ଗଣିତ ଏକ ବିଷୟ ଯାହାକୁ ଅନେକ ଛାତ୍ରଛାତ୍ରୀ ଭୟ କରନ୍ତି। ତେବେ ଏହି ଭୟର କାରଣ ହେଉଛି ଏହାକୁ ସଠିକ୍ ଭାବରେ ବୁଝିପାରିବାର ଅଭାବ। ଯଦି ଗଣିତର ମରମ ବୁଝାଯାଏ, ତେବେ ଏହି ବିଷୟ ଅତି ମଜାଦାର ଓ ଉପକାରୀ ଲାଗିଥାଏ। ଗଣିତ ହେଉଛି ଏମିତି ଏକ ବିଷୟ ଯାହା ଜୀବନର ପ୍ରତିଟି ଦିନରେ ବ୍ୟବହାର ହୁଏ। ଆମେ ଏହି ବିଷୟ ଛାଡ଼ି ଚିନ୍ତା କରିପାରିବୁନାହିଁ।

ପ୍ରାଚୀନ ଦିନରୁ ଗଣିତ ଜ୍ଞାନ ମାନବ ସଭ୍ୟତାର ଉନ୍ନତି ପାଇଁ ବହୁତ ମୂଲ୍ୟବାନ ଅଂଶ ହୋଇଥିଲା। ଭାରତୀୟ ଗଣିତଜ୍ଞ ଆର୍ଯ୍ୟଭଟ, ବ୍ରହ୍ମଗୁପ୍ତ, ଭାସ୍କରାଚାର୍ୟ ମାନେ ଗଣିତକୁ ବିଜ୍ଞାନ ଭାବରେ ଉନ୍ନତ କରିଥିଲେ। ଶୂନ୍ୟ ଓ ଦଶମିକ ସଂଖ୍ୟାର ଆବିଷ୍କାର ଭାରତର ଅବଦାନ। ଏହି ଗୁରୁତ୍ୱପୂର୍ଣ୍ଣ ଅବିଷ୍କାର ବିନା ଆଜିର ବିଜ୍ଞାନ ଓ ତଥ୍ୟପ୍ରଯୁକ୍ତି ଅଗ୍ରଗତି ସମ୍ଭବ ହେଇପାରିନଥାନ୍ତା।

ସ୍କୁଳରେ ଆମେ ପ୍ରଥମେ ଯୋଗ, ବିୟୋଗ, ଗୁଣା, ଭାଗ ଶିଖୁ। ଏହି ସବୁ ମୂଳ ଧାରଣା ନିମିତ୍ତ ହେଉଛି ଆମ ପାଇଁ ଜୀବନ ରେ ନିଜ ସମୟ, ଅର୍ଥ, ଦୂରତା, ଗତି ଓ ସମସ୍ୟା ନିରାକରଣରେ ସହଯୋଗ କରିବା। ଗଣିତ ଶିଖିବା ମାନେ ମନକୁ ଶୃଖଳାବଦ୍ଧ ଭାବେ ଚିନ୍ତା କରିବା ଅଭ୍ୟାସ ଗଢିବା।

ଆପଣ ବିଚାର କରନ୍ତୁ, ଆମେ ବଜାରକୁ ଗଲେ ମାଲ କିଣିବା ସମୟରେ ଦର ଗଣନା କରିବା, ଫେରା ନିଅବା, ବ୍ୟୟ ଓ ଆୟ ମଧ୍ୟରେ ସମତୁଳନ ରଖିବା — ଏହି ସବୁରେ ଗଣିତର ଅବଧାନ ରହିଛି। ଏହା ଛାଡ଼ି ଆମେ ଘର ନିର୍ମାଣ, ଛାତ୍ରବୃତ୍ତି ଗଣନା, ଆହୁରି ଅନେକ ଦୈନନ୍ଦିନ କାମରେ ଗଣିତକୁ ଅବଶ୍ୟକ ପଡ଼େ।

ଗଣିତ କେବଳ ପରୀକ୍ଷାରେ ଅଂକ ଆଣିବା ଉପାୟ ନୁହେଁ, ଏହା ମନୁଷ୍ୟ ଚିନ୍ତାଧାରା ଏବଂ ବ୍ୟବହାରିକତା ଅନୁଶୀଳନର ଉତ୍ତମ ଉପାୟ। ଏଥି ଦ୍ୱାରା ଛାତ୍ରଛାତ୍ରୀମାନେ ଧୈର୍ଯ୍ୟ, ନିୟମିତତା, ଧ୍ୟାନ, ଶୃଖଳାବଦ୍ଧ ଚିନ୍ତାଧାରା ଓ ଅନୁଶୀଳନ ଶିଖନ୍ତି। ଏହି ଗୁଣଗୁଡ଼ିକ ତାଙ୍କର ସାର୍ବତ୍ରିକ ବିକାଶ ପାଇଁ ଆବଶ୍ୟକ।

ଏହି ଦିନରେ ଗଣିତ ବିନା ବିଜ୍ଞାନ ଅପୂର୍ଣ୍ଣ। ଇଞ୍ଜିନିୟରିଂ, ଡାକ୍ତରୀ, ଅନୁସନ୍ଧାନ, ବୃହତ ପ୍ରଯୁକ୍ତି ଦ୍ୱାରା ନିର୍ମିତ ଉପକରଣ — ଏହି ସବୁର ଭିତିରେ ଗଣିତ ଅଛି। ଡିଜିଟାଲ ବିଶ୍ୱ ଯାହାରେ ଆମେ ବଞ୍ଚୁଛୁ, ତାହା ସମ୍ପୂର୍ଣ୍ଣ ଗଣିତ ଓ କମ୍ପ୍ୟୁଟର ଭିତ୍ତିକ ଅଲଗୋରିଦମ ଉପରେ ନିର୍ଭର କରେ।

ଏହିପରି ଏକ ଗୁରୁତ୍ୱପୂର୍ଣ୍ଣ ବିଷୟ ପ୍ରତି ଛାତ୍ରଛାତ୍ରୀମାନଙ୍କର ଆଗ୍ରହ ଓ ଭଲପାଇବା ବୃଦ୍ଧି କରିବା ଦରକାର। ଶିକ୍ଷକମାନେ ଯଦି ଗଣିତକୁ ଗୋଟିଏ ରମ୍ୟ ଗଳ୍ପ ଭାବେ ପଢ଼ାନ୍ତି, ଦୈନନ୍ଦିନ ଜୀବନର ଉଦାହରଣ ଦେଇ ବୁଝାନ୍ତି, ତେବେ ଗଣିତ ପ୍ରତି ଛାତ୍ରଛାତ୍ରୀ ଆକୃଷ୍ଟ ହେବେ। ବାଲ୍ୟାବସ୍ଥାରୁ ଗଣିତ ଶିଖିବାର ଅଭିରୁଚି ଗଢିଲେ ଆଗାମୀ ଦିନରେ ତାଙ୍କର ଚିନ୍ତାଧାରା ସୁସଂଗଠିତ ହେବ।

ଗଣିତ କେବଳ ବିଷୟ ନୁହେଁ — ଏହା ଜୀବନ ଶୈଳୀ, ଚିନ୍ତା ଓ ବ୍ୟବହାରର ଏକ ମାନସିକ ଅଭିଗମ। ଗଣିତ ଆମକୁ ଶିକ୍ଷାଏ – କିପରି ଏକ ସମସ୍ୟାକୁ ବିଚାର କରି ସମାଧାନ ପାଇଁ ପଦକ୍ଷେପ ନିଆଯିବ। ଏଥିପାଇଁ ଏହାକୁ ଅନ୍ୟ ଦୃଷ୍ଟିକୋଣରୁ ଦେଖିବା ଦରକାର।

ସମାପନରେ କୁହିବାକୁ ଚାହେଁ — ଗଣିତ ଏକ ଆଶା, ଏକ ଶକ୍ତି, ଏବଂ ଏକ ଅବସର। ଏହାକୁ ଭୟ କରିବା ନୁହେଁ, ଭଲପାଇବା ଦରକାର। ଗଣିତ ଯଦି ଆମର ମିତ୍ର ହେଉଛି, ତେବେ ଆମେ ଜୀବନର ବିଭିନ୍ନ ପରୀକ୍ଷା ଏବଂ ପରିସ୍ଥିତିକୁ ସାହସରେ ସମ୍ମୁଖୀନ ହୋଇପାରିବା। ଗଣିତ ଶିଖିବା ମାନେ ଦୃଢ଼ ଭବିଷ୍ୟତ ପାଇଁ ଏକ ଦୃଢ଼ ପାଦକ୍ଷେପ।

!! ସୁଶାନ୍ତ କୁମାର ସାସମଲ

ହନୁମାନ ନଗର ଆସ୍କା ରୋଡ଼

ବ୍ରହ୍ମପୁର ଗଞ୍ଜାମ !!

ଗଣିତ ପାଠର ମରମ କଥା

ଗଣିତ ପାଠର ମରମ କଥା