ସୂର୍ଯ୍ୟ ଧିରେ ଧିରେ ଅସ୍ତ ହୋଇଯାଉଥିବାର ଦେଖା ଯାଉଥିଲା ଶିବ ବାବୁ ଙ୍କ କୋଠା ଘର ଓ ନଡ଼ିଆ ଗଛ ସନ୍ଧି ରେ। ଏପଟେ ଶିବ ବାବୁ ଙ୍କ ସ୍ତ୍ରୀ ମେଘ୍ନା ଦେବୀ ସନ୍ଧ୍ୟାବତୀ ଜାଳୁଥିବା ସମୟରେ ସେପଟରୁ ଘରୁ ପିଲା ମାନଙ୍କ କୋଳାହଳ ଶୁଭୁଥାଏ।ଏହି ପିଲା ମାନଙ୍କ ଖେଳ କୁଦ ତାଙ୍କ ପାଇଁ ଜମା ବି ନିତି ଦିନିଆ କଥା ନୁହେଁ ଖରା ଛୁଟି ନହୁଏ କି ଏତେ ବର୍ଷ ପରେ ପୁଅ ବୋହୁ ନାତି ନାତୁଣୀ ନ ଆସନ୍ତି। ଆଜି ଘର ର ମାହୋଲ ପୁରା ଖୁସି ର ଥିଲା।

ଆୟାଂଶ ଓ ମାୟରା ବାହାରୁ ଦୁଇ ଜଣ ଜେଜେ ବାପାଙ୍କ ପାଖକୁ ଦୌଡ଼ି ଦୌଡ଼ି ଆସିଲେ। ଜେଜେ ଜେଜେ ଆମେ ରବି ଅଙ୍କଲ ଙ୍କ ଦୋକାନ ରୁ ଶୁଣି ଆସିଲୁ କାଲି ଏଠି ଭୋଟ ଅଛି, ତମ ସ୍କୁଲ ରେ ହିଁ ହବ ଆଉ ସବୁ ଲୋକ ଆସିବେ। ଏଟା କଣ କିଛି ଗେମ୍ କି ଆମେ ବି participate କରି ପାରିବା ? ବୋଲି ପ୍ରଶ୍ନ କଲା ମାୟରା । ଆୟାଂଶ କହିଲା ଆରେ ବୁଦ୍ଦୁ ଏଟା ଗେମ୍ ନୁହେଁ ଗୋଟେ ଫେଷ୍ଟିଭାଲ ହେବ ଆମେ ସବୁ ଯିବା। ରାଇଟ୍ ନା ଜେଜେ? ସେପଟରୁ ମେଘନା ଦେବୀ ରୋଷେଇ ଘରୁ କହୁଥାନ୍ତି ଭଲ କରିଛ ପିଲା ମାନେ ଆଜି ସ୍କୁଲ ର ମାଷ୍ଟ୍ରେ ଙ୍କୁ ଠିକ୍ ମିଳିଛନ୍ତି ବୁଝାଅ ବୁଝାଅ ଦେଖିବା କହି ହସି ଉଠିଲେ।

ଶିବୁ ବାବୁ ଉତ୍ତର ଦେଲେ ହଁ ଏଟା ଗୋଟେ ଫେଷ୍ଟିଭାଲ ଭଳି ଯେଉଁଠି ଲୋକ ମାନେ ଗଣତନ୍ତ୍ର ମାନେ ତୁମ ମାନଙ୍କ ଭାଷାରେ democracy କୁ celebrate କରନ୍ତି ନିଜର ପ୍ରତିନିଧି କୁ ଭୋଟ ଦେଇ କରି ବାଛି। ମାୟରା କହିଲା ବୁଝିଲି ବୁଝିଲି ଜେଜେ ଆମେ ସମସ୍ତେ କାଲି ଭୋଟ ଦେଇ celebrate କରିବା। ଜେଜେ ହସି ଉତ୍ତର ଦେଲେ ନା ମା କେବଳ ବଡ଼ ଲୋକ ଯାହାର ଅଠର ବର୍ଷ ହୋଇଥିବ ସେମାନେ ହିଁ ଭୋଟ ଦେଇ ପାରିବେ ତେଣୁ କାଲି ମୁଁ , ତୁମ ଜେଜେମା, ତୁମ ବାବା ଓ ମାମା ମିଶି ଯିବୁ ଭୋଟ ଦେବାକୁ।

ସେପଟରୁ ସିତାଂଶୁ (ବାଙ୍ଗାଲୋର ରେ software ରେ ଜବ୍ କରେ) ଲାପଟପ୍ ରେ କାମ କରୁ କରୁ ରୁମ୍ ଭିତରେ ପଶିଲା । ବାପା କହିଲେ ପୁଅ କାଲି ଆମେ ସବୁ ସାଙ୍ଗ ହୋଇ ଯିବା ଭୋଟ ଦେବାକୁ। ସିତାଂଶୁ କହିଲା seriously ବାପା ତମକୁ ଲାଗୁଛି ମୁଁ ଏତେ ପାଠ ପଢ଼ିକି ଏତେ ବଡ଼ କମ୍ପାନୀ ରେ ଚାକିରି କରୁଛି ତମକୁ ଲାଗୁଛି ମୁଁ ଯିବି ଭୋଟ ଦେବାକୁ। ମୁଁ ଯଦି ଏହି ଗାଁ ପିଲାଙ୍କ ଭଳି ରାଜନୀତି ରେ ମାତିବି ମୋ standard କଣ ରହିବ। ଏମିତି ମୋର କାଲି ମିଟିଂ ଅଛି ଅନଲାଇନ୍ ରେ କହି ତାର କାମ ରେ ଲାଗିଗଲା। ବାପା ଟିକେ ନୀରବ ହୋଇଗଲେ କହିଲେ ହଉ ଠିକ୍ ଅଛି ବୋହୁ ତମେ ତମ ଶାଶୁ ଙ୍କ ସହ କାଲି ଯିବ ତାହେଲେ ଭୋଟ ଦେବାକୁ ଲୋକ ପରିଚୟ ବି ହୋଇଯିବ। ବୋହୂ ଆଜ୍ଞା ରେ ଉତ୍ତର ଦେଇ ରୁମ୍ କୁ ଚାଲିଗଲେ ।

ସେପଟୁ ପୁଅ ବୋହୁଙ୍କ ପାଟି ଶୁଭିଲା। ବୋହୂ -" ବାପା ଯେତେବେଳେ ମୋତେ ଯିବାକୁ କହିଲେ ତୁମେ ସେଇଠି ବସି କି ରହିଗଲ ଟିକେ ମନା କରିପାରିଲନି । ମୋତେ ବାଧ୍ୟ ହୋଇ ହଁ କରିବାକୁ ପଡ଼ିଲା ଏହି ଯୋଉ ଗରମ ସମୟରେ ଲାଇନ୍ ରେ ଛିଡ଼ା ହୋଇ ଭୋଟ ପାଇଁ ଯିବି ମୁଁ ଜଣେ established ଡକ୍ଟର ମୁଁ ଭୋଟ ଦେଲେ ମୋତେ କଣ ଟା ଏଥିରୁ ମିଳିବ। ଏ କଥା ସବୁ ପରେ ମେଘନା ଦେବୀ ଆସି କହିଲେ ଦେଖ ବୋହୁ ଠିକ୍ କହୁଛି ଏସି ରେ ରହିବା ଲୋକ ଏତେ ଗରମ ରେ ଯାଇ ଭୋଟ ଦେଇ କଣ ପାଇବ କୁହ ତ। ଆଉ ମୁଁ ଯାଇ କଣ କରିବି। ମୁଁ ତ ଘର କାମ ରେ ବ୍ୟସ୍ତ ସେଥିରେ ନାତି ନାତୁଣୀ ବି ଅଛନ୍ତି ତମେ ତ ଘର ର ମୂରବୀ ତମେ ଜଣେ ଦେଲେ କଣ ହୋଇଗଲାନି? ଆମ ଘର ର ସବୁ ନିଷ୍ପତ୍ତି ତ ତମେ ନିଅ ମୋର କଣ ଆପତ୍ତି ଅଛି।

ସେତିକି ବେଳେ ବନମାଳୀ(ଶିବୁ ବାବୁ ଙ୍କ ବୋଲ ହାକ କରେ) ପଶିଲା ଘରକୁ। ବାବୁ ଘର ଅଛନ୍ତି ନା। ଶିବୁ ବାବୁ କହିଲେ ଆ ବନମାଳୀ ଆ ତୋତେ ହିଁ ଅପେକ୍ଷା କରିଥିଲି। ମୋତେ ସାଙ୍ଗ ଦେବାକୁ କେହି ମିଳିଲେନି , କାଲି ତୋର ମୋର ଭୋଟ ଦେବାକୁ ଯିବା। ବନମାଳୀ କହିଲା ବାବୁ ମୁଁ? ମୁଁ ଯାଇ କିସ ଆଉ ଭୋଟ ଦେବି। ମୁଁ ହେଲି ଚାଷୀ ମୂଲିଆ ନୁକ ପାଠ ସାଠ ରାଜନୀତି କଥା ମୋତେ କୋଉଠୁ ଜଣା। ଯିଏ ଜିତିବା କଥା ଜିତିବ ଏ ମଳି ମୁଣ୍ଡିଆ ନୂକ ର ଗୁଟେ ଭୁଟ କଣ ବା କାମରେ ନାଗିବ। କାଲି ଦିନରେ ମୁଁ ଟିକେ ଖେତ କୁ ଜିମି, ଏନେ ବାଡ଼ି ଆଡ଼େ ଗଛ ଦୁଇଟା ବି ଲଗେଇତେ ହବ, ନହେଲେ ଏବେଠୁ ଯୋଉ ଖରା ହେଲାଣି ଆଉ ପାଞ୍ଚ ବର୍ଷ ପରେ ରହି ହବନି।

ଶିବୁ ବାବୁ ଦୀର୍ଘ ନିଶ୍ଵାସ ପକେଇଲେ। କହିଲେ ବାଃ ସବୁ ନିଜେ ନିଜେ ସ୍ଥିର କରି ସାରିଛନ୍ତି। ମୋ ପୁଅ ଯିଏ ବାଙ୍ଗାଲୋର ରେ ଏତେ ବଡ଼ କମ୍ପାନୀ ରେ କାମ କରୁଛି , ଅଫିସ ର ଅଧା ଦାୟିତ୍ଵ ତା କାନ୍ଧ ରେ ସେ ବଡ଼ ବଡ଼ ନିଷ୍ପତ୍ତି ନେଉଛି କିନ୍ତୁ ଆଜି ସେ ଭୋଟ ଦେଇ ପାରିବନି ବାଃ। ତାକୁ କିଏ ବୁଝାଇବ ରାଜନୀତି ରେ ମାତିବା ଆଉ ଭୋଟ ଦେବା ପୁରା ଅଲଗା। ମୋ ବୋହୂ କେତେ କେତେ ଲୋକଙ୍କ ଜୀବନ ବଞ୍ଚାଉଛି, ଡାକ୍ତରଖାନା ଠାରୁ ଘର ଯାଏଁ ସବୁ ଦାୟିତ୍ଵ ତୁଲାଉଛି କିନ୍ତୁ ସେ ଭାବୁଛି ଭୋଟ ସହ ତାର କଣ ବା ଯାଏ ଆସେ ଅଛି। ମୋ ସ୍ତ୍ରୀ ଯିଏ ତିରିଶ ବର୍ଷ ରୁ ଅଧିକ ମୋର ଘର ଚଳାଉଛି , ସବୁ ସେ ବୁଝୁଛି ହେଲେ ସେ ବି ଭାବୁଛି ଜଣେ ଗୃହିଣୀ କଣ କରିବ ଭୋଟ ଦେଇ। ଆଉ ଏବେ ଆସିବା ମୋର ବାମ ହାତ ବନମାଳୀ ପାଖକୁ। ଘର ର ବୋଲ ହାକ କରିବା ଠୁ ଜଣେ ସଫଳ ଚାଷୀ ହେବା ସହ ପରିବେଶ ପାଞ୍ଚ ବର୍ଷ ପରେ କଣ ହେବ ସେଥିପାଇଁ ଗଛ ଲଗାଉଛି ହେଲେ ପାଞ୍ଚ ବର୍ଷ ପରେ ଦେଶ ର ଭବିଷ୍ୟତ କଣ ହେବ ସେଥିରେ ଭାବୁଛି ସେ ଗୋଟେ ଲୋକ କଣ କରିବ। ହେଲେ ତମେ ମାନେ ଜାଣିବା ଦରକାର ଏହି ଗୋଟେ ଗୋଟେ ଭୋଟ ଦେଶର ଭବିଷ୍ୟତ କୁ ନିର୍ଦ୍ଧାରଣ କରି ପାରିବ। ସେହି ଗୋଟେ ଗୋଟେ କଣ ହେବ ଭାବି ଆମ ପରିବାରରୁ ଯଦି ପାଞ୍ଚ ଟି ଭୋଟ କଟି ଗଲାଣି ତେବେ ପୁରା ଦେଶର କଥା ଭାବ। ଆଉ ଜାଣି ରଖ ତୁମ ନିଜ ନିଜ ର କର୍ତ୍ତବ୍ୟ ରେ ଦକ୍ଷ ହୋଇପାର କିନ୍ତୁ ଭୋଟ ବିନା ତୁମେ ନିଜର ନାଗରିକତା ର କର୍ତ୍ତବ୍ୟ ରୁ ଓହୋରି ଯାଉଛ। କେହି ନଗଲେ ବି ମୁଁ ମୋ ଅଧିକାର ଓ କର୍ତ୍ତବ୍ୟ ରୁ ଓହୋରି ଯାଇପାରିବିନି କହି ଶୋଇ ଗଲେ ଶିବୁ ବାବୁ।

ସକାଳୁ ସକାଳୁ ଶିବୁ ବାବୁ ଦେଖିଲେ ସମସ୍ତେ ନିଜ ନିଜ କାମରେ ଲାଗିଛନ୍ତି। କାହାକୁ କିଛି ନ କହି ଚୁପ୍ ଚାପ୍ ବାହାରିଗଲେ ଭୋଟ ଦେବାକୁ। କିଛି ସମୟ ଲାଇନ୍ ରେ ଛିଡ଼ା ହେବା ପରେ ହଠାତ୍ ତାଙ୍କ ନାତି ନାତୁଣୀ ସେଠି ଦୌଡ଼ି ଯାଇ କୁଣ୍ଢେଇ ପକେଇଲେ। ହଠାତ୍ ଜେଜେ ଆଶ୍ଚର୍ଯ୍ୟ ହୋଇ ପଚାରିଲେ ତମେ କେମିତି ଆସିଲ ? ସେମାନେ ହାତ ଠାରି ଦେଲେ ଲାଇନ୍ ର ପଛ ଭାଗକୁ ସେଠି ତାଙ୍କ ସ୍ତ୍ରୀ, ପୁଅ , ବୋହୁ ଓ ବନମାଳୀ ହାତରେ ଭୋଟର ପରିଚୟ ପତ୍ର ଧରି ଛିଡ଼ା ହୋଇଥାନ୍ତି ଗଣତନ୍ତ୍ର ର ମହା ପର୍ବ ରେ। ଆଉ ଶିବୁ ଭାବୁ ଏହି ପର୍ବ ରେ ସେମାନଙ୍କୁ ସାମିଲ କରି ପ୍ରତ୍ୟେକ ସଚେତନ ନାଗରିକ ର ଭୋଟ କିପରି ମୂଲ୍ୟବାନ ତାହା ଜଣେଇ ଦେଇଗଲେ।

ଆପଣଙ୍କ କୈବଲ୍ୟ ନାୟକ

Kaibalya Nayak

ଫାଇଭ ଭୋଟ୍ସ | Five Votes - Odia story

ଗଣତନ୍ତ୍ର ର ମହାପର୍ବ "ନିର୍ବାଚନ" ର ଶେଷ ଦିନରେ ମୋର ଏକ ଓଡ଼ିଆ କାହାଣୀ "ଫାଇଭ୍ ଭୋଟ୍ସ"।