ସେଦିନ ଅସହ୍ୟ ଗରମ ହେଉଥାଏ। ଲାଗୁଥାଏ ସତେ ଯେମିତି ଆକାଶ ରୁ ନିଆଁ ଝୁଲ ଖସି ପଡୁଛି ତା ସହ ଯୋଉ ଗୁଳୁଗୁଳି କହିବା ଅସମ୍ଭବ। ଏପଟେ ଶାଶୁ ବୋହୂ ଦୁଇ ଜଣ ଯାକ ଝାଳ ନାଳ ହୋଇ ପିଠୋଉ ବାଟିବାରେ ଲାଗି ପଡ଼ିଛନ୍ତି କାହିଁକି ନା ଆଜି ଅନେକ ଦିନ ପରେ ରମେଶ ଘରକୁ ଫେରୁଛି। ରମେଶ ଭାଇ ଙ୍କ ସ୍ତ୍ରୀ ରଶ୍ମି ଭାଉଜ କହିଲେ ଆଜି ଯେତିକି ଗରମ ହଉଛି ସତରେ ବର୍ଷା ଢାଳି ପକେଇବ। ଶାଶୁ ଉତ୍ତର ଦେଲେ ହୁସ୍ ସେ ନିଆଁ ଲଗା ବର୍ଷା କଥା କହନା। ରୁଜ ରୁଜ୍ ଉଠେଇ ଦଉଛି ହେଲେ କୁଣ୍ଡା ଝଡ଼ିଲା ଭଳି ପକେଇଦେଇ ପଳଉଛି ସେ ଆହୁରି ବେଶି ଗରମ ଲାଗୁଛି। ଏପଟେ ରଶ୍ମି ଭାଉଜ କହିଲେ ଆଜି ଅସୁଳେ ବର୍ଷା ନହେଲେ ସିଧା ମରିଯିବି।

ଧୀରେ ଧୀରେ କାଉଁଳିଆ ପାଗ କରିଦେଲା। ସୁଲୁସୁଲୁ ପବନ ବହିବା ଆରମ୍ଭ କଲା । ରମେଶ ଭାଇ ର ଚାରି ବର୍ଷର ପୁଅ ଟିଏ ଓ ଦୁଇ ବର୍ଷ ର ଝିଅଟିଏ। ଦୁହେଁ ବି ଝିପିରି ବର୍ଷା ରେ ଭିଜି ନାଚକୁଦ କରୁଥିଲେ କାହିଁକି ନ ଏହି ଗରମ ରୁ ସତେ ଯେମିତି ତ୍ରାହି ମିଳିଗଲା। ହେଲେ ପବନ ର ବେଗ ବଢ଼ିଲା ଓ ବର୍ଷା ବି ବଢ଼ିଲା। ବର୍ଷା ତ ଜୋରରେ ହେଉଥିଲା ତାଠୁ ଅଧିକ ବେଗରେ କିନ୍ତୁ ପବନ ବୋହୁଥିଲା। ହଠାତ୍ ବାହାରେ ଥିବା ଜିନିଷ ଉଡ଼ିବାକୁ ଲାଗିଲା ଓ ପ୍ରବଳ ଜୋରରେ ଘଡ଼ଘଡ଼ି ବିଜୁଳି ମାରିଲା । ରମେଶ ଭାଇ ର ବୋଉ କୁନି ଖୁଡ଼ି କହୁଥାନ୍ତି ନିୟୁଜ ଆସିଲେ ଦେଖିବ ଆଜି କେତେ ଲୋକ ଘଡ଼ଘଡ଼ି ରେ ମରି ଯାଇଥିବେ ରଶ୍ମି ଭାଉଜ କହିଲେ ବୋଉ ସେ ଖରାପ କଥା ପାଟିରେ ଧରନ୍ତୁନି ମୋତେ ଭାରି ଡର ଏ ବିଜୁଳି ଘଡ଼ଘଡ଼ି କୁ।

ହଠାତ୍ କରେଣ୍ଟ ବି ପଳେଇଲା କିଛି ନୂଆ କଥା ନୁହେଁ ଯେ ଗାଁ ରେ ଟିକେ ପବନ ବୋହିଲେ ଆଉ କରେଣ୍ଟ କୋଉଠି ରହେ ଯେ। ପ୍ରଚଣ୍ଡ କାଳ ବୈଶାଖୀ ରୂପ ଦେଖେଇ ଦେଇ ଗଲା। ବର୍ଷା କୁ ସବୁଦିନ ଅପେକ୍ଷା କରୁଥିବା କୁନି ଖୁଡ଼ି କହୁଥିଲେ ଆଜି ଗାଜିକି ହେଇଛି ଯେ ଲାଇନ୍ ଆସିଲେ ଯାଇ ଥଣ୍ଡା ଲାଗିବ।

ଘଣ୍ଟେ ଦେଢ଼ ଘଣ୍ଟା ପରେ ସମୟ ହେଲାଣି ହେଲେ ଏପଟେ କରେଣ୍ଟ ଆସିନି। ପିଲା ଦୁଇଟା ଘର ଭିତରେ ଖାଲି ରେ କେତେ ସମୟ ବସିବେ ଦୁଇ ଜଣ ମୋବାଇଲ ଧରି ବସି ଯାଇଛନ୍ତି। ତାଙ୍କ ବୋଉ ଦୌଡ଼ି କି ଆସିଲେ କହିଲେ ଆଜି କରେଣ୍ଟ ଏତେବେଳକୁ ଆସି ନାହିଁ ଫୋନ୍ ରେ ଚାର୍ଜ ନାହିଁ ତମେ ସବୁ ସାରି ସାରିଲଣି । ଆସି ଦେଖନ୍ତି ତ ଗୋଟେ ଫୋନ୍ ରେ ୨୦ ପର୍ସେଣ୍ଟ ଓ ଆଉ ଗୋଟିଏ ରେ ଦଶ ପରସେଣ୍ଟ ଚାର୍ଜ ଅଛି। ହେ ଭଗବାନ ଆଜି କେମିତି ଚଳିବା କରେଣ୍ଟ ନ ଆସିଲେ ଏ ଛୁଆ ଦୁଇଟା ଙ୍କ ପାଇଁ ଜୀବନ ରେ ଟିକେ ଶାନ୍ତି ନାହିଁ କହି ପାଟି କରୁଥିଲେ। ସେପଟରୁ କୁନି ଖୁଡ଼ି କହୁଥାନ୍ତି ନା ମ ଆସିଯିବ ଆଉ ଟିକେ ପରେ ଏତେ ସମୟ କଟିବ ନା କଣ ? ନଅ ଟା ବେଳକୁ ଆସିଯିବ।

ସେତେବେଳକୁ ତାଙ୍କ ଘରକୁ ମାଳତୀ ବୋଉ ବୁଢ଼ୀ ଆସିଲା କହିଲା ଲୋ କୁନି ତମର ରୋଷେଇ ବାସ ସଇଲାନି ନା ନାଇଁ। ଆଉ ପାଞ୍ଚ ଦିନ ଯାକ ଲାଇନ୍ ଆସିବନି ବୋଲି ସବୁ କହୁଛନ୍ତି। ଗାଁ ମୁଣ୍ଡ ରେ ଦୁଇଟା ବଡ଼ ଗଛ ଓ ଖୁଣ୍ଟି ୩ ଟା ଗଳି ପଡ଼ିଛି। ସେପଟୁ ଯାଇଥିଲେ ବନେଇ ଦେବେ ଆମ ରି ଗାଁ ମୁଣ୍ଡ ରୁ ଉପୁଡ଼ି ପଡ଼ିଛି କିଏ ଆଉ ବନେଇବ । ରଶ୍ମି ଭାଉଜ ଙ୍କ ମୁଣ୍ଡ ପୁରା ଅନ୍ଧାର ରୋଷେଇ କେମିତି କରିବେ କଣ ଖାଇବେ ଓ ରମେଶ ଭାଇ କାଲି କେତେବେଳେ ପହଞ୍ଚିବେ କେମିତି ଜାଣିବେ। କାଲି ତା ବିବାହ ବାର୍ଷିକୀ ଏତେ ଦିନ ପରେ ସ୍ଵାମୀ ଆସିବେ ବୋଲି ବହୁତ ଖୁସି। ମାଳତୀ ବୋଉ ବୁଢ଼ୀ ପୁଣି କହିଲା କୋଉଠି କାଳେ ପୁଣି ଟ୍ରେନ୍ ଗାଡ଼ି ଧକ୍କା ହେଇଛି । ଏଥିରେ ଟିକେ କାନକୁ ଦେଲେନି ଶାଶୁ ବୋହୂ କାହିଁକି ନା କରେଣ୍ଟ ଆସିବା ଚିନ୍ତା ରେ ଥାଆନ୍ତି। ଆଉ କୋଉଠି ନା କୋଉଠି ପ୍ରତ୍ୟେକ ଦିନ ତ ଦୁର୍ଘଟଣା ହଉଛି।

ରାତି ଏଗାର ବେଳକୁ ଲୋ ଭୋଲ୍ଟେଜ୍ ରେ କରେଣ୍ଟ ଆସିଲା। ନା ସେଥିରେ ପଙ୍ଖା ଘୁରୁ ଥାଏ ନା ସେଥିରେ ଫୋନ୍ ଟିକେ ଚାର୍ଜ ବସେଇ ହଉଥାଏ। ରାତି ସାରା ଖାଲି ଡହଳ ବିକଳ ଲାଗୁଥାଏ। ସେହି ଗରମ ଭିତରେ ଟିକେ ନିଦ ଲାଗିଛି କି ନାହିଁ ରାତି ଦୁଇଟା ଅଢେଇଟା ବେଳକୁ ଚାରି ପାଞ୍ଚ ଜଣ ଭାଉଜ ଭାଉଜ ଡାକ ପକେଇଲେ । ରଶ୍ମି ଭାଉଜ କୁନି ଖୁଡ଼ି ସବୁ ଉଠିକି ଗଲେ ଏତେ ରାତିରେ କିଏ ଡାକୁଛି ଖୁଣ୍ଟି ବନା ହେବାକୁ ଚାନ୍ଦା ମାଗିବାକୁ ଆସିଲେଣି ନା କଣ? ଦେଖିଲା ବେଳକୁ ହରିଶ ସହ ଗାଁ ର ଆଉ ଚାରି ପାଞ୍ଚଟା ଯୁବକ । ହରିଶ କହିଲା ଦେଖନ୍ତୁ ଧୀରେ କଥା ଶୁଣିବେ ରମେଶ ଭାଇ ଯୋଉ ଟ୍ରେନ୍ ରେ ଆସୁଥିଲା ସେହି ଟ୍ରେନ୍ ଟା ବାହାନଗା ପାଖରେ ଦୁର୍ଘଟଣା ହୋଇଛି ଆଉ ଗୋଟେ ମାଲବାହୀ ଟ୍ରେନ ସହ। ଏଯାଏଁ କିଛି ସଠିକ୍ ଖବର ଆସି ନାହିଁ କିନ୍ତୁ ଭଦ୍ରକ ହସ୍ପିଟାଲ ରେ ରମେଶ ଭାଇ ପଡ଼ିଛି ବୋଲି ଖବର ଆସିଛି। ଆମେ ଏବେ ଯାଉଛୁ ଭାଉଜ ଆମ ସହ ଆସନ୍ତୁ। ରଶ୍ମି ଭାଉଜ ପୁରା ନୀରବ। କୁନି ଖୁଡ଼ି କହିଲେ କିନ୍ତୁ ମୋ ପୁଅ ତ କାଲି ଆସିଥାନ୍ତା ଆଜି କେମିତି ଆସିଲା ତମ ପାଖରେ ଭୁଲ ଖବର ଅଛି। ହରିଶ କହିଲା ଏ ଖବର ପରେ ଆମେ ତାଙ୍କ କମ୍ପାନୀ ସାଙ୍ଗ ଙ୍କୁ କଲ୍ କରିଥିଲୁ ସେ କହିଲେ ଭାଉଜ ଙ୍କ ମ୍ୟାରେଜ୍ anniversary ପାଇଁ ଭାଇ ତାଙ୍କୁ ସର୍ପ୍ରାଇଜ ଦେବାକୁ ପ୍ଲାନ୍ କରିଥିଲେ।

ସାଙ୍ଗେ ସାଙ୍ଗେ ସବୁ ବାହାରିଗଲେ ଭଦ୍ରକ ହସ୍ପିଟାଲ । ଗଣ୍ଡା ଗଣ୍ଡା ଶବ ଓ ଅସହ୍ୟ ଚିତ୍କାର। ରମେଶ ଭାଇ କୁ ଖୋଜା ଚାଲିଛି ହେଲେ ଏତେ ରୋଗୀ ଙ୍କ ଭିତରୁ କୋଉଠୁ ମିଳୁଛି। ଯେତେ ଯେତେ ଭିତରକୁ ଖୋଜୁଛନ୍ତି ରଶ୍ମି ର ଧର୍ଯ୍ୟ ଘର ଭାଙ୍ଗି ଯାଉଛି। ଶେଷ ରେ ନର୍ସ ଜଣେ ଠାରି ଦେଇଗଲେ ଶବ ରହିଥିବା ଜାଗା ରେ ଦେଖିବାକୁ। ଛାତି କୁ ପଥର କରି ଗୋଟାଏ ଗୋଟାଏ ଶବ ଦେଖୁ ଥାଆନ୍ତି ହେଲେ ରମେଶ ଭାଇ କୁ ପାଉ ନାହାନ୍ତି। ଶେଷ ରେ ଫେରୁଥିବା ସମୟରେ ଦେଖିଲେ ଗୋଟେ କଣ କୁ ରମେଶ ଭାଇ ଶୋଇଛି ଓ ତା ଦେହରେ ବ୍ଲଡ ଚାଲିଛି। ରଶ୍ମି ଭାଉଜ ତାଙ୍କୁ ଦେଖି ଜୋରରେ କାନ୍ଦିବାକୁ ଲାଗିଲେ । ଡାକ୍ତର ଆସି କହିଗଲେ ଥରେ ବାହାରେ ଯାଇ ଗଦା ଗଦା ଶବ ଦେଖି ଆସ ତାପରେ କାନ୍ଦିବ ଆଉ ୟେ ଲୋକ ର ବେଶୀ କିଛି ଅସୁବିଧା ହୋଇନି ଆଘାତ ଲାଗି କିଛି ରକ୍ତ ବୋହି ଯାଇଛି ଖୁବ୍ ଶୀଘ୍ର ହୋସ ଆସିଯିବ। କିଛି ସମୟ ପରେ ରମେଶ ଭାଇ ଆଖି ଖୋଲିଲା ଓ କେମିତି ଭାଗ୍ୟରୁ ମୃତ୍ୟୁ ଯନ୍ତା ରୁ ବଞ୍ଚିକି ଆସିଛି ଧିର ସ୍ୱର ରେ କହିଲା। ରମେଶ ଭାଇ କହିଲେ ତୁମକୁ ଟିକେ anniversary ରେ ଖୁସି କରେଇବି ଭାବୁଥିଲି ହେଲେ ତୁମକୁ ଦୁଃଖ ଦେଇଦେଲି। କିନ୍ତୁ ବୋଧ ହୁଏ ରଶ୍ମି ଭାଉଜ ଙ୍କ ପାଇଁ ସବୁଠାରୁ ବେଷ୍ଟ wedding anniversary ର ଗିଫ୍ଟ ଥିଲା ଭଗବାନ ଙ୍କ ତରଫରୁ ତାଙ୍କ ସ୍ଵାମୀ ର ଜୀବନ ସହିତ। ଆଉ ଏହାଠୁ ବଡ଼ ଗିଫ୍ଟ କଣ ବା ହୋଇ ପାରି ଥାଆନ୍ତା।

ଏହି କାହାଣୀ କାଳ୍ପନିକ ହୋଇ ପାରେ। କିନ୍ତୁ ପୂର୍ବ ବର୍ଷ ଜୁନ ମାସ ର ଏକ କାଳବୈଶାଖୀ ଦିନ ଘଟିଥିଲା ବାହାନଗା ରେ ଲୋମ ଟାଙ୍କୁରି ଉଠିବା ଟ୍ରେନ୍ ଦୁର୍ଘଟଣା। ସମସ୍ତେ ସେଦିନ ରଶ୍ମି ଭାଉଜ ନଥିଲେ ଯେ ତାଙ୍କ ସ୍ଵାମୀ କୁ ଜୀବିତ ଦେଖି ଫେରି ପାଇଲେ ଆଉ କେତେ ଜଣ ତ ଶେଷ ଦର୍ଶନ ବି କରି ପାରି ନାହାଁନ୍ତି। ଚାହୁଁ ଚାହୁଁ ବର୍ଷେ ପୁରିବାକୁ ବସିଲାଣି ହେଲେ ସେ ଘଟଣା ମନ ରୁ ଲିଭିନି।

ଧନ୍ୟବାଦ।

କୈବଲ୍ୟ ନାୟକ

କାଳବୈଶାଖୀ ଓ ବିବାହ ବାର୍ଷିକୀ

ସତ୍ୟ ଆଧାରିତ କାଳ୍ପନିକ କାହାଣୀ