ମୋ ପ୍ରିୟବନ୍ଧୁ

ବନ୍ଧୁ କହିଲି ବୋଲି ହସୁଛ କି ? ହୁଏତ ସମାଜ ଦ୍ଵାରା ଆମେ ଏକ ବନ୍ଧନର ପରିଧି ଭିତରେ ଅଛୁ, କିନ୍ତୁ ତୁମ ବ୍ୟକ୍ତିତ୍ଵ ମୋତେ ସେ ବଂଧନରୁ ଅନେକ ଦୂରକୁ ଆଗେଇ ଯିବାର ପ୍ରେରଣା ଦେଇଛି | ଆଉ ସେ ପ୍ରେରଣା ମୋତେ ତୁମ ସ୍ତ୍ରୀ ଠାରୁ ଉର୍ଦ୍ଧକୁ ନେଇ ବାନ୍ଧବୀ ଟିଏ ବନେଇଛି| ସମାଜରେ ନାରୀ ପୁରୁଷର ଭେଦଭାବରୁ ଉର୍ଦ୍ଧରେ ମୋତେ ଗୋଟେ ଭାବନତ୍ମକ ମଣିଷ ରୂପେ ଚିହ୍ନି ଥିବାରୁ ତୁମକୁ ସ୍ୱାହୃଦୟେ ଧନ୍ୟବାଦ୍ |

ତୁମକୁ ସେଇଦିନ ପାଇଁ ଧନ୍ୟବାଦ୍, ଯେବେ ଆମ ଦୁଇ ପରିବାର ପରଷ୍ପର କୁ ସ୍ଵୀକୃତ ଦେଇ ସାରିବା ପରେ ମଧ୍ୟ ଲୁଚି ଲୁଚି ମୋତେ ମୋ ଇଚ୍ଛା କଣ ପଚାରିଥିଲ ଏବଂ ମୋ ସ୍ଵୀକୃତିକୁ ସ୍ଵାହୃଦୟେ ଆପଣେଇବାକୁ କଥା ଦେଇଥିଲ | ବୋଧହୁଏ ତୁମେ ଜାଣିଥିଲ ଯେ ବିବାହ ର ମାନେ ଦୁଇ ବ୍ୟକ୍ତିତ୍ୱର ମିଳନ ଯାହାକି ସ୍ୱାଭିମାନ, ଭାବପ୍ରବଣତା, ଶାରୀରିକ ତଥା ମାନସିକ ପରିପକ୍ୱତା ଏବଂ ଦୁହିଁଙ୍କର ଆତ୍ମବିଶ୍ବାସର ଆଦାନ ପ୍ରଦାନ ଦ୍ଵାରା ସମ୍ଭବ ହୋଇଥାଏ | ସେଥିପାଇଁ ହୁଏତ ତୁମେ ମୋ ବ୍ୟକ୍ତିତ୍ଵର ମାନ ରଖିଥିଲ ଏବଂ ବିବାହ ପାଇଁ ମୋ ରାୟ ମଧ୍ୟ ଜରୁରୀ ବୋଲି ଜାଣିଥିଲ, ଯାହାକି ଏହି ପୁରୁଷ ପ୍ରାଧାନ୍ୟ ସମାଜରେ ଖୁବ୍ ବିରଳ |

ତୁମକୁ ସେଇଦିନ ପାଇଁ ଧନ୍ୟବାଦ୍ ଯେବେ ବିବାହର "ଦଶଦୋଷ କ୍ଷମା" ପ୍ରତିଜ୍ଞା ବିଧି ପୁରା କରି, ମୋର ସହେ ଦୋଷ କୁ କ୍ଷମା କରିବା ସହ ଦୋଷ ମାର୍ଜିତ କରିବାର ପ୍ରତିଜ୍ଞା କରିଥିଲ | ଆଉ ପ୍ରତିବଦଳରେ ମୋ ଠାରୁ ସମାନ ପ୍ରତିଜ୍ଞାର ଜିଜ୍ଞାସା ରଖିଥିଲ | ଏ ଦୁନିଆରେ ଦୋଷ ପାଇଁ ଦଣ୍ଡର ଅନେକ ସଂଜ୍ଞା ଅଛି ହେଲେ ସଂଶୋଧନ କିମ୍ବା କ୍ଷମାର ଆଧାର ଖୁବ୍ କମ୍ | ହେଲେ ମୁଁ ଆଜି ଯାଏଁ ସଂଶୋଧନର ପ୍ରକ୍ରିୟାରେ ବାନ୍ଧି ହୋଇ ଚାଲିଛି | ସଂଶୋଧନ ଏବଂ କ୍ଷମା ଠାରୁ ବି ଉର୍ଦ୍ଧରେ ରହିଛି ସେହି କାମଜନିତ ମୋର କିଛି ରାୟ |ଯାହାକୁ ଖୋଜିବା ଆଉ ପାଇସାରି ଆଗକୁ ବଢିବାର ଯଥାର୍ଥତା ହୁଏତ ତୁମେ ଜାଣି ପାରିଥିଲ |

ତୁମକୁ ସେଇଦିନ ପାଇଁ ଧନ୍ୟବାଦ୍ ଯେବେ ବିବାହ ପରର ପ୍ରଥମ କଥାବାର୍ତ୍ତା ରେ ବଡଙ୍କୁ ସମ୍ମାନ ତଥା ଛୋଟଙ୍କୁ ପ୍ରେମ ମାଗିନେଇ ବଦଳରେ ଘରର ସବୁ କାର୍ଯ୍ୟ ପାଇଁ ମୋତେ ମୂରବୀ ପଣିଆ ଦେଇଥିଲ | ବିବାହ କର୍ମକାର୍ଯ୍ୟରେ ଘରର ନୂଆବୋହୂ ଯେତେବେଳେ ପରଦା ପଛରେ ରହିବା ଯୋଗ୍ୟ ବୋଲି ସଭିଏଁ କୁହନ୍ତି, ସେତେବେଳେ ଗୃହସଭାକୁ ଭିଡ଼ିଆଣି ତୁମେ ବିବାହ ସମ୍ବନ୍ଧୀୟ ମୋର ରାୟ ପଚାରିଥିଲ | ମୁଁ ଜଣେ ନାରୀ ତଥା ବୋହୂଟିଏ ହେଲେ ମଧ୍ୟ ମୋର ଅସ୍ତିତ୍ୱର ଗୁରୁତ୍ଵ ସଭିଙ୍କୁ ଜଣେଇ ଥିଲ |

ତୁମକୁ ସେଇଦିନ ପାଇଁ ଧନ୍ୟବାଦ୍ ଯେବେ ନିଜ ବ୍ୟକ୍ତିଗତ ଜୀବନରେ ମୋତେ ପ୍ରବେଶ କରାଇଥିଲ | ଘରର ରୋଷେଇଶାଳ କଥାତ ସ୍ତ୍ରୀ ଟିକୁ ପଚରା ଯାଏ | ହେଲେ ଅଫିସ୍ ର ଫାଇଲ୍ ଗୁଡ଼ିକୁ ଦେଖିଲାବେଳେ ତୁମେ ଯେ ମୋ ପରାମର୍ଶ ଲୋଡ଼ିଥିଲ ! ପୁଣି ପରବର୍ତ୍ତୀ କାଳରେ ଉପଦେଶ ହଉ କିମ୍ବା ମନ୍ତ୍ରଣା ହଉ ସବୁରେ ମୋତେ ଯୋଡ଼ି ରଖିଥିଲ |

ତୁମକୁ ସେଇଦିନ ପାଇଁ ଧନ୍ୟବାଦ୍ ଯେବେ ପରିବାରର କଳହ ସମାଧାନ ପାଇଁ ମୋତେ ରାୟ ମାଗିଥିଲ | ନୁଆବୋହୁକୁ ଘରର ଗୁମର କଥା ଲୁଚେଇବାଟା ଆମ ଯୌଥ ପରିବାରର ସାଧାରଣ ଘଟଣା | ପର ଝିଅକୁ କଣ ଘର କଥା କୁହାଯାଏ ? ତା ଆଗରେ ଆମ ସନ୍ମାନ ତଳେ ପଡି ଯିବନି ? ଏମିତି ଅନେକ ଭାବନା ସକାସେ ଶାଶୁଘରେ ବୋହୂକୁ କଥା ଲୁଚାଯାଏ | ବୋହୁଟି ଅଳ୍ପବହୁତେ କିଛିକିଛି ଜାଣି ପାରୁଥିଲେ ବି ପରଘରି ହୋଇ ରହିଯାଏ | କିଛି ସମସ୍ୟାର ସମାଧାନ ରଖିଥାଏ ତ କିଛି ଦୁଃଖ ପାଇଁ ଆଶ୍ଵାସନା ରଖିଥାଏ | କିନ୍ତୁ ନିଜର ହୋଇବି ନଜାଣିଲା ପରି କଥା କାଟି ଚାଲିଯାଏ | କିନ୍ତୁ ତୁମେ ସବୁ ଦୁଃଖ ସୁଖ ରେ ମୋତେ ଆଗ ଧାଡ଼ିରେ ଠିଆ କରିଥିଲ |

ତୁମକୁ ସେଇଦିନ ପାଇଁ ଧନ୍ୟବାଦ୍ ଯେବେ ନିଜ salary ର ପ୍ରତ୍ୟେକଟି ଖର୍ଚ୍ଚ ଆଉ ସଂଚୟର ତାଲିକାଟି ମୋ ଆଗରେ ରଖି ଦଉଥିଲ | ଅନେକ ଲୋକ ଏହାକୁ ଦେଖି ସ୍ତ୍ରୀ ବୋଲକରା ବୋଲି କୁହନ୍ତି, ହେଲେ ତୁମ ପାରିଶ୍ରମିକ ତୁମେ କାହା ପାଇଁ ବ୍ୟୟ କରିବ ତାକୁ କହିବାକୁ ମୁଁ ବା କିଏ ? ହେଲେ ମୁଁ ଜଣେ ଶିକ୍ଷିତ ମଣିଷ ଆଉ ତାର ମାନ ରଖି ତୁମେ ଯେ ମୋର ରାୟ ଲୋଡୁଥିଲ ସେ କଥା ବା କିଏ ଜାଣେ |

ତୁମକୁ ସେଇଦିନ ପାଇଁ ଧନ୍ୟବାଦ୍ ଯେବେ ଘରଲୋକ ପରିବାର ଆଗକୁ ବଢେଇବା ପାଇଁ ମନ୍ତବ୍ୟ ଦେଲେ ଆଉ ତୁମେ ମୋ ରାୟ ମାଗିଲ, ପୁଣି ମୋ କଥାର ପ୍ରତ୍ୟେକଟି ଶବ୍ଦକୁ ମାନିବ ବୋଲି କଥାଦେଲ | ଗୋଟିଏ ନାରୀର ଜୀବନର ସବୁଠୁ ବଡ଼ ପର୍ଯ୍ୟାୟ ସେବେ ଆରମ୍ଭ ହୁଏ ଯେବେ ସେ ମା ହୁଏ, ତେଣୁ ତାର ଇଛା ଏବଂ ପ୍ରସ୍ତୁତିରେ କୌଣସି ବାଧା ନଦେବା ଉଚିତ୍ ବୋଲି ତୁମେ କେମିତି ଜାଣିଲ ? ଏକ ନୂଆ ଜୀବନ କୁ ଧାରଣ କରି ପୁଣି ଏକ ପୀଢ଼ି ର ଆରମ୍ଭ ଯିଏ କରେ ତାର ପ୍ରସ୍ତୁତି ଏବଂ ତାର ରାୟ ନିଶ୍ଚିତ ଭାବେ ଜରୁରୀ ବୋଲି ତୁମ ଅନୁମାନ ସଂପୂର୍ଣ୍ଣ ଠିକ୍ ଥିଲା |

ତୁମକୁ ସେଇଦିନ ପାଇଁ ଧନ୍ୟବାଦ୍ ଯେବେ ଆମ ନବଜାତ ଶିଶୁର ନାମକରଣରେ ତୁମେ ମୋ ରାୟ ମାଗିଲ | ତୁମ ବଂଶର ଉତ୍ତରାଧିକାରୀ ସିଏ, ପୁଣି ତୁମ ଅଂଶ ସିଏ ବୋଲି ସମସ୍ତେ ଜାଣିଥିଲେ ବି ତା ପାଇଁ ସବୁଠୁ ଅଧିକ, ମୋ ରାୟ ଜରୁରୀ ବୋଲି ତୁମେ ଯେ ଅନୁଭବ କରି ପାରିଲ !

ମୁଁ କେବଳ ନାରୀ ନୁହେଁ ମୁଁ ବୁଦ୍ଧିମତୀ, ସଞ୍ଜମଶିଳା, ଶିକ୍ଷିତା, ପୁଣି କରୁଣାମୟୀ ମଣିଷଟିଏ | ଏହିପରି ଗୁଣ ଥିବା ପ୍ରତ୍ୟେକଟି ମଣିଷର ରାୟ ଜୀବନର ପ୍ରତିଟି ପର୍ଯ୍ୟାୟରେ ଜରୁରୀ | ଆଉ ଯାହା ପାଖରେ କୌଣସି ଗୋଟିଏ ଗୁଣ ର ଅଭାବ ଅଛି, ସେ ଅଭାବକୁ ପୁରାଣ କରିବା ପାଇଁ ତାଙ୍କ ଆତ୍ମୀୟ ମାନେ ଶତଚେଷ୍ଟା କରିବା ଜରୁରୀ | ଗୋଟିଏ ଘରର ପ୍ରତ୍ୟେକଟି ଯୋଗ୍ୟ ମଣିଷର ରାୟ ନବା ଆଉ ଅଯୋଗ୍ୟ ମଣିଷକୁ ଯୋଗ୍ୟ ବନାଇବାରେ ଚେଷ୍ଟା କରିବାଟା ହିଁ ଏକ ସୁନ୍ଦର ପରିବାର ର ଆଧାର |

ମୋ ଯୋଗ୍ୟତାକୁ ପରଖି ଥିବାରୁ, ପୁଣି ସବୁ କ୍ଷେତ୍ରରେ ନିଜ ଯୋଗ୍ୟତା ର ପରୀକ୍ଷା ଦେଇଥିବାରୁ ତୁମକୁ ଅଶେଷ ଅଶେଷ ଧନ୍ୟବାଦ୍ |

ଇତି ତୁମ ବାନ୍ଧବୀ

ସୁସ୍ମିତା ଜେନା

ବିଶାଖାପାଟଣା

Her story matters: Describing a moment of your life where you thought your decision also matters

ମୋ ସ୍ବାମୀଙ୍କ ପାଇଁ ଏକ ଚିଠି