ନାରୀ ନୁହେଁ ସେ ଯୋଗ ଜନ୍ମା ଯଜ୍ଞ ଅଗ୍ନି

ଦ୍ରୁପଦ ର କୁମାରୀ ସେ କୁରୁ ପାଟବଂଶୀ

ଆର୍ଯ୍ୟବର୍ତ୍ତ ର ସାମ୍ରାଙ୍ଗୀ ପାଣ୍ଡବ ଙ୍କ ପତ୍ନୀ

ଶାଶୁ ବଚନ ମାନି ସେ ଯେ ସାଜିଲା ପାଞ୍ଚାଳୀ

ସଭା ମଧ୍ୟେ ସାଜିଲା ସେ ବେଶ୍ୟା କେଉଁପରି ll

ମୁକ ହେଲେ ଦେବବ୍ରତ ସାଜିଲେ ସେ ଅନ୍ଧ

ଧର୍ମ ରକ୍ଷା ପାଇଁ ପୁଣି କରିଲେ ଅଧର୍ମ

କିପରି ସହିଲେ ସେ କୁରୁ ସଭା ରେ ଅଧର୍ମ

ଧର୍ମ ରକ୍ଷା କରିବାକୁ ପରା କରିଥିଲେ ପଣ ll

ଧୃତରାଷ୍ଟ୍ର ଜନ୍ମାନ୍ଧ କର୍ମ ରୁ ବି ଅନ୍ଧ ହେଲେ

ପୁତ୍ର ମୋହେ ଧର୍ମ ଭୁଲି ଅଧର୍ମ ଆଦରିଲେ

କେଉଁ ଆଡ଼େ ଗଲା ତାଙ୍କ ବିଦୂର ର ନୀତି

ଧର୍ମ ନାଁ ରେ ଅଧର୍ମ କୁ ସହିଲେ କେମିତି ll

ଗୁରୁ ଶ୍ରେଷ୍ଠ ବୋଲି ସେ ଯେ ମହା ଗୁରୁ ଦ୍ରୋଣ

ସଭା ମଧ୍ୟେ ସବୁ ଦେଖି ମୌନ ହେଲେ ପୁଣ

କାହିଁ ଗଲା ଶାସ୍ତ୍ର ତାଙ୍କ କାହିଁ ଗଲା ନୀତି

ଦ୍ରୁପଦ କୁମାରୀ କଷ୍ଟ ସହିଲେ କେମିତି ll

ପାଞ୍ଚ ପାଞ୍ଚ ପତି ବୋଲି ଗର୍ବ ଥିଲା ତାର

ସଭା ମଧ୍ୟେ ଦାସ ହେଲେ ପାଞ୍ଚ ପତି ତାର

ଛଳ ବଳେ ଦୁର୍ଯ୍ୟୋଧନ ଦାସ ଦେଲା କରି

ତାକୁ ଧର୍ମ ମାନି ପାଣ୍ଡବ ମୁକ ହୋଇଲେ କିପରି ll

ଦୁଃଶାସନ କେଶ ଧରି ଘୋଷାରି ଆଣିଲା

ସଭା ମଧ୍ୟେ ଆଣି ତାକୁ ଫୋପାଡ଼ିଣ ଦେଲା

ଵସ୍ତୁ ନୁହେଁ ନାରୀ ସେ ଯେ ସବୁ ଭୁଲିଗଲେ

ପାଞ୍ଚାଳୀ ର କାନ୍ଦ ସେଠି କେହି ନ ଶୁଣିଲେ ll

ମୁକ ବଧିର ହେଲା ସେଠି କୁରୁ ଧର୍ମ ସଭା

ଦ୍ରୋପଦୀ ର ଆପମାନେ ଆର୍ଯ୍ୟବର୍ତ୍ତ କମ୍ପିଗଲା

ଅଗ୍ନି କୁ ବାନ୍ଧିବା ପାଇଁ ଦୁଷ୍ଟ ଚେଷ୍ଟା କଲା

ଯୋଗ ଜନ୍ମା ଯୋଗ ଅଗ୍ନି ଅଯୋନି ସମ୍ଭୁତା

ତାକୁ କିବା ବାନ୍ଧି ଦେବ ଦୁର୍ଯ୍ୟୋଧନ ଦୁଷ୍ଟ ଆତ୍ମା ll

ତାର ରକ୍ଷଣ ପାଇଁ କେହି ସଭାରେ ନଥିଲେ

ସଭା ମଧ୍ୟେ ସେହି ଏକା ନାରୀ ରୂପେ ଥିଲା

ଉପାୟ ନ ପାଇ ଶେଷେ ଗୋବିନ୍ଦ ଚିନ୍ତିଲା

ଦୟାମୟ ପ୍ରଭୁ ସେ ଯେ କରୁଣା ସାଗର

ସହିପାରିଲେନି ସେ ଏ ଅଧର୍ମ ବିଚାର ll

ସଭା ମଧ୍ୟେ ଦ୍ରୋପଦୀ ର ବିବସନା ବେଳେ

କୋଟି ବସ୍ତ୍ର ଦେଇ ସେ ତା ଲଜ୍ଜା କୁ ରଖିଲେ

ଦୁଃଶାସନ ବସ୍ତ୍ର ଭିଡି ଭିଡି ଥକି ଗଲା

କରୁଣାମୟ ଙ୍କ କରୁଣା ଜାଣି ନ ପାରିଲା ll

ଲୋକ ହସା ହେଲା ସେ ଯେ କୁରୁ ସଭା ତଳେ

ବସ୍ତ୍ର ଭିଡି ଭିଡି ଥକି ପଡିଲା ସଭା ରେ

ଅନ୍ଧକାର ହେଲା ସଭା ପୁରୁଷ ନିର୍ବସ୍ତ୍ର ହେଲେ

ନାରୀ ଅପମାନ ଫଳ ଆଖିରେ ଦେଖିଲେ ll

ତଥାପି ଚେତିଲେନି ସେଇ କୌରବ ର ଵଂଶ

ଗର୍ବ ଫଳେ ପଠାଇଲେ ପାଣ୍ଡବ ଙ୍କୁ ବନେ

ଅଜ୍ଞାତ ବାସ ଦେଇ ନାନା ଯାତନା ଯେ ଦେଲେ

ପାପ ର କଳସ ଧୀରେ ଧୀରେ ପୂର୍ଣ୍ଣ ହେଲା

ସର୍ବ ଶେଷେ ତାହା ମହାଭାରତ ରୂପ ନେଲା ll

ପାଞ୍ଚ ଗାଁ ଦୂରେ ଥାଉ ସୂଚ୍ୟଗ୍ରେ ମେଦିନୀ ନ ଦେଲା

ସର୍ବ ଶେଷେ କହ୍ନେଇ କୁ ବନ୍ଦୀ ଚେଷ୍ଟା କଲା

ଯାର ମାୟା ବଳେ ଏ ଜଗତ ଚାଲଇ

ତାକୁ କେବା ବାନ୍ଧି ପାରେ ଗର୍ବେ ମତ୍ତ ହେଇ ll

ସବୁ ସୀମା ଶେଷ ପରେ କୁରୁକ୍ଷେତ୍ର ଦେଖା ହେଲା

ଧର୍ମ ରକ୍ଷା ପାଇଁ ପୁଣି ଅଧର୍ମ ଯେ ହେଲା

ସୁଭଦ୍ରା ସୁତ ଜୀବନ ଅଧର୍ମ ରେ ନେଲେ

ଧର୍ମ ରକ୍ଷା ପାଇଁ କୃଷ୍ଣ ଗୀତା ବାଣୀ ଦେଲେ ll

ଶହେ ଭାଇ ଗଲେ ତାଙ୍କ ସୁତ ବି ତ ଗଲେ

ପାଞ୍ଚ ଗାଁ କି ହେବ ସେ ହସ୍ତିନା ବି ଦେଲେ

ଧର୍ମ ର ହେଲା ତ ଜୟ ଦୁର୍ଯ୍ୟୋଧନ ଅନ୍ତ ହେଲା

ଗର୍ବ କରି ସେ ଯେ କିବା ଶାନ୍ତି ପାଇଗଲା ll

ସବୁ ସହିବେ ଗୋସାଇଁ ଗର୍ବ ନ ସହଇ

ନାରୀ ଅପମାନ କ୍ଷେତ୍ରେ ସଦା ଉପସ୍ଥିତ ସେ ହୁଅଇ

ନ୍ୟାୟ ଦେଲେ ଦ୍ରୋପଦୀ କୁ ଧର୍ମ ରକ୍ଷା କଲେ

ଧର୍ମ ରକ୍ଷା ପାଇଁ ଶେଷେ ସେ ଅଭିଶାପ ମଧ୍ୟ ନେଲେ ll

ଅଭିଶାପ ପାଇ ଯଦୁ ଵଂଶ ନାଶ ହେଲା

ସବୁ ଆଡେ ଅଧର୍ମ ଅନୀତି ମାଡି ଗଲା

ମାଡି ମାଡି ଚାଲିଛି ସେ ଅଧର୍ମ ର ଚେର

କଳକୀ ଅବତାର ନିଅ ଗଡି ଯାଉଅଛି ବେଳ

ଗଡି ଯାଉ ଅଛି ବେଳ ll

ଧର୍ମଯୁଦ୍ଧ

ନାରୀ ନୁହେଁ ସେ ଯୋଗ ଜନ୍ମା ଯଜ୍ଞ ଅଗ୍ନି