୧୮୫୨ ମସିହା ଅଗଷ୍ଟ ୫ ତାରିଖରେ କଟକ ଜିଲ୍ଲା କୁଆଁପାଳ ନିକଟ ପଶଲୁଣ୍ଡା ଗାଁରେ ଜନ୍ମଗ୍ରହଣ କରିଥିଲେ ପ୍ରଖ୍ୟାତ ଐତିହାସିକ, ସମ୍ପାଦକ, ଶିକ୍ଷାବିତ, ସମାଜସେବୀ ଓ ସମାଜ ସଂସ୍କାରକ ପ୍ୟାରୀମୋହନ ଆଚାର୍ଯ୍ୟ ।

ଗାଁରୁ ଚାଟଶାଳୀ ପାଠ ଶେଷ କରି ପ୍ୟାରୀମୋହନ କଟକ ଜିଲ୍ଲା ସ୍କୁଲରେ ଅଧ୍ୟୟନ କଲେ । ବିଦ୍ୟାଳୟରେ ପଢୁଥିଲାବେଳେ ଓଡ଼ିଶାରେ ପ୍ରଳୟଙ୍କରୀ ନ’ଅଙ୍କ ଦୁର୍ବିକ୍ଷ ପଡ଼ିଥିଲା । ସେ ଆପଣା ଚେଷ୍ଟାରେ ଲୋକଙ୍କୁ ବଞ୍ଚାଇବା ପାଇଁ ଉଦ୍ୟମ କରିଥିଲେ ।

ମାତ୍ର ୩୦ ବର୍ଷର ଜୀବନର ଶେଷ ୧୦ ବର୍ଷ ସେ ଦେଶପ୍ରୀତି ଓ ଜାତି ଗଠନ ଲାଗି ଉତ୍ସର୍ଗ କରିଦେଇଥିଲେ। ମାତୃଭୂମି ଓ ମାତୃଭାଷାର ଉନ୍ନତି ପାଇଁ ତାଙ୍କର ଜୀବନ ସମର୍ପିତ ଥିଲା। ସେ ଭାଷାଭିତ୍ତିକ ଓଡ଼ିଶା ପ୍ରଦେଶ ଗଠନର ସ୍ବପ୍ନ ଦେଖିଥିଲେ।

ବ୍ରିଟିସ୍ ଶାସନ ବିରୋଧରେ ସ୍ବର ଉତ୍ତୋଳନ କରି ଉତ୍କଳୀୟମାନଙ୍କୁ ଜାତୀୟ ଭାବନାରେ ଉଦ୍‌ବୁଦ୍ଧ କରିବା ପାଇଁ ପ୍ୟାରୀମୋହନ ‘ଉତ୍କଳପୁତ୍ର’ ପତ୍ରିକା ମାଧ୍ୟମରେ ଉଦ୍ୟମ କରିଥିଲେ। ଦର୍ଶନ ଅଧ୍ୟାପକ ହରନାଥ ଭଟ୍ଟାଚାର୍ଯ୍ୟଙ୍କ ଦ୍ବାରା ପ୍ରଭାବିତ ହୋଇ ସେ ୧୮୭୦ରେ ବ୍ରାହ୍ମଧର୍ମ ଗ୍ରହଣ କରିଥିଲେ। ତତ୍‌କାଳୀନ କଟକ ସହରର ରାସ୍ତାଘାଟର ଅବସ୍ଥାକୁ ଲକ୍ଷ୍ୟ କରି ‘ଦରଖାସ୍ତ ଜୁତିଆନ’ ନାମକ ଲେଖା ପ୍ରକାଶ କରି ଇଂରେଜଙ୍କ କ୍ରୋଧର ଶିକାର ହୋଇଥିଲେ ।

କଲେଜରେ ଅଧ୍ୟୟନ କାଳରେ ପ୍ୟାରୀମୋହନ ମଧୁସୂଦନ ରାଓ, ପଣ୍ଡିତ ଗୋବିନ୍ଦଚନ୍ଦ୍ର ରଥ, ଦ୍ଵିଜେନ୍ଦ୍ର ପାଲ ଆଦି ସହପାଠୀଙ୍କ ସହିତ ମିଶି , ଓଡ଼ିଶାର ଗରିବଙ୍କ ଉନ୍ନତି ପାଇଁ ସେ ନିଜ ଜୀବନକୁ ସମର୍ପଣ କରିଦେଇଥିଲେ । ସେ ଥିଲେ ସ୍ଵାଧୀନଚେତା । ବିଦେଶୀ ଶାସନ ଓ ମାନସିକତା ବିରୋଧରେ ତାଙ୍କର ଆଭିମୁଖ୍ୟ ଅତି ସ୍ପଷ୍ଟ ଥିଲା । ଶିକ୍ଷାର ଆଲୋକ ସବୁଠି ଓ ସମସ୍ତଙ୍କ ପାଖରେ ପହଞ୍ଚାଇବା ତାଙ୍କର ଲକ୍ଷ୍ୟ ଥିଲା ।

ସେହି ଲକ୍ଷ୍ୟ ନେଇ କଟକରେ ଏକ ବିଦ୍ୟାଳୟ ପ୍ରତିଷ୍ଠା କରାଇଥିଲେ ସେ, ଯାହା ପରେ ପ୍ୟାରୀମୋହନ ଏକାଡ଼େମୀ ଭାବେ ନାମିତ ହେଲା । ସେ ଓଡ଼ିଶାର ଆଦ୍ୟ ଐତିହାସିକ ଭାବେ ମଧ୍ୟ ପରିଚିତ । ହିନ୍ଦୁ ଧର୍ମରେ ଅନେକ କୁସଂସ୍କାର ରହିଥିବାରୁ ସେ ଏହାକୁ ବିରୋଧ କରୁଥିଲେ ଏବଂ ବନ୍ଧୁ ମଧୁସୂଦନ ରାଓଙ୍କ ଦ୍ଵାରା ପରିଚାଳିତ ବ୍ରହ୍ମ ସମାଜରେ ସାମିଲ ହୋଇଥିଲେ । ମାତ୍ର ୨୯ ବର୍ଷ ୫ ମାସର ଜୀବନକାଳ ମଧ୍ୟରେ ସେ ଯେଉଁ ଅମଳିନ କୀର୍ତ୍ତି ସୃଷ୍ଟି କରିଯାଇଛନ୍ତି ତାହା ଅବିଶ୍ଵାସନୀୟ ଅଟେ ।

୧୮୮୧ ଡିସେମ୍ବର ୨୮ ତାରିଖରେ ଏହି ମହାପୁରୁଷଙ୍କର ମହାପ୍ରୟାଣ ହୋଇଥିଲା ।

!! ସୁଶାନ୍ତ କୁମାର ସାସମଲ

ହନୁମାନ ନଗର ଆସ୍କା ରୋଡ଼

ବ୍ରହ୍ମପୁର ଗଞ୍ଜାମ !!

ଦେଶ ପ୍ରେମୀ ଆଚାର୍ଯ୍ୟ ପ୍ୟାରୀମୋହନ (Country lover Acharya Parimohan)

ଦେଶ ପ୍ରେମୀ ଆଚାର୍ଯ୍ୟ ପ୍ୟାରୀମୋହନ (Country lover Acharya Parimohan)