ଫୁଲ ପାଇଁ ଭଅଁର ଯେତିକି ପାଗଳ , ଗୋପାଳ ସେତିକି ପାଗଳ ପ୍ରକୃତି ପ୍ରେମରେ। ଯେବେ ବରଷା ଖୁବ୍ ବରଷି ଯିବା ପରେ । ବାଦଲ ଧୁଆଁ ଧୁଆଁ ହୋଇ ପାହାଡକୁ ଢାଙ୍କିବା ଦେଖେ ଗୋପାଳ, ତା ମନ ନାଚି ଉଠେ। ଚିତ୍ କରି ଶୋଇ ଗୋପାଳ ଆକାଶକୁ ଦେଖେ , ଅନାବନା ଭାବନାରେ ବୁଡି ରୁହେ । କଣ ସବୁ ଭାବେ କେଜାଣି? ସକାଳ ପାହାନ୍ତିରୁ ଦୌଡେ ପାହାଡକୁ ଲାଗିଥିବା ବଣ ପାଖକୁ, ସେଠି ବସି ରୁହେ । କୁହେ ତାପରି ଉଦାସ ରହୁଥିବା ଲୋକ ମାନଙ୍କୁ କୁଆଡେ ଏ ନିଛାଟିଆ ବଣ, ଝରଣା ଖୁବ ଭଲ ଲାଗେ।

ମୌସୁମୀ ଆସିଲେ , ଆସେ ବର୍ଷା । ବରଷେ ଦିନ ରାତି ଅବିରତ । କୁଳୁକୁଳୁ ଶବ୍ଦ କରୁଥିବା ଝରଣା ସୁ ସୁ ଗର୍ଜନ କରେ। ବିଲ , ବାଡି , ଗାଡିଆ ଓ ପୋଖରୀ ଜଳ ବନ୍ଦୀ। ସବୁଆଡେ ପାଣିର ଅପୂର୍ବ ମନୋରମ ଦୃଶ୍ୟ। ବିଲ ହୁଡ଼ା ମଝିରେ ବସେ ମୁଗୁରା କିମ୍ବା ଜାଲ। ଘରେ ଘରେ ମାଛ ବେଶରର ଆସର । ସକାଳର ପଖାଳ ସହ ମାଛ ଭଜାର ସ୍ଵାଦ କହିଲେ ନସରେ ।

ଗୋପାଳକୁ ଗାଁରେ ଖୁବ ଭଲ ପାଆନ୍ତି ସମସ୍ତେ । ପାଠ ପଢ଼ିବାରେ ଟିକିଏ କମଜୋର, ହେଲେ ସାହି ପଡିଶାଙ୍କ ବୋଲ ହାକ କରିବାରେ ଆଗୁଆ । ସ୍କୁଲରେ ପାଠ ପଢ଼ା କମ, ହେଲେ କୌଣସି ପ୍ରକାରର ସଭା କିମ୍ବା ଗଣେଶ ପୂଜାଠାରୁ ଆରମ୍ଭ କରି ସମସ୍ତ ପର୍ବ ପର୍ବାଣୀରେ କେମିତି ସହଯୋଗରେ କାମ ହେବ । ସେଥି ପାଇଁ ସେ ସବୁବେଳେ କର୍ମଠ। ଗୁରୁଜୀ ଓ ବନ୍ଧୁ ମାନଙ୍କର ପ୍ରିୟ ଗୋପାଳ ।

ନବମ ଶ୍ରେଣୀରେ ପଢ଼େ ଗୋପାଳ। ବିରାଟ ପ୍ରକୃତି ପ୍ରେମୀ। ଆଖପାଖରେ ଥିବା ନିର୍ଜୀବ ବସ୍ତୁ ଭଲପାଏ ଗୋପାଳ । ତାକୁ ଲାଗେ ସେମାନେ କୁଆଡେ ଏକାନ୍ତରେ କାନ ଡେରି ତା କଥା ଶୁଣନ୍ତି। ଗୋପାଳ ବିଲ ଆଡେ ଯାଏ। ତାଳ ଗଛ ପାଖରେ ପୋଲ ଉପରେ ବସି , ନଦୀକୁ ଚାହିଁ ରହେ । ତାଳ ଗଛ ଉପରେ ଥିବା ପକ୍ଷୀ ମାନଙ୍କୁ ଦେଖେ । ଭାରି ଭଲ ଲାଗେ ପକ୍ଷୀ ମାନଙ୍କର ସଙ୍ଘର୍ଷ।

ଏହା ବ୍ୟତୀତ ତା ପାଖରେ ଛୋଟ ବଂଶୀ ଟିଏ ଥାଏ। ସେ ନଦୀ ଉପର ପୋଲ ଉପରେ ବସି ବଂଶୀ ଫୁଙ୍କେ।ପାଣିର ସୁଅକୁ ଶୁଣେ । ଦେଖେ ଆଖି ପାଉ ନଥିବା ଦୂରତା ଯାଏଁ ନଦୀ ବୋହି ଯାଉଛି । ଦେଖେ ପାହାଡ଼ ସେପାଖରୁ ସୂର୍ଯ୍ୟ ଉଦୟ। ଯେମିତି ଲାଗେ ସୂର୍ଯ୍ୟ ଉଠି ଆସେ ନଦୀ ଉପରେ ମୁଣ୍ଡ ଗୁଞ୍ଜିଲେଣି।

ଚାଷୀ ଭାଇ ମାନେ କାନ୍ଧରେ କୋଦାଳ ଧରି ବିଲ ଅଭିମୁଖେ କାମ କରିବା ପାଇଁ ଧାଡି ବାନ୍ଧି ଗଲେଣି । ପିଲାଏ ସାଇକେଲରେ ଧୀରେ ଧୀରେ ସ୍କୁଲ ଯିବା ଆରମ୍ଭ କଲେଣି । ଏଥର ଗୋପାଳ ଝଅଟ ବାହାରି ଗଲା ସ୍କୁଲକୁ। ଦେଖେ ପ୍ରାଥନା ସଭା ଆରମ୍ଭ ହେଲାଣି । ଗୋପାଳ ସ୍କୁଲ ପାଖ ପାଚେରୀ କଡ଼ରେ ଲୁଚି ରହିଲା ।

ଯେମିତି ସଭା ସରିଲା , ସେମିତି ମାରେ ଡିଆଁ ଶ୍ରେଣୀ ଭିତରକୁ। ଏଥର ଗୋପାଳ ସାହିତ୍ୟ ପଢିବା ଆରମ୍ଭ କଲା । ତାର ଓଡ଼ିଆ ସାହିତ୍ୟ ଭାରି ପ୍ରିୟ । କାରଣ ସାହିତ୍ୟ ସହିତ ଜଡିତ ସେ । ପ୍ରକୃତିରୁ ସୃଷ୍ଟି ହୁଏ ସାହିତ୍ୟ । ଆଖ ପାଖରେ ଜନ୍ମ ନିଏ ଅନେକ ସାହିତ୍ୟ। ସେ ପଢ଼େ ଗପ , ଗୀତ ଓ ଅନେକ କବିତା । ପ୍ରାୟ ସାହିତ୍ୟ, ବିଜ୍ଞାନ ଓ ଗଣିତ ପଢା ସରିବା ପରେ । ଏବେ ଖାଇବା ଛୁଟି।

ଖାଇସାରି ଗୋପାଳ ଦେଖିଲା, ଆକାଶରେ ଦଲକାଏ ବାଦଲ କଳା ରୂପ ଧାରଣ କଲାଣି । ଆକାଶ ସେ ପାଖରୁ ବିଜୁଳି ଚମକିବା ଆରମ୍ଭ ହେଲାଣି । ମଝିରେ ମଝିରେ ଘଡଘଡି ର ଶବ୍ଦ। ଶ୍ରେଣୀ ଗୃହ ଅନ୍ଧକାର ହୋଇ ଗଲାଣି । ବର୍ଷାକୁ ନଜର ରଖି, ଏ କଣ ଛୁଟି ବେଲ ବାଜିଲାଣି। ସବୁ ପିଲା ମାନେ ଘର ଅଭିମୁଖେ ଯାତ୍ରା କଲେଣି .....

ଅବଶିଷ୍ଟ ଶେଷ ଭାଗରେ...

ଗପବାଲା ଓ ମୌସୁମୀ -୨

ଦ୍ଵିତୀୟ ଭାଗ