କର୍ମ ହିଁ ଭଗବାନ

କର୍ମ ହିଁ ସତ୍ୟ

କର୍ମ କରେ କାଳଜୟୀ

କର୍ମ ସାଜେ ମୁକ୍ତିର ପଥ

ଜୀବନଟା ପାଣି ଫୋଟକା। କେତେବେଳେ ଯେ କେଉଁ ମୁହୂର୍ତ୍ତରେ ମିଳେଇଯିବ ତାହା ବା କିଏ ଜାଣେ। ଏ ମାଟିର ଶରୀର ମାଟିରେ ମିଶିଯିବ। ରହିଯିବ କେବଳ ନିଜର ଅତୀତରେ କରିଥିବା ସେଇ କର୍ମ ଗୁଡ଼ିକ।

ମନୁଷ୍ୟ କରିଥିବା କର୍ମ କେବଳ ଜୀବନ ଥିବା କାଳରେ ପରିଚୟ ଦିଏନାହିଁ ବରଂ ମୃତ୍ଯ ପରେ ମଧ୍ୟ ତା'ର କର୍ମ ତାକୁ କାଳଜୟୀ କରିଦିଏ ଇତିହାସ ପୃଷ୍ଠାରେ।

ଚାଣକ୍ୟଙ୍କ ମତରେ,

ରାଜା ପୂଜା ପାଏ ଆପଣା ଦେଶରେ

କବି ପୂଜା ପାଏ ଦେଶ ବିଦେଶରେ

ଏହାର ତାତ୍ପର୍ଯ୍ୟ, ରାଜା କେବଳ ନିଜ ପ୍ରଜାଙ୍କ ନିକଟରେ ଏବଂ ନିଜ ରାଜ୍ୟରେ ହିଁ ପରିଚିତ ପରନ୍ତୁ କବି ନିଜ ଲେଖା ମାଧ୍ୟମରେ ନିଜ କର୍ମ ଦ୍ବାରା ଦେଶ ବିଦେଶ ସବୁଆଡ଼େ ପରିଚିତ ଏବଂ ସମ୍ମାନିତ ହୁଏ।

ଇତିହାସ କିମ୍ବା କିମ୍ବଦନ୍ତୀର ପୃଷ୍ଠା ଲେଉଟାଇ ଦେଖିଲେ ଆମେ ଅନେକ ଉଦାହରଣ ପାଇବା ଯାହା ଦର୍ଶାଏ ମନୁଷ୍ୟ ତା କର୍ମରୁ ମହାନ୍ ହୋଇଥାଏ ଜନ୍ମରୁ ନୁହେଁ।

କିମ୍ବଦନ୍ତୀରୁ କିଛି ଚରିତ୍ର :

ଏକଲବ୍ଯ, ମହାଭାରତର ଏକ ଛୋଟ ଚରିତ୍ର ପରନ୍ତୁ ମୁଖ୍ୟ ଭୂମିକା ଗ୍ରହଣ କରେ। ଏକ ଛୋଟ ଜାତି, ନିଷାଦ ଶବର ଜାତିରେ ଜନ୍ମ ଗ୍ରହଣ କରି ମଧ୍ୟ ନିଜ ଶସ୍ତ୍ର ଚାଳନା ଦକ୍ଷତା ଲାଗି ଆଜି ସଭିଙ୍କ ଆଗରେ ପରିଚିତ। ଛୋଟ ଜାତିରେ ଶସ୍ତ୍ର ଚାଳନା ବାରଣ ଥାଇ ମଧ୍ୟ, ଗୁରୁ ଦ୍ରୋଣାଚାର୍ଯ୍ୟଙ୍କୁ ଅନୁସରଣ କରି ତାଙ୍କ ଅଜ୍ଞାତରେ ସେ ନିଜକୁ କରିପାରିଥିଲେ ଦକ୍ଷ। ଗୁରୁଙ୍କ ଆଦେଶରେ ନିଜ ବୃଦ୍ଧ ଅଙ୍ଗୁଳି କୁ ଗୁରୁଦକ୍ଷିଣା ଭାବରେ ପ୍ରଦାନ କରି ସାଜିଥିଲେ ସଦା ସର୍ବଦା ପାଇଁ କାଳଜୟୀ। ତାଙ୍କର ଏହି ମହାନତା, ଦୁନିଆକୁ ଏହା ଦର୍ଶାଏ ଯେ ମନୁଷ୍ୟର ଜାତି ଠାରୁ ତା କର୍ମ ହିଁ ହେଉଛି ଅଧିକ ଗୁରୁତ୍ବପୂର୍ଣ୍ଣ।

ମହାଭାରତର ଆଉ ଏକ ମୁଖ୍ୟ ଚରିତ୍ର କର୍ଣ୍ଣ। ହୁଏତ ସେ କୁନ୍ତୀ ପୁତ୍ର ହୋଇପାରନ୍ତି ପରନ୍ତୁ ଜନ୍ମରୁ ସେ ଏକ ରଥ ଚାଳକ ପରିବାରରେ ବଢି ଆସିଥିଲେ। ଛୋଟ ଜାତିରେ ବଢି ମଧ୍ୟ ସେ ପରିଶେଷରେ ନିଜ କର୍ମ ପାଇଁ ଅଙ୍ଗ ଭଳି ରାଜ୍ୟର ରାଜା ହୋଇପାରିଥିଲେ। ଏକ ରଥ ଚାଳକର ପୁତ୍ର ହୋଇ ମଧ୍ୟ ନିଜ କର୍ମ ଦ୍ବାରା ସେ ଅଙ୍ଗ ପ୍ରଦେଶର ରାଜା ହୋଇ ଏହା ପୁଣି ଥରେ ପ୍ରମାଣ କରିଦେଲ ଯେ କର୍ମ ହିଁ ମନୁଷ୍ୟ କୁ ଦିଏ ଏକ ସ୍ଵତନ୍ତ୍ର ପରିଚୟ।

ଯେବେ ବନ୍ଧୁ ଉପରେ ଚର୍ଚ୍ଚା ହୁଏ ମନେ ପଡ଼େ ସେଇ କୃଷ୍ନ ସୁଦାମା ଙ୍କ କାହାଣୀ। ସୁଦାମା ଏକ ଗରିବ ବ୍ରାହ୍ମଣ ଥିଲେ। ପରନ୍ତୁ ନିଜ ବନ୍ଧୁ ପାଇଁ ନିଜର ବିଶ୍ୱସ୍ତତା ପ୍ରମାଣ କରିଦେଇଥିଲା ମନୁଷ୍ୟ ତାର ଆଚାର ବ୍ଯବହାର ଦ୍ଵାରା ଦୁନିଆ ବୁକୁରେ ସାଜି ପାରେ ମହାନ୍।

ଜଟାୟୁ, ରାମାୟଣ ର ଏକ ପ୍ରମୁଖ ଚରିତ୍ର। ପକ୍ଷୀ କୂଳରେ ଜନ୍ମ ଗ୍ରହଣ କରି ମଧ୍ୟ ମାତା ସୀତାଙ୍କୁ ରକ୍ଷା କରିବା ପାଇଁ ମହାବଳୀ ପ୍ରବଳ ପ୍ରତାପୀ ଦଶାନନ ରାବଣ ସହ ଲଢେଇ କରି ନିଜ ଜୀବନ ହାରିଥିଲେ। ତାଙ୍କ ସାହସିକତା ଏବଂ ନାରୀ ପ୍ରତି ସମ୍ମାନ ତାଙ୍କୁ କରିଥିଲା ମହାନ୍।

ଇତିହାସରୁ କିଛି ଚରିତ୍ର :

ଆବ୍ରାହମ ଲିଙ୍କନ ଆମେରିକା ପୁରାତନ ରାଷ୍ଟ୍ରପତି ଏକ ଗରିବ ପରିବାରରେ ଜନ୍ମ ଗ୍ରହଣ କରି ମଧ୍ୟ ଦୁନିଆରେ ଦାସତ୍ଵ କୁ ହଟାଇବା ଲାଗି ତାଙ୍କ ପ୍ରୟାସ ଏବଂ ଆମେରିକୀୟ ଗୃହଯୁଦ୍ଧ ରେ ତାଙ୍କ ନେତୃତ୍ଵ ତାଙ୍କୁ ଦେଶ ବିଦେଶରେ ଦେଇଛି ଅନେକ ସମ୍ମାନ ଏବଂ ପରିଚୟ।

ଏକ ସାମାନ୍ୟ ପରିବାରରେ ଜନ୍ମ ହୋଇ ମଧ୍ୟ ମହାତ୍ମା ଗାନ୍ଧୀ ଆଜି ଦେଶର ଜନକ ଭାବରେ ପରିଚିତ। ଦେଶକୁ ପରାଧୀନତାରୁ ମୁକ୍ତ କରିବା ପାଇଁ ଅହିଁସା ରୂପକ ଅସ୍ତ୍ରକୁ ବ୍ୟବହାର କରି ସେ କରିଥିଲେ ଅନେକ ଲଢ଼େଇ। ତାଙ୍କ ସେଇ ସୁକର୍ମ ଲାଗି ଆଜି ସେ ଦେଶ ବିଦେଶରେ ରେ ପରିଚିତ।

ଥୋମାସ ଏଡିସନ, ଦାରିଦ୍ର୍ୟ ସୀମାରେଖା ତଳେ ଥାଇ ମଧ୍ୟ ଶିକ୍ଷା ଗ୍ରହଣରେ ବାଧା ଥାଇ ମଧ୍ୟ ସେ ଇତିହାସରେ ନିଜକୁ ବୈଜ୍ଞାନିକ ଭାବରେ ନିଜ ପରିଚୟ ସୃଷ୍ଟି କରିପାରିଥିଲେ। ବିଦ୍ୟୁତ୍ ବଲ୍ବ ର ଉଦ୍ଭାବନ ତାଙ୍କୁ ଦେଇଥିଲା ଏକ ସ୍ଵତନ୍ତ୍ର ପରିଚୟ।

ପୋଲାଣ୍ଡରେ ଏକ ଗରିବ ପରିବାରରେ ଜନ୍ମ ହୋଇଥିବା କ୍ୟୁରି ପ୍ରଥମ ମହିଳା ଭାବରେ ନୋବେଲ ପୁରସ୍କାର ଜିତିଥିଲେ ଏବଂ ଦୁଇଟି ଭିନ୍ନ ବୈଜ୍ଞାନିକ କ୍ଷେତ୍ରରେ (ପଦାର୍ଥ ବିଜ୍ଞାନ ଏବଂ ରସାୟନ ବିଜ୍ଞାନ) ନୋବେଲ ପୁରସ୍କାର ଜିତିଥିବା ଏକମାତ୍ର ବ୍ୟକ୍ତି ରୂପରେ ନିଜ ପରିଚୟ ସୃଷ୍ଟି କରିପାରିଥିଲେ। ରେଡିଓଆକ୍ଟିଭିଟି ଉପରେ ତାଙ୍କର ଅନୁସନ୍ଧାନ ଅନେକ ବୈଜ୍ଞାନିକ ଅଗ୍ରଗତି ପାଇଁ ପଥ ପରିଷ୍କାର କରିପାରିଛି।

ଏହି ବ୍ୟକ୍ତିମାନେ ଉଦାହରଣ ଦିଅନ୍ତି ଯେ ମହାନତା ଜଣଙ୍କର ଜନ୍ମ କିମ୍ବା ସାମାଜିକ ସ୍ଥିତି ଦ୍ୱାରା ନିର୍ଣ୍ଣୟ କରାଯାଏ ନାହିଁ, କିନ୍ତୁ ସେମାନଙ୍କର କାର୍ଯ୍ୟକଳାପ ଏବଂ ସମାଜରେ ଅବଦାନର ପ୍ରଭାବ ଦ୍ୱାରା ନିର୍ଣ୍ଣୟ କରାଯାଏ | ସେମାନଙ୍କର ଦୃଢ଼ତା, ନବସୃଜନ, ଏବଂ ସେମାନଙ୍କର ନିଜସ୍ୱ କର୍ମ ପ୍ରତି ଉତ୍ସର୍ଗୀକୃତତା ସେମାନଙ୍କୁ ଅସାଧାରଣ ସଫଳତା ହାସଲ କରିବାକୁ ପ୍ରେରିତ କରିପାରିଛି ଏବଂ ଏକ ଚିରସ୍ଥାୟୀ ପଦଚିହ୍ନ ଛାଡିଦେଇପାରିଛନ୍ତି ଯାହା ସେମାନଙ୍କ ଜାତି ଧର୍ମ ବର୍ଣ୍ଣ ସାମାଜିକ ଅର୍ଥନୈତିକ ପରିସ୍ଥିତିର ଉର୍ଦ୍ଧ୍ଵରେ।

ସଂସ୍କୃତର ଏହି ଶ୍ଳୋକ ଅନୁସାରେ,

ରୂପଯୌବନସମ୍ପନ୍ନା ବିଶାଳକୂଳସମ୍ଭବାଃ

ବିଦ୍ୟାହୀନ ନ ଶୋଭନ୍ତେ ନିର୍ଗନ୍ଧାଃ କିଂଶୂକା ଯଥା

ଅର୍ଥାତ୍,

ସୁନ୍ଦର ରୂପ, ଯୌବନ କିମ୍ବା ଏକ ଉଚ୍ଚ କୂଳରେ ଜନ୍ମ କଲେ ମଧ୍ୟ ଯଦି ତୁମ ପାଖରେ ବିଦ୍ୟା ନାହିଁ କିମ୍ବା ତୁମ ପାଖରେ ତୁମ ନିଜର କର୍ମ ନାହିଁ ତେବେ ତୁମେ ଦୁନିଆରେ କିଛି ବି ପରିଚୟ ପାଇବା ଯୋଗ୍ୟ ନୁହେଁ, ଯେପରି ପଳାଶ ଫୁଲ ସୁନ୍ଦର ଓ ଅକର୍ଷଣୀୟ ହୋଇଥିଲେ ମଧ୍ୟ ଏହା ପାଖରେ ନିଜର ବାସ୍ନା ନାହିଁ, ଏକ ଫୁଲର ପରିଚୟ ତା'ର ସୁଗନ୍ଧିତ ବାସ୍ନାରେ ହୋଇଥାଏ, ପରନ୍ତୁ ପଳାଶ ପାଖରେ ସୁନ୍ଦରତା ଥିଲେ ମଧ୍ୟ ଏହା ଗନ୍ଧହୀନ। ତେଣୁ ଏହା କେଉଁଠାରେ ଶୋଭା ପାଏ ନାହିଁ।

ମଣିଷ ଜୀବନ ନୁହଇଁ କେବଳ

ବର୍ଷ ମାସ ଦିନ ଦଣ୍ଡ

କର୍ମେ ଯିଏ ନର କର୍ମ ଏକା ତା'ର

ଜୀବନର ମାନଦଣ୍ଡ

କର୍ମ ଅଟେ ତୋର ଧର୍ମ

ଯୁଗେ ଯୁଗେ ହେବୁ କାଳଜୟୀ ତୁ ରେ

କରିଥିଲେ ଭଲ କର୍ମ

ଜୀବନ ଯମୁନା କେତେବେଳେ କେଉଁ

ବାଟେ ବହି ଚାଲିଯିବ

ତୁ ପରା ମଣିଷ ଦୁନିଆ ବୁକୁରେ

କହି ବୁଲୁ ଶ୍ରେଷ୍ଠ ଜୀବ

କାହିଁ ତୋର କର୍ମ ଜ୍ଞାନ

କର୍ମ କଲେ ସିନା ଇଶ୍ୱର ପାଇବୁ

କର୍ମ ପରା ଭାଗବାନ

ଜାତି ଧର୍ମ ବର୍ଣ୍ଣ ଧନୀ କି ଗରିବ

ନୁହେଁ ତୋର ପରିଚୟ

ଭଲ କାମ ଯଦି କରି ତୁ ପାରିବୁ

ହୋଇବ ତୋହରି ଜୟ

ସାଜିବୁ ନାହିଁ ପଳାଶ

ପଙ୍କରେ ଜନ୍ମି ବି ପଦ୍ମ ପରି ହେବୁ

କର୍ମରେ କରିବୁ ବଶ

ତେଣୁ ମନୁଷ୍ୟ ନିଜ ଜାତି କୂଳ ରୂପ ଯୌବନ ପଛରେ ନ ଦୌଡ଼ି ଉଚିତ୍ କର୍ମ ଏବଂ କର୍ତ୍ତବ୍ୟ କରିବା ଉଚିତ୍। ନିଜ କର୍ମ ହିଁ ନିଜକୁ ଦେଶ ବିଦେଶରେ ପରିଚୟ ଦେଇପାରିବ।

@ସତ୍ୟବ୍ରତ ସେନାପତି

ଯେଣେ ଯିବୁ ତେଣେ ଯା, କର୍ମ ଘେନି ବୁଲୁ ଥା।

ତୋ କର୍ମ ହିଁ ତୋର ପରିଚୟ...