ବିଷୟ ପ୍ରବେଶ -

*****************

ମଣିଷ ହେଉଛି ଅନ୍ୟ ପ୍ରାଣୀ ମାନଙ୍କ ଠାରୁ ବୁଦ୍ଧିମନ୍ତ ପ୍ରାଣୀ। ସେ ସର୍ବଦା କ୍ଷମତା ଲୋଭି ହୋଇଥାଏ। ସଫଳତା ହାସଲ୍ କରିବାକୁ ନିଜକୁ ବିକଶିତ କରିବାକୁ ସେ ସର୍ବଦା ଚେଷ୍ଟିତ ଥାଏ।ସମାଜରେ ନିଜର ପ୍ରତିଷ୍ଠା ସ୍ଥାପନ କରିବାକୁ ସେ ଅବିରତ ପ୍ରୟାସ ଜାରି ରଖିଥାଏ। ଏସବୁ ନିମନ୍ତେ ନିଜ ବ୍ୟକ୍ତିତ୍ବର ବିକାଶ ବହୁ ଜରୁରୀ ହୋଇଥାଏ।ବ୍ୟକ୍ତିତ୍ବ ହିଁ ମଣିଷ କୁ ଯୋଗ୍ୟ ଓ ସଭ୍ୟ କରାଇଥାଏ। ବ୍ୟକ୍ତିତ୍ବ ଏକ ପାହାଚ ପରି ହୋଇଥାଏ। ସମୟର ଅଗ୍ରଗତି ସହ ଏହା ଉଚ୍ଚତର ହୋଇ ଥାଏ କିମ୍ବା ନିଚତର ହୋଇଥାଏ। ଏହା ଏକ ପରିବର୍ତ୍ତନଶୀଳ ପ୍ରକ୍ରିୟା। ଇତିହାସ ଅଧ୍ଯୟନ ରୁ ଅନେକ ଉତ୍କୃଷ୍ଟ କିମ୍ବା ନିତ୍କୃଷ୍ଟ ଵ୍ୟକ୍ତିତ୍ବ ବିଶିଷ୍ଟ ମନୁଷ୍ୟ ସମ୍ବନ୍ଧରେ ଜାଣି ପାରିଥାଉ। ବ୍ୟକ୍ତିତ୍ବ ଅନେକ କାରକ ଉପରେ ନିର୍ଭରଶୀଳ। ବ୍ୟକ୍ତିତ୍ବ ମୁଖ୍ୟତଃ ଦୁଇ ପ୍ରକାରର ହୋଇଥାଏ । ଯଥା ବାହ୍ୟ ବ୍ୟକ୍ତିତ୍ବ ଓ ଅନ୍ତଃ ବ୍ୟକ୍ତିତ୍ବ। ଉଭୟ ବ୍ୟକ୍ତିତ୍ବ ଅନେକ କାରକ ଉପରେ ପର୍ଯ୍ୟବେସିତ। ଛତ୍ରପତି ଶିବାଜି, ସ୍ବାମୀ ବିବେକାନନ୍ଦ, ମହାତ୍ମାଗାନ୍ଧୀ ଆଦି ଉଚ୍ଚ ବ୍ୟକ୍ତିତ୍ବ ସମ୍ପନ୍ନ ହୋଇଥିବା ବେଳେ ହିଟଲର୍, ମୁସୋଲିନି ଆଦି ବ୍ୟକ୍ତି ଙ୍କ ଠାରେ ନିକୃଷ୍ଟ ବ୍ୟକ୍ତିତ୍ବ ଦେଖିବାକୁ ମିଳିଥାଏ। ଆମେ ଯେତେବେଳେ ଗୋଟେ ବ୍ୟକ୍ତି କୁ ଅନୁସରଣ କରନ୍ତି ସେତେବେଳେ ଆମେ ତାର ବ୍ଯକ୍ତିତ୍ବ ଉପରେ ବହୁ ପ୍ରଭାବିତ ହୋଇଥାନ୍ତି। ବ୍ୟକ୍ତିର ବ୍ୟକ୍ତିତ୍ବ ହିଁ ନିଜ ଆଡକୁ ଆକର୍ଷଣ କରିବାରେ ସାହାଯ୍ୟ କରିଥାଏ। ବ୍ୟକ୍ତିତ୍ବ ହିଁ ବ୍ୟକ୍ତି କୁ ଯୋଗ୍ୟ କିମ୍ବା ଅଯୋଗ୍ୟ ର ଉପାଧି ପ୍ରଦାନ କରିଥାଏ। ସମାଜରେ ବଞ୍ଚିବା ପାଇଁ, ତିଷ୍ଠିବା ପାଇଁ ବ୍ୟକ୍ତିତ୍ବ ହିଁ ଗୁରୁତ୍ବପୂର୍ଣ୍ଣ ହୋଇଥାଏ। ଉଦାହରଣ ସ୍ବରୂପ ଆମେ ମହାତ୍ମା ଗାନ୍ଧିଜୀ ଙ୍କୁ ଅନୁସରଣ କରିଥାଉ ।ଏହାର ଅର୍ଥ ଆମେ ମହାତ୍ମା ଗାନ୍ଧୀଙ୍କ ବ୍ୟକ୍ତିତ୍ବ ଦ୍ବାରା ପ୍ରଭାବିତ। ଗୋଟିଏ ଯୋଗ୍ୟ ବ୍ୟକ୍ତି ହେବା ପାଇଁ ବ୍ୟକ୍ତିତ୍ବ ବିକାଶ ନିହାତି ଆବଶ୍ୟକ ହୋଇଥାଏ। ବ୍ୟକ୍ତିତ୍ବ ବିକାଶ ନିମନ୍ତେ ଅନେକ ମାର୍ଗ ଅବଲମ୍ବନ କରିବା ଜରୁରୀ ହୋଇଥାଏ।

ବ୍ୟକ୍ତିତ୍ବ କୁ ଦୁଇ ଭାଗରେ ବିଭାଜନ କରା ଯାଇପାରିବ। ବାହ୍ୟ ବ୍ୟକ୍ତିତ୍ବ ଓ ଅନ୍ତଃ ବ୍ୟକ୍ତିତ୍ବ। ଉଭୟ ବ୍ୟକ୍ତିତ୍ବ ର ବିକାଶ ନିମନ୍ତେ ଉପଯୁକ୍ତ ମାର୍ଗ ବା ପନ୍ଥା ରହିଅଛି। ସେଗୁଡିକ ନିମ୍ନ ରେ ବର୍ଣ୍ଣନା କରାଗଲା।

ବାହ୍ୟ ବ୍ୟକ୍ତିତ୍ବ କୁ ଅନ୍ତଃ ବ୍ୟକ୍ତିତ୍ବ ହିଁ ବିକଶିତ କରିବାରେ ସାହାଯ୍ୟ କରିଥାଏ। ପରସ୍ପର ପରସ୍ପର ଉପରେ ନିର୍ଭରଶୀଳ ହୋଇ ରହିଥାନ୍ତି।

ବାହ୍ୟ ବ୍ୟକ୍ତିତ୍ବ ବାହାରକୁ ଦୃଶ୍ୟ ହୋଇଥାଏ ।ଏହା ବ୍ୟକ୍ତିର ଶକ୍ତି କୁ ସୂଚାଇ ଥାଏ। ବ୍ୟକ୍ତିର ବ୍ୟକ୍ତିତ୍ବ କୁ ତିର ଅନ୍ତଃ ବ୍ୟକ୍ତିତ୍ବ କୁ ଦୃଷ୍ଟିରେ ରଖି ନିରୂପଣ କରାଯାଇଥାଏ।

ବର୍ହି ବ୍ୟକ୍ତିତ୍ବ ବିକାଶ ନିମନ୍ତେ ପରାମର୍ଶ-

*****************************************

୧) ସମ୍ପତ୍ତି ବା ଧନ ର ଉପାର୍ଜନ ଉପରେ ଗୁରୁତ୍ୱ ପ୍ରଦାନ କରିବା।-

------------------------------------------------

ମଣିଷ ର ଜୀବନ ହେଉଛି ସଂଘର୍ଷ ମୟ ଜୀବନ । ଗରିବ ହେଉ ବା ଧନୀ ପ୍ରତ୍ୟେକ ଲୋକ ବଞ୍ଚିବା ପାଇଁ ସଂଘର୍ଷ କରିଥାଏ। ଏଥିପାଇଁ ଲୋଡା ହୁଏ ତାକୁ ଅର୍ଥ। ଆଜିର ପୁଞ୍ଜିବାଦୀ ସମାଜରେ ଟଙ୍କା ର ମୂଲ୍ୟ ବହୁ ଉପରେ। ଖାଦ୍ୟ , ବସ୍ତ୍ର ଓ ବାସଗୃହ ମଣିଷ ର ପ୍ରମୁଖ ମୌଳିକ ଆବଶ୍ୟକତା। ମାତ୍ର ଟଙ୍କା ର ସ୍ଥାନ ମଧ୍ୟ ଏମାନଙ୍କ ଠାରୁ ଉପରେ। ଟଙ୍କା, ଅଧୁନା ସମୟରେ ବ୍ୟକ୍ତି ର ମୌଳିକ ଆବଶ୍ୟକତା ହୋଇଯାଇଛି। ଆଜିର ସମୟରେ ମଣିଷ ବଞ୍ଚିବାକୁ ହେଲେ ବା ତିଷ୍ଠିଵାକୁ ହେଲେ ଟଙ୍କାର ଭୂମିକା ବହୁ ଗୁରୁତ୍ୱପୁର୍ଣ୍ଣ। ଆମେ ଅନେକ ସମୟରେ ଦେଖିବାକୁ ପାଇଛନ୍ତି ଯେ ବଡ ବଡ ଉଚ୍ଚ ପଦବୀ ଧାରି ଲୋକ ବା ସେଲିବ୍ରିଟି କୌଣସି ରୋଗ ର ଚିକିତ୍ସା ପାଇଁ ବଡ ବଡ ଚିକିତ୍ସାଳୟରେ ଭର୍ତ୍ତି ହୋଇଥାନ୍ତି। ବହୁ ଅର୍ଥ ରାଶି ବ୍ୟୟ କରି ନିଜକୁ ସୁସ୍ଥ କରି ପାରିଥାନ୍ତି। ମାତ୍ର ଏକ ଗରିବ ,ଅର୍ଥ ଅଭାବରୁ ଉପଯୁକ୍ତ ଚିକିତ୍ସା ନ ପାଇ ଛୋଟ ରୋଗରେ ମଧ୍ୟ ମୃତ୍ୟୁ ବରଣ କରି ଦେଉଛି। ତେଣୁ ଅର୍ଥ ର ବା ଟଙ୍କାର ଭୂମିକା ଗୁରୁତ୍ବପୂର୍ଣ୍ଣ। ସମାଜ ସେହି ବ୍ୟକ୍ତି କୁ ପ୍ରାଧାନ୍ୟ ଦେଇଥାଏ, ଯାହା ପାଖରେ ପ୍ରଚୁର ପରିମାଣରେ ଟଙ୍କା ଥାଏ। ଟଙ୍କା ଦ୍ବାରା ବ୍ୟକ୍ତିର ବ୍ୟକ୍ତିତ୍ବ ଦୃଢ ବା ଶକ୍ତିଶାଳୀ ହୋଇଥାଏ। ତେଣୁ ଟଙ୍କା ବା ଧନ ର ଉପାର୍ଜନ କରିବା ଏକ ଦୃଢ ବ୍ୟକ୍ତିତ୍ବ ର ପରିଚୟ ଦେଇଥାଏ। ଟଙ୍କା ଉପାର୍ଜନ ର ମାଧ୍ୟମ ମଧ୍ୟ ବ୍ୟକ୍ତି ର ବ୍ୟକ୍ତିତ୍ବ କୁ ବହୁ ପ୍ରଭାବିତ କରିଥାଏ।ମୁକେଶ୍ ଅମ୍ବାନି ,ବିଲ୍ ଗେଟସ୍, ଆଦାନୀ ଆଦି ବ୍ୟକ୍ତି ଗଣ ଙ୍କ ବ୍ୟକ୍ତିତ୍ବ ସେମାନଙ୍କ ଉପାର୍ଜିତ ଧନ ଉପରେ ନିର୍ଭର କରିଥାଏ। ଉପଯୁକ୍ତ ମାର୍ଗରେ ଧନ ର ଉପାର୍ଜନ ବ୍ୟକ୍ତିତ୍ବ ଦୃଢ ଏବଂ ବିକଶିତ କରିଥାଏ।

୨) ଶକ୍ତିଶାଳୀ ଲୋକଙ୍କ ସହ ସଂପର୍କ ସ୍ଥାପନ କରିବା-

-----------------------------------------

ସଂପର୍କ ବ୍ୟକ୍ତି କୁ କ୍ଷମତା ପ୍ରଦାନ କରିଥାଏ। ଆମେ ସମସ୍ତେ ଜାଣିଛନ୍ତି ଯେ ରାଜନେତା ହେଉ ବା ଫିଲ୍ମ ତାରକା , ଖେଳାଳି ହେଉ ବା ଉଚ୍ଚ ପଦସ୍ତ କର୍ମଚାରୀ ହେଉ , ସେମାନଙ୍କ ଗୁରୁତ୍ବ ସାଧାରଣ ଲୋକ ଙ୍କ ଠାରୁ ଅଧିକା ହୋଇଥାଏ। ଯଦି କୌଣସି ସାଧାରଣ ବ୍ୟକ୍ତି , ଯାହା ର ଆୟ ସ୍ବଳ୍ପ ହୋଇଥାଏ ବା ଜୀବନ ଧାରଣର ମାନ ନିମ୍ନ ହୋଇଥାଏ , ସେ ଯଦି କୌଣସି ରାଜନେତା ସହ ସଂପର୍କ ସ୍ଥାପନ କରେ ତେବେ ସେ ମଧ୍ୟ କ୍ଷମତାଶାଳୀ ବା ପ୍ରଭାଵ ଶାଳୀ ମନେ ହୋଇଥାଏ। କଲେଜ୍ ବା ସ୍କୁଲ ରେ ପାଠ ପଢୁଥିବା ଜଣେ ଦୁର୍ବଳ ପିଲା ଯଦି ଶକ୍ତିଶାଳୀ ପିଲା ଙ୍କ ସହ ସଂପର୍କ ରଖେ ତେବେ ସେ ଦୁର୍ବଳ ହେବା ସତ୍ତ୍ୱେ ବି ସବଳ ହୋଇଥାଏ। ତେଣୁ ସଂପର୍କ ବ୍ୟକ୍ତି ର ବ୍ୟକ୍ତିତ୍ବ କୁ ବହୁ ପ୍ରଭାବିତ କରିଥାଏ। ଅର୍ଥ ଠାରୁ ସଂପର୍କ ଅଧିକ ପ୍ରଭାବଶାଳୀ ବ୍ୟକ୍ତିତ୍ବ ସ୍ଥାପନ କରିପାରିଥାଏ।

୩) ନିଜର ଦକ୍ଷତା କୁ ପରିପ୍ରକାଶ କରିବା-

---------------------------------

ଆମେ ପିଲା ବେଳେ ପର୍ବତ ଏବଂ ଗୁଣ୍ଡୁଚି ମୂଷା ସମ୍ବନ୍ଧରେ ଏକ କାହାଣୀ ଶୁଣିଥିଲେ । ପର୍ବତ ଟିଏ ନିଜର ବିଶାଳତାକୁ ନେଇ ଗୁଣ୍ଡୁଚି ମୂଷା ଉପରେ ଉପହାସ କରିଛି।ମାତ୍ର ଅନ୍ତିମ ରେ ପର୍ବତ ନିଜେ ଉପହାସର ପାତ୍ର ପାଲଟି ଯାଇଛି, ଯେତେବେଳେ ଗୁଣ୍ଡୁଚି ମୂଷା ତାକୁ ଏକ ବାଦାମର ଚୋପା ଛଡେଇବାକୁ କହିଛି। ଏହି କାହାଣୀ ମାଧ୍ୟମରେ ଏହି ଶିକ୍ଷା ଦିଆଯାଇଅଛି ଯେ ପ୍ରତ୍ୟେକ ଙ୍କ ପାଖରେ କିଛି ବିଶେଷ ଓ ସ୍ବତନ୍ତ୍ର ଦକ୍ଷତା ବା କ୍ଷମତା ରହିଥାଏ। ଜଣେ ଭଲ ଗାୟକ ହୋଇଥିବା ବେଳେ ଜଣେ ଭଲ ଖେଳାଳି ହୋଇଥାଏ, ଜଣେ ଭଲ ରାଜନେତା ହୋଇଥିବା ବେଳେ ଜଣେ ଭଲ ଚିତ୍ରକର ହୋଇଯାଏ। ବ୍ୟକ୍ତି ଟିଏ ନିଜର ଦକ୍ଷତା କୁ ଅନ୍ୟ ଆଗରେ ଉପସ୍ଥାପନ କରି ନିଜ ବ୍ୟକ୍ତିତ୍ବ ର ବିକାଶ ଲାଭ କରିପାରିଥାଏ। ବ୍ୟକ୍ତିତ୍ବ ବିକାଶ ପାଇଁ ସୁନ୍ଦର ଦେଖାଯିବା ,ପାଖରେ ଧନ ଥିବା ଆବଶ୍ୟକ ହୋଇନ ଥାଏ, ନିଜର କ୍ଷମତା ଓ ଦକ୍ଷତା ମାଧ୍ୟମରେ ମଧ୍ୟ ନିଜର ବ୍ୟକ୍ତିତ୍ଵ ବିକଶିତ ହୋଇଥାଏ।

୪) ଅନ୍ୟ ମାନଙ୍କ ସହ ଯୋଗାଯୋଗ କୁ ଉନ୍ନତ କରିବା-

-----------------------------------------

ସମାଜରେ ଅନେକ ବ୍ୟକ୍ତି ରହିଥାନ୍ତି ଯେଉଁମାନେ ନିଜର କଥା ମାଧ୍ୟମରେ ଅନ୍ୟକୁ ପରିବର୍ତ୍ତନ କରି ପାରିଥାନ୍ତି‌। ଭୂଲ୍ ତଥ୍ୟକୁ ମଧ୍ୟ ଉପଯୁକ୍ତ ତର୍କ ମାଧ୍ୟମରେ ସଠିକ୍ ଭାବେ ଉପସ୍ଥାପନା କରିବାର କ୍ଷମତା ଏହି ପ୍ରଭାବଶାଳୀ ବ୍ୟକ୍ତି ଙ୍କ ପାଖରେ ରହିଥାଏ। ଭଲଭାବେ ଯୋଗାଯୋଗ ସ୍ଥାପନ‌ କରୁଥିବା ଲୋକମାନେ ଶକ୍ତିଶାଳୀ ରାଜନେତା ବା ବିଜନେସ ମେନ୍ ହୋଇ ପାରିଥାନ୍ତି। ଉଚିତ୍ ସମୟରେ ଉଚିତ୍ ମନ୍ତବ୍ୟ ଦେବା , ଅନ୍ୟ ସମ୍ମୁଖରେ କୌଣସି ବିଷୟ କୁ ଉପସ୍ଥାପନା କରିବା ଏକ ଉଚ୍ଚ ବ୍ୟକ୍ତିତ୍ବ ସମ୍ପନ୍ନ ବ୍ୟକ୍ତି ର ପରିଚୟ ହୋଇଥାଏ। ଏହା ମଧ୍ୟ ବାହ୍ୟ ବ୍ୟକ୍ତିତ୍ବ ବହୁ ପ୍ରଭାବିତ କରିଥାଏ। ଉଦାହରଣ ସ୍ବରୂପ ଜଣେ ରାଜନେତା ପାଖରେ କୌଣସି ଉଚ୍ଚ ଶିକ୍ଷାଗତ ଯୋଗ୍ୟତା ନଥାଏ। ଦେଶ ,ରାଜ୍ୟ ସଂପର୍କରେ କୌଣସି ଜ୍ଞାନ ନଥାଏ ,ତଥାପି ସେ ଏପରି ଭାବେ ନିଜର ମନ୍ତବ୍ୟ ଉପସ୍ଥାପନା କରେ ଯାହା ଅନ୍ୟ ମାନଙ୍କ ଉପରେ ବିଶେଷ ପ୍ରଭାବ ପକେଇଥାଏ। ତେଣୁ ଯୋଗାଯୋଗ ସ୍ଥାପନ ମଧ୍ୟ ଏକ ବ୍ୟକ୍ତିତ୍ବ ବିକାଶର ମୁଖ୍ୟ କାରକ ହୋଇଥାଏ।

୫) ସୁନ୍ଦରତା ଉପରେ ଗୁରୁତ୍ୱ ପ୍ରଦାନ କରିବା।-

-----------------------------------------

ସୁନ୍ଦର ଦେଖା ହେବା ମଧ୍ୟ ବ୍ୟକ୍ତିତ୍ବ ବିକାଶ ରେ ସହାୟକ ହୋଇଥାଏ।ଝିଅ ହେଉ ଅବା ପୁଅ , ସୁନ୍ଦର ଦେଖାଯିବା ଦ୍ବାରା ଅନ୍ୟ ମାନଙ୍କୁ ଆକର୍ଷଣ କରିବାରେ ସହାୟକ ହୋଇଥାଏ। ସୁନ୍ଦରତା ଦ୍ବାରା ଅନ୍ୟ ମାନଙ୍କ ସହିତ ସଂପର୍କ ସୃଦୃଢ଼ କରାଯାଇପାରିଥାଏ। ସୁନ୍ଦରତା ବୃଦ୍ଧି ନିମନ୍ତେ ବିଭିନ୍ନ ପ୍ରକାରର ଉପାୟ ରହିଅଛି। ଆର୍ଥିକ କ୍ଷମତା , ସଂପର୍କ ସ୍ଥାପନ, ଯୋଗାଯୋଗ କ୍ଷମତା , ଅନ୍ତଃ ଦକ୍ଷତା ପ୍ରଦର୍ଶନ ଭଳି ସୁନ୍ଦରତା ମଧ୍ୟ ଅନ୍ୟ ମାନଙ୍କୁ ବିଶେଷ ପ୍ରଭାବିତ କରିଥାଏ।ଯଦି କୌଣସି ପୁଅ କିମ୍ବା ଝିଅ ସୁନ୍ଦର ହୋଇଥାନ୍ତି, ତେବେ ସେମାନଙ୍କ ପାଖରେ ଧନ ବଳ କିମ୍ବା ବାହୁବଳ ନଥିବା ସତ୍ତ୍ୱେ ସେମାନଙ୍କ ବଚନ ର ଓଜନ ରହିଥାଏ। ସେମାନଙ୍କ କଥା କୁ ଅନ୍ୟମାନେ ଗୁରୁତ୍ୱାରୋପ କରିବା ସହ ସେମାନଙ୍କ ପ୍ରତି ଯତ୍ନଶୀଳ ମଧ୍ୟ ହୋଇଥାନ୍ତି। ଏହା ଆମର ବାହ୍ୟ ବ୍ୟକ୍ତିତ୍ବ କୁ ପ୍ରଭାବିତ କରିଥାଏ। ସୁନ୍ଦରତା ହେବା ପ୍ରାକୃତିକ ହୋଇଥାଏ। ଏହି ଗୁଣ ପ୍ରତ୍ୟେକ ଙ୍କ ପାଖରେ ନଥାଏ, ମାତ୍ର ଆଜିର ବୈଜ୍ଞାନିକ ପଦ୍ଧତିରେ ଅନେକ କାର୍ଯ୍ୟ ସମାପନ କରାଯାଇ ହେଉଛି‌।ଏହି ଶ୍ରେଣୀର ବ୍ୟକ୍ତି ମାନେ ସୁନ୍ଦରତା ମାଧ୍ୟମରେ ନିଜର ଦୃଢ ବ୍ୟକ୍ତିତ୍ବ ପ୍ରଦର୍ଶନ କରିଥାନ୍ତି।

ଅନ୍ତଃ ବ୍ୟକ୍ତିତ୍ବ ବିକାଶ ନିମନ୍ତେ ପରାମର୍ଶ-

****************************************

୬) ସୁଦୃଢ ମାନସିକତା ବଜାୟ ରଖିବା -

--------------------------------

ଏହା ଏକ ମୁଖ୍ୟ ଅନ୍ତଃ ବ୍ୟକ୍ତିତ୍ବ ବିକାଶର ଲକ୍ଷଣ।ଏହା ବ୍ଯକ୍ତି କୁ ଅସାଧ୍ୟ କାର୍ଯ୍ୟ କୁ ସାଧ୍ୟ କରିବାରେ ସାହାଯ୍ୟ କରିଥାଏ ।ଏହା ଦ୍ବାରା ବ୍ୟକ୍ତିର ବ୍ୟକ୍ତିତ୍ବ ବହୁ ପରିମାଣରେ ବିକଶିତ ହୋଇ ପାରିଥାଏ। ଆମେରିକାର ସବୁଠାରୁ ବଡ କମ୍ପାନୀ 'ଆପଲ୍' ର ପ୍ରତିଷ୍ଠାତା ଷ୍ଟିଭ୍ ଜବ୍ ଏହି କଂପାନୀ କୁ ଗୋଟିଏ ଗ୍ୟାରେଜ୍ ରୁ ଆରମ୍ଭ କରିଥିଲେ ।ଅନେକ ଯନ୍ତ୍ରଣା, ସଂଘର୍ଷ ସହ୍ୟ କରି କରି ଶେଷରେ ଠିଆ କରେଇ ପାରିଥିଲେ ଏହି କଂପାନୀ କୁ।ମାତ୍ର ଯେତେବେଳେ ଚକ୍ରାନ୍ତ କରି ନିଜ କଂପାନୀ ରୁ ତାଙ୍କୁ ବାହାର କରିଦିଆଗଲା, ସେତେବେଳେ ସେ ଭାଙ୍ଗି ପଡିଥିଲେ ସତ କିନ୍ତୁ ନିଜ ଲକ୍ଷ୍ୟ ପଥରୁ ଓହରି ନଥିଲେ।ସେ ଲାଗି ପଡିଥିଲେ ପୁଣି ନୂତନ କଂପାନୀ ପ୍ରତିଷ୍ଠା ରେ ।ସଫଳ ମଧ୍ୟ ହେଲେ। ପରବର୍ତ୍ତୀ ସମୟରେ ଆପଲ୍ କଂପାନୀକୁ ମଧ୍ୟ ଫେରିପାଇଥିଲେ। ଏପରି କେବଳ ଦୃଢ ମାନସିକତା ଯୋଗୁଁ ସମ୍ଭବ ପର ହେଲା । ସବୁ କିଛି ହରେଇଥିବା ବ୍ୟକ୍ତିକୁ ପୁନର୍ବାର ସବୁକିଛି ପ୍ରଦାନ କରିବାକୁ ଏହା ସାହାଯ୍ୟ କରିଥାଏ।

୭) ସାହସ , ଯତ୍ନଶୀଳତା , ଦୃଢ ମନୋଭାବ ପ୍ରଦର୍ଶନ କରିବା -

----------------------------------------------

ଭାରତୀୟ କ୍ରିକେଟ୍ ଜଗତର ଭଗବାନ ସଚୀନ୍ ତେନ୍ଦୁଲକର ଯେତେବେଳେ ସତର ବର୍ଷ ବୟସରେ ଖେଳିବା ଆରମ୍ଭ କଲେ , ସେତେବେଳେ କ୍ରିକେଟ କୁ ବହୁତ୍ ନିନ୍ଦା କରାଯାଇଥିଲା। ଅଳ୍ପ ବୟସ ରେ କ୍ରିକେଟ୍ ରେ ପଦାର୍ପଣ ଲୋକଙ୍କ ପାଇଁ ଗ୍ରହଣୀୟ ନଥିଲା।ମାତ୍ର ସେ ନିଜ ର ଖେଳ ପ୍ରଦର୍ଶନ ମାଧ୍ୟମରେ ସମସ୍ତଙ୍କ ସନ୍ଦେହ କୁ ଦୂର କରିପାରିଥିଲେ। ଏହା ହୋଇପାରିଥିଲା ତାଙ୍କର ସାହସ ବ୍ୟକ୍ତିତ୍ବ ପାଇଁ। ହଲିଉଡ୍ ରେ କ୍ୟାପଟେନ ଆମେରିକା ଚରିତ୍ର ସହ ଆମେ ପରିଚିତ ହୋଇଛନ୍ତି। ପ୍ରାଥମିକ ପର୍ଯ୍ୟାୟରେ ସେ ବହୁତ୍‌ ପତଳା ଓ ଦୁର୍ବଳ ଥିଲେ ମାତ୍ର ଦେଶର ସୁରକ୍ଷା କରିବାକୁ ସେ ଦୃଢ ନିଷ୍ପତ୍ତି ନେଇଥିଲେ।ଏକଦା ମିଲିଟାରି ଟ୍ରେନିଂ ସମୟରେ ଟ୍ରେନିଂ ଦାୟିତ୍ୱ ରେ ଥିବା ଅଫିସର ଏକ ନକଲି ଗ୍ରେନେଡ୍ କୁ ଫିଙ୍ଗି ଦେଇ ଚିତ୍କାର କରିଲେ ,ଏହା ଦେଖି ଅନ୍ୟ ସୈନିକ ମାନେ ସେଠାରୁ ଦୌଡି ପଳାୟନ କଲେ ,ମାତ୍ର ସେହି ପତଳା ଓ ଦୁର୍ବଳ ସୈନିକ ଟି ଗ୍ରେନେଡ୍ ଉପରେ ଶୋଇପଡି ଅନ୍ୟ ମାନଙ୍କୁ ସୁରକ୍ଷା ପ୍ରଦାନ କରିବାକୁ ଲାଗିଲା। ତାର ଏପରି ସାହସ , ଦୃଢତା ଓ ଯତ୍ନଶୀଳତା ପାଇଁ ସେ ଆର୍ମିରେ ଚୟନ ହୋଇପାରିଥିଲେ। ଏହି ବିଷୟ ଟି କାଳ୍ପନିକ ହେଲେ ବି ଏକ ଉଚ୍ଚ ବ୍ୟକ୍ତିତ୍ବ ର ଦୃଷ୍ଟାନ୍ତ ଦେଖାଇଥାଏ।

୮) ନିଜ ର ଚରିତ୍ର କୁ ବିକଶିତ କରିବା-

----------------------------

ଚରିତ୍ର କୁ ବିକଶିତ କରିବା ଓ ଦୃଢ କରିବା , ଆମକୁ ଏକ ସୁଦୃଢ ବ୍ୟକ୍ତିତ୍ବ ପ୍ରଦାନ କରିଥାଏ।ଆମେ ସମସ୍ତେ ଭାରତ ର ମହାନ ବୈଜ୍ଞାନିକ ଓ ରାଷ୍ଟ୍ରପତି ଏପିଜି ଅବଦୁଲ କଲାମ ବିଷୟରେ ଜାଣିଛନ୍ତି। ସେ ବହୁ ଲୋକ ପ୍ରିୟ ଥିଲେ । ଲୋକପ୍ରିୟତା ସେ ବୈଜ୍ଞାନିକ କିମ୍ବା ରାଷ୍ଟ୍ରପତି ପଦବୀ ପାଇଁ ନୁହେଁ। ସେ ଲୋକପ୍ରିୟ ହୋଇପାରିଛନ୍ତି କେଵଳ ତାଙ୍କ ଦୃଢ ଚରିତ୍ର ପାଇଁ।ସେ ବହୁ ଦୟାଳୁ ଥିଲେ , ଶିକ୍ଷାକୁ ଗୁରୁତ୍ବ ଦେଉଥିଲେ , ସାଧାରଣ ଜୀବନ ଯାପନ କରୁଥିଲେ ,ମନ ରେ ଗର୍ଵ , ଅହଙ୍କାର କୁ ସ୍ଥାନ ଦେଉନଥିଲେ, ପିଲା ମାନଙ୍କୁ ବହୁତ୍ ଭଲ ପାଉଥିଲେ। ଏହି ସବୁ ଗୁଣ ପାଇଁ ସେ ଶ୍ରେଷ୍ଠ ଚରିତ୍ର ଏବଂ ଶ୍ରେଷ୍ଠ ଚରିତ୍ର ପାଇଁ ଶ୍ରେଷ୍ଠ ବ୍ୟକ୍ତିତ୍ବ କୁ ହାସଲ କରିପାରିଥିଲେ। ଅନ୍ତଃ ବ୍ୟକ୍ତିତ୍ବ ବିକାଶ ନିମନ୍ତେ ଏହା ଏକ ପ୍ରମୁଖ କାରଣ ହୋଇଥାଏ।

୯) ନିଜର ଦୃଷ୍ଟିଭଙ୍ଗୀ କୁ ଉନ୍ନତ କରିବା-

-----------------------------

ଏ ମଣିଷ ହେଉଛି ସମୟର ଦାସ। ସମୟର କୋପଦୃଷ୍ଟି ଯେତେବେଳେ ମଣିଷ ଉପରେ ପଡେ, ସେତେବେଳେ ମଣିଷ ନତମସ୍ତକ ହୋଇ ପରିସ୍ଥିତି ସମ୍ମୁଖରେ ଦଣ୍ଡବତ ହୋଇପଡେ।ପରାଜୟ ସ୍ବୀକାର କରିନିଏ। ଏହି ପରାଜୟତା ରୁ ପୁନଃରୁଦ୍ଧାର କରିଥାଏ ନିଜର ସ୍ବପ୍ନ। ଭାରତର ମହାନ୍ ନେତା ନରେନ୍ଦ୍ର ମୋଦି ହୁଅନ୍ତୁ ବା ମହାନ୍ ବୈଜ୍ଞାନିକ ଅବଦୁଲ କାଲାମ୍ ହୁଅନ୍ତୁ, ବାଲ୍ୟ ସମୟରେ ସେମାନଙ୍କ ସ୍ବପ୍ନ କୁ କ'ଣ ପରିସ୍ଥିତି ଚାପି ପାରିଥିଲା କି? ମାନବ ସେବାର ଇଚ୍ଛା , ସମାଜ ମଙ୍ଗଳ କାମନା ସେମାନଙ୍କ ସ୍ବପ୍ନକୁ ଜୀବନ୍ତ କରି ରଖିଥିଲା।ନିଜର ଦୃଢ଼ ଦୃଷ୍ଟିଭଙ୍ଗୀ ମାଧ୍ୟମରେ ସେମାନେ ନିଜର ବ୍ୟକ୍ତିତ୍ଵ କୁ ମହାନ ବ୍ୟକ୍ତିତ୍ବ ରେ ପରିଣତ କରିପାରିଛନ୍ତି।ତେଣୁ ଉଚ୍ଚ ବ୍ୟକ୍ତିତ୍ବ ପ୍ରତିଷ୍ଠା ନିମନ୍ତେ ଉଚ୍ଚ ଦୃଷ୍ଟିଭଙ୍ଗୀ ରହିବା ମଧ୍ୟ ନିହାତି ଆବଶ୍ୟକ।ଏହା ବ୍ୟକ୍ତି କୁ ସଫଳତା ପ୍ରଦାନ ସହ ବ୍ୟକ୍ତିର ବ୍ୟକ୍ତିତ୍ବ ବିକାଶ ରେ ବିଶେଷ ସହାୟକ ହୋଇଥାଏ।

୧୦) ଆତ୍ମ ନିୟନ୍ତ୍ରଣ ଉପରେ ଗୁରୁତ୍ୱାରୋପ କରିବା।-

---------------------------------------

ଏହା ଏକ ମୁଖ୍ୟ କାରଣ ଅଟେ ଯାହାକି ମନୁଷ୍ୟ କୁ ସର୍ବଶ୍ରେଷ୍ଠ ବ୍ଯକ୍ତିତ୍ବ ପ୍ରଦାନ କରିଥାଏ। ନିୟନ୍ତ୍ରଣ ମନୁଷ୍ୟ ସଫଳତା ର ଚାବିକାଠି ହୋଇଥାଏ। ଏପରି କରିପାରୁଥିବା ବ୍ୟକ୍ତି ଦୃଢ ବ୍ୟକ୍ତିତ୍ବ ସୃଷ୍ଟି କରି ପାରିଥାନ୍ତି। ପ୍ରତ୍ୟେକ ସମସ୍ୟା କୁ ସମାଧାନ କରିବାରେ ଏହା ଆମକୁ ସାମର୍ଥ୍ୟ ଏବଂ ଶକ୍ତି ଯୋଗାଇଥାଏ। ପ୍ରତ୍ୟେକ ପରିସ୍ଥିତି କୁ ମୁକାବିଲା କରିବାର ଧୌର୍ଯ୍ୟ ପ୍ରଦାନ କରିଥାଏ। ମହାତ୍ମାଗାନ୍ଧୀ ଙ୍କୁ ଇଂରେଜ ମାନେ ଅନେକ ସମୟରେ ଥଟ୍ଟା ,ପରିହାସ ଏବଂ ଧମକ ମଧ୍ୟ ଦେଇଛନ୍ତି।ମାତ୍ର ଗାନ୍ଧିଜୀ ନିଜ ଉପରେ ନିଜ ନିୟନ୍ତ୍ରଣ କୁ ହରେଇଵାକୁ ଦେଇନାହାନ୍ତି।ନିଜର ଏହି ଗୁଣ ପାଇଁ ସେ ଇଂରେଜ ମାନଙ୍କୁ ଭୟଭୀତ ଓ ବିଚଳିତ କରିବାରେ ସମର୍ଥ ହୋଇପାରିଥିଲେ। ଆତ୍ମ ନିୟନ୍ତ୍ରଣ ନିଜକୁ ଅନୁଚିତ୍ ମାର୍ଗ ରେ ପାଦ ଥାପିବା ରେ ବାରଣ କରିଥାଏ । ତେଣୁ ଏହା ଦ୍ବାରା ଏକ ଦୃଢ ଓ ପ୍ରଭାବଶାଳୀ ବ୍ୟକ୍ତିତ୍ବ ଜନ୍ମଲାଭ କରିଥାଏ।

ବିଷୟ ପ୍ରସ୍ଥାନ-

****************

ଅନ୍ତଃ ବ୍ୟକ୍ତିତ୍ବ, ବାହ୍ୟ ବ୍ୟକ୍ତିତ୍ବ କୁ ପ୍ରତିଷ୍ଠିତ କରିଥାଏ। ସମୟ ପରିବର୍ତ୍ତନ ଶୀଳ। ଆମ ମାନଙ୍କ ପାଖରେ ସୁନ୍ଦରତା ଅଛି । ମାତ୍ର କିଛି ବର୍ଷ ପରେ ତାହା ମଧ୍ୟ ଧିରେ ଧିରେ ପରିବର୍ତ୍ତନ ହେବାକୁ ଲାଗିବ। ଆର୍ଥିକ କ୍ଷମତା ମଧ୍ୟ ଆମ ହାତରୁ ଚାଲି ଯାଇ ପାରେ।ଆମ ସଂସ୍ପର୍ଶରେ ରେ ଥିବା ସୁଦୃଢ ବ୍ୟକ୍ତିତ୍ବବାନ୍ ବ୍ୟକ୍ତି ମାନେ ମଧ୍ୟ ଆମ ଠାରୁ ଦୂରେଇ ଯାଇ ପାରନ୍ତି ମାତ୍ର ଆମ ମାନଙ୍କ ପାଖରେ ଥିବା ଅନ୍ତଃ ବ୍ୟକ୍ତିତ୍ବ ଏସବୁ କୁ ପୁଣି ହାସଲ କରିବାରେ ସହାୟକ ହୋଇଥାଏ। ସେଥିପାଇଁ ବର୍ହି ବ୍ୟକ୍ତିତ୍ବ ଠାରୁ ଅନ୍ତଃ ବ୍ୟକ୍ତିତ୍ବ ଅଧିକ ପ୍ରଭାବଶାଳୀ ହୋଇଥାଏ।

_________________________________________________

ପ୍ରସ୍ତୁତି- ସୌମ୍ୟ ରଞ୍ଜନ ରାୟ

ଭୂୟାଁ ଉଆସ,ଗୁଆମାଳ, ଭଦ୍ରକ

ବ୍ୟକ୍ତିତ୍ୱର ବିକାଶ ପାଇଁ ୧୦ଟି ପ୍ରଭାବଶାଳୀ ପରାମର୍ଶ | 10 Effective Tips for Personality Development in Odia

ବ୍ୟକ୍ତିତ୍ବ ବିକାଶ ହିଁ ସଫଳତାର ଚାବିକାଠି