ଚାଲ କିଛି ସମୟ ଆମେ ପଛକୁ ଫେରିଯିବା,

କିଛି ହସ, କିଛି ଲୁହ ଆଉ କିଛି ପାଇବାକୁ

ଜିଦି ଧରି ବସିବା

ଚାଲ କିଛି ସମୟ ଆମେ ପଛକୁ ଫେରିଯିବା ......||

ମନରେ ଟିକେବି ନଥିବ ଅହଂକାର

ନଥିବ ଗର୍ବ କି ଭୁଲ ଠିକ ର ବିଚାର

ଅଳ୍ପକୁ ବହୁତ ଭାବି ଖୁସିରେ ବଂଚିବା

ଚାଲ କିଛି ସମୟ ଆମେ ପଛକୁ ଫେରିଯିବା...||

ବୁଢା ବାପା ଆଉ ବୁଢ଼ୀ ମାର ପାଖକୁ ଯାଇ,

କିଛି ସମୟ ତାଙ୍କ ପାଖରେ ରହି

ପୁଣିଥରେ ଜହ୍ନ ମାମୁଁ ର କାହାଣୀ ଶୁଣିବା

ଚାଲ କିଛି ସମୟ ଆମେ ପଛକୁ ଫେରିଯିବା ....|

ସବୁ ସକାଳରେ ଥିବ ଗୋଟିଏ ଭାବନା

ଆମ ସାଙ୍ଗ ସାଥି ଆଉ ଆମ କଣ୍ଢେଇ ଖେଳଣା

ଆଉ ଥରେ ମିଶି ପୁଣି ସାଙ୍ଗରେ ଖେଳିବା

ଚାଲ କିଛି ସମୟ ଆମେ ପଛକୁ ଫେରିଯିବା...||

ସବୁଠାରୁ ବଡ଼ ଗାଡି ଫଟା ସାଇକେଲ ଚକା

ସଢ଼େଇର ଭାତ ହାଣ୍ଡି ଆଉ କାଗଜ ନଉକା

ବୋଉ ବାପା ଠାରୁ କେତେ ଗାଳି ଶୁଣୁଥିବା

ଚାଲ କିଛି ସମୟ ଆମେ ପଛକୁ ଫେରିଯିବା...||

ଖରାଦିନେ ଗାଁ ଦାଣ୍ଡେ କାଚ ଗୋଲୀ ଖେଳ

ଗାଧୁଆ ତୁଠରେ ଏକ ସାଥେ ହୋଇ ମେଳ

ଆଡି ରୁ ପାଣିକୁ ଡେଇଁ ପହଁରି ଖେଳିବା

ଚାଲ କିଛି ସମୟ ଆମେ ପଛକୁ ଫେରିଯିବା...||

ପାଠ ପଢ଼ା ସମୟରେ ଛାଟ ପହାରକୁ ଡରି

ମୁଣ୍ଡ ପେଟ ଖରାପର ବାହାନା କରି

ଖାତା ବହିକୁ ଲୁଚେଇ ମିଛରେ ଖୋଜିବା

ଚାଲ କିଛି ସମୟ ଆମେ ପଛକୁ ଫେରିଯିବା...||

ବୋଉ ଠାରୁ ମାଗିଆଣୀ ଟଙ୍କେ ଆଠଣା

ଗାଁ ବୁଢ଼ା ଦୋକାନରୁ ଚଟପଟି କିଣା ଗୋଟେ ପାକେଟ କୁ ଚିରି ସବୁ ମିଶିକି ଖାଇବା

ଚାଲ କିଛି ସମୟ ଆମେ ପଛକୁ ଫେରିଯିବା...||

ଗାଁ ଯାତରା ଦେଖିବା ପାଇଁ

ବାପାଙ୍କ ସଙ୍ଗେ ଅଝଟ ହୋଇ

ସାଇକେଲ ରେ ବସି ମେଳା ବୁଲିଯିବା

ଚାଲ କିଛି ସମୟ ଆମେ ପଛକୁ ଫେରିଯିବା...||

ସବୁଦିନ ପଢା ସାରି ସଂଧ୍ୟା ଚାରିଟା ବେଳେ

ସେବାକ ସଚିନ ଭାବି ଖେଳ ପଡିଆ ଆଡେ

ବ୍ୟାଟ ବଲ ଧରି ଯାଇ ମିଶିକି ଖେଳିବା

ଚାଲ କିଛି ସମୟ ଆମେ ପଛକୁ ଫେରିଯିବା...||

ଟଙ୍କେ ଦୁଇଟଙ୍କା ଆଦାୟ କରି

ଘରୁ ମୁଠେ ମୁଠେ ଚାଉଳ ଧରି

ବଣଭୋଜି କରି ଆମେ ମିଶିକି ଖାଇବା

ଚାଲ କିଛି ସମୟ ଆମେ ପଛକୁ ଫେରିଯିବା...||

କଞ୍ଚା ଆମ୍ବ କେବେ ପୁଣି କଞ୍ଚା ତେନ୍ତୁଳି

ନାଲି ଲୁଣ ସାଥେ କିଛି ଲଙ୍କା କୁ ଗୋଳି

କ୍ଲାସ ରୁମ ପଛେ ବସି ଲୁଚିକି ଖାଇବା

ଚାଲ କିଛି ସମୟ ଆମେ ପଛକୁ ଫେରିଯିବା...||

ଗାଁ ସାହି ଝିଅ ଯେତେ ଆମ ସାଙ୍ଗ ସାଥି

ବୋହୁ ଚୋରି ଖେଳ ସାଥେ ପୁଚି, କିତିକିତି

ପୁଅ ଝିଅ ନଭାବି ପୁଣି ମିଶିକି ଖେଳିବା

ଚାଲ କିଛି ସମୟ ଆମେ ପଛକୁ ଫେରିଯିବା...||

ନା ଥିବ ଭୟ ନା କାହାପ୍ରତି ରାଗ

ଆଜି ମାଡଗୋଳ ପୁଣି କାଲି ସେଇ ସାଙ୍ଗ

କିଛି ବେଳ ପାଇଁ ଆସ ଛୋଟ ପିଲା ହେଇଯିବା

ଚାଲ କିଛି ସମୟ ଆମେ ପଛକୁ ଫେରିଯିବା...||

ଚାଲ କିଛି ସମୟ ଆମେ ପଛକୁ ଫେରିଯିବା,

ଆମ ପିଲାବେଳର କଥା