ମୋର ଆଜି ଵି ମନେ ଅଛି ପିଲାଦିନ କଥା, ଗଣେଶ ପୂଜା ଆସିଲେ ଗୋଡ ଆଉ ତଳେ ଲାଗେନି, କଣ କରିବୁ କେମିତି କରିବୁ କେତେ କଣ ସାଙ୍ଗମାନଙ୍କ ସାଙ୍ଗେ ଭାବି ବସେ |

ପ୍ରଥମେ ଆରମ୍ବ ହୁଏ ଚାନ୍ଦା କେତେ କଣ ମଗାଯିବ, ଯେମିତି ସମସ୍ତେ ଦେଇ ପାରୁଥିବେ, ତାପରେ ଶ୍ରେଣୀ ଶିକ୍ଷକ ଙ୍କ ସହ ପରାମର୍ଶ କରି ଗୋଟିଏ ମିଟିଙ୍ଗ ର ଆୟୋଜନ ହୁଏ, ଯେଉଁଠି ପୂଜା ର ଜଣେ ସଭାପତି ବଛା ଯାଏ, ଯିଏ ସବୁ ବୁଝା ବୁଝି କରିବି, ଯାହା କାନ୍ଧ ରେ ଏ ବର୍ଷ ଗଣେଶ ପୂଜାର ଭରା ରହେ, ଏବଂ ସେତବେଳେ ସେ ସଭାପତି ଜଣଙ୍କ, ଜଣେ ମୁଖ୍ୟମନ୍ତ୍ରୀ ଠୁ କମ ନୁହେଁ, କି କାମ କି ବ୍ୟସ୍ତ, କଣ ବା କହିବି |

ମୁଁ ଅଷ୍ଟମ ଶ୍ରେଣୀ ରେ ପଢୁଥିବା ସମୟ ରେ ଗଣେଶ ପୂଜା ର ଭାର ମୋ ଉପରେ ରହିଲା, ମୁଁ ନିଜକୁ ଭାରି ଭାଗ୍ୟବାନ ମନେ କରୁଥିଲି, ମୁଣ୍ଡ ରେ ଗୋଟିଏ କଥା କିଛି ତ ନୂଆ କରିବି ଯାହା କେହି କରି ନଥିବେ, ସିଂହ ରାଶି ନା ସବୁବେଳେ ଅଲଗା ଚିନ୍ତାଧାରା ଆମର |

ଚାନ୍ଦ ମଗା ସରିଲା, ପୂଜାପାଇଁ ଆଉ ସପ୍ତାହ ଅଛି, ଏବେ ଠୁ ପୂଜା ର ଆୟୋଜନ ପାଇଁ କାମ ଚାଲିଲା, ମୁଁ ପିଲାଙ୍କୁ ନେଇ ଗୋଟିଏ ଗ୍ରୁପ କଲି, ତାଙ୍କୁ କିଛି କିଛି କାମ ଦେଇଥାଏ, କହିଲେ ମଜା ଲାଗେ ସେ ସପ୍ତାହ ମୁଁ ନିଜକୁ ଭାରି ବ୍ୟସ୍ତ ପାଇଛି, କେମିତି ଦିନ ବିତିଛି ଜାଣିନି, ସ୍କୁଲ ରେ ଖେଳ ଛୁଟି ପର୍ଯ୍ୟନ୍ତ ପଢା ହୁଏ, ଏହା ପର ପିରିୟଡ଼ ପୂଜା ପାଇଁ କାମ ଚାଲେ |

କେମିତି ଶ୍ରେଣୀ ସଜା ହେବ, କେଉଁ ମୂର୍ତ୍ତି ଆସିବ, କିଏ କଳାପଟା ରେ ଗଣେଶ ଆଙ୍କିବ, କିଏ ଫୁଲ ଆଣିବ, କିଏ ମାଳା ଗଢ଼ିବ, ପୂଜା ସାମଗ୍ରୀ କିଏ ଆଣିବ, ଏମିତି ନାନା କାମ, ରଙ୍ଗୀନ କାଗଜ ଧରି ପିଲାମାନେ ନିଜ ନିଜ କାରିଗରି ଦେଖାନ୍ତି |

ଅସଲି କାମ ଆରମ୍ବ ହୁଏ ପୂଜା ଆଗ ଦିନ, କ୍ଲାସ ସସ୍ପେଣ୍ଡ ହୁଏ, କେବଳ ପୂଜା କିଛି ପିଲାମାନେ ହିଁ ଆସନ୍ତି, ପୂଜା ହେବା ସ୍ଥାନ କୁ ପରିଷ୍କାର କରି, ମୂର୍ତ୍ତି ବସାଯାଏ, ଶ୍ରେଣୀ ଗୃହ କୁ ସାଜଯାଏ, ତା ଆଗରୁ ଆଉ ଵି କାମ ଅଛି, ଆଖି ପାଖ ସ୍କୁଲ ଏବଂ କିଛି ବ୍ୟକ୍ତି ଙ୍କୁ ଗଣେଶ ପୂଜା ର ନିମନ୍ତ୍ରଣ ପତ୍ର ବଣ୍ଟନ କରାଯାଏ, ଏହାକୁ ଆମେ ପିଲାମାନେ ହିଁ କରିଥାଉ,ଏହିପରି ପୂଜା ର ଆୟୋଜନ ହୁଏ |

ମୋ ଅନୁଭୂତି ମତେ ବହୁତ ଖୁସି ଦିଏ, ଯେ ମୁଁ ମୋ ଜୀବନ ରେ ଥରେ ମାତ୍ର ଗଣେଶ ପୂଜା ର ସଭାପତି ହେଇଥିଲି, ଏବଂ ମୋ ଆୟୋଜନ ରେ ମୋ ଶିକ୍ଷକ, ଶିକ୍ଷୟତ୍ରୀ ବୃନ୍ଦ ଖୁସି ହୋଇଥିଲେ |

ଗଣେଶ ପୂଜା ପ୍ରତିବର୍ଷ ଆସେ, କିନ୍ତୁ ସ୍କୁଲ ବେଳେ ଯେଉଁ ଖୁସି ଓ ଉତ୍ସାହ ଥାଏ ପୂଜାକୁ ନେଇ ତାହା, ଆଜି ର ପୂଜା ରେ ନାହିଁ, |

ଗଣେଶ ପୂଜା

ରଙ୍ଗୀନ କାଗଜ ପତାକା, ମଇଦା ଅଠା,କଳାପଟା ରେ ପ୍ରଭୁ ବିଘ୍ନରାଜ, ନୂଆ ଡ୍ରେସ