ଅତି ଦୁଃଖର କଥା, ଆଜିକାଲି ଆମ ଦେଶରେ ଧନ ଲୋଭରେ ପ୍ରତ୍ୟହ ହଜାର ହଜାର ସଂଖ୍ୟାରେ ଗୋହତ୍ୟା କରାଯାଉଛି ! ଯଦି ଏହିପରି ଗୋହତ୍ୟା ଚାଲୁରହେ, ତେବେ ଏପରି ଏକ ସମୟ ଆସିବ, ଯେତେବେଳେ କି ଗୋବଂଶ ସମ୍ପୂର୍ଣ୍ଣ ବିଲୁପ୍ତ ହୋଇଯିବ। ଯଦି ଗାଈ ନ ରହିବେ, ତେବେ କ'ଣ ଯେ ଦଶା ହେବ, କେତେ ଯେ ବିପତ୍ତି ପଡ଼ିବ, ତାହାର କଳନା ନାହିଁ। ଗୋବଂଶ ବିଲୁପ୍ତ ହୋଇଗଲେ ଗୋବର ମିଳିବ ନାହିଁ ଏବଂ ଗୋବରଖତ ନ ମିଳିଲେ ଜମି ଅନୁର୍ବର ହୋଇଯିବ। ଜମି ଅନୁର୍ବର ହେଲେ କୃଷିକାର୍ଯ୍ୟ ହେବ କିପରି ? କୃଷି ନ ହେଲେ ଅନ୍ନ ଓ ବସ୍ତ୍ର ମିଳିବ କିପରି ? ଲୋକମାନଙ୍କର ଶରୀରନିର୍ବାହ ପାଇଁ ମଧ୍ୟ ଅନ୍ନ, ଜଳ ଓ ବସ୍ତ୍ର ମିଳିବା କଷ୍ଟକର ହୋଇ ପଡ଼ିବ। ଗାଈ ଓ ଗାଈର କ୍ଷୀର, ଘିଅ, ଗୋବର ପ୍ରଭୃତି ନ ମିଳିଲେ ପ୍ରଜାମାନେ ବହୁତ ଦୁଃଖୀ ହେବେ । ଗୋଧନ ଅଭାବରୁ ଦେଶ ପରାଧୀନ ଓ ଦୁର୍ବଳ ହୋଇଯିବ।

ବର୍ତ୍ତମାନ ପ୍ରତିଦିନ କେଉଁଠି ନା କେଉଁଠି ପ୍ରାକୃତିକ ବିପର୍ଯ୍ୟୟ ଘଟୁଛି।ଘଟୁଥ‌ିବା ପ୍ରାକୃତିକ ବିପର୍ଯ୍ୟୟ ମଧ୍ୟରେ ଭୂମିକମ୍ପ, ଦୁର୍ଭିକ୍ଷ, ଅନାବୃଷ୍ଟି, ଅତିବୃଷ୍ଟି, ଭୂସ୍ଖଳନ , ବଜ୍ରପାତ, ବନ୍ୟା.ବାତ୍ୟା, ସୁନାମି, ଅଂଶୁଘାତ, ପ୍ରଚଣ୍ଡ ଗ୍ରୀଷ୍ମ ପ୍ରବାହ, ଯୁଦ୍ଧ, ମହାମାରୀ ଓ ପରସ୍ପର କଳହ ପ୍ରଭୃତିର ମୁଖ୍ୟ କାରଣ ହେଉଛି ଗୋହତ୍ୟା। ଏଣୁ , ନିଜର ପୂର୍ଣ୍ଣ ଶକ୍ତି ବିନିଯୋଗ କରି ପ୍ରତ୍ୟେକ ଅବସ୍ଥାରେ ଗୋରକ୍ଷା କରିବା ଏବଂ ଗୋରୁମାନଙ୍କୁ କଂସେଇଖାନାକୁ ଯିବାକୁ ନ ଦେବା ଆମ୍ଭମାନଙ୍କର ପରମ କର୍ତ୍ତବ୍ୟ ।

ଗୋରକ୍ଷା ଦୃଷ୍ଟିରୁ ପ୍ରତ୍ୟେକ ଭାଇ-ଭଉଣୀ ନିଜ ନିଜ ଘରେ ଗୋପାଳନ କରନ୍ତୁ। ମଇଁଷି ପ୍ରଭୃତିଙ୍କର କ୍ଷୀର ଓ ଘିଅ ନ ଖାଇ ଗାଈକ୍ଷୀର ଓ ଗାଈଘିଅ ଖାଆନ୍ତୁ, ଘରେ ଘରେ ଗୋବର ଗ୍ୟାସ ଉପଯୋଗ କରନ୍ତୁ। ଗୋରକ୍ଷା ଉଦ୍ଦେଶ୍ୟରେ ହିଁ ଗୋଶାଳା ନିର୍ମାଣ କରନ୍ତୁ, କ୍ଷୀର ଉଦ୍ଦେଶ୍ୟରେ ନୁହେଁ। ଯେତେ ଗୋଚର ଭୂମି ରହିଛି, ସେଗୁଡ଼ିକର ରକ୍ଷଣାବେକ୍ଷଣ କରିବା ସଙ୍ଗେ ସଙ୍ଗେ ସରକାରଙ୍କ ଠାରୁ ଗୋଚର ଭୂମି ନେଇ ଆସନ୍ତୁ। ସରକାରଙ୍କର ଗୋହତ୍ୟା ନୀତିକୁ ବିରୋଧ କରନ୍ତୁ ଏବଂ ଦେଶର ସୁରକ୍ଷା ପାଇଁ ସାରା ଦେଶରେ ଯଥାଶୀଘ୍ର ଗୋହତ୍ୟା ସମ୍ପୂର୍ଣ୍ଣ ବନ୍ଦ କରିବାକୁ ସରକାରଙ୍କୁ ଅନୁରୋଧ କରନ୍ତୁ ।

ନିଷ୍କାମଭାବରେ ଗୋସେବା କଲେ ମୁକ୍ତି ମିଳେ। ଗୋସେବା ଦ୍ବାରା ଅନ୍ତଃକରଣ ନିର୍ମଳ ହୁଏ। ଭଗବାନ ଶ୍ରୀକୃଷ୍ଣ ମଧ୍ୟ ବିନା ପାଦୁକାରେ ଗୋଚାରଣ ଲୀଳା କରିଥିବାରୁ ତାଙ୍କର ନାମ ‘ଗୋପାଳ’ ରହିଲା । ପୂର୍ବକାଳରେ ମୁନି ଋଷିମାନେ ବଣରେ ନିଜ ନିଜ ପାଖରେ ଗାଈ ରଖୁଥିଲେ। ଗୋଦୁଗ୍‌ଧ ଓ ଗୋଘୃତ ଦ୍ବାରା ସେମାନଙ୍କର ବୁଦ୍ଧି ପ୍ରଖର ଓ ଅସାଧାରଣ ହେଉଥିଲା, ଫଳରେ ସେମାନେ ବଡ଼ ବଡ଼ ଗ୍ରନ୍ଥ ରଚନା କରି ପାରୁଥିଲେ। ଆଜିକାଲି ସେହି ଗ୍ରନ୍ଥକୁ ଠିକ୍‌ଭାବେ ବୁଝିବା ଲୋକ ମଧ୍ୟ ବିରଳ। ଗାଈକ୍ଷୀର ଓ ଗାଈ ଘିଅ ପିଇ ସେମାନେ ଦୀର୍ଘାୟୁ ହେଉଥିଲେ। ତେଣୁ ଗାଈଘିଅର ଅନ୍ୟ ନାମ ‘ଆୟୁ’ ଅର୍ଥାତ୍ ଗାଈ ଘିଅ ଖାଇଲେ ଆୟୁ ବୃଦ୍ଧି ହୁଏ । ବଡ଼ ବଡ଼ ରାଜା ମଧ୍ୟ ସେହି ମୁନିଋଷି ମାନଙ୍କ ପାଖକୁ ଆସି ସେମାନଙ୍କର ଉପଦେଶ ଅନୁସାରେ ରାଜକାର୍ଯ୍ୟ କରୁ ଥିଲେ ।

ଗୋରକ୍ଷା ପାଇଁ ବଳିଦାନ ଦେଇଥିବା ବ୍ୟକ୍ତିମାନଙ୍କ ଚରିତ୍ରରେ ଇତିହାସ ଓ ପୁରାଣ ଭରପୂର।

!! ସୁଶାନ୍ତ କୁମାର ସାସମଲ

ହନୁମାନ ନଗର ଆସ୍କା ରୋଡ଼

ବ୍ରହ୍ମପୁର ଗଞ୍ଜାମ !!

ଗୋବଂଶ ଲୋପ

ଗୋବଂଶ ଲୋପ