ଫେସବୁକ୍‌ରେ ପିତୃଭକ୍ତି

******************************

କ'ଣ ଗରମ ହେଲା ଭଳିଆ ହେଉଛି ।ଠିକ୍ ବେଳକୁ ବିଜୁଳି ବି ନାହିଁ ।କ'ଣ ଟିକିଏ ପବନ ହେଲା କି ନାହିଁ ଲାଇନ୍ ଟା ଯାଇଛି ଯେ ଯାଇଛି ।ଆସିବାର ନାଆ ଗନ୍ଧ ନାହିଁ ।ରାତି ବାରଟା ହେଲାଣି,ଆଖିକୁ ନିଦ ଆସୁନି।କ'ଣ କରିବେ ମଦନ ବାବୁ ଖାଲି ଏପଟ ସେପଟ ହେଉଛନ୍ତି ।ଆସିକି ଆଷାଢ ମାସ ହେଲାଣି ବରଷା ବୁନ୍ଦେ ହେଉନି ।ସତରେ ଆଉ ମଣିଷ ବଞ୍ଚି ପାରିବନି ।ଦିନ ଆସିବ ଅସହ୍ୟ ଖରାରେ ସବୁ ପୋଡି ଛାରଖାର ହୋଇଯିବ ।ପୃଥିବୀ ପୃଷ୍ଠରୁ ଜୀବ ସତ୍ତା ଲୋପ୍ ପାଇଯିବ ।ଏସବୁ ପାଇଁତ ଏଇ ମଣିଷ ସମାଜ ଦାୟୀ ନା ।ନିଜ ହାତରେ ପ୍ରକୃତିକୁ ନଷ୍ଟ କଲା ଆଉ ଏବେ ପ୍ରକୃତି ଦାଉ ସାଧୁଛି ।ସେତେବେଳେ କ'ଣ ଏତେ ଗରମ ହେଉଥିଲା ମଣିଷ ପୁଣି ବିନା ବିଜୁଳିରେ ଜୀବନ ଯାପନ କରୁଥିଲା ।ଦାଣ୍ଡ ବାରଣ୍ଡାରେ ଖଟ ଉପରେ ଗଡପଡ ହୋଇ ଭାବୁଛନ୍ତି ମଦନ ବାବୁ ।

କେତେବେଳେ ଆଖିକୁ ନିଦ ଆସି ଯାଇଛି ଜାଣି ନାହାନ୍ତି, ମୋବାଇଲ୍ ର ଟୁଙ୍ଗ୍ ଶବ୍ଦରେ ମଦନ ବାବୁଙ୍କର ଆଖି ଖୋଲିଲା ।ଆଖିକୁ ମଳି ମଳି ମୋବାଇଲ୍ ଉଠେଇ ଦେଖନ୍ତି ତ ପୁଅର ମେସେଜ୍ ।ଲେଖାଅଛି " Happy Fathers DAY, Love you Bapa .ଆମର ତୁମ କଥା ବହୁତ ମନେ ପଡୁଛି ,ମୋର ଛୁଟି ନାହିଁ, ଆପଣ ଟିକିଏ ଆସନ୍ତୁ ।ଚିଣ୍ଟୁ ବି ଆପଣଙ୍କୁ ବହୁତ ଖୋଜୁଛି" ।

ବାର୍ତ୍ତାଟିକୁ ପଢି ବୁଝିବାକୁ ବାକି ରହିଲାନି ଯେ ଆଜି ପିତୃ ଦିବସ ବୋଲି ।ଆଜିକାଲି ପିଲାମାନଙ୍କର ବାପାଙ୍କ ପ୍ରତି ଭଲ ପାଇବା, ସମ୍ମାନ ଥାଉ କି ନ ଥାଉ କିନ୍ତୁ ଫେସବୁକ୍, ହ୍ବାଟ୍ସଅପ୍ ରେ କେତେ ବାର୍ତ୍ତା ।ସତରେ ବଡ ବିଚିତ୍ର ଆଜିର ଦୁନିଆ, କେତେ ଜଣ ପୁଅ ବୋହୂ ବାପା ମାଆଙ୍କୁ ପଚାରୁଛନ୍ତି ।ପଶୁପକ୍ଷୀ ଶାବକ ଭଳି ,ଡେଣା ଲାଗିଗଲେ ପିତାମାତା କାମରେ ଆସନ୍ତିନି ,ନିଜ ସଂସାରକୁ ନେଇ ବାପାମାଆଙ୍କ ଠାରୁ ଦୂରକୁ ଚାଲି ଯାଆନ୍ତି ।ବାପାମାଆ ଶେଷରେ ଆଶ୍ରୟ ହୀନ ହୋଇ କେଉଁ ବୃଦ୍ଧାଶ୍ରମର ଶରଣ ନିଅନ୍ତି ।

ଭୁଲିଗଲି ,ମଦନ ବାବୁଙ୍କ ପରିଚୟ ଦେବାକୁ ।ମଦନ ବାବୁ ଢେଙ୍କାନାଳର ବାସିନ୍ଦା । ଗତବର୍ଷ ଶିକ୍ଷକ ଚାକେରୀରୁ ଅବସର ନେଇଛନ୍ତି ।ପରିବାର କହିଲେ ପୁଅ ମାନସ, ବୋହୁ ମୋନାଲିସା ଏବଂ ନାତି ଚିଣ୍ଟୁ ।ନିଜ ଧର୍ମପତ୍ନୀ ମିତା ଦେବୀ କେବେଠୁ ହାତଛାଡି ଅଫେରା ଦୁନିଆର ଯାତ୍ରୀ ହୋଇ ସାରିଛନ୍ତି ।ସେତେବେଳକୁ ପୁଅ ମାନସ ସପ୍ତମରେ ପଢୁଥିଲା ।ସାଙ୍ଗସାଥୀ ମାନେ ଦ୍ବିତୀୟ ବିବାହ କରିବାକୁ କେତେ କରି କହିଲେ କିନ୍ତୁ ମଦନ ବାବୁ କରିନଥିଲେ ।ମନରେ ଡର ଥିଲା, ସାବତ ମାଆ କ'ଣ ନିଜ ମାଆ ହୋଇ ପାରିବ ।ଛୁଆଟିକୁ ମଣିଷ କରିବାକୁ କେତେ କଷ୍ଟ ସହିଛନ୍ତି ସେକଥା କେବଳ ସିଏ ନିଜେ ଜାଣନ୍ତି ।ମଦନ ବାବୁ ମହାପ୍ରଭୁଙ୍କୁ ବହୁତ ଭଲ ପାଆନ୍ତି।ଅବସର ସମୟରେ ଯେଉଁ ଟଙ୍କା ମିଳିଲା ସେହି ପଇସାରେ ପୁରୀରେ ଖଣ୍ଡେ ଜାଗା କିଣିଛନ୍ତି ।ଇଛା ଅଛି ସେଠାରେ ଘର ଖଣ୍ଡିଏ କରି ଜୀବନର ଶେଷ ସମୟ ଶ୍ରୀକ୍ଷେତ୍ରରେ କାଟିବେ ।ସାହିତ୍ୟ ପ୍ରତି ବହୁତ ରୁଚି ମଦନ ବାବୁଙ୍କର ।ସମୟ ପାଇଲେ ଲେଖାଲେଖି କରନ୍ତି ।ଜଣେ ଶିକ୍ଷକ ଅପେକ୍ଷା ଜଣେ କବି ହିସାବରେ ସେ ଅଧିକ ପରିଚିତ ।

ମାନସ ଆଜି ଜଣେ ଇଞ୍ଜିନିୟର ।ବାଙ୍ଗାଲୋରରେ ଚାକେରୀ, ସେଇଠି ରହୁଛି ।ତା ମନ ଇଛାରେ ଭଲ ପାଇ ସେଠାରେ ବିବାହ କରିଛି । ନିଜ ଜାତିର ନହେଲେ ମଧ୍ୟ ପୁଅର ଖୁସି ପାଇଁ ମଦନ ବାବୁ ବାଧା ଦେଇ ନାହାନ୍ତି ବରଂ ସ୍ବୀକୃତି ଦେଇଛନ୍ତି । ଦୁଇବର୍ଷ ହେଲା ନାତି ଟୋକାଟିଏ ହୋଇଛି ।ବର୍ଷେରେ ଥରେ ଦୁଇଥର ପୁଅ ବୋହୁ ଆସନ୍ତି ଦିନେ ଦୁଇ ଦିନ ରହି ଫେରି ଯାଆନ୍ତି ।ଅବସର ପରେ ପୁଅ କହୁଛି ବାଙ୍ଗାଲୋର ପଳାଇ ଯିବା ପାଇଁ କିନ୍ତୁ ଜନ୍ମମାଟି ଛାଡି ଯିବାକୁ ଇଛା ନାହିଁ ମଦନ ବାବୁଙ୍କର ।

ନାତି ଟୋକାକୁ ଦେଖିବାକୁ ବହୁତ ଇଛା ହେଉଥିଲା ମଦନ ବାବୁଙ୍କର ।ପୁଅର ମେସେଜ୍ ପାଇ ମନଟା କାହିଁ ଭଲ ଲାଗିଲାନି ।ନାତି ଟୋକାର ମୁହଁଟା ଆଖି ଆଗରେ ଭାସି ଉଠିଲା ।ଟ୍ରେନ୍ ଟିକେଟ୍ କଲେ ଦୁଇଦିନ ପରେ ଟିକେଟ୍ କନ୍ଫର୍ମ ହେଲା ।ଘରର ଦାୟିତ୍ବ ବିଶ୍ବସ୍ଥ ରାମୁକୁ ଦେଇ ବାହାରି ପଡିଲେ ବାଙ୍ଗାଲୋର ।ବାଙ୍ଗାଲୋର ଷ୍ଟେସନରେ ପହଁଚିବା ପୂର୍ବରୁ ପୁଅ ଆସି ଗାଡିଧରି ଅପେକ୍ଷା କରିଥିଲା ।ନାତି ଟୋକା ପାଇଁ ଖେଳଣା ଚକୋଲେଟ୍ କିଣି ଯାଇ ପହଁଚିଲେ ପୁଅ ରହୁଥିବା ଘରେ ।

ବୋହୂ ଆସି ମୁଣ୍ଡିଆ ମାରିଲା ।ନାତି ଟୋକାତ ପ୍ରଥମେ ଆସିଲାନି, କାନ୍ଦିଲା କିନ୍ତୁ ପରେ ବୋଧେ ଜାଣିଗଲାକି ଜେଜେ କି କ'ଣ ଆଉ କାନ୍ଦିଲାନି।ନାତି ସହିତ ଦିନଟେ ଭଲରେ କଟିଲା ।ରାତିରେ ସମସ୍ତେ ଖାଇ ପିଇ ଶୋଇବାକୁ ଗଲେ

।

ଅବଶ୍ୟ ବାଙ୍ଗା୍ଲୋରରେ ଏତେ ଗରମ ନାହିଁ କିନ୍ତୁ ଆଖିକୁ ନିଦ ଆସୁନଥାଏ ମଦନ ବାବୁଙ୍କର ।ସେହି ସମୟରେ ନାତି ଟୋକାର କାନ୍ଦ ଶୁଭେ ।କାନ୍ଦଟା ବନ୍ଦ ହେଲାନି, ଆରେ କେମିତିକା ବାପା ମାଆ ଛୁଆଟା କାନ୍ଦୁଛି, ଦୁଇ ଜଣ ଯାକ ଶୋଇ ପଡିଛନ୍ତି ନା କ'ଣ ?ଏହା ଭାବି ଖଟରୁ ଉଠି ପୁଅ ବୋହୁଙ୍କ ରୁମ୍ ଆଡକୁ ଗଲେ ।ମଦନ ବାବୁ କିଛି କହିବା ଆଗରୁ ବୋହୂ ମୋନାଲିସା ପାଟି ଶୁଣି ଚୁପ୍ ରହିଗଲେ ।

ବୋହୂ ପୁଅକୁ କହୁଛି " ତୁମର ତ ଖାଲି ବାପା ପ୍ରେମ ଝରି ପଡୁଛି, ବାପାର ତେଣିକି ପୁଅ ପ୍ରତି କାଣିଚାଏ ପ୍ରେମ ନଥାଉ ।ବୁଢା ଚାକେରୀରୁ ଅବସର ନେଲା ଯେଉଁ ପଇସା ପାଇଲା ପୁରୀରେ ଖଣ୍ଡେ ଜାଗା କିଣିଦେଲା, ତୁମକୁ ଟିକିଏ ପଚାରିଲା ।ଆରେ ଗୋଟିଏ ବୋଲି ପୁଅ ତାଙ୍କର ଯଦି ଭଲ ପାଇବା ଥାଆନ୍ତା ଜାଗାଟା ତୁମ ନାମରେ ରେଜିଷ୍ଟ୍ରି କରି ନଥାନ୍ତେ ।ମୋ କଥା ମାନ ବାପାଙ୍କୁ କୁହ ବାପାତ ବୁଢା ହେଲେଣି ଏକୁଟିଆ କେତେ ଦିନ ଗାଆଁରେ ରହିବେ ଗାଆଁ ଜାଗା , ପୁରୀ ଜାଗା ବିକି ଦେଇ ଆମ ପାଖକୁ ଚାଲି ଆସନ୍ତୁ ।ଆମେ ବରଂ ସେଇ ପଇସାରେ ବାଙ୍ଗାଲୋର କିଣିଥିବା ଜାଗାରେ ଭଲ ଘର ଖଣ୍ଡିଏ କରିବା" । ଏକଥା ଶୁଣି ପୁଅ ମାନସ କହୁଛି ସେ ବୁଢା କ'ଣ ମାନିବ । ବୋହୂ କହୁଛି ତୁମ ଦ୍ବାରା କୌଣସି କାମ ହେବନି, ତୁମେ ତ ଆଗ କୁହ ନହେଲେ ଦେଖିବା ।

ଏକଥା ଶୁଣି ମଦନ ବାବୁଙ୍କର ପାଦ ତଳୁ ମାଟି ଖସିଗଲା, ମୁଣ୍ଡରେ ହାତ ଦେଇ ଦେଲେ ।ଆଖିରୁ ସ୍ବତ୍ତଃ ଦୁଇ ଚାରି ଟୋପା ଲୁହ ନିଗିଡି ଆସିଲା ।ନିଜ ରୁମ୍କୁ ଫେରିଗଲେ ମଦନ ବାବୁ ।ଭାବିବାକୁ ଲାଗିଲେ କେଉଁଠି ଭୂଲ ରହିଲା, ନିଜ ସୁଖଶାନ୍ତିକୁ ଜଳାଞ୍ଜଳି ଦେବା , ପୁଅକୁ ଉଚ୍ଚ ଶିକ୍ଷିତ କରେଇବା ନା ଆଉ କ'ଣ ।ଆରେ ବେଳ ପାଇଲେ ସମ୍ପତ୍ତି ପାଇଁ ଏମାନେ ବାପାର ଜୀବନ ନେବା ପାଇଁ ବି ପଛେଇବେ ନାହିଁ ।ଆଖିକୁ ନିଦ ନାହିଁ ମୋବାଇଲ୍ ଦେଖୁ ଦେଖୁ ନଜର ପଡିଲା ମାନସର ଏକ ଫେସବୁକ୍ ପୋଷ୍ଟ ଉପରେ ।ଯେଉଁଥିରେ ତାଙ୍କ ଫଟୋ ଅଛି ତଳେ ଲେଖା ହୋଇଛି " ପିତା ଧର୍ମ ପିତା ସତ୍ୟ ପିତା ହିଁ ପରମ ତପ, ପିତରୀ ପ୍ରୀତି ମାପନ୍ନେ ପ୍ରିୟନ୍ତୀ ସର୍ବ ଦେବତା " LOVE YOU BAPA. । ହସ ଲାଗିଲା ମଦନ ବାବୁଙ୍କୁ, ମନରେ ଟିକିଏ ଭଲ ପାଇବା ନଥାଉ କିନ୍ତୁ ଏ ହେଉଛି ଫେସବୁକ୍ ରେ ପିତୃଭକ୍ତି ।

ରାତି ପାହି ସକାଳ ହେଲା ପୁଅ ମାନସକୁ ଦେଖି ମଦନ ବାବୁ କହିଲେ ମୋତେ ଆଜି ଘର ଫେରିବାକୁ ପଡିବ ।କ'ଣ କାଲି ଆସୁ ଆସୁ ତୁମେ ଆଜି ଯିବାକୁ ବାହାରିଲଣି ।ଗୋଟେ ଗୁରୁତ୍ବପୁର୍ଣ୍ଣ କାମ ଅଛି ବୋଲି ମଦନ ବାବୁ କହିଲେ ।ମାନସ କହିଲା ତୁମେ କାହିଁକି ଏତେ ଟେନସନ୍ ନେଉଛ ସେ ଜାଗା ଫାଗା ସବୁ ବିକି ଆମ ପାଖକୁ ପଳାଇ ଆସ ।ମଦନ ବାବୁ ହସିହସି କହିଲେ , ହଉ ଦେଖିବା ।ସେହି ଦିନ ହିଁ ମଦନ ବାବୁ ପୁଅ ପାଖରୁ ଫେରି ଆସିଲେ ।

ଶେଷରେ ଗୋଟିଏ କଥା ,ପାଠକ ପାଠିକା ମାନେ ବିଚାର କରି କହିବେ ତ ଯେଉଁ ପୁଅ କହିବ ବାପା ତୁମେ ଗାଆଁରେ ଥିବା ଜାଗାବାଡି ବିକି ଦେଇ ମୋ ପାଖକୁ ଚାଲି ଆସ ସେ ପୁଅ କ'ଣ ତୁମକୁ ସତରେ ଭଲ ପାଏ, ସେ ପୁଅ କ'ଣ ତୁମର ସେବାଶୁଶ୍ରୁଷା କରିବ ।

ସମସ୍ତଙ୍କୁ ଅନୁରୋଧ ଫେସବୁକ୍ ହ୍ବାଟସଅପ୍ ରେ ବାପାଙ୍କ ଫଟୋ ଛାଡି ଦେଇ ଲଭ୍ ୟୁ ଲେଖିଦେଲେ ହେବନି ବାପାଙ୍କର ତ୍ୟାଗ ଭଲ ପାଇବାକୁ ବୁଝି ଜଣେ ପ୍ରକୃତ ପୁତ୍ରର କର୍ତ୍ତବ୍ୟ ନିର୍ବାହ କରନ୍ତୁ । ଭଗବାନଙ୍କର ଚଳନ୍ତି ବିଗ୍ରହ ହେଉଛନ୍ତି ବାପା ମାଆ ।ତାଙ୍କର ସେବା କରନ୍ତୁ ।

( ଜୟ ଜଗନ୍ନାଥ )

ଦାସ କମଳ କୁମାର

ଗୋବିନ୍ଦପୁର,ମାର୍ଥାପୁର

ଫେସବୁକ୍ ରେ ପିତୃଭକ୍ତି

ଚାଲନ୍ତୁ ପଢ଼ିବା ଦାସ କମଳ କୁମାର ଙ୍କ ଦ୍ଵାରା ଲିଖିତ ଏକ ବ୍ଲଗ୍