ବିଷୟ ପ୍ରବେଶ -

*****************

ଗୁରୁ ପୂର୍ଣ୍ଣିମା ହେଉଛି ସନାତନ ଧର୍ମ ସଂସ୍କୃତି ର ଏକ ଅବିଚ୍ଛେଦ୍ୟ ଅଙ୍ଗ। ସନାତନ ସଂସ୍କୃତିରେ ଆଷାଢ଼ ମାସର ପୂର୍ଣ୍ଣିମାକୁ ଗୁରୁ ପୂର୍ଣ୍ଣିମା କୁହାଯାଏ । ଆମର ଧାର୍ମିକ ଶାସ୍ତ୍ରରେ, 'ଗୁ' ଶବ୍ଦର ଅର୍ଥ ଅନ୍ଧକାର ବା ଅଜ୍ଞତା ଏବଂ 'ରୁ' ଶବ୍ଦ ର ଅର୍ଥ ହେଉଛି ଆଲୋକ ।ଗୁରୁ ତାକୁ ହିଁ କହିବା, ଯିଏ ଅଜ୍ଞତା ର ଅନ୍ଧକାର କୁ ଦୂର କରେ ଏବଂ ଜ୍ଞାନ ରୂପକ ଆଲୋକ କୁ ପ୍ରଦାନ କରେ। ଗୁରୁଙ୍କ କୃପା ବିନା କିଛି ବି ସମ୍ଭବ ପର ନୁହେଁ। ଭାରତ, ନେପାଳ ଏବଂ ଭୁଟାନର ହିନ୍ଦୁ, ଜୈନ ଏବଂ ବୌଦ୍ଧ ଧର୍ମର ଅନୁଗାମୀମାନେ ଏହାକୁ ଏକ ପର୍ବ ଭାବରେ ପାଳନ କରନ୍ତି। ହିନ୍ଦୁ,ବୌଦ୍ଧ ଏବଂ ଜୈନ ମାନେ ସେମାନଙ୍କର ଆଧ୍ୟାତ୍ମିକ ଶିକ୍ଷକ ସମ୍ମାନିତ କରିବା ଏବଂ ସେମାନଙ୍କୁ କୃତଜ୍ଞତା ଜଣାଇବା ପାଇଁ ଏହି ପର୍ବ ପାଳନ କରାଯାଏ । ହିନ୍ଦୁ କ୍ୟାଲେଣ୍ଡରର ହିନ୍ଦୁ ମାସର ପୂର୍ଣ୍ଣିମା ଦିନ ଟି ସାଧାରଣତଃ ଜୁନ୍ କିମ୍ବା ଜୁଲାଇ ମାସରେ ରେ ପାଳନ କରାଯାଇଥାଏ । ମହାଭାରତ ମହାକାବ୍ୟ ର ରଚୟିତା ଓ ସଂସ୍କୃତ ର ମହାନ ପଣ୍ଡିତ ବ୍ୟାସଦେବଙ୍କ ଜନ୍ମଦିବସକୁ ବ୍ୟାସ ପୂର୍ଣ୍ଣିମା ବା ଗୁରୁ ପୂର୍ଣ୍ଣିମା ରୂପେ ପାଳନ କରାଯାଏ ।ଋଷି ପରାଶରଙ୍କ ଔରସରେ ସତ୍ୟବତୀ ଙ୍କ ଗର୍ଭରୁ ଆଷାଢ଼ ପୂର୍ଣ୍ଣିମା ଦିନ ମହର୍ଷି ବ୍ୟାସଦେବ ଗଙ୍ଗାନଦୀ ଗର୍ଭସ୍ଥ କୃଷ୍ଣଦ୍ୱୀପରେ ଜନ୍ମ ଗ୍ରହଣ କରିଥିଲେ । ବ୍ୟାସଦେବଙ୍କ ଔରସରେ ଶୁକଦେବ ଜନ୍ମ ହୋଇଥିଲେ । ଏହାଙ୍କ ମାତା ସତ୍ୟବତୀଙ୍କ ସଙ୍ଗେ ଶାନ୍ତନୁଙ୍କର ବିବାହ ହୋଇଥିଲା । ଶାନ୍ତନୁ ଓ ସତ୍ୟବତୀଙ୍କ ପୁତ୍ର ବିଚିତ୍ରବିର୍ଯ୍ୟ ନିଃସନ୍ତାନ ମୃତ ହେବାରୁ ସତ୍ୟବତୀଙ୍କ ଆଦେଶ ଅନୁସାରେ ଏ ବିଚିତ୍ରବିର୍ଯ୍ୟଙ୍କ ଦୁଇ ବିଧବାପତ୍ନୀ ଅମ୍ବିକା ଓ ଅମ୍ବାଳିକାଙ୍କ ସଙ୍ଗେ ନିୟୋଗ ବିଧି ଅନୁସାରେ ସହବାସ କଲେ ଓ ସେମାନଙ୍କ ଗର୍ଭରୁ ଧୃତରାଷ୍ଟ୍ର ଓ ପାଣ୍ଡୁଙ୍କ ଜନ୍ମ ହେଲା । ଏହାଙ୍କ ଔରସରେ ବିଚିତ୍ରବିର୍ଯ୍ୟଙ୍କ ଦାସୀଗର୍ଭରେ ବିଦୁର ଜନ୍ମଗ୍ରହଣ କରିଥିଲେ ।

ପୁରାଣାନୁସାରେ ପ୍ରତ୍ୟେକ ଦ୍ୱାପର ଯୁଗରେ ଜନ୍ମଗ୍ରହଣ କରି ବେଦମାନଙ୍କ ସଂଗ୍ରହ ଓ ବିଭାଗକାରୀ ୨୮ ଜଣ ଋଷି ବେଦବ୍ୟାସ ଭାବେ ପରିଚିତ ହୋଇଛନ୍ତି । ଏମାନେ ବ୍ରହ୍ମା ବା ବିଷ୍ଣୁଙ୍କର ଅବତାର ବୋଲି କଥିତ ହୋଇଅଛି। ପ୍ରଥମ ଦ୍ୱାପର ଯୁଗରେ ସ୍ୱୟଂ ବ୍ରହ୍ମା ବେଦବ୍ୟାସ ରୂପେ, ଦ୍ୱିତୀୟ ଦ୍ୱାପରରେ ପ୍ରଜାପତି ବା ମନୁ, ତୃତୀୟ ଦ୍ୱାପରରେ ଶୁକ୍ରାଚାର୍ଯ୍ୟ, ଚତୁର୍ଥ ଦ୍ୱାପରରେ ବୃହଷ୍ପତି ବେଦଭାଷ୍ୟ ରୂପେ ପରିଚିତ ହୁଅନ୍ତି । ସ୍ୱୟଂଭୁବ, ଉଶନା, ସବିତା, ମୃତ୍ୟୁ ବା ଯମ, ଇନ୍ଦ୍ର, ବଶିଷ୍ଠ, ସାରସ୍ୱତ, ତ୍ରିଧାମ, ଋଷଭ ବା ତ୍ରିବୃଷ, ସୁତେଜା ବା ଭାରଦ୍ୱାଜ, ଅନ୍ତରିକ୍ଷ ବା ଧର୍ମ, ସୁଚକ୍ଷୁ, ତ୍ରଯ୍ୟାରୁଣି, ଧନଞ୍ଜୟ, କୃତଞ୍ଜୟ, ଋତଞ୍ଜୟ, ଭରଦ୍ୱାଜ, ଗୌତମ, ଉତ୍ତମ ବା ହର୍ଯ୍ୟତ୍ମା, ବାଚଶ୍ରବା ବା ନାରାୟଣ ବା ବେଣ, ସୋମମୁଖ୍ୟାୟନ ବା ତୃଣବିନ୍ଦୁ, ଋକ୍ଷ ବା ବାଲ୍ମୀକି, ଶକ୍ତି, ପରାଶର, ଜାତୁକର୍ଣ୍ଣ ଓ କୃଷ୍ଣ ଦ୍ୱୈପାୟନ ବେଦବ୍ୟାସ ଭୂମିକାରେ ଅବତିର୍ଣ୍ଣ ହୋଇଅଛନ୍ତି ।

ଗୁରୁ ପୂର୍ଣ୍ଣିମା, ଦେଶର ପାଳିତ ହେଉଥିବା ପ୍ରତ୍ୟେକ ପର୍ବ ମଧ୍ୟରୁ ସର୍ବଶ୍ରେଷ୍ଠ ପର୍ବ ଅଟେ। ଏହି ପର୍ଵ ଖୁସି ର ଦ୍ବାର ଖୋଲି ଦେଇଥାଏ। ଏହା ଏକ ପର୍ବ ଅଟେ ତାହା ସହ ଏହା ଏକ ବ୍ରତ ମଧ୍ୟ ଅଟେ।ଦେଶରେ ପାଳିତ ହେଉଥିବା ପର୍ବ ଗୁଡିକ ସାଧାରଣତଃ କୃଷି ଭିତ୍ତିକ କିମ୍ବା ଦୈବିକ କିମ୍ବା ଲୋକ ବିଶ୍ବାସ ଉପରେ ଆଧାରିତ ଥାଏ। ମାତ୍ର ଏହି ପର୍ବ ପାଳନ ସ୍ଵତନ୍ତ୍ର ଓ ଭିନ୍ନ ହୋଇଥାଏ। ଏହି ପର୍ବ ମହାନ ସନାତନ ସଂସ୍କୃତି କୁ ବାଣ୍ଟୁଥିବା ମହାନ ସ୍ତମ୍ଭ ଅଟେ। ଏହି ଗୁରୁ ପୂର୍ଣ୍ଣିମା କୁ ବ୍ୟାସ ପୂର୍ଣ୍ଣିମା ମଧ୍ୟ କୁହାଯାଏ। ଏହି ଦିବସରେ ସଂସ୍କୃତ ଭାଷାର ମହାନ ପଣ୍ଡିତ ଆଦି କବି ଓ ମହାଭାରତ ମହା କାବ୍ୟ ର ରଚୟିତା ଦେବ ବ୍ୟାସ ଜନ୍ମ ଗ୍ରହଣ କରି ଥିଲେ। ସେ ଅନେକ ପୁରାଣ ଓ ଉପନିଷଦ ରଚନା କରିଥିଲେ। ସେ ବେଦ କୁ ମଧ୍ଯ ବିଭାଜନ କରିଥିଲେ। ଜଗତରେ ଯେତକ ଧର୍ମ ଗ୍ରନ୍ଥ, ଉପଦେଶାତ୍ମକ ପୁସ୍ତକ , ନୀତିବାଣୀ ସମ୍ବନ୍ଧୀୟ ପୁସ୍ତକ ରହିଛି,ସେସବୁ ରେ ବ୍ୟାସ ଦେବ ଙ୍କ ପ୍ରତ୍ୟକ୍ଷ ବା ପରୋକ୍ଷ ଭାବେ ଯୋଗଦାନ ରହିଛି।ଏହି ଦିଵସରେ ପ୍ରତ୍ୟେକ ଗୁରୁ ଙ୍କୁ ପୂଜା କରାଯାଏ। ଶିଷ୍ୟ ମାନେ ଗୁରୁଙ୍କ ପୂଜନ ପରେ ଆହାର ସେବନ କରିଥାନ୍ତି।ଅନେକେ ଏହି ଦିବସରେ ଉପବାସ ମଧ୍ୟ କରିଥାନ୍ତି।ଏହା ଦ୍ବାରା ବର୍ଷକ ର ପୁଣ୍ୟ ଫଳ ଗୋଟିଏ ଦିନରେ ପ୍ରାପ୍ତ ହୋଇଥାଏ।

ପାଳନ -

*********

ଗୁରୁ ପୂର୍ଣ୍ଣିମା ଏକ ଆଧ୍ୟାତ୍ମିକ ଉତ୍ସବ ଭାବେ ପାଳନ କରା ଯାଉଥିବା ସହ ଗୁରୁ କିମ୍ବା ଶିକ୍ଷକଙ୍କ ସମ୍ମାନାର୍ଥେ ଏକ ପୂଜାପାଠ ମଧ୍ୟ ହୋଇଥାଏ। ଗୁରୁମାନଙ୍କର ଭୂମିକା ପ୍ରତ୍ୟେକ ଜୀବନର ସବୁଠାରୁ ଆବଶ୍ୟକୀୟ ଅଂଶ ବୋଲି ବିଶ୍ୱାସ କରାଯାଇଥାଏ। ଏହି ଦିନ ଶିଷ୍ୟମାନେ ଗୁରୁଙ୍କ ପ୍ରତି ପୂଜା ଅର୍ପଣ କରନ୍ତି କିମ୍ବା ସେମାନଙ୍କର ଗୁରୁଙ୍କୁ ସମ୍ମାନ ପ୍ରଦର୍ଶନ କରିଥାନ୍ତି ।ଧାର୍ମିକ ମହତ୍ତ୍ୱ ବ୍ୟତୀତ, ଏହି ଉତ୍ସବର ଭାରତୀୟ ଶିକ୍ଷାବିତ୍ ଏବଂ ପଣ୍ଡିତମାନଙ୍କ ପାଇଁ ବହୁତ ମହତ୍ତ୍ୱ ରହିଛି । ଭାରତୀୟ ଶିକ୍ଷାବିତ୍ ମାନେ ସେମାନଙ୍କର ଶିକ୍ଷକମାନଙ୍କୁ ଧନ୍ୟବାଦ ଦେବା ସହିତ ଅତୀତର ଶିକ୍ଷକ ଓ ବିଦ୍ୱାନମାନଙ୍କୁ ସ୍ମରଣ କରି ଏହି ଦିନ ପାଳନ କରିଥାନ୍ତି।

ବୌଦ୍ଧ ଧର୍ମ ର ପରମ୍ପରା ଅନୁଯାୟୀ ବୁଦ୍ଧଙ୍କ ସମ୍ମାନାର୍ଥେ ଏହି ପର୍ବ ପାଳନ କରାଯାଏ, ଯିଏ ଏହି ଦିନ ଉତ୍ତରପ୍ରଦେଶର ସାରନାଥରେ ତାଙ୍କର ପ୍ରଥମ ଉପଦେଶ ପ୍ରଦାନ କରିଥିଲେ। ଯୋଗ ପରମ୍ପରାରେ ଏହି ଦିନଟି ଏକ ମହାନ ଉତ୍ସବ ଭାବରେ ପାଳନ କରାଯାଏ। ବୈଦିକ ହିନ୍ଦୁ ପରମ୍ପରାରେ ପ୍ରାଚୀନ ହିନ୍ଦୁ ପରମ୍ପରାର ଅନ୍ୟତମ ଗୁରୁ ତଥା ଗୁରୁ-ଶିଷା ପରମ୍ପରାର ପ୍ରତୀକ ଭାବରେ ଗ୍ରହଣ କରାଯାଉଥିବା ଦେବ ବ୍ୟାସ ଙ୍କ ଜନ୍ମ ଦିବସରେ ଏହା ପାଳନ କରାଯାଏ। ଏହି ପର୍ବ ଶିଷ୍ୟମାନଙ୍କ ଦ୍ୱାରା ଶିକ୍ଷକଙ୍କ ପ୍ରତି କୃତଜ୍ଞତାର ଅଭିବ୍ୟକ୍ତି ଅଟେ । ଭାରତୀୟ ଶାସ୍ତ୍ରୀୟ ସଙ୍ଗୀତ ଏବଂ ଭାରତୀୟ ଶାସ୍ତ୍ରୀୟ ନୃତ୍ୟର ଛାତ୍ରମାନେ,ଗୁରୁ ଶିଷ୍ୟର ପରମ୍ପରାଙ୍କୁ ଅନୁସରଣ କରନ୍ତି ଏବଂ ଏହି ପବିତ୍ର ପର୍ବକୁ ସାରା ବିଶ୍ୱରେ ପାଳନ କରନ୍ତି ।

ଗୁରୁତ୍ବ-

********

ହିନ୍ଦୁ ଧର୍ମ ରେ ମହତ୍ତ୍ଵ-

--------

ଜଣେ ମତ୍ସ୍ୟଜୀବୀ ସାଗର ରେ ଏକଦା ଏକ ବଡ ମାଛ ର ସନ୍ଧାନ କରିଲେ। ଯେତେବେଳେ ସେ ସେହି ମାଛ ଟିକୁ କାଟିଲେ ତନ୍ମଧ୍ୟରୁ ଏକ କନ୍ୟା ବାହାରିଥିଲା। ସେମାନଙ୍କ ର କୌଣସି ସନ୍ତାନ ନ ଥିବାରୁ ସେ ସେହି କନ୍ୟାଟିର ଲାଳନ ପାଳନ କଲେ। ବଡ ହେବା ପରେ ପରେ ସେ ନିୟମିତ ପିତା ଙ୍କ ସହ ନୌକା ଚାଳନା କରିବାକୁ ଯାଆନ୍ତି। ତାଙ୍କର ନାମ ଥିଲା ସତ୍ୟବତୀ। ସେ ମାଛ ପେଟରୁ ବାହାରି ଥିବାରୁ ତାଙ୍କ ଶରୀର ରୁ ମାଛର ଦୁର୍ଗନ୍ଧ ବାହାରୁ ଥିଲା। ତେଣୁ କେତେକ ତାଙ୍କୁ ମତ୍ସ୍ୟ ଗନ୍ଧା ବୋଲି ମଧ୍ୟ ସମ୍ବୋଧନ କରିଥାନ୍ତି। ଏକଦା ପିତା ଙ୍କ ଅନୁପସ୍ଥିତି ରେ ପରାଶର ଋଷି ସତ୍ୟବତୀ ଙ୍କ ସୌନ୍ଦର୍ଯ୍ୟ ରେ ବିମୋହିତ ହୋଇଗଲେ ଓ ତାଙ୍କ ସହ ଗୁପ୍ତ ବିବାହ କରିବାକୁ ନିଷ୍ପତ୍ତି ନେଲେ। ସତ୍ୟବତୀ ଙ୍କର ବାରଣ ସତ୍ତ୍ଵେ ସେ ତାଙ୍କର ଦୁର୍ଗନ୍ଧ ଦୂର କରି ତାଙ୍କ ସହ ବିବାହ କରିଥିଲେ। ତାଙ୍କ ର ଏକ ସନ୍ତାନ ଜାତ ହେଲା ।ପରାଶର ଋଷି ଙ୍କ ତେଜ ରେ ବାଳକ ଟି ତେଜସ୍ଵୀ ଓ ମହା ଜ୍ଞାନୀ ହୋଇଥିଲା‌। ସେ ପରବର୍ତ୍ତୀ ସମୟରେ ସୁପ୍ରସିଦ୍ଧ କାବ୍ୟ ମହାଭାରତ ରଚନା କରିଥିଲେ।ତାହା ସହ ସେ ବେଦ ଓ ଅନେକ ପୁରାଣ ମାନ ରଚନା କରିଥିଲେ। ବେଦ ର ବିଭାଜନ ମଧ୍ୟ କରିଥିଲେ। ଯଥା - ଋକ୍ ବେଦ, ସାମ୍ ବେଦ ,ଯର୍ଜୁ ବେଦ ଓ ଅଥର୍ବ ବେଦ। ବେଦ ରଚନା ଓ ବିଭାଜନ କରିଥିବାରୁ ତାଙ୍କର ନାମ ରହିଲା ବେଦ ବ୍ୟାସ।

ତାଙ୍କ ର ଜନ୍ମ ଦିବସକୁ ଗୁରୁ ପୂର୍ଣ୍ଣିମା ଭାବରେ ପାଳନ କରାଯାଏ।

ବୌଦ୍ଧ ଧର୍ମ ରେ ମହତ୍ତ୍ଵ-

---------

ଗୌତମ ବୁଦ୍ଧ ତାଙ୍କର ଜ୍ଞାନ ପ୍ରାପ୍ତ ହେବାର ପ୍ରାୟ ପାଞ୍ଚ ସପ୍ତାହ ପରେ ବୋଧଗୟା ଠାରୁ ସାରନାଥ ପର୍ଯ୍ୟନ୍ତ ଯାତ୍ରା କରିଥିଲେ। ସେ ଜ୍ଞାନ ପ୍ରାପ୍ତ କରିବା ପୂର୍ବରୁ, ସେ ସାଂସାରିକ ମୋହ ମାୟା ତ୍ୟାଗ କରି କୋଠର ସାଧନା ରେ ବିଲୀନ ହୋଇ ଯାଇଥିଲେ। କୋଠର ତପସ୍ୟା ପରେ

ଜ୍ଞାନ ପ୍ରାପ୍ତ କରିଥିଲେ। ଏହା ପରେ ସେ ଅନେକ ସ୍ଥାନ ପରିଭ୍ରମଣ କଲେ। ବିଭିନ୍ନ ସ୍ଥାନ ଭ୍ରମଣ ସମୟରେ ସେ ଅନେକ ଶିଷ୍ୟ ର ମଧ୍ୟ ସନ୍ଧାନ ପାଇଲେ। ସେ ପ୍ରଥମେ ପାଞ୍ଚ ଜଣ ବ୍ୟକ୍ତି କୁ ନିଜ ଶିଷ୍ୟ ର ଆକ୍ଷା ଦେଇ ତାଙ୍କୁ ,ସାଧନା ମାଧ୍ୟମରେ ପାଇଥିବା ଜ୍ଞାନ କୁ ବଣ୍ଟନ କଲେ। ଏହାକୁ ଧର୍ମ ଚକ୍ର ପ୍ରବର୍ତ୍ତନ କୁହାଯାଏ। ବୌଦ୍ଧ ଧର୍ମ ରେ ଏହି ଦିବସ ଟିକୁ ଗୁରୁ ପୂର୍ଣ୍ଣିମା ଭାବରେ ପାଳନ କରାଯାଏ।ଏହା ପରେ ତାଙ୍କ ର ଶିଷ୍ୟ ସଂଖ୍ୟା ବୃଦ୍ଧି ପାଇଥିଲା।ସେ ଶିଷ୍ୟ ମାନଙ୍କୁ ଏକ ନୂତନ ଧର୍ମ ର ମନ୍ତ୍ର ପ୍ରଦାନ କରିଥିଲେ । ଏବଂ ଏହାକୁ ବ୍ୟାପକ ଭାବେ ପ୍ରଚାର କରିବା ନିମନ୍ତେ ବିଭିନ୍ନ ସ୍ଥାନ କୁ ଶିଷ୍ୟ ମାନଙ୍କୁ ପ୍ରେରଣ କରିଥିଲେ।

ଜୈନ ଧର୍ମ ରେ ମହତ୍ତ୍ଵ-

--------

ଜୈନ ପରମ୍ପରା ଅନୁଯାୟୀ ଗୁରୁ ପୂର୍ଣ୍ଣିମା ତ୍ରିନୋକ ଗୁହା ପୂର୍ଣ୍ଣିମା ନାମରେ ଜଣାଶୁଣା। ଏହି ପୂର୍ଣ୍ଣିମା ରେ ସମସ୍ତ ଶିକ୍ଷକମାନଙ୍କୁ ବିଶେଷ ସମ୍ମାନ ଦିଆଯାଇଥାଏ। ଦିନଟି ଚତୁର୍ମାସିଆ ର ଆରମ୍ଭରେ ପଡେ । ଏହି ଦିନ ରେ ଜୈନ ଧର୍ମ ର ପ୍ରତିଷ୍ଠାତା ମହାଭୀରା ତାଙ୍କର ପ୍ରଥମ ଶିଷ୍ୟଙ୍କୁ ଜ୍ଞାନ ପ୍ରଦାନ କରିଥିଲେ। ଉକ୍ତ ଦିବସ ଟିକୁ ଗୁରୁ ପୂର୍ଣ୍ଣିମା ଭାବରେ ପାଳନ କରାଯାଏ।

ବାସ୍ତବରେ ଦେଖିବାକୁ ଗଲେ, ଏହି ଦିବସ ରେ ଅନେକ ମହତ୍ତ୍ଵ ରହିଛି।କେବଳ ହିନ୍ଦୁ ଧର୍ମ ରେ ନୁହେଁ ବରଂ ସମସ୍ତ ଧର୍ମ ରେ ଏହା ର ପ୍ରାଧାନ୍ୟ ରହିଛି। ପ୍ରତ୍ୟେକ ଧର୍ମ ରେ ଏହି ଦିବସ ଟିକୁ ପାଳନ କରିଵାର ସ୍ଵତନ୍ତ୍ର କାରଣ ରହିଥାଏ , ମାତ୍ର ଏହାର ଉଦ୍ଦେଶ୍ୟ ଏକ ଥାଏ, ଯାହା ହେଉଛି ଗୁରୁ ମାନଙ୍କ ର ବିଶେଷ ସମ୍ମାନ।

ଗୁରୁ ଶିଷ୍ୟ ପରମ୍ପରା -

ଗୁରୁ ପୂର୍ଣ୍ଣିମା ରେ ଗୁରୁ ଓ ଶିଷ୍ୟ ମାନଙ୍କ ମଧ୍ୟରେ ଥିବା ପବିତ୍ର ସଂପର୍କ କୁ ଗୁରୁତ୍ୱାରୋପ କରିଥାଏ। ଗୁରୁ ଶିଷ୍ୟ ର ସଂପର୍କ ,ଭକ୍ତ-ଭଗବାନ ସଂପର୍କ ଭଳି। ଗୁରୁ ଙ୍କର କୌଣସି ଧର୍ମ ନଥାଏ।

ଧର୍ମ ନିର୍ବିଶେଷରେ ଭାରତୀୟ ଶିକ୍ଷାବିତ୍‌ ମାନେ ସେମାନଙ୍କର ଶିକ୍ଷକମାନଙ୍କୁ ଧନ୍ୟବାଦ ଦେଇ ଏହି ଦିବସ ଟିକୁ ପାଳନ କରିଥାନ୍ତି। ଭାରତରେ ଅନେକ ବିଦ୍ୟାଳୟ, କଲେଜ ଏବଂ ବିଶ୍ୱବିଦ୍ୟାଳୟରେ ଅନେକ କାର୍ଯ୍ୟକ୍ରମ ଆୟୋଜନ କରାଯାଇ ସେଥିରେ ଛାତ୍ରମାନେ ସେମାନଙ୍କର ଶିକ୍ଷକମାନଙ୍କୁ ଧନ୍ୟବାଦ ଦେଇଥାନ୍ତି।ଶିଷ୍ୟମାନେ ସେମାନଙ୍କ ର ଶିକ୍ଷକମାନଙ୍କୁ ଦେଖା କରନ୍ତି ଏବଂ କୃତଜ୍ଞତା ଜ୍ଞାପନ ସହ ଉପହାର ମଧ୍ୟ ପ୍ରଦାନ କରିଥାନ୍ତି।

ଛାତ୍ରମାନେ ଏହି ଦିବସରେ ବିଭିନ୍ନ କଳା ପ୍ରତିଯୋଗିତା ଆୟୋଜନ କରିଥାନ୍ତି । ଗୁରୁ-ଶିଷ୍ୟ ମଧ୍ୟରେ ଏହା ଏକ ମୁଖ୍ୟ ପରମ୍ପରା ଅଟେ। ଅନେକ ଛାତ୍ର ତାଙ୍କ ଗୁରୁଙ୍କୁ କବିତା ବା ଉଦ୍ଧୃତି ଦେଇ ଅଭିବାଦନ କରିଥାନ୍ତି। ଗୁରୁ ମାନେ ବ୍ୟକ୍ତିର ସଫଳତା ଏବଂ ସୁଖ ପାଇଁ ଆଶୀର୍ବାଦ ମଧ୍ୟ ପ୍ରଦାନ କରନ୍ତି | ସଂକ୍ଷେପରେ କହିବାକୁ ଗଲେ , ଗୁରୁ ପୂର୍ଣ୍ଣିମା ଭାରତୀୟମାନଙ୍କ ପାଇଁ ଶିକ୍ଷକ ଦିବସ ପାଳନ କରିବାର ଏକ ପାରମ୍ପାରିକ ଉପାୟ ଅଟେ।

ବିଷୟ ପ୍ରସ୍ଥାନ-

ଗୁରୁ ଜୀବନ ଗଠନ ର ମୁଖ୍ୟ ଆଧାର ,ଜୀବନ ବିକାଶ ର ପ୍ରମୁଖ ଉତ୍ସ।ଗୁରୁ ବିନା ଜୀବନ ନିରର୍ଥକ। ଜୀବନ ରେ ଅନେକ ଗୁରୁ ମୁଖ୍ୟ ଭୂମିକା ଗ୍ରହଣ କରିଥାନ୍ତି। ପ୍ରଥମତଃ ଜନ୍ମଗୁରୁ, ସେ ହେଉଛନ୍ତି ଆମର ପିତା ମାତା। ସେମାନେ ଆମକୁ ଜନ୍ମ ଦେଇ ସଂସାର ଦେଖାଇବାରେ ସହାୟକ ହୋଇଥାନ୍ତି। ତାହା ସହ ସଂସାର ଦେଖାଇଵାର ଦୃଷ୍ଟିଭଙ୍ଗୀ ମଧ୍ୟ ପ୍ରଦାନ କରିଥାନ୍ତି।

ଦ୍ବିତୀୟତଃ ଶିକ୍ଷା ଗୁରୁ, ସେମାନେ ଆମକୁ ଜୀବନରେ ମାର୍ଗ ଦର୍ଶନ କରିଥାନ୍ତି।ଭଲ ମନ୍ଦ ର ପ୍ରଭେଦ ଶିକ୍ଷା ଦେଇଥାନ୍ତି।ଜୀବନ ର ଢାଞ୍ଚା ପ୍ରସ୍ତୁତ କରିବାରେ ସହାୟକ ହୋଇଥାନ୍ତି। ତୃତୀୟତଃ ଦୀକ୍ଷା ଗୁରୁ ।ମେମାନେ ଜୀବନ କୁ ଉଦ୍ଦେଶ୍ୟ ପ୍ରଦାନ କରିଥାନ୍ତି। ଉପରୋକ୍ତ ସମସ୍ତ ଗୁରୁ ବିନା ଏକ ସୁଦୃଢ ଜୀବନ ଗଠନ କରିହେବ ନାହିଁ। ଜୀବନରେ ଗୁରୁ ର ଭୂମିକା ବହୁ ଗୁରୁତ୍ୱପୁର୍ଣ୍ଣ। ଜୀବନ ରେ ଗୁରୁ ର ମହତ୍ତ୍ଵ ବହୁ ଅଧିକ। ଗୁରୁ ର କୌଣସି ଧର୍ମ ନ ଥାଏ। ସେ ସବୁ ଧର୍ମ ର ସ୍ରଷ୍ଟା ହୋଇଥାଏ। ତେଣୁ ପ୍ରତ୍ୟେକ ଧର୍ମ ରେ ଗୁରୁ ଙ୍କ ର ସ୍ବତନ୍ତ୍ର ମହତ୍ତ୍ଵ ଓ ସ୍ଥାନ ରହିଥାଏ।

ପବିତ୍ର ଗୁରୁ ପୂର୍ଣ୍ଣିମା ଅବସରରେ ସମସ୍ତଙ୍କୁ ହାର୍ଦ୍ଧିକ ଅଭିନନ୍ଦନ ଓ ଶୁଭେଚ୍ଛା।

________________________________________________

ପ୍ରସ୍ତୁତି- ସୌମ୍ୟ ରଞ୍ଜନ ରାୟ

ଭୂୟାଁ ଉଆସ, ଗୁଆମାଳ, ଭଦ୍ରକ

ଗୁରୁ ପୂର୍ଣ୍ଣିମା ଓ ଗୁରୁ ଶିଷ୍ୟ ପରମ୍ପରା | Guru Purnima & Guru Shishya Tradition in Odia

ଗୁରୁ ଗୁଙ୍ଗେ ଗୁରୁ ବାବରେ, ଗୁରୁ କେ ରହିୟେ ଦାସ। ଗୁରୁ ଜୋ ଭେଜେ ନରକ୍ କୋ, ସ୍ବର୍ଗ କି ରଖିୟେ ଆସ୍ ॥