ବ୍ୟାସାୟ ବିଷ୍ଣୁ ରୁପାୟଃ

=============

ଅନେକଦିନ ତଳର କଥା l ଯମୁନାନଦୀ ତଟରେ ଧୀବରଟିଏ ବାସ କରୁଥିଲା l ସେ ଧୀବରର ଏକ ଅପୂର୍ଵ ସୁନ୍ଦରୀ କନ୍ୟାଟିଏ ଥିଲା l ତାହା ଦେହରୁ ମାଛର ଗନ୍ଧ ବାହାରୁ ଥିବାରୁ ନାମ ତା'ର ଧୀବର ରଖିଥିଲା ମତ୍ସ୍ୟଗନ୍ଧା l କନ୍ୟା ମତ୍ସ୍ୟଗନ୍ଧା ନୌକା ଚାଳନାରେ ଥିଲା, ଅତ୍ୟନ୍ତ ଧୁରନ୍ଧର l ଯମୁନାରେ ନୌକା ଚଳାଇ, ଲୋକ ମାନଙ୍କୁ ସେ ନଦୀ ପାର କରାଉ ଥିଲା l

ଦିନେ ପାରି ହେବା ପାଇଁ, ଆସି ପହଞ୍ଚିଲେ ଜଣେ ସିଦ୍ଧ ତପସ୍ୱୀ l ତାଙ୍କର ଖୁବ ତେଜୋମୟ ଶରୀର ଥିଲା, ସେ ଥିଲେ ମହାମୁନି ପରାଶର l ଯମୁନାକୁ ସେ ନୌକାରେ ପାର ହେଉଥିବା ବେଳେ ନୌକା ଚାଳନା କରୁଥିବା ରୁପସୀ ମତ୍ସ୍ୟଗନ୍ଧାର ରୂପରେ ମୋହିତ ହୋଇ ପଡ଼ିଲେ l ସେ ଅତ୍ୟନ୍ତ ଶ୍ରଦ୍ଧାରେ ମତ୍ସ୍ୟ ଗନ୍ଧାର ପରିଚୟ ପଚାରିଲେ l ମତ୍ସ୍ୟଗନ୍ଧା କହିଲା, " ହେ ମୁନିବର,ଏ ନୌକା ମୋର ପିତା ଦାସ ରାଜାଙ୍କର l ମୁଁ ତାଙ୍କର ଏକମାତ୍ର ସନ୍ତାନ l ପିତାଙ୍କ ଆଦେଶରେ ଜୀବିକା ନିର୍ବାହ ପାଇଁ ମୁଁ ଏ ନୌକା ଚଳାଉଛି l ପିତାଙ୍କ ଆଦେଶରେ ମୁଁ ବିନା ଶୁଳ୍କରେ ଯାତ୍ରୀଙ୍କୁ ନଦୀ ପାର କରାଉଛି l କାରଣ ପିତା ମୋତେ କହିଛନ୍ତି ମୋ'ର ଏହା ଦ୍ୱାରା ବହୁ ପୁଣ୍ୟ ହେବ l"

ବିମୋହିତ ମୁନି ପରାଶର ସରଳ ଧୀବର କନ୍ୟା ଠାରୁ ଏଭଳି ମଧୁର କଥାମାନ ଶୁଣି ଆହୁରି ମୁଗ୍ଧ ହେବା ସଙ୍ଗେ ସଙ୍ଗେ ତାଙ୍କୁ କହିଲେ,"ହେ ମଧୁର ଭାଷିଣୀ ସୁନ୍ଦରୀ,ତୁମେ ନିଶ୍ଚୟ ଦିନେ ରାଜରାଣୀ ହେବ l କିନ୍ତୁ, ତୁମକୁ ମୋ ଠାରୁ ଏକ ବର ପ୍ରାପ୍ତି ହେବା ଆବଶ୍ୟକ l ମୁଁ ତୁମ ଶରୀରରୁ ମତ୍ସ୍ୟଗନ୍ଧ ଦୂର କରିଦେଇ ମହକ ଭରିଦେବି ଯାହା ଯୋଜନ ଦୂରପର୍ଯ୍ୟନ୍ତ ବାସିବ l ମୁଁ ଆଜି ଅତ୍ୟନ୍ତ କାମାସକ୍ତ ଓ କାମନା ଯୁକ୍ତ ହୋଇ ପଡ଼ିଛି l ତୁମର ଗର୍ଭରେ ମୋର ଏକ ସନ୍ତାନ ଦରକାର l "

ମତ୍ସ୍ୟଗନ୍ଧା ଦ୍ୱନ୍ଦ୍ୱରେ ପଡ଼ି ଗଲେ l ପିତା ଜାଣିଲେ ରାଗିବେ, ଏପଟେ ଋଷିଙ୍କ ଅଭିଶାପ ଭୟ l କିନ୍ତୁ ସେ ଚିନ୍ତାକରି ଦେଖିଲେ ତେଜସ୍ୱି ଋଷିଙ୍କର ବର ଦାନ ତାଙ୍କ ପାଇଁ ବାଞ୍ଛନୀୟ l ତେଣୁ ସେ ଋଷିଙ୍କ କଥାରେ ରାଜି ହୋଇ ଗଲେ l ମହର୍ଷି ପରାଶର ନିଜର ତପ ବଳରେ ଚାରିଆଡ଼େ କୁଜ୍ଜ୍ଝଟିକା ସୃଷ୍ଟି କରିଦେଲେ ଯେପରିକି ସେମାନଙ୍କୁ କେହି ଦେଖି ପାରିବେ ନାହିଁ l ପରାଶର ପରିତୃପ୍ତ ହେବାପରେ ମତ୍ସ୍ୟଗନ୍ଧାଙ୍କୁ କହିଲେ,"ଯମୁନାର ଏହି ଦ୍ଵୀପରେ ତୁମେ ମୋର ସନ୍ତାନକୁ ଜନ୍ମ ଦେବ l ଦିନେ ଏହି ପୁତ୍ର ସାରା ସଂସାରରେ ପ୍ରସିଦ୍ଧ ହେବ" l ଏତକ କହିଲା ପରେ ମତ୍ସ୍ୟଗନ୍ଧାଙ୍କ ଶରୀରରୁ ମତ୍ସ୍ୟଗନ୍ଧ ଚାଲି ଗଲା l ତାଙ୍କ ଶରୀର ସୁଗନ୍ଧରେ ଚତୁର୍ଦ୍ଦିଗ ମହକି ଉଠିଲା l ସେ ପରିଚିତ ହେଲେ ଯୋଜନ ଗନ୍ଧା ଭାବରେ l ଯମୁନାର ସେହି ଦ୍ଵୀପରେ ସେ ପରାଶରଙ୍କ ପୁତ୍ରକୁ ଜନ୍ମ ଦେଲେ l ସେହି ପୁତ୍ରଟି ଦ୍ବୀପରେ ଜନ୍ମ ହୋଇଥିବାରୁ ଏବଂ ତାଙ୍କ ଶରୀର ବର୍ଣ୍ଣ ଶ୍ୟାମଳ ହୋଇଥିବାରୁ ତାଙ୍କର ନାମ ହେଲା କୃଷ୍ଣଦ୍ୱପାୟନ l ସମସ୍ତ ବେଦ,ବିଦ୍ୟା ଓ ସିଦ୍ଧାନ୍ତର ଅଧିକାରୀ ହୋଇ, ସତ୍ୟବାଦୀ, ଜିତେନ୍ଦ୍ରିୟ ଏବଂ ଜଣେ ବିଦ୍ୱାନ ତପସ୍ୱୀ ଭାବେ ସମଗ୍ର ସଂସାରରେ ସେ ବିଦିତ ହେଲେ l କାଳକ୍ରମେ ସେ ଭାରତୀୟ ସମାଜକୁ ଅଷ୍ଟାଦଶ ପୁରାଣ ଓ ମହାଭାରତ ଭଳି ଅମୁଲ୍ୟ ଗ୍ରନ୍ଥମାନ ରଚନା କରି ଦେଇ ଯାଇଛନ୍ତି l ଆଦି ଗ୍ରନ୍ଥ ବେଦକୁ ସେ ଚାରିଭାଗ ଋକ, ଶ୍ୟାମ, ଯଜୁ , ଅଥର୍ବ ଆଦିରେ ବିଭକ୍ତ କରି ବେଦବ୍ୟାସ ନାମରେ ପରିଚିତ ହୋଇଛନ୍ତି l ମହର୍ଷି ବ୍ୟାସଙ୍କୁ ବିଶାଳବୁଦ୍ଧି,ପଦ୍ମ ପତ୍ର ପରି ଆୟତ୍ତ ନେତ୍ର ଯୁକ୍ତ ବୋଲି ବର୍ଣ୍ଣନା କରାଯାଇଛି l ଭାରତ ତୈଳ ପୂର୍ଣ୍ଣ ଜ୍ଞାନମୟ ପ୍ରଦୀପକୁ, ସାରା ସଂସାରର କଲ୍ୟାଣ ନିମନ୍ତେ ସେ ଚିରକାଳପାଇଁ ପ୍ରଜ୍ବଳନ କରି ଦେଇ ଯାଇଛନ୍ତି l ସେ ବଦ୍ରିକା ଆଶ୍ରମରେ ତପସ୍ୟାରେ ସିଦ୍ଧିଲାଭ କରିଥିବାରୁ ତାଙ୍କୁ ବାଦରାୟଣ ବୋଲି ଅଭିହିତ କରାଯାଏ l ଯୋଜନଗନ୍ଧା ପରାଶରଙ୍କ ବର ଅନୁଯାୟୀ, ସତ୍ୟବତୀ ନାମରେ ମହାରାଜ ଶାନ୍ତନୁଙ୍କୁ ବିବାହ କରି, କୁରୁ କୁଳର ରାଜମାତା ହୋଇଥିଲେ l

ଅସୀମ ଜ୍ଞାନର ଭଣ୍ଡାର ବ୍ୟାସ ଦେବଙ୍କୁ ସାକ୍ଷାତ ବିଷ୍ଣୁଙ୍କ ଅବତାର ବୋଲି ମାନ୍ୟକରାଯାଏ l ଏଣୁ ତାଙ୍କ ବନ୍ଦନାରେ କୁହା ଯାଇଛି :-

ବ୍ୟାସାୟ ବିଷ୍ଣୁରୂପାୟ,

ବ୍ୟାସ ରୂପାୟ ବିଷ୍ଣବେ l

ନମୋବୈବ୍ରହ୍ମବିଧୟେ

ବଶିଷ୍ଠାୟ ନମୋ ନମଃ l

ଅଚର୍ତୁବଦନୋ ବ୍ରହ୍ମା

ଦ୍ୱିର୍ବାହୁରପରୋ ହରିଃ l

ଆଭାଲ ଲୋଚନଃ ଶମ୍ଭୁଃ

ଭଗବାନ ବାଦରାୟାଣଃ ll

ଶ୍ରୀମଦ ଭାଗବତରେ ତାଙ୍କୁ ଭଗବାନଙ୍କର ଚବିଶ ଅବତାର ମଧ୍ୟରୁ ସପ୍ତଦଶ ତମ ଅବତାର ଭାବେ ବର୍ଣ୍ଣନା କରି କୁହାଯାଇଛି :-

ସପତଦଶେ ଦେବ କାର୍ଯ୍ୟେ l

ଜନ୍ମିଲେ ପରାଶର ଵୀର୍ଯ୍ୟେ l

ନିଗମ ବୃକ୍ଷ ଥିଲା ଏକା l

ବିଚାରି କଲେ ଶତେ ଶାଖା ll

ମହାମୁନୀ ବ୍ୟାସଦେବଙ୍କୁ ସମଗ୍ର ସଂସାରର ଗୁରୁ କହିଲେ ଅତ୍ୟୁକ୍ତି ହେବ ନାହିଁ l ଆଷାଢ଼ପୂର୍ଣ୍ଣିମା ବା ବ୍ୟାସ ପୂର୍ଣ୍ଣିମା,ତାଙ୍କ ଜନ୍ମ ତିଥିକୁ ଏଥିପାଇଁ ଗୁରୁ ପୂର୍ଣ୍ଣିମା ଭାବେ ପାଳନ କରାଯାଏ l

!!! ଓଁ ନମଃ ବ୍ୟାସାୟ ବିଷ୍ଣୁ ରୁପାୟ !!!

🙏🙏🙏

ଅର୍ଜୁନୀ

---------------

ଅର୍ଜୁନୀ ଚରଣ ବେହେରା

ମୋ -7693091971

ବ୍ୟାସାୟ ବିଷ୍ଣୁ ରୁପାୟଃ | Byasaya Bishnu Rupayah