ରକ୍ଷା କରିବା କେବଳ ଏକ ଜୀବକୁ ବଞ୍ଚାଇବା ନୁହେଁ। ଗେଣ୍ଡା ପ୍ରକୃତିରେ ଏକ ଗୁରୁତ୍ଵପୂର୍ଣ୍ଣ ଭୂମିକା ଗ୍ରହଣ କରେ। ଏମାନେ ଘାସ ଜମିରେ ଚରିବା ସମୟରେ ଛୋଟ ଗଛ ପୋଛାରୁ ଆରମ୍ଭ କରି ଅନେକ ପ୍ରକାରର ଉଭିଦର ବିତରଣରେ ସାହାଯ୍ୟ କରନ୍ତି। ଏହା ଜୈବିକ ବିବିଧତା ବଜାୟ ରଖେ। ଗେଣ୍ଡା ନଥିଲେ ପ୍ରକୃତିର ସନ୍ତୁଳନ ନଷ୍ଟ ହୋଇଯିବ। ତେଣୁ ଗେଣ୍ଡା ରକ୍ଷା କରିବା ମାନେ ଆମର ସମଗ୍ର ପରିବେଶ ପ୍ରଣାଳୀକୁ ରକ୍ଷା କରିବା।

ଶେଷରେ, ବିଶ୍ୱ ଗେଣ୍ଡା ଦିବସ ଆମକୁ ଏକ ସୁନ୍ଦର ପ୍ରାଣୀକୁ ହତ୍ୟା ଓ ବିଲୁପ୍ତିରୁ ବଞ୍ଚାଇବା ପାଇଁ ଏକାଠି ହେବାର ସୁଯୋଗ ଦେଇଥାଏ। ଏହା ଆମକୁ ଶିଖାଇଥାଏ ଯେ ପ୍ରକୃତିରେ ଥିବା ପ୍ରତ୍ୟେକ ଜୀବର ଏକ ମହତ୍ଵ ଅଛି। ଆଜିର ଏହି ଦିବସ କେବଳ ଏକ ଦିନର ଉତ୍ସବ ନୁହେଁ, ବରଂ ଏକ ସଙ୍କଳ୍ପ। ଆଉ ଗେଣ୍ଡା ଶିଙ୍ଗ ପାଇଁ ନୁହେଁ, ବରଂ ଏହାର ସୁନ୍ଦର ଅସ୍ତିତ୍ୱ ପାଇଁ ଏହାକୁ ଚିନ୍ହା ଯାଉ। ଆସନ୍ତୁ, ଆଜି ଆମେ ସବୁ ଏହି ସଙ୍କଳ୍ପ ନେବା ଯେ ଆମେ ଗେଣ୍ଡା ଓ ଏହାର ଘର ଜଙ୍ଗଲକୁ ସୁରକ୍ଷିତ ରଖିବା ପାଇଁ ଯଥାସାଧ୍ୟ ଚେଷ୍ଟା କରିବା। କାରଣ ଗେଣ୍ଡା ବଞ୍ଚିଲେ ଜଙ୍ଗଲ ବଞ୍ଚିବ, ଆମର ପରିବେଶ ବଞ୍ଚିବ ଓ ଆମେ ବଞ୍ଚିବା।

!! ସୁଶାନ୍ତ କୁମାର ସାସମଲ

ହନୁମାନ ନଗର ଆସ୍କା ରୋଡ଼

ବ୍ରହ୍ମପୁର ଗଞ୍ଜାମ !!

ବିଶ୍ଵ ଗେଣ୍ଡା ଦିବସ – ସୁରକ୍ଷାର ସଙ୍କଳ୍ପ

ବିଶ୍ଵ ଗେଣ୍ଡା ଦିବସ – ସୁରକ୍ଷାର ସଙ୍କଳ୍ପ