ସବୁଦିନିଆ ବ୍ୟସ୍ତବହୁଳ ଜୀବନରେ ମଣିଷର ଦେହ ଓ ମନ ବେଳେ ବେଳେ ଥକି ପଡ଼େ। ତାଛଡ଼ା ସକାଳୁ କିଛି ପେଟରେ ନଥିଲେ ଚିଡ଼ି ଚିଡାପଣଟା ସିଂହ ପରି ଜାଗି ଉଠେ। ଥକ୍କା ମେଣ୍ଟାଇବା ପାଇଁ ବାହାରୁ ଘେରାଏ ବୁଲିଆସି ପେଟପୂଜା କରିଦେଲେ ଟିକେ ଆତ୍ମା ଶାନ୍ତି। ସେଇଥିପାଇଁ ପାଇଁ ଆଖି ଖୋଜେ ଟିକେ ସୁଆଦିଆ ଚଟ୍ ପଟା ଖାଦ୍ୟ। କିନ୍ତୁ, ସେଦିନର ଗୋପାଳପୁର ବିଚ୍ ଫେଷ୍ଟିଭାଲ୍ ର ସନ୍ଧ୍ୟା କାଳିନ ଚଟ୍ ପଟା ଖାଦ୍ୟଟି ଏବେ ଯାଏଁ ମୋ ମନରୁ ଯାଇନାହିଁ।

ସେଦିନ ୨୪/୧୨/୨୦୧୫। ମୋ ସାଙ୍ଗ ପ୍ରଣବ ଫୋନ୍ ରେ କହିଲା ଫ୍ରେସ୍ ହୋଇଯାଆ ଚଞ୍ଚଳ। ମୁଁ ଟିୟୁସନ୍ ସାରି ଫେରୁଥାଏ, ମେସ୍ କୁ। ମୁଁ କହିଲି କାହିଁକି କ'ଣ କାମ ଅଛି କିରେ? କୁଆଡ଼େ ବୁଲି ଯିବାକି? ସେ କହିଲା, "ହଁ, ବୁଲି ଯିବା ମେଲୋଡ଼ି ଦେଖି। ଆଉ ଗୋପାଳପୁର ବିଚ୍ ଫେଷ୍ଟିଭାଲ୍ ଦେଖି।" ମୁଁ ତରବରରେ କହିଲି ୧୫ମିନିଟ୍ ଅପେକ୍ଷା କର। ମୁଁ ଏଇ ସାଙ୍ଗେ ସାଙ୍ଗେ ରେଡ଼ି ହୋଇଯାଉଛି। ବହୁତ ଦିନପରେ ପିଲାଦିନର ସାଙ୍ଗ ସହ ବୁଲାବୁଲି ଓ ମୌଜମସ୍ତୀର ସୁଯୋଗ କିଏ ବା ହାତ ଛଡ଼ା କରିବ?! ବ୍ରହ୍ମପୁର ବୈକୁଣ୍ଠ ନଗର ଆମ ମେସ୍ ରୁ ଶୀଘ୍ର ବାଥ୍ ରୁମ୍ ଯାଇ ଗୋଧୋଇପାଧୋଇ ନୂଆ ପ୍ୟାଣ୍ଟ୍ ସାର୍ଟ ପିନ୍ଧି ରେଡି ହୋଇଗଲି। ଫୋନ୍ କଲି ପ୍ରଣବ ପାଖକୁ। ବାଇକ୍ ଧରି ୨୦ମିନିଟ୍ ପରେ ମେସ୍ ସାମ୍ନାରେ ହାଜର।

ସମୟ ସନ୍ଧ୍ୟା ଘ.୬.୩୦ମି.। ବାଇକ୍ ର ସ୍ପିଡୋମିଟର୍ କଣ୍ଟା ୫୦ ଦେଖାଉଥାଏ। ବାଇକ୍ ଆଗକୁ ଚାଲୁଥାଏ ଦ୍ରୁତ ଗତିରେ। କୋହଲା ପବନ ବାଜୁଥାଏ, ଦେହରେ। ଡିସେମ୍ବର ମାସର ଶୀତ।

ସନ୍ଧ୍ୟା ଘ. ୭.୩୦ମି. । ଆମେ ଗୋପାଳପୁର ବେଳାଭୂମି ପାଖରେ ହାଜର। ଗାଡ଼ି କୁ ପାର୍କିଂ ଏରିଆରେ ରଖି ଟିକେଟ୍ କାଟିଲୁ। ବେଳାଭୂମି ଆଡ଼କୁ ଚାଲିଲୁ।ଚାରିଆଡେ ଆଲୋକରେ ସୁସଜ୍ଜିତ ଡେକୋରେସନ୍ ଲାଇଟ୍ ର ଭଳିକି ଭଳି ରଙ୍ଗିନ୍ ଲାଇଟ୍। ସଙ୍ଗୀତ ଓ ନୃତ୍ୟ ରେ କରତାଳି ବର୍ଷଣରେ ଫାଟିପଡୁଥାଏ ବେଳାଭୂମି। ସମୁଦ୍ରରୁ କେବେ ଶାନ୍ତ ସ୍ବରୂପ ଛୋଟ ଲହଡ଼ି ତ କେବେ ବଡ଼ ବଡ଼ ଲହଡ଼ି ବେଳାଭୂମି ଆଡ଼କୁ ମାଡ଼ି ଚାଲିଥାଏ। ସମୁଦ୍ରର ବେଳାଭୂମିରେ ଠାଏଁ ଠାଏଁ ପ୍ରେମୀ ଯୁଗଳଙ୍କ ଧାଁ ଦୌଡ ହସ କୌତୁକ ଲାଗିଥାଏ। କେଉଁଠି କେଉଁଠି ନବବିବାହିତା ଦମ୍ପତିଙ୍କ ସେଲ୍ଫି ଉଠା ଚାଲିଥାଏ। କେଉଁଠି କେଉଁଠି ଛୋଟ ଛୋଟ ଝିଅ ପୁଅଙ୍କ ଖେଳକୁଦ ତ କେଉଁଠି କେଉଁଠି ଜିନିଷ କିଣାକିଣିରେ ଠେଲାପେଲା। ପ୍ରାୟ ଗହଳି କହିଲେ ଏକ ଜନସମୁଦ୍ର କହିଲେ ଅତ୍ୟୁକ୍ତି ହେବ ନାହିଁ। ଭିଡ଼ ଭିତରେ ମୋ ସାଙ୍ଗ ପ୍ରଣବ ମୋତେ ଟାଣି ଟାଣି ନେଉଥାଏ ଆଗକୁ ଆଗକୁ। ରଙ୍ଗମଞ୍ଚ ପାଖରେ ଛିଡ଼ା ହୋଇ ବିଭିନ୍ନ ପ୍ରକାରର ଲୋକନୃତ୍ୟ ସହ ପାଶ୍ଚାତ୍ୟ ଦେଶର ମଡେନ୍ ଡ୍ୟାନ୍ସ୍ ସବୁ ଦେଖିଲୁ। ଅଗଣିତ ଦର୍ଶକ ମୋବାଇଲ୍ ରେ ଭିଡିଓ କରୁଥାନ୍ତି, ଉପରକୁ ଟେକି। ତା ସହ କେତେ ସେଲ୍ଫି ଷ୍ଟିକ୍ ଲଗାଇ ଫଟୋ ସହ ଭିଡ଼ିଓ ର ମଜା ନେଉଥାନ୍ତି। ପ୍ରସିଦ୍ଧ ଗାୟକ 'ହର୍ଷିତ୍ ସକ୍ସେନା' ଙ୍କ ସଙ୍ଗୀତ ରେ ସହରବାସୀ ଝୁମୁଥାନ୍ତି। ତା ସାଙ୍ଗକୁ ବେଳାଭୂମିରେ ଭଳି କି ଭଳି ସାମଗ୍ରୀ ଦେଖି ମନ ଖୁସି ହୋଇଯାଉଥାଏ। କେଉଁଠି ରାମଦୋଳି, କେଉଁଠି କାର୍ ଦୋଳି, କେଉଁଠି ଲାଇଟ୍ ରେ ସୁସଜ୍ଜିତ ଡଙ୍ଗା ବେଶ୍ ମନୋରମ ଲାଗୁଥାଏ। ଭଳିକି ଭଳି ଚଟ୍ ପଟା ଖାଦ୍ୟ ର ଷ୍ଟଲ୍ ମାନ ଖୋଲିଥାଏ। ସେ ମୋତେ ହାତ ଟାଣି ନେଲା ଷ୍ଟଲ୍ ପାଖକୁ ଓ କହିଲା, "ଚାଲ୍ କିଛି ଖାଇବା।" ମୁଁ ପନିର୍ ଟିକା, ପାପୁଡି ଚାଟ୍, ଚଣା ମସଲା, କଟକିଆ ରସଗୋଲା ସହ ଆଇସ୍କ୍ରିମ୍ ଖାଇଲି। ଯେହେତୁ ମୁଁ ନିରାମିଷାସୀ। ସେ ମଟନ୍ ଚକୋଲେଟ୍ ବିରିଆନି, ଚିକେନ୍ କବାବ୍, କଙ୍କଡ଼ା ଝୋଳ ସହ ଆଇସ୍କ୍ରିମ୍ ଖାଇଲା। ପ୍ରାୟ ୧୦୦ରୁ ୧୫୦ଉପରେ ବିଭିନ୍ନ ଷ୍ଟଲ୍ ଖୋଲିଥିଲା। ମିନିବଜାରର ଖେଳନା, କମିକ୍ସ ଓ ବୁକ୍ ଷ୍ଟଲ୍ ତ ଖୁବ୍ ନିଆରା। ହସ୍ତତନ୍ତ ର ବୟନିକା, ଚାନ୍ଦୁଆ, ଫଟୋ ଫ୍ରେମ୍, ପୁସ୍ତକ ଭଣ୍ଡାର ଇତ୍ୟାଦି ଖୋଲିଥିଲା।

ସମୟ ରାତି ନଅଟା। ମୁଁ କହିଲି ଚାଲ୍ ମେସ୍ କୁ ଫେରିଯିବା। ସେ କହିଲା ଯିବା ତ ଯିବା ତା ପୂର୍ବରୁ ମିଠାପାନଟିକେ ନ ଖାଇ ଗଲେ ମନ ଭରିବନି। ଦଶଟି ମିଠା ପାନ ଧରି ଆସିଲା। ସେ ଗୋଟିଏ ପାଟିରେ ପକାଇ ଦେଇ ମୋ ପାଟିରେ ଗୋଟିଏ ଗୁଞ୍ଜି ଦେଲା। ପଲିଥିନ୍ ରେ କ'ଣ ଛତୁ ଭଳି ଜିନିଷ ଧରିଥିଲା। ମୁଁ କହିଲି ଏଇଟା କ'ଣ କିରେ? ସେ କହିଲା, 'ପାଣି ସିଙ୍ଗିଡା' । ମୁଁ ଆଶ୍ଚର୍ଯ୍ୟ ହୋଇ ତା' ମୁହଁ କୁ ଚାହିଁଲି। ସେ କହିଲା ନାଁ ଶୁଣିନୁ ବୋଧେ। ମୁଁ ମୁଣ୍ଡ ନାଡି ନାହିଁ କଲି। ସେ କହିଲା ବସ ବାଇକ୍ ରେ ମୁଁ ଏହା ବିଷୟରେ ଗାଡ଼ି ଚଲାଇ ଚଲାଇ କହିବି। ସେ ଗାଡ଼ି ଚଳାଇ କହିଲା, "ମହୁନାଡ ପରି ଏହା ମଧ୍ୟ ପାଣିରେ ଏହା ବଢ଼େ। ପଶ୍ଚିମବଙ୍ଗ ଓ ଗୁଜୁରାଟ ରେ ଏହାର ଚାହିଦା ଅଧିକ। ନବରାତ୍ରୀ ସମୟରେ ପକ୍ବ ପାଣି ସିଙ୍ଗିଡାକୁ ଚୂର୍ଣ୍ଣ କରି ପ୍ରସ୍ତୁତ କରାଯାଇଥିବା ଅଟାର ବ୍ରେଡ୍ ଉପବାସକାରୀଙ୍କୁ ଶକ୍ତି ପ୍ରଦାନ କରେ। ପାଣି ସିଙ୍ଗିଡାକୁ କଞ୍ଚା, ସିଝା ଓ ଭଜା କରି ଖିଆଯାଇଥାଏ। ସବୁଜ, ଲାଲ୍ ଓ ବାଇଗଣୀ ରଙ୍ଗର ପାଣି ସିଙ୍ଗଡ଼ା ଦେଖିବାକୁ ମିଳେ। ମୁଁ ଯେଉଁଟା ଏବେ ଆଣିଛି ସେଇଟା ବାଇଗଣୀ ରଙ୍ଗର।" ମୁଁ କହିଲି କିନ୍ତୁ କାହା ପାଇଁ ନେବୁ? ସେ କହିଲା, "କାହାପାଇଁ ମାନେ!, କାଲି ଡିସେମ୍ବର ୨୫। ତୁମ ରୁମ୍ ରେ ଏକ୍ସମାସ୍ ପାର୍ଟି ମୋ ତରଫରୁ। ଆରେ କାଲି ତୋ ଜନ୍ମଦିନ ମୁଁ ପୁରା ଭୁଲି ଯାଇଥିଲି, କହି ଚିମୁଟି ଦେଲି ତା'ର ଗାଲକୁ। କାଲି ଏ ପାଣି ସିଙ୍ଗଡ଼ା ରେ ଏକ ନୂଆ ଆଇଟମ୍ ତୁମ ସବୁଙ୍କୁ ଚଖାଇବି। ତୁ ଖାଲି ସକାଳୁ ଫ୍ରେସ୍ ହୋଇ ବଜାର ଯାଇ ଗ୍ରିନ୍ ମଟର, ଗାଜର, ଭୃଷଙ୍ଗ ପତ୍ର, ଧନିଆପତ୍ର, ଦହି ଓ ବେସନ ଆଣିବୁ। ମୁଁ କହିଲି, ହେଉ.. ଦେଖିବା କେମିତିକା ନୂଆ ଆଇଟମ୍ ଟା।" ରାତି ୯ଟା ୪୫ମିନିଟ୍। ଆମେ ରୁମ୍ ରେ ପହଞ୍ଚିଲୁ। ରାତିରେ କନ୍ଥାପଟି ପାରି ଆରାମରେ ଶୋଇଲୁ।

ପରଦିନ ୨୫ ଡିସେମ୍ବର ୨୦୧୫। ମୁଁ ମୋ ରୁମ୍ ମେସ୍ ର ପିଲାସମସ୍ତଙ୍କୁ ସକାଳୁ ଏକଲା ଡାକି କହିଲି ଆଜି ମୋ ବେଷ୍ଟ ଫ୍ରେଣ୍ଡ୍ ପିଲାଦିନର ସାଙ୍ଗ ପ୍ରଣବର ଜନ୍ମଦିନ। ସେ ଶୋଇଛି। କିଛି ପାଟି କରନି। ଉଠିଲେ ସମସ୍ତେ ଫୁଲ ତୋଡା ଧରି ଏକା ସାଙ୍ଗରେ ଉଇସ୍ କରିବ। ଓକେ। ମୁଁ ବଜାର ଯାଇ କିଛି ପରିବାପତ୍ର ଓ କେକ୍ ପାଇଁ ଅର୍ଡର୍ କରିବି। ତୁମକୁ ମୁଁ ୫୦୦ଟଙ୍କା ଦେଇ ଦେଉଛି। ଆଉ କିଛି ମିଶାଇ ନୂଆ ପ୍ୟାଣ୍ଟ୍ ସାର୍ଟ ହଳେ ଓ ବେଲୁନ୍, ପାର୍ଟି ପ୍ରପେଲର୍, ସ୍ପ୍ରେ ଧରି ଆସିବ ଉପରବେଳାକୁ। ଆଜି ରାତିକୁ ମ୍ୟୁଜିକ୍,ଡ୍ୟାନ୍ସ୍ ସଙ୍ଗେ ନୂଆ ଆଇଟମ୍ ବି ହେବ। ସମସ୍ତେ ମୋ କଥା ଶୁଣି ଖୁସି ହୋଇଗଲେ। ମୋ କହିବା ପ୍ରକାରେ ସବୁ କାମ ଠିକ୍ ଠାକ୍ ହୋଇଗଲା।

ମୁଁ ତାକୁ ମନ୍ଦିର ଜାଗାଆଡେ ବୁଲାଇ ନେଇଗଲି ଦିନସାରା। ସନ୍ଧ୍ୟା ୬ଟା ବେଳକୁ ପହଞ୍ଚିଲା ବେଳେ ପିଲାମାନେ ରୁମ୍ କୁ ଲିଚୁ ଲାଇଟ୍, ଧୋତି ରେ ଘର, ଫୁଲତୋଡ଼ା, ରଙ୍ଗିନ୍ କାଗଜ ଓ ଜରି ରେ ଝାଲାର୍ ଇତ୍ୟାଦି ରେ ସଜାଇ ଆମ ଦୁହିଁଙ୍କୁ ସ୍ବାଗତ କଲେ। ମୁଁ ସମସ୍ତଙ୍କୁ ମୋ ବେଷ୍ଟ୍ ଫ୍ରେଣ୍ଡ୍ ସହ ପରିଚିତ କରାଇଦେଲି। ସମୟ ୭.୩୦ମି.। ସମସ୍ତେ ମିଶି ମୋ ସାଙ୍ଗ ସହ କେକ୍ କାଟିଲୁ ଓ ପରସ୍ପର ମଧ୍ୟରେ ବାଣ୍ଟି ଖାଇଲୁ। ତା'ପରେ ମ୍ୟୁଜିକ୍ ଲାଗିଲା। ସମସ୍ତେ ମିଶି ଡ଼୍ୟାନ୍ସ୍ କଲୁ। ଆମେ ସମସ୍ତେ ମିଶି ତାକୁ ନୂଆ ପ୍ୟାଣ୍ଟ୍ ସାର୍ଟ ଗିଫ୍ଟ ଦେଲୁ। ସମୟ ରାତି ୮.୩୦ମି.। ତା'ପରେ ମୁଁ ଘୋଷଣା କରିଦେଲି, "ମୋ ସାଙ୍ଗ ଆଜି ତୁମ ସମସ୍ତଙ୍କୁ ଆଜି ଗୋଟିଏ ନୂଆ ଆଇଟମ୍ ତିଆରି କରି ଚଖାଇବ। ଯାହାର ନାମ ଚାଲ ବୁଝି ନେବା ତା'ର ମୁହଁ ରୁ।" ମୋ ସାଙ୍ଗ ହସି ହସି କହିଲା, 'ଦହି ଛୁଙ୍କ ପାଣି ସିଙ୍ଗଡ଼ା'।

ଚାଲନ୍ତୁ ଜାଣିନେବା ମୋ ସାଙ୍ଗର ହାତ ତିଆରି 'ଦହି ଛୁଙ୍କ ପାଣି ସିଙ୍ଗଡ଼ା' ପ୍ରସ୍ତୁତି ପ୍ରଣାଳୀ।

ଦହି ଛୁଙ୍କ ପାଣି ସିଙ୍ଗଡ଼ାର ପ୍ରସ୍ତୁତି:

୧. ପ୍ରଥମେ ପାଣି ସିଙ୍ଗଡ଼ା ଓ ଆଳୁକୁ ସିଝାଇ ତା'ର ଚୋପା ଛଡ଼ାଇ ଏକ ପାତ୍ରରେ ରଖ।

୨. କରେଇରେ ତେଲ ଗରମ କରି ଜିରା, କଟା ପିଆଜ, ଚାମୁଚାଏ ଚିନି ପକାଇ ସାମାନ୍ୟ ଲାଲ୍ ହେବା ପର୍ଯ୍ୟନ୍ତ ଭାଜ।

୩. ପିଆଜ ଅଳ୍ପ ଭାଜି ହୋଇଗଲା ପରେ ସେଥିରେ କଟା ଗାଜର, କଟା ଟମାଟ ଓ ଗ୍ରୀନ୍ ମଟର ଦେଇ ଭଲସେ ଭାଜନ୍ତୁ।

୪. ଭଲରେ ଭାଜି ହୋଇଗଲା ପରେ ସେଥିରେ ସିଝା ପାଣି ସିଙ୍ଗଡ଼ା, ସ୍ବାଦ ଅନୁସାରେ ଲୁଣ, ହଳଦୀ ଗୁଣ୍ଡ, ଲଙ୍କା ଗୁଣ୍ଡ, ଧନିଆ ଗୁଣ୍ଡ, ଗରମ ମସଲା, ଅଳେଇଚ ଗୁଣ୍ଡ, ଡାଲ୍ ଚିନି ଗୁଣ୍ଡ ଓ ସିଝା ଆଳୁକୁ ଛୋଟ ଛୋଟ ଖଣ୍ଡ କରି ପକାଅ। ଭଲଭାବରେ ଘାଣ୍ଟି ଦେଇ ୩ମିନିଟ୍ ଯାଏଁ ଘୋଡ଼ାଇ ଦିଅ।

୫. ସବୁ ସିଝି ଗଲା ପରେ ଏସବୁକୁ ଏକ ପାତ୍ରକୁ ବାହାର କରି ରଖ।

୬. ଅନ୍ୟ ଏକ ପାତ୍ରରେ ଦହି, ବେସନ ଓ ପାଣି ଦେଇ ଭଲ ଭାବେ ଫେଣ୍ଟି ରଖ।

୭. କରାଇରେ ତେଲ ଗରମ କରି ପଞ୍ଚ ଫୁଟଣ, ଚିରା ଯାଇଥିବା କଞ୍ଚାଲଙ୍କା ଓ ଭୃଷଙ୍ଗ ପତ୍ର ପକାଇ ଫୁଟାନ୍ତୁ।

୮. ଛୁଙ୍କ ହେବା ପରେ ଦହି ବେସନ ମିଶ୍ରଣକୁ ସେଥିରେ ଢାଳି ଖୁବ୍ କମ୍ ଲୁଣ ଓ କଷା ହୋଇଥିବା ପାଣି ସିଙ୍ଗଡ଼ା-ଆଳୁ କୁ ଆଣି ମିଶ୍ରଣରେ ମିଶାଅ।

୯. ଧନିଆପତ୍ର କୁ ଖୁବ୍ ଛୋଟ ଛୋଟ ଖଣ୍ଡ କରି ଉପରେ ପକାଅ ଓ ଗୋଲ୍ ମରିଚ ଗୁଣ୍ଡ ଉପରେ ଛିଞ୍ଚି ଦିଅ।

ଏବେ ପ୍ରସ୍ତୁତ ଆପଣଙ୍କ ଦହି ଛୁଙ୍କ ପାଣି ସିଙ୍ଗଡ଼ା।

ସେଦିନ ରାତିରେ ଭେଜ୍ ପଲାଉ, କଟକି-ପନିର ରସା, ଡାଲି, ପାମ୍ପଡ ସାଙ୍ଗକୁ ଦହି ଛୁଙ୍କ ପାଣି ସିଙ୍ଗଡ଼ାର ଆଇଟମ୍ ଟି ଖୁବ୍ ଜମିଥିଲା। ଆମେ ସମସ୍ତେ ମିଶି ମୋ ସାଙ୍ଗ କୁ ପ୍ରଶଂସା କଲୁ।

ବନ୍ଧୁଗଣ ଆପଣବି ଥରେ କରି ଖାଆନ୍ତୁ, କେମିତି ଲାଗିଲା ଜଣାଇବେ...

🙏💐

ନାମ - ରବୀନ୍ଦ୍ରନାଥ ସାହୁ

ଗ୍ରାମ/ପୋଷ୍ଟ୍ - ବି. ନୂଆଁ ପଲ୍ଲୀ

ଭାୟା - କବିସୂର୍ଯ୍ୟନଗର

ଜିଲ୍ଲା - ଗଞ୍ଜାମ

ରାଜ୍ୟ - ଓଡ଼ିଶା

ପିନ୍ କୋଡ ନଂ- ୭୬୧୧୦୪

ଦୂରଭାଷ/ ଟେଲିଗ୍ରାମ୍ ନଂ- ୭୮୭୩୨୯୩୫୦୮

ଦହି ଛୁଙ୍କ ପାଣି ସିଙ୍ଗଡ଼ା

ଖରାଦିନିଆ ଚଟପଟା ଖାଦ୍ୟ