ନୀଳ ଏ ସାଗର ନୀଳ ଏ ଅମ୍ବର ନୀଳ ଦିଶେ ଆଜି ଜହ୍ନ,

ସେ ନୀଳ ଭିତରେ ତୁମେ ମନେ ପଡ ଆଗୋ ପ୍ରାଣପ୍ରିୟା ଧନll୧ll

ସାତ ସମୁଦ୍ରର ଆଢୁଆଳେ ଆଜି ପୋତରେ କାଟୁଛି ଦିନ,

ଆତୁର ହୃଦୟ ଖୋଜଇ ସାହାରା ବିଚଳିତ ହୁଏ ମନll୨ll

ମନେ ପଡେ ଆଜି ନିଶି ଚନ୍ଦ୍ରମାରେ ଅର୍ଦ୍ଧରାତ୍ରି ବାର୍ତାଳାପ,

ତୁମଠୁ ଦୂରରେ ଲାଗେ ଏକା ମତେ ସତେ ଯେନ୍ହେ ଅଭିଶାପll୩ll

କନକଲତା ତୁ ଗଜମୁକୁତା ଲୋ ଚମ୍ପା କଳୀ ପରି ବାସୁ,

ସହସ୍ର କୋଷର ଦୂରେ ରହି ସଦା ମୋହରି ହୃଦୟେ ବସୁ ll୪ll

ତୁ ହସିଲେ ଲାଗେ ପଦୁଅଁ ଫୁଟିଲା ଉଇଁଲା ସରଗତରା,

ତୋ ମୁଖମଣ୍ଡଳ ଆଭା ପ୍ରଭା ସହ ଶଶୀ ସରି ନୁହେଁ ପରା ll୫ll

ହରିଣୀ ଚାଲି ତୋ ଗୋଲାପୀ ଓଠ ଲୋ ନୟନେ ମାଖି କଜଳ,

ହାରିଗଲି ଖୋଜି ତୋପରି ସୁନ୍ଦରୀ ନଭ ଜଳ ଆଉ ସ୍ଥଳ ll୬ll

ମଉନ ବ୍ରତକୁ ଆପଣାର କରି ଦୂରେ ରଖି ସବୁ ଖେଦ,

ଭାବେ ତୁମ ପ୍ରେମତୀର କଲା ଆଜି ହୃଦୟ କୁ ମୋର ଭେଦ ll୭ll

ଚିତ୍କାରୁଛି ମନ ତୁମରି ସ୍ମୃତିରେ ଶୁଣିବାକୁ ନାହିଁ କେହି,

ହୃଦୟ ମଧ୍ୟରୁ ଆରତ ନିର୍ଣ୍ଣାଦ ଉଙ୍କିମାରେ ତୁମ ପାଇଁ ll୮ll

ନିରାକରଙ୍କର ପହିଲି କିରଣେ ତୁମେ ମନେ ପଡ ସାଥି,

ସଞ୍ଜ କିରଣରେ ତୁମକୁ ସ୍ମରଣେ ଏ ସାଗର ମହାରଥୀ ll୯ll

ରବି ବିଦା ନେଲେ ଚାନ୍ଦ ଉଇଁଗଲେ ମନେ ଉଙ୍କି ମାରେ ଢେଉ,

କେବେ ପୁଣି ସାଥି ଆସିକି କହିବି ବାର୍ତାଳାପ ଟିକେ ହେଉ ll୧୦ll

ଘୋର ଅନ୍ଧକାର ମଧ୍ୟରାତ୍ରିରେ ତ ତୁମେ ମୋ ଶଶୀ ଚନ୍ଦ୍ରମା,

ସ୍ବପ୍ନ ଦେଖେ ଆଜି ଦରିଆ ମଧ୍ୟରେ ତୁମେ ହେବ ମୋର ବାମା ll୧୧ll

କୋଷ କୋଷ ଦୂର ଲଙ୍ଘି ଏ ସମୁଦ୍ର ଆସିଯିବି ତୁମ ପାସ,

କ୍ଷୁଦ୍ର ହୃଦୟରେ ତୁମର ଟିକିଏ ଦେଇପାରିବ କି ବାସ? ll୧୨ll

ସମୁଦ୍ର ଗରଜେ ବାରିଦ ବରଷେ ଉଙ୍କି ମାରଇ ଲହରୀ,

ଦୂର ପ୍ରେମର ଏ ଛୋଟ ବନାନୀରେ ମୁଁ ଶୁଆ ତୁମେ ମୋ ଶାରି ll୧୩ll

ସାଗରର ଅସରନ୍ତି ଢେଉ ଚିରି ଆସୁଛି ପାଶେ ତୁମର,

ସବୁ ରାଗ ରୁଷା କାଢିଣ ମନରୁ କରିବ ବୋଲି ନିଜର ll୧୪ll

କୌତୁକର କଳୀ ଖେଳାଇବା ଆମେ ପୁଣି ହୋଇଣ ଏକାଠି,

ଦେଖିବା ସପନ ଭରିଣ ଯୌବନ ହୋଇ ପ୍ରେମ ସହପାଠୀ ll୧୫ll

ଗଭୀର ସାଗରେ ସମୁଦ୍ର ସ୍ରୋତରେ ଚଳାଇ ଆସେ ଜାହାଜ,

ଆସିବି ଶୀଘ୍ର ମୁଁ ତୁମରି ମନରେ ଦୁରେଇ ରଖିଥ ଲାଜ ll୧୬ll

ସ୍ୱଳ୍ପଦିନର ଏ ଦୂରତା କଅଣ ଦୂରେଇବ ଆମ ମନ,

ଆଜି ବି ରାଧାଙ୍କୁ କୁଞ୍ଜ ବନେ ପରା ଶୁଭେ କୃଷ୍ଣ ବଂଶୀ ସ୍ଵନ ll୧୭ll

ଦରିଆପାରି ପ୍ରେମିକ