ଶ୍ରୀଯୁକ୍ତ ଦୁଷ୍ମନ୍ତ କୁମାର ମିଶ୍ର

ଯିଏ ଯୋଗର ଈଶ୍ୱର,ଯିଏ ଯଜ୍ଞର ସ୍ବାମୀ,ଯଶୋଦାଙ୍କର ଆନନ୍ଦ

ବର୍ଦ୍ଧକ ଏବଂ ଯିଏ ଯମୁନା ଜଳରେ କେଳି କରନ୍ତି ,ସେଇ ଯଦୁ ପତି ଙ୍କୁ ମୁଁ ବନ୍ଦନା କରୁଅଛି ।ହେ ପ୍ରଭୁ !ଆପଣଙ୍କ ନାମ ,ଗୁଣ ପ୍ରଚାର ଓ ପ୍ରସାର କରିବାରେ ଯଦି କୌଣସି ତ୍ରୁଟି ରହିଯାଉ ଥାଏ ତେବେ ଏ ଅଧମ କୁ କ୍ଷମା କରିବା ହେବେ ।ଜୟ ଶ୍ରୀହରି ।🌹🌹

ମଥୁରା ନରେଶ କଂସ ର ଡାକରା ପାଇ ଗୋପପୁର ର ସମସ୍ତ ଗୋପାଳ ମାନଙ୍କ ସହିତ ନନ୍ଦ ଦୁଧ ,ଦହି ଧରି କଂସ ନିକଟରେ

ପହଁଞ୍ଚିଲେ । ମଥୁରାଧିପତି କଂସ ,ନନ୍ଦ ଓ ଗୋପାଳ ମାନଙ୍କୁ ଦେଖି ଆନନ୍ଦିତ ହେଲା ।ମନ୍ତ୍ରୀ ଅକ୍ରୁର ନନ୍ଦ ଙ୍କ ମୁହଁକୁ ଚାହିଁଲେ

ଓ କହିଲେ "ନନ୍ଦ ମହାଖୁଡ଼ ତୁମକୁ କଂସ ମହାରାଜ ଡାକିବାର

କାରଣ ତୁମକୁ ଗୋପପୁର ର ରାଜନ ରୂପରେ ମହାରାଜ ଦେଖିବାକୁ ଚାହୁଁଛନ୍ତି ।ଏବଂ ତୁମେ ଆଜି ଠାରୁ ଗୋପପୁର ର ରାଜା ହେଲ "।ଏହାପରେ ଅକ୍ରୁର ସମସ୍ତ ଗୋପାଳ ମାନଙ୍କୁ କହିଲେ -ଗୋପାଳ ଭାଇ ମାନେ କଂସ ରାଜାଙ୍କ ନିଷ୍ପତ୍ତି ଓ ଅନୁମତି ଅନୁଯାଇ ଆଜିଠାରୁ ଗୋପପୁର ରାଜା ରୂପେ ନନ୍ଦ କୁ ଘୋଷଣା କରାଗଲା ।ସମସ୍ତ ଗୋପାଳ ଭାଇମାନେ ନନ୍ଦ ଙ୍କୁ ରାଜା ଭାବେ ସମ୍ମାନ ଦେବ ।ଏହା କଂସ ମହାରାଜାଙ୍କ ଆଦେଶ ।

"ସମସ୍ତ ଗୋପାଳ ରାଜା ଅନୁମତି ଶୁଣ

ନନ୍ଦ ହୋଇଲା ଆଜିଠୁଁ ଗୋପର ରାଜନ "।

କଂସ ,ନନ୍ଦ ର ମୁଣ୍ଡରେ ଶାଢ଼ୀ ବାନ୍ଧିଦେଲେ ଓ କହିଲେ ତୁମେ

ଆଜିଠାରୁ ଗୋପର ଠାକୁର ,ତୁମ ଆଦେଶ କୁ ସମସ୍ତ ଗୋପାଳ

ମାନିବାକୁ ବାଧ୍ୟ ।କଂସ କହିଲା ନନ୍ଦ କୁ ,ନନ୍ଦ ମହାଖୁଡ଼ ତୁମେ ଅକ୍ରୁର କଅଣ କହୁଛନ୍ତି ତାଙ୍କ ଠାରୁ ସବୁ ଶୁଣ। ଠିଆହୋଇ ସବୁ ଶୁଣୁଥାନ୍ତି ନନ୍ଦ ।ଏହାପରେ ଅକ୍ରୁର ନନ୍ଦ କୁ କହିଲେ "ହେ ନନ୍ଦ ତୁମକୁ ଗୋପପୁରରେ ରାଜା କରାଇବାର ଉଦ୍ଦେଶ୍ୟ ଏହାଯେ ତୁମେ ପ୍ରତ୍ୟକ ଦିନ ଲକ୍ଷେ ଭାର ଦୁଧ ,ଦହି ,ଅଧାମ ଓ କୋଟିକା ମଥୁରା ପୁରକୁ ପଠାଇବ ।ଯଦି ଏଥିରୁ ଟିକେ ଉଣା ହୁଏ ତାହାଲେ କଳହ ହେବ ବୋଲି ଜାଣିରଖ । ନନ୍ଦ ସବୁ ଶୁଣିଲା ।

କଂସ ରାଜାର ଆଦେଶ ପାଇ ଗୋପାଳ ମାନଙ୍କୁ ଧରି ଗୋପପୁର କୁ ଫେରିଗଲା ।ଗୋପନଗର ରାଜା ରୂପେ ନନ୍ଦ ଅଧିଷ୍ଠିତ ହେବାରୁ ଗୋପ ପୁର ଘରେ ଘରେ ଆନନ୍ଦ ଉତ୍ସବ କହିଲେ ନସରେ ।ଏତେ ଦିନ ପରେ ଜଣେ ରାଜା ଙ୍କ ଅଧୀନରେ ଗୋପବାସୀ ରହିବେ ,ତାଙ୍କର ଅନ୍ୟ ରାଜାଙ୍କୁ ଆଉ ଭୟ କରିବାର ନାହିଁ ଏକଥା ଭାବି ସମସ୍ତ ଗୋପାଳ ଓ ଗୋପାଳୁଣୀ ଆନନ୍ଦିତ ଥାଆନ୍ତି ।ଯଶୋଦା ମଧ୍ୟ ଆନନ୍ଦ କହିଲେ ନସରେ ।ସେ ଏବେ ଗୋପ ର ରାଣୀ ହୋଇଗଲେ ।

ତାଙ୍କ ପାଟିରୁ ନାରାୟଣ ରଖ ,ନାରାୟଣ ରଖ ବୋଲି ଶବ୍ଦ ବାହାରୁଥାଏ ।ମାୟାଧର ଙ୍କ ମାୟା ଏସବୁ ।ଗୋପପୁର ରେ ନନ୍ଦ ଙ୍କୁ ରାଜା କରାଇବା ତାଙ୍କର ଉଦ୍ଦେଶ୍ୟ ଥିଲା ।ଅକ୍ରୁର ମାଧ୍ୟମରେ ଏସବୁ ସେଇ ନାରାୟଣ ଭିଆଣ କଲେ ।ନନ୍ଦ ରାଜା ହୋଇଗଲା ପରେ ପ୍ରତିଦିନ ଲକ୍ଷେ ଭାର ଦୁଧ ,ଦହି ଓ ଆଧାମ କଂସ ଉଦ୍ଦେଶ୍ୟ ରେ ମଥୁରା ପୁରକୁ ପଠାଇବାର ବ୍ୟବସ୍ଥା କଲା ।

ଦିନେ ନନ୍ଦ ନୃପରାଣ ଯଶୋମତୀ ଙ୍କୁ ଚାହିଁ କହିଲେ "ଦେଖ ଯଶୋଦା ମୁଁ ଆଜି ଦୁଧ ,ଦହି ଧରି ମଥୁରାକୁ ଯିବି ।ମୁଁ ଗୋଗୋଷ୍ଠ ଯାଇ ସେଠାରୁ କଂସ ରାଜାଙ୍କ ପାଖକୁ ଯିବାର ଅଛି । ଅବଶ୍ୟ ମୁଁ ଶୀଘ୍ର ଯାଇ ଫେରି ଆସିବି ।ମୋ ପୁତ୍ର ତୋତେ ଲାଗିଲା ଯଶୋମତୀ ।ତୁମେ ମାଆ ଓ ପୁଅ ସାବଧାନ ହୋଇ ରହିଥିବ ।ଭୟ ମନରେ ତୁମେ ଆଣିବନି ।ଏମିତି କହି ନନ୍ଦ ଶିକା ଓ ବାହୁଙ୍ଗୀ କୁ ଠିକ୍ କଲେ ।ନନ୍ଦ ଘରୁ ବାହାରି ଗୋଷ୍ଠ କୁ ଗଲାବେଳେ ଦେଖିଲେ ପୁଅ ଶ୍ରୀକୃଷ୍ଣ ପଲଙ୍କ ଧାର ରେ ଶୋଇଅଛି ।ନନ୍ଦ ରାଜା ,ଯଶୋଦା ଙ୍କୁ କହିଲେ ଦେଖ ପୁଅ

କିପରି ଶୋଇଛି ?ପଡିଯାଇ ପାରେ ? ତାକୁ ଠିକ୍ ଭାବେ ଶୁଆଇ

ଦିଅ ?ରାଣୀ ଯଶୋଦା ଙ୍କୁ ଏହିପରି ତିଆରି ନନ୍ଦ ଗୋଷ୍ଠ କୁ ଗଲେ ।

ଯେମିତି ନନ୍ଦ ରାଜା ଗୋଷ୍ଠ କୁ ବାହାରି ଯାଇଛନ୍ତି ,ଠିକ୍ ସେତିକି

ବେଳେ ଯଶୋଦା ପୁତ୍ର ବଳରାମକୁପାଖକୁ ଡାକିଲେ ଓ କହିଲେ

"ଦେଖ ରାମ ,ମୁଁ ଯମୁନା କୁ ବହୁତ ଦିନ ହେବ ଯାଇ ନାହିଁ !ତୁ

ଏହି ପୁତ୍ର ଅର୍ଥାତ ତୋହର ସାନ ଭାଇ କୃଷ୍ଣ ପାଖରେ କିଛି ସମୟ ଜଗି ରହିଥିବୁ ।ଏବେ ସେ ଶୋଇଛି ।ପୁତ୍ର କୃଷ୍ଣ ନିକଟରେ ତୁ ବସିଥାଅ ବାବୁ ବଳରାମ ।ଏହାକହି ଯଶୋଦା ରାଣୀ ଯମୁନା କୁ ଗଲେ ।ଯେମିତି ମାତା ଯଶୋଦା ଯମୁନାକୁ ଯାଇଛନ୍ତି ,ମାୟା ରଚନା କରିଦେଲେ ପ୍ରଭୁ ଚକ୍ରଧର ।

ଭଗବାନ ଶ୍ରୀକୃଷ୍ଣ ଶୋଇକରି ମନରେ ଭାବିଲେମାଆ ଯଶୋଦା ଦୁଧ ,ଦହି ସବୁ ଶିକାର ଥୋଇଛନ୍ତି ।ମୁଁ ଥାଉଁ ,ଥାଉଁ କଂସ ଏସବୁ ଖାଇବ ?।ଆଜି ସବୁତକ ଦୁଧ ,ଦହି କୁ ମୁଁ ଭୋଜନ କରିବି ।ପ୍ରଭୁ ଭଗବାନ ଶ୍ରୀକୃଷ୍ଣ ନିଦ୍ରାଦେବୀ ଙ୍କୁ ଆଜ୍ଞାଦେଲେ ।ବଳରାମ ଙ୍କୁ ନିଦ୍ରାଘାରି ଦିଅ ?।ନିଦ୍ରାଦେବୀ ଆଜ୍ଞାପାଇ ରାମ ଭଗବାନଙ୍କ ଆଖିରେ ନିଦ୍ରା ଭରି ଦେଲେ ।ବଳରାମ ଶୋଇଗଲେ ।

ବଳରାମ ଶୋଇଯିବା ଦେଖି କୃଷ୍ଣ ଭଗବାନ ଆସ୍ତେ ଆସ୍ତେ ଦୁଧ

ଦହି ଥିବା ଘରକୁ ଯାଇ ଶିକାକୁ ହାତ ବଢ଼ାଇଲେ ।ଦେଖିଲେ

ବହୁ ପରିମାଣରେ ଦୁଧ ଓ ଲବଣୀ ଠେକି ରେ ଥୁଆ ହୋଇଛି ।

ବାଡ଼ି ଗୋଟିଏ ହାତରେ ଧରି ସବୁ ଦୁଧ ,ଦହି ,ଓ ଲବଣୀ ଥିବା

ହାଣ୍ଡିକୁ କଣା କରିଦେଲେ ପ୍ରଭୁ କୃଷ୍ଣ ଭଗବାନ । ପାଟିକୁ ବିସ୍ତାର କରି ପ୍ରଭୁ ଶ୍ରୀହରି ସବୁ ତକ ଖାଇଦେଲେ ।ଖାଇ ସାରିବା ପରେ ଦୁଇ ,ଚାରି ହାଣ୍ଡି ଦୁଧ ନେଇ ତଳେ କଚାଡି ଦେଲେ ।ଶ୍ରୀହରି ନିଜ ଦେହରୁ ବିଲେଇ ମାନଙ୍କୁ ସୃଷ୍ଟି କଲେ ।

ବିଲେଇ ମାନଙ୍କର ଦେହର ରଙ୍ଗ ଏହି ,କଳା ,ଶ୍ୟାମଳ ଧଳା ରଖିଲେ ।ଶରୀରରୁ ସୃଷ୍ଟି କରିଥିବା ବିଲେଇ ମାନଙ୍କୁ କିଛି ଦୁଧ ପିଇବାକୁ ଦେଲେ ।ସବୁତକ ଦୁଧ ,ଦହି ପିଇ ସାରିବାପରେ ଭଗବାନ ଶ୍ରୀକୃଷ୍ଣ ଚୁପଚାପ ଯାଇ ରାମଙ୍କ ପାଖରେ ଶୋଇ ପଡିଲେ ।କିଛି ସମୟ ପରେ ଭଗବାନ ଶ୍ରୀକୃଷ୍ଣ ନିଜକୁ ନିଜେ ଖଟୁଲିରେ ବାନ୍ଧି ହୋଇ ଦୁଇ ହାତରେ ମାଟି ଦୁଇ ମୁଠା ନେଇ ପାଟିରେ ପୁରାଇଲେ ।ମାୟାଧର ମିଛରେ କାନ୍ଦିବା ଆରମ୍ଭ କରି ଦେଲେ ।ଶ୍ରୀକୃଷ୍ଣ ଭଗବାନ ଙ୍କ କାନ୍ଦିବା ଶୁଣି ପ୍ରଭୁ ହଳଧର ନିଦ୍ରାରୁ ଉଠିପଡିଲେ ।ମାତା ଯଶୋଦାଯମୁନା ରୁ ସ୍ନାନ ସାରି ସେହି ସମୟରେ ଆସି ସେଠାରେ ପହଁଞ୍ଚିଗଲେ ।ପୁତ୍ର କୃଷ୍ଣ କାନ୍ଦୁଥିବାର ଦେଖିଲେ ।କୋଳରେ ଧରି କୃଷ୍ଣ ଭଗବାନ ଙ୍କୁ ଚୁମା ଦେଲେ ।

ଯଶୋଦା ଦେଖିଲେ ଦହି ହାଣ୍ଡି ,ଦୁଧ ହାଣ୍ଡି ସବୁ ଭାଙ୍ଗି ଘର ସାରା ପଡିଛି ।ଯଶୋଦା ଭାବିଲେ ବିଲେଇ ବୋଧହୁଏ ଏସବୁ କରିଛି ।ମାତା ଯଶୋଦା ଙ୍କର ଏପରି ଭାବନା ଦେଖି ବାଳ ମୁକୁନ୍ଦ ମନ୍ଦ ମନ୍ଦ ହସୁଥିଲେ .....

କ୍ରମଶଃ................

ହରିବଂଶ ( ଭାଗ -୪୪)

ହରିବଂଶ ( ଭାଗ -୪୪)