ସେଦିନ ଥାଏ ଇଂରାଜୀ ନବବର୍ଷ ୨୦୨୧। ଗୋଟିଏ ଦିନ ପୂର୍ବରୁ ମୁଁ ଛାଡ଼ିବାକୁ ଯାଇଥାଏ ନର୍ଲା(କଳାହାଣ୍ଡି)ମୋ ବଡ଼ବାପାଙ୍କ ଝିଅ ମାନେ ମୋ ବଡ଼ ଦିଦିଙ୍କୁ ଛାଡ଼ିବାକୁ। ଆମ ଭାଇନା ସେଇଠି କାମ କରନ୍ତି। ସେ ଜଣେ ସିଭିଲ୍ ଇଞ୍ଜିନିୟର୍। ମୁଁ ନୂଆ ବର୍ଷ ଦିନରେ ହିଁ ମୋର ଫେରିବାର ଯୋଜନା ସରିଥାଏ। କିନ୍ତୁ, ମୋର ଦିଦି ଓ ଭାଇନା ବାଧ୍ୟ କରି ମନା କରିଦେଲେ। ସେମାନେ କହିଲେ ଯେ ଆସିଛୁ ଯେତେବେଳେ ସାନ ଭାଣିଜୀର ଜନ୍ମଦିନ ପାଳିକି ହିଁ ଯିବୁ। ମୋ ଦିଦିର ଦୁଇ ଝିଅ। ସାନ ଝିଅର ଜନ୍ମଦିନ ଠିକ୍ ନୂଆ ବର୍ଷ ଦିନ। ଦୁର୍ଭାଗ୍ୟକୁ ସେଦିନକୁ ମୋ ଆକାଉଣ୍ଟ୍ ରେ ମାତ୍ର ₹୧୦୦୦ ଥାଏ। କାରଣ ତା' ପୂର୍ବରୁ ମୋ ଦିଦି ଓ ଦୁଇ ଭାଣଜୀଙ୍କ ପାଇଁ ବହୁତ ସପିଙ୍ଗ୍ କରିଦେଇଥାଏ। ମନରେ ଗୋଟିଏ ଭୟ ଗାଁକୁ ଫେରିବାବେଳେ କାଳେ ଟଙ୍କା ନିଅଣ୍ଟ ପଡ଼ି ଯିବକି?! ତଥାପି ମନରେ ସାହସ ସଞ୍ଚୟ କରି ଭାବିଲି ଯାହା ହେବ ଦେଖାଯିବ। ସେମାନଙ୍କ କଥାକୁ ମୁଁ କାଟି ପାରିଲି ନାହିଁ। ଭାବିଲି ସାନ ଭାଣିଜୀକୁ ଗୋଟିଏ ଭଲ ସୁନ୍ଦର୍ ଖେଳନାଟିଏ ଓ ଚକୋଲେଟ୍ ଟିଏ ଉପହାର ଦେଇ ଦେଇଦେବି।

ଠିକ୍ ନୂଆ ବର୍ଷ ଦିନ ରାତି ୫ଟାରୁ ଦିଦି ଉଠି ରଙ୍ଗୋଲି ଓ ମୁରୁଜରେ ଇଂରାଜୀ ନବ ବର୍ଷର ସୁନ୍ଦର ମୟୂର ଯୋଡ଼ା କରି ଓ ପାନପତ୍ର ଚିତ୍ରରେ "HAPPY NEW YEAR 2021" ଲେଖିସାରିଥିଲା। ମୁଁ ଓ ଦୁଇ ଭାଣଜୀ ନିଦରେ କୋମଳ ଶଯ୍ୟାରେ ମୋଟା ମଖମଲ କମ୍ବଳ ଘୋଡ଼ି ହୋଇ ଶୋଇଥାଉ। ପ୍ରବଳ ଥଣ୍ଡା ପଡୁଥାଏ। ଦୁଇ ଭାଣଜୀଙ୍କୁ ଥଣ୍ଡା ଧରିଦେଇଥାଏ। କାରଣ ରାତି ସାରା ବସ୍ ରେ ଆମେ ତିନିଜଣ ଶୋଇନଥାଉ। ମୌଜମସ୍ତୀରେ ବ୍ୟସ୍ତ ଥାଉ। ନୂଆ ଜାଗାକୁ ଯାଉଥିବାରୁ ମୋତେ ରାତିସାରା ନିଦ ଆସୁନଥାଏ।

ସମୟ ସକାଳ ପ୍ରାୟ ୬ଟା ପାଖାପାଖି ହେବ। ମୋ ଗୋଡ଼ରେ ପ୍ରବଳ ଶୀତୁଆ ଥଣ୍ଡା ପବନ ବାଜିବାରୁ ଝାଏଁ କରି ନିଦ ଭାଙ୍ଗିଗଲା। ମୁଁ ନିଦରୁ ଉଠି ସେମାନଙ୍କୁ ଭଲ ଭାବରେ ଘୋଡ଼ାଇ ଦେଲି। ବାହାରକୁ ଯାଇ ଦେଖିଲି ଦିଦିର ରଙ୍ଗୋଲି ସାଜସଜ୍ଜା କାର୍ଯ୍ୟ ଶେଷ ହୋଇଯାଇଛି। ଦିଦି କହିଲା, "ଏତେ ସକାଳୁ କାହିଁ ଉଠିଲୁ ଯେ?! ପ୍ରବଳ ଥଣ୍ଡା ପଡୁଛି।ଏଇଠି ତ ସକାଳ ୭ଟାରେ ଲାଇନ୍ ପାଣି ଆସେ। ସରକାରୀ କ୍ୱାର୍ଟର୍ ରେ ଆମେ ରହୁଛୁ ନାଁ... ଯାଆ ଆଉ ଟିକେ ଶୋଇପଡ଼। ମୋର ଅଧକପାଳି ମାରୁଛି। କଫ ବି ଧରିଦେଇଛି। ମୁଁ ବି ଯାଉଛି ଆଉ ଟିକିଏ ଶୋଇପଡ଼ିବି। ପରେ ଟିକେ ଭଲ ଲାଗିଲେ ଗାଧୋଇ ପାଧୋଇ ରୋଷେଇ ଆରମ୍ଭ କରିବି।" ମୁଁ କହିଲି, "ମୋତେ ଆଉ କି ନିଦ ହେବ!... ଯିଏ ସକାଳ ୪ଟାରୁ ଉଠିବା ପିଲା ତା'ର ପୁଣି ଆଜି ୬ଟାରେ ନିଦ ଭାଙ୍ଗିଛି। ଆଉ ଥଣ୍ଡା!... ହୁଁଃ... ଯିଏ ଜନ୍ମ ହେବାର ୨୧ଦିନରେ ବରଫ କାଠି ମଲେଇ ଖାଇଛି। ତା'କୁ ପୁଣି ତୁ ଥଣ୍ଡାକୁ ଡ଼ରାଉଛୁ। ଯିଏ ପିଲାଦିନେ ଥଣ୍ଡାକୁ ଫୁଟ୍ ବଲ୍ ପରି ଖେଳି ଆସିଛି ତା'କୁ ତୁ ଏ ଶୀତୁଆ ଥଣ୍ଡା ପବନକୁ ଡ଼ରାଉଛୁ। ତୁ ଯାଆ ଶୋଇପଡ଼। ମୁଁ ଠାକୁର ପୂଜା ପାଇଁ ଫୁଲ ତୋଳିବାକୁ ଯାଉଛି। ସକାଳୁ ସକାଳୁ ମଣିଂ ୱକ୍ ଟେ ବି ହୋଇଯିବ। ଗୋଟିଏ ଗୁଳିରେ ଦୁଇଟା ଶିକାର...।" ଦିଦି ହସିଦେଇ କହିଲା, "ହେଉ ଯାଆ ସକାଳୁ ସକାଳୁ ତୋ ସୁନିଲ୍ ସେଟ୍ଟି ପରି ଷ୍ଟିଲ୍ ବଡ଼ି ବାହାର କରି।" ମୁଁ ଟି-ସାର୍ଟ ଓ ୱନ୍-ଥାର୍ଡ ପ୍ୟାଣ୍ଟ୍ ଟିଏ ପିନ୍ଧିଲି। ପାଦରେ ସକ୍ସ୍ ଓ ସ୍ପୋଟର୍ସ ସୁ ପିନ୍ଧିଲି। ବଡ଼ ପଲିଥିନ୍ ବ୍ୟାଗ୍ ଟିଏ ରଖିଲି। ମୋ ଏଣ୍ଡ୍ରଏଡ୍ ଓ ଇଅର୍ ଫୋନ୍ ଧରିଲି। ପର୍ସ ଧରିଲି। ଦିଦି କହିଲା, "ବୁଲା କୁକୁର ପ୍ରତି ସାବଧାନ ହୋଇ ଯିବୁ। ମୁଁ ଚାଲିଲି ଶୋଇବାକୁ।" ଦିଦି କବାଟ ବନ୍ଦ କରି ଶୋଇବାକୁ ଚାଲିଗଲା। ମୁଁ କାନରେ ଇଅର୍ ଫୋନ୍ ଦେଇ ମ୍ୟୁଜିକ୍ ଚାଲୁ କଲି ଏବଂ ଚାଲିଲି ରନିଂ କରି କରି ଫୁଲ ତୋଳିବାକୁ। ଠିକ୍ ଅଧ କିଲୋମିଟର ବାଟ ଧାଇଁଛି। ଗୋଟିଏ ହୋଟେଲ୍ ତଳେ ଶୋଇଥିବା ଦଳେ ବୁଲା କୁକୁର ଗୋଡ଼ାଇବାରେ ଲାଗିଲେ। ମୁଁ ପ୍ରାଣ ବିକଳରେ କ୍ଷିପ୍ର ଗତିରେ ଦୌଡ଼ି ଚାଲିଥାଏ। ସେମାନେ ମୋ ପିଛା ଛାଡୁ ନଥାନ୍ତି। ମୁଁ ଦୌଡ଼ି ଯାଇ ଏକ ଲମ୍ବା କନିଅର ଫୁଲ ଗଛରେ ଚଢ଼ିଗଲି। ସେମାନେ ତଳେ ରହି ସେମିତି ଭୁକୁଥାନ୍ତି। ଗୋଟିଏ ମୋଟା କନିଅର ଡ଼ାଳଟିଏ ଭାଙ୍ଗିଲି। ବାଡ଼ିଟି ଧରି ତଳକୁ ଡେଇଁଲି। ସେମାନେ ଭୟରେ କିଛି ଦୂର ଘୁଞ୍ଚିଯାଇ ପୁଣି ଭୁକିବାରେ ଲାଗିଲେ। ମୁଁ ସେମାନଙ୍କ ପଛରେ ବାଡ଼ି ଧରି ଗୋଡ଼ାଇଲି ବାଡ଼େଇବାକୁ। ସେମାନେ ଦୌଡ଼ି ପଳାଇଗଲେ। ମୁଁ ସେମାନଙ୍କ ପିଛା କରି କରି ଯେଉଁ କୁକୁରଟା ମୋତେ ବେଶୀ ଚୋବେଇବାକୁ ଗୋଡ଼ାଉଥିଲା, ସେଇଟାକୁ ଆଚ୍ଛା କରି ପାନେ ଦେଲି। ତା'ପରେ ସେମାନେ ଆଉ କି ରହନ୍ତି! ବିରିକୁ ମାଡ଼ ଦେଖି କୋଳଥ ପଡ଼ିଆରେ ଉଠିଗଲା ଭଳି ଯିଏ ଯୁଆଡ଼େ ପ୍ରାଣ ବିକଳରେ ଦୌଡ଼ିଲେ। ତା'ପରେ ମୁଁ ଶାନ୍ତିରେ ଭଳି କି ଭଳି କନିଅର, ଟଗର, ମନ୍ଦାର, ଗେଣ୍ଡୁ, ଗୋଲାପ ଓ ସେବତୀଫୁଲ ବୁଲି ବୁଲି ତୋଳିଲି। ଫୁଲ ତୋଳା ସରିଲା ବେଳକୁ ସମୟ ସକାଳ ଘ୭.୩୦ମି।

ସକାଳୁଆ ସୁନେଲି ସୂର୍ଯ୍ୟ କିରଣ ପଡୁଥାଏ। ଝାଳରେ ମୁଁ ବୁଡ଼ି ଯାଇଥାଏ। ଗୋଟିଏ ଗୋଟିଏ ପାଦ ବଢ଼ାଇ ଧିରେ ଧିରେ ପରିବା ମାର୍କେଟ୍ ଦେଇ ଘରମୁହାଁ ହେଉଥାଏ। ସକାଳୁଆ ସଜ ପନିପରିବା ଦେଖି ମୋ ମନ ସମ୍ଭାଳି ପାରିଲା ନାହିଁ। ମୁଁ ବ୍ରୋକଲି, ଫୁଲକୋବି, ମିଠା ମକା, ଗାଜର, ବିନ୍, ବନ୍ଧାକୋବି, ଗ୍ରିନ୍ ମଟର୍ ଓ ଟମାଟରୁ ଅଧକିଲୋ ଲେଖାଏଁ ଧରି ପକାଇଲି। ଆଉ ଆଉ ଦୁଇ କିଲୋ ଅଧେ ଧରିଲି। ତା'ପରେ ଘରକୁ ଚାଲିଲି। କଲିଂ ବେଲ୍ ମାରିବାରୁ ଦିଦି ଆସି କବାଟ ଖୋଲିଲା। ସେ ମୋ ହାତରେ ପରିବା ଓ ଫୁଲ ଦେଖି ଖୁସି ହୋଇଗଲା। ସେ କହିଲା, "ଭଲ ହେଲା ପରିବା ଧରି ଆସିଗଲୁ। ନଚେତ୍ ଆଉ ଟିକିଏ ପରେ ମୋତେ ପୁଣି ଯିବାକୁ ପଡ଼ନ୍ତା। ଏ ଥଣ୍ଡାରେ... (ସେ କିଛି କହୁ କହୁ ସେ କାଶି ପକାଇଲା)" ମୁଁ କହିଲି, "ହେଉ ତୁ ଯାଆ ଶୋଇପଡ଼। ମୁଁ ଗୋଧୋଇ ସାରି ପୂଜା କରିଦେବି। ପରେ ରୋଷେଇ କଥା ଚିନ୍ତା କରିବା।" ଦିଦି କାଶି କାଶି କହିଲା, "ଭାଇନା ବି ଆଜି ଆସିବେନି। ଗଜପତି ବୋର୍ଡର୍ ରେ ତାଙ୍କର କ'ଣ ଆଜି ପାର୍ଟି ରଖିଛନ୍ତି। ଆମକୁ ହିଁ ଆଜି ସବୁ ଉପରବେଳା ଜନ୍ମଦିନ ପାର୍ଟି ଆରେଞ୍ଜ୍ କରିବାକୁ ପଡ଼ିବ ଓ ସାଜସଜ୍ଜା କରିବାକୁ ପଡ଼ିବ। ମୁଁ ବୁଷ୍ଟ୍ ଟିକେ କରିଦେଉଛି। ଟୋଷ୍ଟ୍ ବି ଅଛି। ବୁଡ଼େଇ ବୁଡ଼େଇ ଖାଇଦେବୁ; ଆଉ ପିଇବୁ। ମୋତେ ଟିକେ ଭଲ ଲାଗିଲେ ରୋଷେଇ କରିବି।" ମୁଁ କହିଲି, "ତୁ ଗଲୁ ରେଷ୍ଟ୍ ନେବୁ। ଖାଲି କାଶୁଛୁ। ପ୍ରବଳ ଥଣ୍ଡା ତୋତେ ଧରି ଦେଇଛି।" ସେ ଗଲା ଶୋଇବାକୁ। ମୁଁ ଚାଲିଲି ପାଲଟା ପୋଷାକପତ୍ର ଧରି ଗାଧୋଇବାକୁ। ଗୋଧୋଇ ସାରି ମଠା ପିନ୍ଧିଲି। ଫୁଲ, ତୁଳସୀ ମଞ୍ଜରୀ, ବେଲପତ୍ର, ଚନ୍ଦନ, ଆଳତି ଓ ଧୂପ-ଦୀପରେ ପୂଜା ଚାଲିଲା। ପୂଜା ଶେଷରେ କଦଳୀ ଓ ସେଓ ଭୋଗ ଲଗାଇଲି।

ପୂଜାର୍ଚ୍ଚନା ସରିଲା ପରେ ପୋଷାକ ପିନ୍ଧି ସାରିଲା ବେଳକୁ ଗୋଟିଏ ପ୍ଲେଟରେ ମିଠା, କିଛି ଟୋଷ୍ଟ୍ ଓ ବୁଷ୍ଟ୍ ଏକ ଗ୍ଲାସ୍ ଧରି ଦିଦି ହାଜର। ସେ କହିଲା, "ଏତକ ଖାଇଦେଇ, ରେଷ୍ଟ୍ ନେ। ମୁଁ ପାଣି ତତାଉଛି। ଗାଧୋଇ ଯିବି।" ସେ ଡାଇନିଂ ଟେବୁଲ୍ ଉପରେ ସେତକ ରଖିଦେଇ ଚାଲିଲା ଗାଧୋଇ। ମୁଁ ଖାଇଦେଇ ବୁଷ୍ଟ୍ ପିଇଲି। ତା'ପରେ ମନରେ ଭାବିଲି ସୁପ୍ ଟିକେ ବନେଇଲେ କେମିତି ହୁଅନ୍ତା! ସମସ୍ତେ ଟିକେ ଟିକେ ପିଇଦେଲେ ଥଣ୍ଡା-ଫଣ୍ଡା କୁଆଡ଼େ ଉଡ଼ି ପଳାନ୍ତା। ସଙ୍ଗେ ସଙ୍ଗେ ରୋଷେଇ ଘରକୁ ପସି ପରିବା ଚାଙ୍ଗୁଡ଼ା ଆଡ଼କୁ ଆଖି ବୁଲାଇ ଆଣିଲି। ଥାକରେ ଡବା ଗୁଡ଼ିକ ଉପରେ ଆଖି ବୁଲାଉ ବୁଲାଉ ହଠାତ୍ ଆଖି ପଡ଼ିଗଲା 'ଭେଜିଟେବଲ୍ ଷ୍ଟକ୍' ଉପରେ। ମୁଁ ମନେ ମନେ ଭାବିଲି ଖୁବ୍ ବଢ଼ିଆ ହେଲା। ସୁପ୍ ପାଗଟା ଖୁବ୍ ଜମିଲା ତାହାଲେ। ତା'ପରେ ଆରମ୍ଭ ହେଲା "ବ୍ରୋକଲି-ଗ୍ରିନ୍ ମଟର୍ ଭେଜିଟେବୁଲ୍ ସୁପ୍"।

ବ୍ରୋକଲି-ଗ୍ରିନ୍ ମଟର୍ ଭେଜିଟେବୁଲ୍ ସୁପ୍ ପାଇଁ ଆବଶ୍ୟକୀୟ ସାମଗ୍ରୀ (୪ ଜଣ ପାଇଁ)

୧. କଟା ହୋଇଥିବା ଛୋଟ ଛୋଟ ବ୍ରୋକଲି - ୧୦୦ ରୁ ୨୦୦ ଗ୍ରାମ୍

୨. ଚୁନା ଚୁନା କଟା ବଡ଼ ଟମାଟୋ - ୨ଟି

୩. ଚୁନା ଚୁନା କଟା ବନ୍ଧାକୋବି - ୫୦ ରୁ ୮୦ ଗ୍ରାମ୍

୪. ଚୁନା ଚୁନା କଟା ଗାଜର - ୫୦ ଗ୍ରାମ୍

୫. ଚୁନା ଚୁନା କଟା ବିନ୍ - ୫୦ ଗ୍ରାମ୍

୬. ଘିଅ - ୫୦ ଗ୍ରାମ୍

୭. ବଟର୍ - ୫୦ ରୁ ୧୦୦ ଗ୍ରାମ୍ ଭିତରେ

୮. ଚୁନା ଚୁନା କଟା ଅଦା - ୫୦ ଗ୍ରାମ୍

୯. ସୁଇଟ୍ କର୍ଣ୍ଣ୍ (ମିଠା ମକା) - ୫୦ ରୁ ୧୦୦ ଗ୍ରାମ୍

୧୦. ଗ୍ରିନ୍ ମଟର୍ - ୧୦୦ ଗ୍ରାମ୍

୧୧. ଭେଜିଟେବୁଲ୍ ଷ୍ଟକ୍ - ୨ ରୁ ୩ କପ୍

୧୨. ଚୁନା ଚୁନା କଟା ପିଆଜ - ୫୦ ଗ୍ରାମ୍

୧୩. ଚୁନା ଚୁନା କଟା ରସୁଣ - ୫୦ ଗ୍ରାମ୍

୧୪. ଫୁଲ କୋବି - ୫୦ ଗ୍ରାମ୍

୧୫. ତେଲ - ୨ ବଡ଼ ଚାମଚ୍

୧୬. କ୍ରିମ୍ - ୨ କପ୍

୧୭. ଅଳେଇଚ - ୧ଟି

୧୮. ଲବଙ୍ଗ - ୧ ରୁ ୨ଟି

୧୯. ଡାଳଚିନି - ୧/୨ ଖଣ୍ଡ

୨୦. ଛୋଟ ତେଜପତ୍ର - ୧ ରୁ ୨ଟି

୨୧. ଜିରା ଗୁଣ୍ଡ - ୧/୪ ଚାମଚ୍

୨୨. ଧନିଆ ଗୁଣ୍ଡ - ୧/୪ ଚାମଚ୍

୨୩. ଗରମ ମସଲା - ୧ ଚାମଚ୍

୨୪. ପାଣି - ୩ ରୁ ୫ କପ୍

୨୫. ଗୋଲ ମରିଚ ଗୁଣ୍ଡ - ୧/୪ ଚାମଚ୍

୨୬. ଲୁଣ ସ୍ବାଦ ଅନୁସାରେ

୨୭. କିଛି କଟା ସଜ ଧନିଆପତ୍ର

୨୮. କଞ୍ଚାଲଙ୍କା - ୧ ରୁ ୨ଟା

ପ୍ରସ୍ତୁତି ପ୍ରଣାଳୀ:-

ପ୍ରଥମେ ଗ୍ୟାସ୍ ଅନ୍ କରି ମିଡ଼ିୟମ୍ ଫ୍ଲେମ୍ ରେ ତେଲ, ବଟର୍ ଦୁଇ ଚାମଚ୍ କଡ଼ାଇରେ ପକାଇ ଗ୍ରିନ୍ ମଟର୍ ଓ ବ୍ରୋକଲିକୁ ଚିମୁଟା ଲୁଣ ଓ ଗୋଲମରିଚ ଗୁଣ୍ଡ ଦେଇ ସିଝିଲା ଯାଏଁ ଭାଜି ବାହାର କରି ଏକ ପାତ୍ରରେ ରଖ। ପ୍ୟାନ୍ ରେ ପୁଣି କିଛି ବଟର୍ ଓ ତେଲ ନେଇ କଟା ପିଆଜ, କଞ୍ଚାଲଙ୍କା କଟା ଓ ରସୁଣରେ ଡାଳଚିନି, ଅଳେଇଚ, ଲବଙ୍ଗ, ତେଜପତ୍ର ଓ ବାକି ଚୁନା ଚୁନା କଟା ହୋଇଥିବା ଗ୍ରିନ୍ ଭେଜିଟେବୁଲ୍ (କଟା ଟମାଟୋକୁ ଛାଡ଼ି) ପକାଇ ଭଲ ଭାବରେ ଭାଜ। ଭେଜିଭେଜିଟେବୁଲ୍ ଷ୍ଟକ୍ ରେ ଏହି ଭେଜିଟେବୁଲ୍ସ୍ ମାନଙ୍କୁ ସିଝିବାକୁ ଛାଡ଼ି ଦିଅ। ଏହାପରେ ଏହି ସିଝିଥିବା ଭେଜିଟେବୁଲ୍ସ୍ ମାନଙ୍କୁ ଛାଣି ଅଲଗା ରଖ। ଏଥି ମଧ୍ୟରୁ ଅଧା ବାହାର କରି କଟା ଟମାଟୋ ସହ ଗ୍ରାଇଣ୍ଡର୍ ରେ ପେଷ୍ଟ୍ କରିଦିଅ। ଏବେ ଏହି ପେଷ୍ଟ୍ ରେ ଅଳ୍ପ ପାଣି, ଲୁଣ ଓ ଭେଜିଟେବୁଲ୍ ଷ୍ଟକ୍ ସିଝା ପାଣି ମିଶାଇ ଭଲ ଭାବରେ ଗୋଳାନ୍ତୁ। ଆଉ ଏଥିରେ ବାକି ରହିଯାଇଥିବା କଟା ସିଝା ଭେଜିଟେବୁଲ୍ସ୍ ମିଶାନ୍ତୁ। ଏଥିରେ ଭଜା ହୋଇଥିବା ବ୍ରୋକଲି ଓ ଗ୍ରିନ୍ ମଟର୍ ଉପରେ ପକାଇ ଗୋଳାଇ ଦିଅନ୍ତୁ। ପୁନଶ୍ଚ ଘିଅ ଦ୍ଵାରା କଟା ଅଦା ଗୁଡ଼ିକୁ ନାଲି ହେବା ପର୍ଯ୍ୟନ୍ତ ଡିପ୍ ଫ୍ରାଏ କରନ୍ତୁ। ଆଉ ଏହି ଘାଣ୍ଟରେ ମିଶାଅ। ଏବେ କ୍ରିମ୍ ମିଶାଇ ଭଲ ଭାବରେ ଗୋଳାନ୍ତୁ। ଆଉ ଉପରେ ଧନିଆ ଗୁଣ୍ଡ, ଜିରା ଗୁଣ୍ଡ, ଗୋଲ୍ ମରିଚ ଗୁଣ୍ଡ, ଗରମ ମସଲା ଏବଂ କଟା ଧନିଆପତ୍ର ପକାଇ ଟିକେ ଘାଣ୍ଟି ଦିଅନ୍ତୁ। ଏବେ ଗରମା ଗରମ୍ ବ୍ରୋକଲି-ଗ୍ରିନ୍ ମଟର୍ ଭେଜିଟେବୁଲ୍ ସୁପ୍ କୁ ବ୍ରେଡ୍ ଚପ୍ ବା ବଟର୍ ଟୋଷ୍ଟ୍ ଚଟଣି ସହ ପରଷି ଦିଅନ୍ତୁ।

ମୁଁ ପ୍ରସ୍ତୁତ କରି ସାରି ଯେତେବେଳେ ସମସ୍ତଙ୍କୁ ପିଆଇଲି। ଆଉ କି ଥଣ୍ଡା ଧରିବ ତାଙ୍କୁ ୨ ଘଣ୍ଟା ଭିତରେ ଥଣ୍ଡା-ଫଣ୍ଡା ଛ ହସଉ ଛୁ...। ତା'ପରେ ମୋ ଦିଦି ଆମ ପାଇଁ ଖାଇବା ପ୍ରସ୍ତୁତ କଲା। ଉପରବେଳା ଘରର ସାଜସଜ୍ଜା ଠିକ୍ ସମୟ ସରିଲା। ଦିଦି ଜନ୍ମଦିନ କେକ୍, କ୍ଷିରି, ପୁରି, ପନିର୍ ତରକାରୀ ଓ ମିଠା ପ୍ରସ୍ତୁତ କଲା। ସେହି ସାହିର ସମସ୍ତଙ୍କୁ ଜନ୍ମଦିନରେ ମୁଁ ଡାକିଲି। ସମସ୍ତେ ଜନ୍ମଦିନରେ କେକ୍ କଟିଙ୍ଗ୍ ସମୟରେ ଉପସ୍ଥିତ ରହି ନାନା ପ୍ରକାରର ଉପହାର ଓ ଆଶିର୍ବାଦ ଦେଲେ ମୋ ଭାଣଜୀକୁ। ମୁଁ ମୋ ଗେହ୍ଲି ଛୋଟ ଭାଣଜୀକୁ ଗୋଟିଏ "ଟକିଙ୍ଗ୍ ଟମ୍" ଖେଳନା ଓ ଚକୋଲେଟ୍ ଉପହାର ସ୍ବରୂପ ଦେଲି। ଯାହାକୁ ନେଇ ସେ ଏତେ ଖୁସି ହୋଇଗଲା ଯେ ମୋତେ ଗାଁକୁ ଛାଡ଼ିବାକୁ ନାରାଜ ଥିଲା। ସମସ୍ତେ ନାଚ କଲେ। ଗୀତ ଗାଇଲେ। ଆଉ ଆମ ଘରେ ଖାଇକି ବିଦାୟ ନେଲେ। ଖୁବ୍ ମଜା ଆସିଗଲା, ପହିଲି ଇଂରାଜୀ ନବ ବର୍ଷଟା।

ଭାଇନା ପରଦିନ ସକାଳୁ ଆସି ସାରିଥିଲେ। ମୁଁ ଯେବେ ଗାଁକୁ ବାହାରିଲି; ପର୍ସ ଖୋଲି ଦେଖିଲା ବେଳକୁ ମାତ୍ର ₹୨୦୦ ପଡ଼ିଥିଲା। ଏତେ କମ୍ ଟଙ୍କା କମ୍ ଥାଇ ବି ମୋ ମନରେ ଚିନ୍ତା କି ଦୁଃଖ ଆସୁନଥିଲା। କାରଣ କାଲିର ଖୁସି ଏ ଖର୍ଚ୍ଚର କଣିଚାଏକୁ ବି ସରି ହେବନି। ମୁଁ ମନରେ ଭାବିଲି ସାଙ୍ଗକୁ କହିବି ସେ କିଛି ଟଙ୍କା ଟ୍ରାନ୍ସଫର୍ କରିଦେବ। ମୋ ଭଉଣୀ ମୋତେ ଯିବା ବେଳକୁ ₹୧୦୦୦ ଟଙ୍କା ଲୁଚାଇ ଦେଇଥିଲା। ଆଉ କାନ ପାଖରେ କହୁଥିଲା - ଭାଇନାଙ୍କୁ କହିଦେଇଛି ସେ ବସ୍ ଟିକେଟ୍ କରିଦେଇଛନ୍ତି। ଆଉ ଫ୍ରୁଟ୍ସ୍, ମିଠା କିଣି ଦେବେ। ସେ ଟଙ୍କା ଦେଲେ ମନା କରିବୁନି କି ମୁଁ ଟଙ୍କା ଦେଇଛି ବୋଲି କହିବୁନି। ମୁଁ ମୁରୁକି ହସିଲି। ବସ୍ ରେ ବସିଲା ପରେ ଭାଇନା ₹୫୦୦ ସହ ଫ୍ରୁଟ୍ସ୍, ବିସ୍କେଟ୍ ଓ ମିଠା ଯାଚି କରି ଦେଇଥିଲେ। ସତରେ - ଆଲ୍ଲା ଜବ୍ ଦେତା ହୈ ଛପର୍ ଫାଡ୍ କର ଦେତା ହୈ।

=×=×=×=

ବ୍ରୋକଲି-ଗ୍ରିନ୍ ମଟର୍ ସୁପ୍

ବ୍ରୋକଲି ସୁପ୍ ର ଯାଦୁ