ସ୍ୱଚ୍ଛତା ହେଉଛି ଆମ ଜୀବନର ସମସ୍ତ ପ୍ରକାରର ଜରୁରୀ କାର୍ଯ୍ୟ କଳାପ ମାନଙ୍କ ମଧ୍ୟରେ ଗୁରୁତ୍ୱପୂର୍ଣ୍ଣ କାର୍ଯ୍ୟ | ନିଜକୁ ସ୍ୱଚ୍ଛ ରଖିବା ହିତକର ହେବା ସଙ୍ଗେ ସଙ୍ଗେ ଏ ସମାଜକୁ ସ୍ୱଚ୍ଛ ରଖିବା ମଧ୍ୟ ଆମର କର୍ତ୍ତବ୍ୟ ପାଲଟି ଯାଇଛି | ତେବେ ଏ ସମାଜର ବସବାସ କରୁଥିବା ପ୍ରତ୍ୟେକ ବର୍ଗର ବ୍ୟକ୍ତିମାନଙ୍କ ସ୍ୱଚ୍ଛତା ବିଷୟରେ ଆମର ଧ୍ୟାନ ଦେବା ଜରୁରୀ | ଏହା ସହ କଥା ଯେବେ ନୂଆ ପିଢ଼ିକୁ ଜନ୍ମ ଦେବାର ଆସେ ତେବେ ଆମେ ସମସ୍ତେ ଏକ ପ୍ରକାରର ସକ୍ରିୟ ହୋଇଉଠୁ | ତେଣୁ ଆମ ସମ୍ବେଦନଶୀଳତା ଯଦି ଜ୍ଞାନଯୁକ୍ତ ହୁଏ ତେବେ ସେଥିପାଇଁ ଅନେକ ଲୋକ ଉପକୃତ ହୋଇ ପାରିବେ |

ତେବେ ଗର୍ଭବତୀ ମହିଳା ମାନଙ୍କ ସ୍ୱଚ୍ଛତା ଏବଂ ସଠିକ୍ ଜୀବନ ଶୈଳୀ ଉପରେ ଧ୍ୟାନ ଦେବା ଆମ ସମାଜର ଏକ ମୁଖ୍ୟ କର୍ତ୍ତବ୍ୟ ବୋଲି ମାନିନେଇ ଚାଲିବା ଉଚିତ୍ | ତେବେ ସେଥିପାଇଁ ଉପଯୁକ୍ତ ସ୍ବାସ୍ଥ୍ୟକର୍ମୀ ଙ୍କ ପାଖରୁ ସଠିକ୍ ପରାମର୍ଶ ନେଇ ଆମକୁ ସେ ଦିଗକୁ ଆଗେଇବାକୁ ପଡ଼ିବ | ଏହା ବ୍ୟତୀତ ସ୍ୱଚ୍ଛତା ଦିଗରେ ଗୋଟିଏ ମହିଳାକୁ ଗର୍ଭ ଧାରଣ ପୂର୍ବରୁ ହିଁ ଧ୍ୟାନ ଦେବାକୁ ପଡ଼ିବ | କାରଣ ଅନେକ ସଂକ୍ରାମକ ରୋଗ ପ୍ରଥମେ ମାଆକୁ, ପୁଣି ମାଆ ଠୁ ପିଲାକୁ ବ୍ୟାପି ଯାଇପାରେ | ତେଣୁ ସେଥିପ୍ରତି ବିଶେଷ ଧ୍ୟାନ ଦେବା ସହ ନିଜକୁ ସ୍ୱଚ୍ଛ ରଖିବା ଆନିର୍ବାର୍ଯ୍ୟ | ପୁଣି କେବଳ ସ୍ୱଚ୍ଛତା ନୁହେଁ ବରଂ ଜୀବନ ଶୈଳୀ ତଥା ସ୍ବାସ୍ଥ୍ୟ ହିତକାରୀ କଥା ସବୁ ମଧ୍ୟ ଧ୍ୟାନରେ ରଖିବାକୁ ହେବ | କାରଣ ଗୋଟିଏ ଶିଶୁ କେବଳ ନିରୋଗ ନୁହେଁ ବରଂ ସ୍ୱାସ୍ଥ୍ୟବାନ୍ ହେବା ମଧ୍ୟ ବହୁତ୍ ଜରୁରୀ | ତେଣୁ ଗର୍ଭାବସ୍ଥା ପୂର୍ବରୁ ହିଁ ଆମକୁ ସେଥିପ୍ରତି ଧ୍ୟାନ ଦେବା ସହ ଡାକ୍ତରଙ୍କ ପରାମର୍ଶ ନେବା ଜରୁରୀ |

ଆଜିର ଏହି ଆଧୁନିକ ଏବଂ ରାସାୟନିକ ପୀଢ଼ିରେ ଯେତେବେଳେ ଆମେ ବିଭିନ୍ନ ପ୍ରକାରର ରୋଗ ଏବଂ ଗର୍ଭ ଧାରଣ ଜନିତ ଅକ୍ଷମତା ଦେଇ ଗତି କରୁଚୁ, ତେବେ ଜେବେବି କୌଣସି ଦମ୍ପତ୍ତି ଶିଶୁ ଜନ୍ମ କଥା ଚିନ୍ତା କରୁଛନ୍ତି, ତେବେ ପ୍ରଥମେ ସେମାନଙ୍କୁ ଡାକ୍ତରଙ୍କ ପରାମର୍ଶ ନବା ଉଚିତ୍ | ଯାହା ଦ୍ୱାରା ସେମାନେ ନିଜ ଶରୀରର ପୋଷଣ ତଥା ଅଭାବ ଜନିତ ଜ୍ଞାନ ଆଗରୁ ପାଇବା ସହିତ ଗୋଟିଏ ମାନସିକ ତଥା ଶାରୀରିକ ଭାବେ ସୁସ୍ଥ ଶିଶୁକୁ ଜନ୍ମ ଦେଇ ପାରିବେ |

- ପ୍ରଥମତଃ ଡାକ୍ତରଙ୍କ ପରାମର୍ଶ କ୍ରମେ ଆଇରନ, ଭିଟାମିନ, ପୁଣି ଫୋଲିକ୍ ଏସିଡ୍ ର ମାତ୍ରା କୁ ନିୟନ୍ତ୍ରଣ ରଖୁଥିବା ଔଷଧ ତଥା ଖାଦ୍ୟ ଗ୍ରହଣ ଆରମ୍ଭ କରିବା ଉଚିତ୍ |

- ଭିନ୍ନ ଭିନ୍ନ ଖାଦ୍ୟ ଭିତରେ ସବୁଜ ପନିପରିବା ଯେମିତି ଲାଉ, କଲରା, ଶାଗ, ଭେଣ୍ଡି, ଆଦି ପରିବା, ପୁଣି ରଙ୍ଗୀନ ପରିବା ଯେମିତି ଗାଜର, ବିଟ୍, ବିଲାତି ଆଦି ସେବନ ଦରକାର, ଏହାଛଡ଼ା ଦୁଗ୍ଧ ଜାତୀୟ ଦ୍ରବ୍ୟ ଯେମିତି କ୍ଷୀର, ଦହି, ଲହୁଣୀ, ଘିଅ ଆଦିର ସେବନ ଦରକାର |

- ଋତୁ ଅନୁସାରେ ଉପଯୁକ୍ତ ଫଳ, ଏବଂ କୋଳି ର ସେବନ ଆବଶ୍ୟକ |

- ନିରାମିଷ ଖାଦ୍ୟ ସହିତ ଆମିଷ ଖାଦ୍ୟ ମଧ୍ୟ ଖାଇବା ଆବଶ୍ୟକ |

- ଖାଦ୍ୟ ସହିତ ଉପଯୁକ୍ତ ନିଦ ତଥା ଗର୍ଭଧାରଣ ସହଯୋଗୀ ଯୋଗ ଏବଂ ପ୍ରାଣାୟାମ କରିବା ଆବଶ୍ୟକ |

- ସୁସ୍ଥ ଏବଂ ସକାରାତ୍ମକ ପରିବେଶରେ ରହିବା ଆବଶ୍ୟକ |

ପୁଣି ଆମେ ଯଦି ସ୍ୱଚ୍ଛତା ବିଷୟରେ ଆଲୋଚନା କରୁଚୁ ତେବେ ସେଥିରେ ବି ଆମକୁ ଅନେକ କଥା ବିଶେଷ ରୂପରେ ଧ୍ୟାନ ରଖିବାକୁ ପଡିବ |

- ସଦା ସର୍ବଦା ହାତକୁ ସଫା ରଖିବା ଜରୁରୀ | କାରଣ ଆମ ହାତ ଅନେକ ସମୟରେ ମୁହଁ ଏବଂ ନାକ ପାଖକୁ ଅନ୍ୟମନସ୍କ ଭାବେ ଚାଲିଯାଏ | ଯାହା ରୋଗ ଜୀବାଣୁ ପ୍ରବେଶ କରିବାର ପ୍ରଥମ ସୋପାନ ତେଣୁ କୌଣସି ଦରକାରୀ କିମ୍ବା ଅଦରକାରୀ ଜିନିଷରେ ହାତ ଲଗାଇବା ପରେ ହାତ ସଫା କରିବା ଉଚିତ୍ ଏବଂ ଖାଇବା ଆଗରୁ ସୁନିଶ୍ଚିତ ଭାବେ ହାତ ଧୋଇବା ଆବଶ୍ୟକ |

- ଘରେ ଗୃହ ପାଳିତ ପଶୁ ଥିଲେ ସେମାନଙ୍କର ସେବା କରିବାର ଦାଇତ୍ୱ ଅନ୍ୟକୁ ଦେଇ ପାରିଲେ ବହୁତ୍ ଭଲ କଥା | ନଚେତ୍ ତାଙ୍କର ଧ୍ୟାନ ରଖିବା ବେଳେ ବିଶେଷ ସ୍ୱଚ୍ଛତା ଅବଲମ୍ବନ କରିବା ଜରୁରୀ |

- ସଫା କରିବା ପାଇଁ ବ୍ୟବହାର ହଉଥିବା କ୍ୟାମିକଲ୍ ଠାରୁ ଯେତେ ସମ୍ଭବ ଦୂରରେ ରହିବା ଜରୁରୀ | କାରଣ ସେହି କ୍ୟାମିକଲ ର ଗନ୍ଧ ମହିଳା ସହିତ ଗର୍ଭରେ ଥିବା ପିଲାକୁ ପ୍ରଭାବ ପକାଇ ପାରେ |

- ପନିପରିବା ଏବଂ ଫଳକୁ ଠିକ୍ ଭାବରେ ସଫା କରି ସେବନ କରିବା ଉଚିତ୍ | ଏବଂ ଖାଦ୍ୟ କୁ ଭଲ ଭାବରେ ସିଜାଇ ଖାଇବା ଉଚିତ୍ |

- ଆମିଷ ସେବନ ବେଳେ ତାର ରନ୍ଧା ପ୍ରଣାଳୀ ଅତ୍ୟନ୍ତ ସ୍ୱଚ୍ଛ ହୋଇ ଥିବା ଜରୁରୀ | ପୁଣି କ୍ଷୀର ପିଇବା ପୂର୍ବରୁ ତାକୁ ଭଲ ଭାବରେ ଫୁଟାଇବା ଜରୁରୀ |

- ବାହାର ଖାଦ୍ୟ ଯେତେ ସମ୍ଭବ ବର୍ଜନ କରିବା ଉଚିତ୍ |

- ପ୍ରଚୁର ଜଳ ସେବନ ତଥା ସ୍ୱଚ୍ଛ ପାନୀୟ ଜଳର ସେବନ ଅତ୍ୟନ୍ତ ଆବଶ୍ୟକ |

- ନିଜ ପିନ୍ଧୁଥିବା ଲୁଗା ସବୁବେଳେ ସ୍ୱଚ୍ଛ ହୋଇଥିବା ଆବଶ୍ୟକ | ମୁଖ୍ୟତଃ ଅନ୍ତବସ୍ତ୍ରର ସ୍ୱଚ୍ଛତା ଉପରେ ଅଧିକ ଧ୍ୟାନ ଦେବା ଆବଶ୍ୟକ | କାରଣ ଗର୍ଭଧାରଣ ସମୟରେ ଖୁବ୍ ସହଜରେ ଚର୍ମରୋଗ ହବାର ସମ୍ଭାବନା ଥାଏ |

- ଗର୍ଭାବସ୍ଥା ରେ ଯଦି ଦମ୍ପତ୍ତି ଯୌନ ସଂପର୍କ ରଖୁ ଥାନ୍ତି ତାହା ଡାକ୍ତରଙ୍କ ପରାମର୍ଶ କ୍ରମେ ହବା ଉଚିତ୍ ତଥା ଦମ୍ପତ୍ତିଙ୍କୁ ସ୍ୱଚ୍ଛତା ଉପରେ ଧ୍ୟାନ ଦେବା ଉଚିତ୍ |

ଗର୍ଭାବସ୍ଥା ଭଳି ଏକ ସୁନ୍ଦର ଏବଂ ଗୁରୁତ୍ୱପୂର୍ଣ୍ଣ ସମୟକୁ ସବୁ ମହିଳା ଏବଂ ପରିବାର ବର୍ଗ ଆନନ୍ଦରେ ସ୍ଵାଗତ କରିବା ଉଚିତ୍ | ମାତ୍ର ଏହା ସହିତ ଗର୍ଭବତୀ ମହିଳା ସଦା ସର୍ବଦା ସୁସ୍ଥ, ସ୍ୱଚ୍ଛ ତଥା ସକାରାତ୍ମକ ପରିବେଶରେ ବସବାସ କରିବା ସହ ନିଜକୁ ମଧ୍ୟ ସୁସ୍ଥ, ସ୍ୱଚ୍ଛ ଏବଂ ସକାରାତ୍ମକ ରଖିବା ଉଚିତ୍ | ଏହା ଦ୍ବାରା ଆମେ ଏକ ଉନ୍ନତ ନୂତନ ପିଢ଼ିକୁ ସ୍ଵାଗତ କରିବାରେ ସକ୍ଷମ ହୋଇ ପାରିବୁ |

ସୁସ୍ମିତା ଜେନା

ବିଶାଖାପାଟଣା

Hygiene and health tips during pregnency

ଗର୍ଭାବସ୍ଥାରେ ସ୍ୱଚ୍ଛତା ଏବଂ ଜୀବନଶୈଳୀ ବିଷୟରେ କିଛି କଥା