= ଝୁମୁରୁ ଝୁମୁରୁ ଝାଇଁ =

ଝୁମୁରୁ ଝୁମୁରୁ ଝାଇଁ

ଝୁମୁରି ମନ ଦୋଳିଟେ ପାଇଁ

ଦୋଳି ବାନ୍ଧିଦେବ କିଏ?

ଜେଜେ ବାନ୍ଧିଦେବେ ଗଛରେ ଦୋଳି, ଖୁସିରେ ଝୁମୁରି ଡ଼ିଏଁ।...(୧)

ଦୋଳି ଝୁଲେ ସାଇଁ ସାଇଁ

ଝୁମୁରି କାନ୍ଦୁଛି ପିଠାଟେ ପାଇଁ

ପିଠା କରିଦେବ କିଏ?

ମାଇଁ କରିଛନ୍ତି ରଜ ପୋଡ଼ପିଠା, ଖୁସିରେ ଝୁମୁରି ଡ଼ିଏଁ।...(୨)

ଚକ ଘୂରେ ଘାଇଁ ଘାଇଁ

ଝୁମୁରି ଋଷିଛି ନୂଆଁ ଜାମାଟେ ପାଇଁ

ଜାମା ଆଣିଦେବ କିଏ?

ବାପା ଆଣିଛନ୍ତି ନାଲିଆ ଜାମାଟେ, ଖୁସିରେ ଝୁମୁରି ଡ଼ିଏଁ।...(୩)

ଚିକିରି ଚିକିରି ଚାଇଁ

ଝୁମୁରି ବସିଛି ରଜସଜ ପାଇଁ

ସଜ କରିଦେବ କିଏ?

ଦିଦି ଆଣିଛନ୍ତି ସଜବାଜ ପେଡ଼ି, ଖୁସିରେ ଝୁମୁରି ଡ଼ିଏଁ।...(୪)

ବେଙ୍ଗ ଡିଏଁ ଫକ ଫକ

ମିଠା ପାନ ପାଇଁ ଝୁମୁରିର ମନ ସକ ସକ

ପାନ ଆଣିଦେବ କିଏ?

ଫୁକୁନି ଆଣୁଛି ମିଠା ପାନ ଖଣ୍ଡେ, ଖୁସିରେ ଝୁମୁରି ଡ଼ିଏଁ।...(୫)

ସାତ ଚକୁଳି ଚଉଦ ଚେଁ

ଲୁଡ଼ୋ ଖେଳ ପାଇଁ ଝୁମୁରି କାନ୍ଦୁଛି ଭେଁ ଭେଁ

ଲୁଡ଼ୋ ଖେଳିବ କିଏ?

ଭାଇ ବସିଗଲେ ଲୁଡ଼ୋ ପାଲି ଧରି, ଖୁସିରେ ଝୁମୁରି ଡ଼ିଏଁ।...(୬)

ସଜନା ଗଛର ଛୁଇଁ ଲୋ, ସଜନୀ... ସଜନା ଗଛର ଛୁଇଁ

ଝୁମୁରି କାନ୍ଦୁଛି ରଜପାନ ଜାକି ଦୋଳିରେ ଝୁଲିବା ପାଇଁ

ଦୋଳି ଝୁଲାଇବ କିଏ?

ସାଙ୍ଗ ଆସିଗଲେ ଦଉଡ଼ି ଦଉଡ଼ି, ଖୁସିରେ ଝୁମୁରି ଡ଼ିଏଁ।...(୮)

ମହୁଲ ଫୁଲର ବାସ ଲୋ, ସଜନୀ... ମହୁଲ ଫୁଲର ବାସ

କୋଳି ଖାଇବାକୁ ଝୁମୁରି ଆମର କରିଅଛି ବଡ଼ ରୋଷ

କୋଳି ଆଣିଦେବ କିଏ?

ମାମୁଁ ଆଣିଦେବେ ଭଇଁଚ କୋଳି, ଖୁସିରେ ଝୁମୁରି ଡ଼ିଏଁ।...(୯)

ସଞ୍ଜ ଆସେ ନଇଁ ନଇଁ ଲୋ, ସଜନୀ... ସଞ୍ଜ ଆସେ ନଇଁ ନଇଁ

କଳା ଆକାଶରେ ଧଳା ଚାନ୍ଦ ଦେଖି ହସୁଅଛି ନୀଳକଇଁ

ଚାନ୍ଦକୁ ପାଇବା ପାଇଁ ଝୁମୁରି ମନଟା କୁରୁଳି ଉଠୁଛି କାହିଁ?!

ଚାନ୍ଦ ଆଣିଦେବ କିଏ?

ସାଙ୍ଗସାଥୀ ଏଠି ଟାପରା କଲେଣି, ଲାଜେ ଝୁମୁରି ଘରକୁ ଧାଏଁ।...(୧୦)

=×=×=×=

ଝୁମୁରୁ ଝୁମୁରୁ ଝାଇଁ....