ଆମ ଓଡ଼ିଶାର ପର୍ବପର୍ବାଣି ମଧ୍ୟରେ ଗଣେଶ ପୂଜା ଏକ ଗୁରୁତ୍ୱପୂର୍ଣ୍ଣ ସ୍ଥାନ ରଖେ। ଏହା କେବଳ ଏକ ଧାର୍ମିକ ଅନୁଷ୍ଠାନ ନୁହେଁ, ବରଂ ଏହା ଆମର ସଂସ୍କୃତି ଓ ପରମ୍ପରାର ଏକ ଜୀବନ୍ତ ଉଦାହରଣ। ଆଜିକାଲିର ଯୁବପିଢ଼ି, ଯେଉଁମାନେ ମୋବାଇଲ୍ ଫୋନ୍ ଓ ଇଣ୍ଟରନେଟ୍ ଯୁଗରେ ବଡ଼ ହୋଇଛନ୍ତି, ସେମାନଙ୍କ ପାଇଁ ଏହି ପର୍ବର କ’ଣ ମାନେ? ଆଜିର ଯୁବସମାଜ ପାଇଁ ଗଣେଶ ପୂଜା କେବଳ ପୂଜା-ଅର୍ଚ୍ଚନା ନହେଇ ବହୁତ ଅଧିକ ହୋଇପାରେ।

ପରମ୍ପରା ସହିତ ଆଧୁନିକତାର ମେଳ

ପୂର୍ବେ ଗଣେଶ ପୂଜା ମୁଖ୍ୟତଃ ଘରେ ହୋଇଥାନ୍ତା। ଆଜି ଯୁବସମାଜ ଏହାକୁ ଏକ ଭିନ୍ନ ରୂପ ଦେଇଛି। ସେମାନେ ବଡ଼ ବଡ଼ ପେଣ୍ଡାଲ୍ ତୋଳନ୍ତି, ବିଭିନ୍ନ ଥିମ୍ ରଖନ୍ତି ଏବଂ ସମାଜରେ ଏକ ସୁନ୍ଦର ସନ୍ଦେଶ ଦେବାକୁ ଚାହାନ୍ତି। ଏହି ପେଣ୍ଡାଲ ଗୁଡିକର ସଜାଣି ଦେଖିବାକୁ ଅନେକ ଲୋକ ଆସନ୍ତି। ଏହା ମାଧ୍ୟମରେ ଯୁବକ ଯୁବତୀମାନେ ନିଜର ସୃଜନଶୀଳତା ଦେଖାଇପାରନ୍ତି। ସେମାନେ ସୋସିଆଲ୍ ମିଡିଆରେ ଫୋଟୋ ଓ ଭିଡିଓ ଶେୟାର୍ କରି ଏହି ଉତ୍ସବକୁ ଆହୁରି ବଡ଼ କରିଦେଇଥାନ୍ତି।

ଏକତାର ସୂତ୍ର

ଆଜିର ଯୁବପିଢ଼ି ବହୁତ ବ୍ୟସ୍ତ। କଲେଜ, କାମ ଓ ବ୍ୟକ୍ତିଗତ ଜୀବନର ଚାପରେ ସମାଜରେ ମିଶିବାର ସମୟ କମ୍ ମିଳେ। ଗଣେଶ ପୂଜା ଏକ ଭଲ ସୁଯୋଗ ଆଣିଦେଇଥାଏ। ପଡ଼ୋଶୀ, ବନ୍ଧୁ ଓ ପରିବାର ସହିତ ମିଶି କାମ କରିବାରେ ଏହା ସାହାଯ୍ୟ କରେ। ସମସ୍ତେ ମିଶି ପେଣ୍ଡାଲ୍ ତୋଳନ୍ତି, ଝାଲର ଲଗାନ୍ତି, ଫୁଲର ସଜାଣି କରନ୍ତି। ଏହି ମିଳାମିଶା ମଧ୍ୟରେ ନୂଆ ବନ୍ଧୁତା ହୁଏ, ପୁରୁଣା ସ୍ମୃତିରେ,ଏହା ଯୁବସମାଜକୁ ଏକ ସୁନ୍ଦର ଅନୁଭୂତି ଦେଇଥାଏ।

ସାମାଜିକ ଦାୟିତ୍ୱର ଶିକ୍ଷା

ଗଣେଶ ପୂଜା ଆଜିର ଯୁବପିଢ଼ିକୁ ବହୁତ କିଛି ଶିଖାଇଥାଏ। ପୂଜା ପାଇଁ ଟଙ୍କା ତଥା ଜିନିଷ ଯୋଗାଡ କରିବା, ଲୋକଙ୍କୁ ଏକ ଜୁଟ କରିବା, ସମୟସୀମା ମଧ୍ୟରେ କାମ ଶେଷ କରିବା - ଏସବୁ ଏକ ବଡ଼ କାମ। ଏଥିରେ ଯୁବମାନଙ୍କର ନେତୃତ୍ୱ କ୍ଷମତା ବଢ଼େ। ସେମାନେ ଶିଖନ୍ତି କିଭଳି ଭାବେ ବଡ଼ କାମକୁ ଛୋଟ ଛୋଟ ଭାଗରେ ବାଣ୍ଟି ଶେଷ କରିବେ। ଏହା ଜୀବନର ଅନ୍ୟ କ୍ଷେତ୍ରରେ ମଧ୍ୟ ସେମାନଙ୍କୁ ସାହାଯ୍ୟ କରେ।

ପରିବେଶ ପ୍ରତି ଚେତନା

ପୁରାଣ ସମୟରେ ଗଣେଶ ପୂଜାରେ ମାଟିର ମୂର୍ତ୍ତି ବ୍ୟବହାର ହୁଏ। କିନ୍ତୁ ଆଧୁନିକ ସମୟରେ ପ୍ଲାଷ୍ଟର ଅଫ ପ୍ୟାରିସ୍ର ମୂର୍ତ୍ତି ବ୍ୟବହାର ବଢ଼ିଗଲା, ଯାହା ପରିବେଶ ପାଇଁ କ୍ଷତିକାରକ। ଆଜିର ଶିକ୍ଷିତ ଯୁବସମାଜ ଏହା ବୁଝିପାରିଛି। ସେମାନେ ପୁନର୍ବାର ମାଟିର ମୂର୍ତ୍ତି ବ୍ୟବହାରକୁ ଉତ୍ସାହିତ କରୁଛନ୍ତି। ଏହା ପରିବେଶ ମିତ୍ରବତ୍ତ ମଧ୍ୟ ହୋଇଥାଏ ଏବଂ ବିସର୍ଜନ ପରେ ନଦୀ ଓ ପୋଖରୀ ଦୂଷିତ ହୁଏନାହିଁ। ଏହିପରି ଭାବେ ଯୁବପିଢ଼ି ପରମ୍ପରାକୁ ଆଧୁନିକ ଚିନ୍ତାଧାରା ସହିତ ଜୋଡ଼ୁଛି।

ଆଧ୍ୟାତ୍ମିକ ଶାନ୍ତି

ଯୁବସମାଜ ଜୀବନରେ ଚାପ, ଚିନ୍ତା ଓ ଅସ୍ଥିରତା ବହୁତ ରହେ। ନିଜ ଭବିଷ୍ୟତ ନେଇ ଚିନ୍ତା ଲାଗିଲେଣି। ଗଣେଶ ପୂଜାର ଶାନ୍ତ ଓ ଭକ୍ତିପୂର୍ଣ୍ଣ ବାତାବରଣ ଏହି ଚାପକୁ କିଛି ସମୟ ପାଇଁ କମ୍ କରିଦେଇଥାଏ। ପ୍ରାର୍ଥନା ଓ ଧ୍ୟାନ ମନକୁ ଶାନ୍ତ କରେ। ଭଗବାନ ଗଣେଶଙ୍କୁ 'ବିଘ୍ନହର୍ତ୍ତା' କୁହାଯାଏ, ଯିଏ ଜୀବନର ଅସୁବିଧାକୁ ଦୂର କରନ୍ତି। ଏହି ବିଶ୍ୱାସ ଯୁବମନକୁ ଆଶା ଓ ସାହସ ଦେଇଥାଏ।

ଆଜିର ଯୁବସମାଜ ଗଣେଶ ପୂଜାକୁ କେବଳ ପୁରାତନ ରୀତି ଭାବରେ ନ ଦେଖି ଏହାକୁ ଏକ ନୂଆ ରୂପ ଦେଉଛି। ସେମାନେ ଏହାକୁ ଆଧୁନିକ ଓ ରୁଚିକର ଭାବରେ ପରିବେଷଣ କରୁଛନ୍ତି, କିନ୍ତୁ ଏଥିରେ ପରମ୍ପରାର ସାର କଥାକୁ ରଖୁଛନ୍ତି। ଗଣେଶ ପୂଜା ଆଜି ଯୁବସମାଜକୁ ଏକତା, ସାମାଜିକ ଦାୟିତ୍ୱ, ପରିବେଶ ସଚେତନତା ଏବଂ ଆଧ୍ୟାତ୍ମିକତା ଶିଖାଉଛି। ଏହିପରି ଭାବେ, ଏହି ପର୍ବ ଆଜି ବି ଆମ ଯୁବପିଢ଼ିକୁ ଏକ ଉଜ୍ଜ୍ୱଳ ଭବିଷ୍ୟତ ଗଠନ ପାଇଁ ପ୍ରେରଣା ଦେଇ ଚାଲିଛି।

ଗଣେଶଙ୍କର ଆଶୀର୍ବାଦ ଆପଣାର ଜୀବନକୁ ସଫଳ ଓ ଆନନ୍ଦମୟ କରୁ।

ଗଣେଶ ପୂଜାର ଶୁଭେଚ୍ଛା!

!!ସୁଶାନ୍ତ କୁମାର ସାସମଲ

ହନୁମାନ ନଗର ଆସ୍କା ରୋଡ଼

ବ୍ରହ୍ମପୁର ଗଞ୍ଜାମ !!

ଗଣେଶ ପୂଜା: ଆଜିର ଯୁବସମାଜର ପାଇଁ ଏକ ନୂଆ ଆଲୋକ

ଗଣେଶ ପୂଜା: ଆଜିର ଯୁବସମାଜର ପାଇଁ ଏକ ନୂଆ ଆଲୋକ