ବ୍ୟକ୍ତିତ୍ଵର ବିକାଶ ପାଇଁ କିଛି ଗୁରୁତ୍ୱପୂର୍ଣ୍ଣ ପରାମର୍ଶ Tips for personality development

ଭଗବାନ ଆମକୁ ମାନବ ଜୀବନ ଶୈଳୀ ରୃପେ ଶ୍ରେଷ୍ଠରେ ରଖିଛନ୍ତି। ବହୁତ ପ୍ରକାର ସଦ୍ଗୁଣ,ସଂଭ୍ୟତା,ସଂସ୍କାର ,ବ୍ୟକ୍ତିତ୍ଵ ଓ ଆଚରଣ ଭରି ଧରା ପୃଷ୍ଠରେ ଗୌଣକରି ତୋଳିଛନ୍ତି । ବ୍ୟକ୍ତିତ୍ବ ହେଉଛି ଗୋଟିଏ ବ୍ୟକ୍ତିର ପରିଚୟ। ବ୍ୟକ୍ତି କେବେ ମରିଯାଏ କେବେ ହଜିଯାଏ କିନ୍ତୁ ତାର ବ୍ୟକ୍ତିତ୍ଵ ହିଁ ଯାହା ସେ ଲୋକ ମାନଙ୍କ ପାଖରେ ଛାଡ଼ି ଯାଏ। ଗୋଟିଏ ମାତ୍ର ଭେଟ ରେ ଗୋଟିଏ ଲୋକ ନିଜ ବ୍ୟକ୍ତିତ୍ଵ ମାଧ୍ୟମରେ ସାରା ଜୀବନ ପାଇଁ କାହାର ସ୍ମୃତି ବାକ୍ସ ରେ ରହି ଯାଇଥାଏ। ଗୋଟିଏ ସଫଳ ମଣିଷ ହେବା ନିମନ୍ତେ ଏକ ଉତ୍ତମ ବ୍ୟକ୍ତିତ୍ଵ ନିତ୍ୟାନ୍ତ ଆବଶ୍ୟକ।

ବ୍ୟକ୍ତିତ୍ଵ ନିର୍ଦ୍ଧାରଣ ର ସେମିତି କୌଣସି ନିର୍ଦ୍ଦିଷ୍ଟ ମାପକାଠି ନାହିଁ କି ଏକ ଉତ୍ତମ ବ୍ୟକ୍ତିତ୍ଵ ପାଇଁ ସେମିତି କୌଣସି ସୂତ୍ର ନାହିଁ ନହେଲେ ସବୁ ପ୍ରଭାବଶାଳୀ ବ୍ୟକ୍ତି ଙ୍କ ର ବ୍ୟକ୍ତିତ୍ଵ ସମାନ ପ୍ରକାର ହୋଇ ଥାନ୍ତା। ବ୍ୟକ୍ତି ର ବ୍ୟକ୍ତିତ୍ଵ ତାର ଜନ୍ମଗତ ସ୍ଵଭାବ ର ଆଧାର ରେ ଭିନ୍ନ ହୋଇଥାଏ ଯାହା ତାର ମୌଳିକତା ବୃଦ୍ଧି କରେ। ଏହା ଛଡ଼ା ସ୍ଥାନ , ସମୟ ଓ ପାରିପାର୍ଶ୍ବିକ ଲୋକଙ୍କ ଉପରେ ନିର୍ଭର କରେ ଏକ ଉପଯୁକ୍ତ ବ୍ୟକ୍ତିତ୍ଵ। ତଥାପି କିଛି ଗୁରୁତ୍ୱପୂର୍ଣ୍ଣ ପରାମର୍ଶ ରହିବ ଯାହା ସବୁ ସମୟରେ କାମ କରିବ।

ମନୁଷ୍ୟ ଜୀବନ ଅତ୍ୟନ୍ତ ର୍ଦୂଲଭ ହୋଇ ପଶୁବଳି ଆଚରଣ କଲେ ଠାକୁର ଙ୍କ ପ୍ରତି ଅସମ୍ମାନ ହୋଇଥାଏ। ମନୁଷ୍ୟ ପାଖରେ ଶାଳୀନତା, ବିନମ୍ରଭାବ, ମଧୁର ବ୍ୟବହାର, ଆଦର୍ଶବୋଧ, ସମୟାନୁବର୍ତ୍ତୀତା, ନିଃସ୍ଵାର୍ଥପର ତା,ହିତାକାଂକ୍ଷୀ,ସୁବିଚାର,ସେବା ମନୋଭାବ, ପ୍ରଯତ୍ନ ଶୀଳ,ଉଦାରତା, ପରୋପକାର ଆଦି ପ୍ରଭୃତି ଦିବ୍ୟତାର ଗୁଣ ଗୁଡିକ ପେନ୍ଥା ହୋଇ ପ୍ରସ୍ପୁଟିତ ହେବା ହିଁ ଉତ୍ତମ ମାନର ବ୍ୟକ୍ତିତ୍ବର ବିକାଶ ଗଠନ।

ଅବହେଳିତ ଓ ଆଳସ୍ୟ ମନୋଭାବ ମନୁଷ୍ୟ ଜୀବନର ସାରତତ୍ବକୁ ନଷ୍ଟ କରିଦିଏ।

ପ୍ରତ୍ୟେକ କାର୍ଯ୍ୟକୁ ଦାୟିତ୍ୱ ବୋଧର ଧ୍ୟାନମଗ୍ନରେ ତୁଲାଇବା, ଗମ୍ଭୀରତା , ବିଶ୍ଵାସ ର ସ୍ଥିରତାକୁ ଅବଲମ୍ବନ କରିବା।

ମେଳାପି ମନୋଭାବ ହୋଇ ପ୍ରତ୍ୟେକ ବ୍ୟକ୍ତିର ସମ୍ମାନ କରିବା।ପ୍ରତ୍ୟେକ ବ୍ୟକ୍ତିର ସୁଗୁଣକୁ ସମ୍ମାନ ସହ ଗ୍ରହଣ କରି ର୍ଦୂଗୁଣ କୁ ପ୍ରତ୍ୟାଖ୍ୟାନ କରିବା।

ଆପଣଙ୍କ ବ୍ୟକ୍ତିତ୍ଵ କୁ ବହୁ ଭାବରେ ପ୍ରଭାବିତ କରେ ଆପଣ ନିଜ ଶରୀର କୁ କେମିତି ଭାବରେ ଉପସ୍ଥାପନ କରୁଛନ୍ତି। ପ୍ରଥମ ଥର ଲୋକଟିଏ ଭେଟିଲେ ଆପଣଙ୍କ ବ୍ୟବହାର ପୂର୍ବରୁ ଏହାର ପ୍ରଭାବ ରହିଥାଏ ଓ ତେଣୁ ସବୁବେଳେ ନିଜକୁ ଉପସ୍ଥାପନ ଯୋଗ୍ୟ କରିବା ଉଚିତ୍। ସେଥିପ୍ରତି କିଛି ଧ୍ୟାନ ଦେବା ଆବଶ୍ୟକ।

-> ଶରୀର କୁ ପରିଷ୍କାର ପରିଚ୍ଛନ୍ନ ରଖିବା। ଗୋଟିଏ ଅପରିଷ୍କାର ଶରୀର ଲୋକଙ୍କ ପାଖରେ ଆପଣଙ୍କ ର ଖରାପ ପ୍ରତିଛବି ବନାଇ ଥାଏ ଆପଣ ଯେତେ ଭଲ ହୋଇନଥାନ୍ତୁ ନା କାହିଁକି। ଦାନ୍ତ, ନଖ ଇତ୍ୟାଦି ନିହାତି ସଫା ରହିବା ଆବଶ୍ୟକ କାହିଁକି ନା ଅନେକ ଲୋକ ମାନଙ୍କ ନଜର ପ୍ରଥମେ ନଖ ଓ ଦାନ୍ତ କୁ ଚାଲି ଯାଏ ଓ ଏହା ପରିଷ୍କାର ନଥିଲେ ଆପଣଙ୍କ ଛବି ବିଗାଡ଼ି ପାରେ।

-> ପରିଷ୍କାର ଓ ସ୍ଥାନୋପଯୋଗୀ ପୋଷାକ ପିନ୍ଧିବା। ପରିଷ୍କାର ପରିଚ୍ଛନ୍ନ ପୋଷାକ ଯେତିକି ଜରୁରୀ ସ୍ଥାନ ବିଶେଷ ରେ ଏହାର ପ୍ରଭେଦ ରଖିବା ସେତିକି ଜରୁରୀ। ମଦିର ହେଉ କି ଶିକ୍ଷାନୁଷ୍ଠାନ ହେଉ ଅବା ଅଫିସ୍ ମିଟିଂ ସବୁ ପାଇଁ ପୃଥକ୍ ପୃଥକ୍ ଉପଯୁକ୍ତ ଭାବର ପୋଷାକ ଅଛି ଓ କେତେକ ସ୍ଥାନ ରେ ନିଜର ସ୍ଵତନ୍ତ୍ର ପୋଷାକ ବା ୟୁନିଫର୍ମ ର ବ୍ୟବସ୍ଥା ଅଛି ଏହା ମଧ୍ୟ ଗୁରୁତ୍ୱପୂର୍ଣ୍ଣ। କଥା ଗୁଡ଼ିକ ବହୁତ ଛୋଟ ଲାଗୁଥାଇ ପାରେ କିନ୍ତୁ ଏହା ର ପ୍ରଭାବ ରହିଛି।

ଦ୍ଵିତୀୟ ରେ ଶରୀର ର ଭାବଭଙ୍ଗୀ ଆପଣଙ୍କ ବ୍ୟକ୍ତିତ୍ଵ କୁ ବହୁତ ପରିମାଣ ରେ ନିୟନ୍ତ୍ରଣ କରେ। ଭିନ୍ନ ସ୍ଥାନ ରେ , ଭିନ୍ନ ଭିନ୍ନ ଲୋକଙ୍କ ଗହଣ ରେ ଆପଣଙ୍କ ଶରୀର ର ଭାବଭଙ୍ଗୀ ହିଁ ଆପଣଙ୍କୁ ଅଲଗା କରି ତୋଳିବାରେ ସକ୍ଷମ ହୁଏ। ସାଙ୍ଗ ମାନଙ୍କ ସହ ଭାବଭଙ୍ଗୀ , ପିତା ମାତା ଙ୍କ ସହ ଭାବଭଙ୍ଗୀ , ଭାଇ ଭଉଣୀ ଙ୍କ ଆଗରେ ଭାବଭଙ୍ଗୀ ଓ ଅଫିସିଆଲ୍ ଭାବଭଙ୍ଗୀ ଅଲଗା ଥାଏ ଯାହାକି ଆପଣଙ୍କୁ ସ୍ଥାନ ଉପଯୋଗୀ ମଣିଷ ବନାଇଥାଏ। ଶରୀର ର ଭାବଭଙ୍ଗୀ ଉପରେ କେତୋଟି ପରାମର୍ଶ -

-> ଯେକୌଣସି ସ୍ଥାନ ରେ ହେଉ ମୁହଁ ରେ ଗୋଟିଏ ଛୋଟିଆ ହସ ଟିଏ ରଖନ୍ତୁ। ଆଉଥରେ କହି ରଖୁଛି ଓଠ ରେ ହସ ଟିଏ ଖାଲି ନୁହେଁ ସମ୍ପୂର୍ଣ ମୁହଁ ଟିରେ ଓଠ , ଗାଲ ଓ ଆଖି ରୁ ସ୍ମିତ ହାସ୍ୟ ଲାଗୁଥିବା ଦରକାର ଏହା ଏକ ସଂପୂର୍ଣ୍ଣ ଭିନ୍ନ ବିଷୟ ଏହା ପାଇଁ ଆଉ ଗୋଟେ ବ୍ଲଗ୍ ହୋଇ ପାରିବ। ତାଛଡ଼ା ସମୟ ଓ ସ୍ଥାନ ହିସାବରେ ଆପଣ ନିଜ ନିଜର ଅଭ୍ୟାସ ହିସାବରେ ହସି ପାରିବେ ସେଥିରେ କୌଣସି ଅସୁବିଧା ନାହିଁ। ହସିବା ଦ୍ଵାରା ଏଇୟା ହୁଏ ଯେ ନିଜର ଉପସ୍ଥାପନ ଶୈଳୀ ରେ ଅନେକ ଫରକ ଦେଖା ଯାଏ , ନିଜର ଆତ୍ମ ବିଶ୍ବାସ ବଢ଼ି ଥାଏ ଓ ସାମ୍ନା ବାଲାର ଆପଣଙ୍କ ପ୍ରତି ଏକ ଭଲ ଦୃଷ୍ଟିଭଙ୍ଗୀ ଆସେ। ନିଜର ବ୍ୟକ୍ତିଗତ ହିସାବରେ କହୁଛି ନିଜେ ହସିବା ଯୋଗୁଁ ମୁଁ ନିଜକୁ ଉପସ୍ଥାପନ କରିବାରେ ଅନେକ ସହଜ ମନେ କରେ।

-> ଦେହ କୁଣ୍ଢେଇ ହେବା , ବସିଥିବା ସ୍ଥାନ ରେ ଗୋଡ଼ ହଲେଇବା , ଶବ୍ଦ ସୃଷ୍ଟି କରି ହାଇ ମାରିବା , ନଖ କାମୁଡିବା , ସଭା ସମିତି ରେ ଶୋଇ ପଡ଼ିବା ଇତ୍ୟାଦି କୁ ଜନସମୁହ ରେ ଖରାପ ବ୍ୟକ୍ତିତ୍ଵ ର ଲକ୍ଷଣ ବୋଲି ଧରାଯାଏ।

-> ହାତ କୁ ଆପଣ କେମିତି ଛନ୍ଦି ଛିଡ଼ା ହୁଅନ୍ତି କି ପକେଟ୍ ରେ ପୁରେଇ ବସନ୍ତି ତାହା ବି ପରୋକ୍ଷ ଭାବରେ ଆପଣଙ୍କ ବ୍ୟକ୍ତିତ୍ଵ କୁ ଦର୍ଶାଇ ଦେଇଥାଏ ଯେ ଆପଣ ଏହି ବିଷୟ ପ୍ରତି କେତେ ଅବଗତ।

ତୃତୀୟ ରେ ଆମେ କାହା ସହ କମୁନିକେଟ କଲା ସମୟରେ କେଉଁ କେଉଁ ବିଷୟରେ ଧ୍ୟାନ ଦେଲେ ଅପଣଙ୍କ ବ୍ୟକ୍ତିତ୍ଵ ସୁନ୍ଦର ଲାଗିବ। କିଛି କିଛି ଲୋକଙ୍କ ସହ ବହୁତ ସମୟ କଥା ହେଲା ସମୟରେ କାହିଁକି ଭଲ ଲାଗେ ଆଉ କିଛି ଲୋକଙ୍କ ସହ ଦୁଇ ମିନିଟ୍ କଥା ରେ ଆପଣଙ୍କ ଇଚ୍ଛା ପଳାଇ ଥାଏ।

->ଦେଖା ହେବା ସମୟରେ ସ୍ବାଗତ କରି ନମସ୍କାର / ହ୍ୟାଲୋ ଇତ୍ୟାଦି କହିବା ଉଚିତ୍ ଓ ସାମ୍ନା ଲୋକ ସହ ସମ୍ପର୍କ ହିସାବରେ କର ମର୍ଦନ / ଆଲିଙ୍ଗନ /ପାଦ ଛୁଇଁ ପ୍ରଣାମ / ହାତ ଯୋଡ଼ି ନମସ୍କାର ଆଦି ଗୁରୁତ୍ୱପୂର୍ଣ୍ଣ।

->ଏଥିରେ ବି ଶରୀର ର ଭାବଭଙ୍ଗୀ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରେ। ମୁହଁ ରେ

ଛୋଟ ହସ ଟିଏ ଆପଣଙ୍କ କମ୍ୟୁନିକେସନ କୁ ଆହୁରି ସୁନ୍ଦର କରାଏ।-

> କମ୍ୟୁନିକେସନ ସମୟରେ ଆଖିର ସଠିକ୍ ବ୍ୟବହାର ଆପଣଙ୍କ ବ୍ୟକ୍ତିତ୍ଵ କୁ ଆହୁରି ସୁନ୍ଦର କରିଥାଏ। କଥା ହେଉଥିବା ସମୟରେ ସଠିକ୍ ଭାବରେ ଆଖି ମିଳାଇ କଥା ହେବା ମଧ୍ୟ ଗୋଟେ କଳା ଯାହା ମୋତେ ବ୍ୟକ୍ତିଗତ ଭାବରେ ମୋ ପାଖରେ ଅଭାବ ପରିଲକ୍ଷିତ ହୁଏ। କଥା ହେଉଥିବା ସମୟରେ କିଛି ଲୋକ ମାନେ ବଡ଼ ବଡ଼ ଆଖି କରି ଅନେଇ ରହିଥାନ୍ତି ଓ ଆଉ କିଛି ଜଣ ନ ମୁହଁ କୁ ନ ଅନେଇପାରି ଏପଟେ ସେପଟେ ଅନାନ୍ତି ଉଭୟ ଘଟଣା । କଥା ହେଉଥିବା ସମୟରେ ବା କଥା ଶୁଣିବା ସମୟରେ ଆଖି ବି କଥା କହିବା ଓ ଶୁଣିବା ଏହାକୁ ଆକର୍ଷଣୀୟ କରାଇଥାଏ।

-> କଥାବାର୍ତ୍ତା ରେ ସ୍ପଷ୍ଟତା ଆଣନ୍ତୁ ଏହା ମଧ୍ୟ ବ୍ୟକ୍ତିତ୍ଵ ପାଇଁ ଏକ ଗୁରୁତ୍ବପୂର୍ଣ୍ଣ ଭୂମିକା ଗ୍ରହଣ କରେ। ଯାହାର ଏହି ସମ୍ବନ୍ଧୀୟ କିଛି ଅସୁବିଧା ଅଛି ତାହା ଅଲଗା କଥା କିନ୍ତୁ ଯେଉଁମାନଙ୍କ ଅସୁବିଧା ନାହିଁ ସେମାନେ ଶବ୍ଦ ଓ ବାକ୍ୟ ରେ ସ୍ପଷ୍ଟତା ଆଣିବା ଦ୍ଵାରା ତୁମ କଥା ବୋଧଗମ୍ୟ ହୁଏ ଓ ସବୁବେଳେ ସଠିକ୍ ଉଚ୍ଚାରଣ ମଧ୍ୟ ଗୁରୁତ୍ୱପୂର୍ଣ୍ଣ। ଯଦି ଇଂରାଜୀ ହେଉ କି ଅନ୍ୟ ଭାଷା ବ୍ୟବହାର କରୁଛନ୍ତି ଧ୍ୟାନ ରଖିବେ ଯେ ଏହା ଠିକ୍ ଅର୍ଥ ରେ ବ୍ୟବହୃତ ହେଉଛି ଓ ସଠିକ୍ ଉଚ୍ଚାରଣ ହେଉଛି।ଆପଣଙ୍କ ବ୍ୟକ୍ତିତ୍ଵ ଏହି ସବୁ ଛୋଟ ଛୋଟ ଜିନିଷ ପାଇଁ ପରୋକ୍ଷ ଭାବରେ ଆକର୍ଷଣୀୟ ହୋଇଥାଏ।

-> ଆଉ ଏକ କଥା କେତେ କହିବାର ଅଛି ଆଉ କେତେ ଚୁପ୍ ରହିବାର ଅଛି ବ୍ୟକ୍ତିତ୍ଵ କୁ ସୁଦୃଢ଼ କରିବାର ଆଉ ଏକ କଳା। କିଛି ଲୋକ ବହୁତ ଅଧିକ ଅନାବଶ୍ୟକ ଗପି ଥାଆନ୍ତି ସେମାନଙ୍କ ପାଖକୁ ଯିବାକୁ ଲୋକ ମାନେ ପସନ୍ଦ କରନ୍ତି ନାହିଁ ଆଉ କିଛି କିଛି ଲୋକ ପୁରା ନୀରବ ରହନ୍ତି ସେ ମଧ୍ୟ ଏତେ ଆକର୍ଷଣୀୟ ବ୍ୟକ୍ତିତ୍ଵ ନଥାନ୍ତି। ତେଣୁ ଲୋକ ମାନଙ୍କ ଗହଣ ରେ କେତେ କହି କେତେ ମଜା କରି କେତେ ଚୁପ୍ ରହିବା ତାହା ମଧ୍ୟ ଏକ ଗୁରୁତ୍ଵ ବହନ କରେ। ସାମ୍ନା ଲୋକ ଟି କହୁଥିବା ସମୟରେ ତାଙ୍କ କଥା କୁ ଧର୍ଯ୍ୟ ରଖି ଶୁଣିବା ଉଚିତ୍ ତାପରେ ଆବଶ୍ୟକ ସ୍ଥଳେ ନିଜର ମତାମତ ହିଁ ଦେବା ଉଚିତ୍ ଆଉ ସେହି ବ୍ୟକ୍ତି କହୁଥିବା ସମୟରେ ଆପଣ ନିଜର ମୁହଁ ର ଭାବ ଭଙ୍ଗୀ ରୁ ତୁମେ ତାଙ୍କ କଥା ଶୁଣୁଛ ବୋଲି ବ୍ୟକ୍ତ କରିବା ମଧ୍ୟ ଏକ ଉତ୍ତମ ବ୍ୟକ୍ତିତ୍ଵ ର ଲକ୍ଷଣ।

-> କେହି ଆପଣଙ୍କୁ ସାହାଯ୍ୟ କଲେ ଧନ୍ୟବାଦ ଓ ଆପଣ କିଛି ଭୁଲ କଲେ କ୍ଷମା କରିବେ ଆପଣ ଙ୍କ ଦୈନନ୍ଦିନ ଜୀବନରେ ସଂଯୋଗ କରି ଦିଅନ୍ତୁ।

ପ୍ରଥମ ଥର ରେ ନିଜକୁ ସଂପୂର୍ଣ୍ଣ ଭାବରେ ଉପସ୍ଥାପନ କରି ଦିଅନ୍ତୁ ନାହିଁ , ନିଜକୁ ବଢ଼େଇ ଚଢ଼େଇ କହିବାରୁ ନିବୃତ ରୁହନ୍ତୁ , ସାମ୍ନା ଲୋକକୁ ନୀଚ ଦେଖାଇବା ବନ୍ଦ କରନ୍ତୁ । ଏମିତି କରିବା ଦ୍ୱାରା ବ୍ୟକ୍ତିତ୍ଵ ଆହୁରି ସୁନ୍ଦର ଲାଗିବ।

ନିଜର ଚରିତ୍ର ବା ପ୍ରକୃତ୍ତି ଯାହା ଆପଣଙ୍କ ବ୍ୟକ୍ତିତ୍ଵ ର ଆଧାର। ଉପରୋକ୍ତ ପରାମର୍ଶ କୁ ଆପଣ ବ୍ୟବହାର କରି କିଛି ସମୟ ପାଇଁ ନିଜର ବ୍ୟକ୍ତିତ୍ଵ ପ୍ରକାଶ କରି ପାରିବେ ହେଲେ ଯଦି ଆପଣ ନିଜର ଚରିତ୍ର ଓ ପ୍ରକୃତି ରେ ସୁଧାର ଆଣି ନାହାନ୍ତି ତେବେ ବ୍ୟକ୍ତିତ୍ଵ ବଳିଷ୍ଠ ହୋଇ ପାରିବ ନାହିଁ। କିଛି ଲୋକଙ୍କୁ କହିବାର ଶୁଣିଥିବେ ଲୋକଟା ଜମା ଏମିତି ଜଣା ପଡ଼େନି, ତା ସହ ମିଶିଲା ପରେ ଜଣା ପଡ଼ିଲା ଖାଲି ଚଇନି ଚିକଣ କଥା ହେଲେ ଲୋକ ଟା ବିରକ୍ତକର ତେବେ ଏହାର ଅର୍ଥ ଲୋକଟି କୃତ୍ରିମ ଉପାୟରେ ନିଜକୁ ଏକ ଭଲ ବ୍ୟକ୍ତିତ୍ଵ ରେ ଉପସ୍ଥାପନ କରି ଦେଇଛି କିନ୍ତୁ ସବୁ ସମୟରେ ଲୋକଟି ମାପି ଚୁପି ଚାଲି ପାରିବ ନାହିଁ ସେଥିପାଇଁ ସଂପୂର୍ଣ୍ଣ ବ୍ୟକ୍ତିଗତ ପ୍ରକୃତି ର ପରିବର୍ତ୍ତନ ଆବଶ୍ୟକ।

-> ଅଭିଯୋଗ ବାକ୍ସ ହୋଇ ବୁଲନ୍ତୁ ନାହିଁ। କିଛି ଲୋକ ଅଛନ୍ତି ଯେଉଁ ମାନେ ଚଳନ୍ତା ଅଭିଯୋଗ ବାକ୍ସ ପରି ବ୍ୟବହାର କରନ୍ତି ଓ ପ୍ରତିଟି କଥା ରେ ଦୋଷ ଦୁର୍ବଳତା ବାହାର କରନ୍ତି। ସମାଲୋଚନା କରିବା ଖରାପ ନୁହେଁ କିନ୍ତୁ ଏହାର ସମୟ ସ୍ଥାନ ଅଛି ପ୍ରତିଟି ସମୟରେ ଆପଣ ଦୋଷ ଦୁର୍ବଳତା ଦେଖିଲେ ଆପଣଙ୍କ ବ୍ୟକ୍ତିତ୍ଵ ନକାରାତ୍ମକ ଲାଗିବ। ତା ଅପେକ୍ଷା ଯଦି କଣ କଲେ ଆଉ ଅଧିକ ଭଲ ହୋଇପାରିବ ତାହା ଭାବିବା ଉଚିତ୍ ଓ ସେ ଲୋକକୁ ପରାମର୍ଶ ଦେବା ଉଚିତ୍ ଯଦି ସେ ତୁମ ପରାମର୍ଶ ଅପେକ୍ଷା କରୁଛି ତ।

କିଛି ଲୋକ ଅଛନ୍ତି ନା ସେମାନେ ନିଜେ ଶାନ୍ତି ରେ ବଞ୍ଚନ୍ତି ନା ଅନ୍ୟ ଲୋକ ମାନଙ୍କୁ ଶାନ୍ତି ରେ ବଞ୍ଚିବାକୁ ଦିଅନ୍ତି ତାଙ୍କ କଥା ରେ ମୁଣ୍ଡ ଖେଳାଇ। ସେଭଳି ଲୋକଙ୍କୁ ଲୋକ ପସନ୍ଦ କରନ୍ତି ନାହିଁ ତେବେ ଅନୁମାନ କରି ପାରୁଥିବେ ଲୋକ ମାନେ ତାଙ୍କ ବ୍ୟକ୍ତିତ୍ଵ କୁ କେମିତି ଭାବୁଥିବେ।

-> ସବୁବେଳେ ଲୋକଙ୍କ ଆଗରେ ନିଜର ଦୁଃଖ , ସେ କେତେ କଷ୍ଟ କରନ୍ତି ତାଙ୍କୁ କେତେ ଭଗବାନ ହଇରାଣ କରୁଛନ୍ତି ତାହା କୁହନ୍ତି। ହୁଏତ ଏହା ପ୍ରଥମ କେଇ ଥର ରେ ସମବେଦନା ଆଣି ଦେଇ ପାରେ ହେଲେ ଅଧିକ ହେଲେ ଲୋକ ମାନେ ଏହି ବ୍ୟକ୍ତିତ୍ଵ ଙ୍କ ପାଖକୁ ଆସିବାକୁ ପସନ୍ଦ କରନ୍ତି ନାହିଁ।ବାସ୍ତବିକ ହୋଇ ଲୋକଙ୍କ କଷ୍ଟ କୁ ବୁଝିପାରି ସହଭାଗୀ ହେବା କିମ୍ବା ସାହାଯ୍ୟ କରିବା , ଅନ୍ୟର କହୁଥିବା କଥା କୁ ଅନୁଭବ କରି ପାରିବା ଆଦି ଉତ୍ତମ ବ୍ୟକ୍ତିତ୍ଵ ର ଲକ୍ଷଣ।

ତୁଳନାତ୍ମକ ମନୋଭାବ ବହୁତ କୁତ୍ସିତ ରୂପ ନେଇଥାଏ‌। କେବେ ମଧ୍ୟ ନିଜକୁ ଅନ୍ୟସହ ତୁଳନା କରିବା ହୀନ ମାନ୍ୟତା ର ପରିଚୟ।କିଛି ଲୋକଙ୍କୁ ଦେଖିଲେ ମନ ରେ ଆସେ କାଳେ ମୁଁ ବି ଏମିତି ହୋଇ ଥାଆନ୍ତି ଏହା ହିଁ ହେଉଛି ଏକ ସୁନ୍ଦର ବ୍ୟକ୍ତିତ୍ଵ ର ଉଦାହରଣ। ସେହି ବ୍ୟକ୍ତିର ବ୍ୟକ୍ତିତ୍ଵ କୁ ସାଦର ଭାବେ ନିଜ ଭିତରେ ଗ୍ରହଣ କରିବା। ତାଙ୍କ ପ୍ରତି ଈର୍ଷା ଭାବ ରଖିବା ନାହିଁ। ବ୍ୟକ୍ତିତ୍ଵ ର ମୂଳ ମନ୍ତ୍ର ହେଉଛି ଆତ୍ମ ବିଶ୍ବାସ କିନ୍ତୁ ଗର୍ବ ନୁହେଁ। ଆତ୍ମ ବିଶ୍ବାସ ଓ ନିଜର ଛୋଟ ଛୋଟ ଦୁର୍ବଳତା କୁ ସଜାଡ଼ି ପାରିଲେ ଏକ ସୁନ୍ଦର ବ୍ୟକ୍ତିତ୍ଵ ଗଢ଼ି ହୋଇ ପାରିବା।

ପ୍ରତ୍ୟେକ ମନୁଷ୍ୟ ପାଖରେ ବ୍ୟକ୍ତିତ୍ବର ବହୁମୃଲ୍ୟବାନ ଉପାଦାନ ରହିଅଛି।ଯାହା ସଦମାର୍ଗରେ ପରିଚାଳିତ କରି ରଖିଲେ ଏକ ଆଦର୍ଶ ବ୍ୟକ୍ତିତ୍ବ ରୁପେ ପରିଗଣିତ ହୋଇ ରହିବେ।ଜ୍ଜଳନ୍ତ ଉଦାହରଣ ସୃଷ୍ଟି କରିପାରିବେ।

ମଧୁସ୍ମିତା ସାହୁ

ବ୍ରହ୍ମା ନଗର ପ୍ରଥମ ଗଳି

ବ୍ରହ୍ମପୁର

ଜିଲ୍ଲା-ଗଞ୍ଜାମ

ଓଡ଼ିଶା

ମୋ---୯୩୪୮୨୮୫୪୧୬

ବ୍ୟକ୍ତିତ୍ଵ ର ବିକାଶ

ବ୍ୟକ୍ତିତ୍ଵ ର ବିକାଶ