ମୀତାର ଆଜି ଜନ୍ମ ଦିନ। ରାତି ୧୨ଟାରୁ ୧୨ପର୍ଯ୍ୟନ୍ତ ବୟଫ୍ରେଣ୍ଡ୍, ଗର୍ଲଫ୍ରେଣ୍ଡ୍ ଓ ବନ୍ଧୁବାନ୍ଧବ ସଭିଙ୍କ 'Happy Birthday' ଇମୋଜୀ ଆଉ କେକ୍ ର ଇମୋଜୀ।

*ପ୍ରଥମ ଦୃଶ୍ୟ*

ମୀତାର ତା'ର ସ୍ବାମୀ ସହ ଝଗଡ଼ା ହୋଇଯାଇଛି ଗତକାଲି ରାତିରେ। ସକାଳୁ ଫେସ୍ ବୁକ୍ ନୋଟିଫିକେଶନ୍ ରେ ରିମାଇଣ୍ଡର୍ ରେ ଦେଖିଦେଲା, ସ୍ବାମୀ। ଗୋଟିଏ 'Happy Birthday' ଇମୋଜୀ ଆଉ କ୍ୟାଣ୍ଡେଲ୍ ଲଗା କେକ୍ ର ଇମୋଜୀ ସେଣ୍ଡ୍ କରିଦେଲା। ନଥିଲା ସ୍ନେହ କି ଆବେଗ। ଖାଲି ଥିଲା ଯେମିତି "ମହାକାଳଫଳ ବଡ଼ ସୁନ୍ଦର, ଭିତରେ ଦେଖିଲେ ପୋଡ଼ା ଅଙ୍ଗାର" ସଦୃଶ।

*ଦ୍ବିତୀୟ ଦୃଶ୍ୟ*

ଶୁଣୁଚ ଆଜି ମୋ ଜନ୍ମଦିନ। ତୁମେ ଶିଘ୍ର ଅଫିସ୍ ରୁ ଫେରିଆସିଲେ ପାଳନ କରିବା। ସ୍ବାମୀ ଛାଡ଼ିଦେଲା ଏକ 'ମୁହଁ ମୋଡ଼ା' ଇମୋଜୀ। ଚାଲିଗଲା ଅଫିସ୍ କୁ। ନଥିଲା ମୁହଁରେ ହସ।

*ତୃତୀୟ ଦୃଶ୍ୟ*

ଫୋନ୍ ରେ ମୀତା କହିଲା ମୋ ସାଙ୍ଗମାନେ ଆସୁଛନ୍ତି। ଫେରିଲା ବେଳେ ବଜାରରୁ କିଛି ଆଣିଥିବ। 'ଷ୍ଟପ୍ ଇଟ୍','ଟକ୍ ଟୁ ମାଇଁ ଫୁଟ୍' ଦୁଇଟି ଇମୋଜୀ। ବ୍ୟସ୍ତତା ରେ ବିରକ୍ତ ହୋଇ...

*ଚତୁର୍ଥ ଦୃଶ୍ୟ*

ପୁଣି ଫୋନ୍ ଆସିଲା ମୀତାର। ସକାଳୁ ଟିଫିନ୍ ନେଇନ। କ'ଣ ଜଳଖିଆ ଖାଇଦେବ। ପ୍ଲିଜ୍... ଶୁଣ, ଅନ୍ତତଃ ମୋ ସାଙ୍ଗ ମାନଙ୍କ ଆଗରେ ମୋତେ ବେଜ୍ଜିତ୍ କରନି। ପ୍ଲିଜ୍... କିଛି ଆଣିବ। 'ଓକେ','ଗୋଟିଏ ନେକ୍ ଲେସ୍' ଓ 'ଡେଲିଭରି' ର ଇମୋଜୀ। ନଥିଲା ସେଥିରେ ସ୍ନେହ-ଶ୍ରଦ୍ଧାର ମୂଲ୍ୟ। ଖାଲି ଭିକାରୀ କୁ ଭିକ ଦେବାଭଳି ଅନୁଭବ।

*ପଞ୍ଚମ ଦୃଶ୍ୟ*

କଲିଙ୍ଗ୍ ବେଲ୍ ବାଜିଲା...

ବୋଧହୁଏ ସେ ଆସିଗଲେ...

ସାଙ୍ଗ-ସାଥି ଓ ପୁଅ-ଝିଅ ମେଳରୁ ଦୌଡ଼ି ଯାଇ କବାଟ ଖୋଲିଲା। ପିଅନ୍ ମୁଖାର୍ଜୀ ତନିସ୍କ୍ ଜୁଏଲର୍ସରୁ ଆଣିଥିବା ପ୍ୟାକେଟ୍ ଓ କେକ୍ ବକ୍ସଟି ଦେଇ କହିଲା, "ମ୍ୟାଡାମ୍ ,ସାର୍ ଆଜି ଡେରି ରେ ଆସିବେ। ଅଫିସ୍ ରେ ବହୁତ କାମ ଅଛି।"

ସମସ୍ତଙ୍କ ସାମ୍ନାରେ ପ୍ୟାକେଟ୍ ଖୋଲାଗଲା। ତାଳି ମାରି ନାଚିଲେ। ବାଃ.. ବାଃ... କେତେ ସୁନ୍ଦର ହାର! କେକ୍ କଟାଗଲା, ସମସ୍ତେ ଖାଇଲେ। କିନ୍ତୁ, ସୁନ୍ଦର ପ୍ରେମଭରା ହୃଦୟ ନଥିଲା। ଖାଲି ଥିଲା ଏକ ଛଳନାର ପ୍ରେମ କରୁଥିବା ଇମୋଜୀ।

#ଦୃଶ୍ୟାନ୍ତର#

ପିଅନ୍ ମୁଖାର୍ଜୀ ଘରକୁ ଗଲେ।

ସ୍ତ୍ରୀ ପଚାରିଲା, "ଆଜି କ'ଣ ଚଞ୍ଚଳ ଚାଲିଆସିଲ!"

ନାହିଁ ସାର୍ ଙ୍କୁ କହି ଚଞ୍ଚଳ ଚାଲିଆସିଲି। ତୋର କ'ଣ ମନେ ନାହିଁ, ଆଜି ପରା ତୋର ଜନ୍ମଦିନ! ଆଜି ତୋତେ ୩୩ଛୁଇଁଲା। ଗାଲକୁ ଆଉଁଶି ଦେଇ ମୁଖାର୍ଜୀ କହିଲେ, "ତଥାପି ସଜ ଗୋଲାପ କଢ଼ି ପରି ଆମ ପ୍ରେମ ଅଛି। ନୁହଁ କି?!" ଅଳ୍ପ ଲାଜେଇ ଗଲା ସ୍ମିତା। ମୁଖାର୍ଜୀଙ୍କ ଛାତି ଉପରେ ଆଉଜି ହୋଇଗଲା। ସବୁବେଳେ ଏମିତି ରହୁ, ଫୁସ୍ ଫୁସ୍ କରି ମୁଖାର୍ଜୀଙ୍କ କାନ ପାଖରେ କହିଗଲା।

ମୁଖାର୍ଜୀ କହିଲେ, "କାହିଁ, ତୁ ତ ମନେ ପକାଇଲୁନି।"

ସ୍ମିତା କହିଲା, "ଏଇ ପିଅନ୍ ଚାକିରୀରେ ଆମେ କ'ଣ କରି ପାରିବା ଭାବି କହିଲିନି।

ମୁଖାର୍ଜୀ କହିଲେ, "ଆଜି କାହିଁକି ତୋ ପାଇଁ ଭଲ ଶାଢ଼ୀଟିଏ ଆଣିବାକୁ ଇଚ୍ଛା ହେଲା। ଏଇ ଦେଖ୍ ଗୋଲାପୀ ରଙ୍ଗର.. ପସନ୍ଦ ଆସିବ ତ! ବେଶି ନୁହଁ ମ ଏଇ ₹୩୫୦.. ଆଉ ଦଶ ଟଙ୍କିଆ ଡେରି ମିଲ୍କ୍ ଚକୋଲେଟ୍ ଓ ସ୍ମାଇଲ ହସର ଆଖି ମରା ଇମୋଜୀ ବେଲୁନ୍ ଟିଏ।"

ହସି ହସି ସ୍ମିତା କହିଲା, "ଆରେ ପ୍ରେମରେ ଆଣିଛ। ପସନ୍ଦ କରିବିନି କାହିଁକି?"

ଆସ ଏଇ ଚକୋଲେଟ୍ କୁ ଅଧା ଅଧା ଖାଇ ଆମେ

ପାଳନ କରିବା।

💖😊🥳🥰

ଏକ ଇମୋଜୀଭରା ଦିନ

ପ୍ରେମର ଫରକ