ଭାବନାର ଖମ୍ବ ପରି ଠିଆ ହୋଇ ଚାହିଁ ରହିଥିଲା।ଆଖି ପତା ମଧ୍ୟ ନୀରବ ହୋଇ ନୀରବତା ଭାଙ୍ଗି ବାକୁ ଅପେକ୍ଷା କରିଥିଲା।ହାତରେ ବ୍ୟାଗ ,ବଜାରରୁ ଆଣିଥିବା କମ୍ବଳ,ଶୀତର ପ୍ରକୋପ ଏ ଶରୀର ପାଇଁ ଅସହ୍ୟ ହୋଇ ପଡିଲାଣି।ସଂଚୟ କରି ରଖିଥିବା କେଇଟା ଟଙ୍କାର ଆଜି ପୂର୍ଣ୍ଣ ସଦୂପଯୋଗ ହେଇଛି।ଶୀତ ପଡିବା ଆରମ୍ଭ ହୋଇଗଲାଣି।ସଂନ୍ଧ୍ୟା ମୁହଁ ନ ଦେଖୁଣୁ,ରାତି ଆସି କବାଟ ଠକ ଠକ କଲାଣି।ମଦନ ଆଉ ବିଳମ୍ବ ନକରି ଘରକୁ ଫେରିଲା।ମନକୁ ବାରମ୍ବାର ଆଘାତ କରୁଥିଲା ଅଜସ୍ର ଭାବନା ,ଅଜଣା ପ୍ରଶ୍ନ,ଓ ଦ୍ୱନ୍ଦମୟ ବିଚାର।ମନକୁ ସମ୍ଭାଳି ପାରୁନଥିଲା।କଣ କରିବ ଭାବି ପାରୁନଥିଲା।ଏପରି ଦ୍ୱନ୍ଦାତ୍ମକ ଚିନ୍ତାଧାରା କାହିଁକି?

ଶେଷରେ ସ୍ତ୍ରୀ ଆଗରେ ନିଜ ମନ କଥା ପ୍ରକାଶ କରାଇଲା।ମନ ର ବ୍ୟଥା ବୁଝିଲା ପରେ ସ୍ତ୍ରୀର ବିପରୀତ ଚିନ୍ତାଧାରା ମଦନ, ମୁଖମଣ୍ଡଳ ରେ ଦୁଃଖ ର ଲହରୀ ସୃଷ୍ଟି କରାଉଥିଲା।

ନା,ଆଉ ରହି ହେବନି।ମୋ ଦ୍ବାରା ଏପରି ହୋଇ ପାରିବନି,ମୁଁ ନୀରବ ରହିପାରିବିନି-ମଦନ ର ଏପରି ଚିତ୍କାର ବୋଧୁଏ ନୂଆ ନଥିଲା।ଚିହ୍ନା ଚିହ୍ନା ଲାଗୁଥିଲା।ହଁ,ଏଇ କେଇଟା ଦିନ ହେଇଛି,ଗରିବ ଝିଅ ଟା ଭିକ ମାଗିଵା ଦେଖି ମଦନ ବାବୁ ଙ୍କ ର ରାତି ସାରା କ୍ରନ୍ଦନ ର ଚିତ୍କାର।ଅଖିଆ ଅପିଆ ରାତି ଟା କଟିଗଲା।ଆଜି ନିସଃହାୟ ବୁଢା ଲୋକଟା,ଶୀତ ରେ ଥର ଥର ହୋଇ ଗଛ ମୂଳେ ଶୋଇଥିବା ଦେଖି ମଦନ ର ହୋସ୍ ନିଖୋଜ ହୋଇଯାଇଥିଲା ସତେ।

ସତରେ ଏ ଜୀବନ କଣ?କିଏ ବା ବୁଝାଇ ଦେବ ?କଥାରେ ନାଇ ସୁନା ଥିଲେ ନାକ ନାହିଁ ଓ ନାକ ଥିଲେ ସୁନା ନାହିଁ।ଏ କି ସଂସାର ର ନିୟମ?ଏ କି ବିଧାତା ର ବିଚାର?ସଂଘର୍ଷ ମୟ ଜୀବନରେ ଏ କି ବାରୁଦ ର ଗନ୍ଧ?

ଅନ୍ୟ ମୁହଁ ରେ ହସ ଫୁଟାଇ ନିଃସ୍ଵାର୍ଥ ଭାବନାରେ ସମାଜ ର ମଙ୍ଗଳ କାମନା କରିବା,ଅସହାୟ ନିକଟରେ ସହାୟକ ର ପ୍ରତିମୂର୍ତ୍ତି ସାଜିବା।କାହାର ସ୍ୱପ୍ନ,ସଂପର୍କ,କାମନା,ଭାବନା,ବନ୍ଧୁତା,ମିଳନ,ଆଶା ଓ ଆକାଂକ୍ଷା ଭାଙ୍ଗିବା ପରିବର୍ତ୍ତେ ଯୋଡିବା ବା ସଜାଡ଼ିବା।ଏସବୁ ହିଁ ଜୀବନ ର ପ୍ରକୃତ ମୂଲ୍ୟବୋଧ।ଅଯୋଗ୍ୟ ହୋଇ ଯୋଗ୍ୟ ର ପୋଷାକ ପିନ୍ଧିବା ଆବଶ୍ୟକ ନାହିଁ।ହୃଦୟ ରେ ହିଂସା,ଅହଂକାର, ଅପମାନ,କ୍ରୋଧ,ପ୍ରତିଶୋଧ,ପର ନିନ୍ଦା ଓ ଏପରି ମନ୍ଦ ଆଚରଣ ଲୁଚାଇ ଓଠରେ ହସ ଦେଖାଇ ସହାନୁଭୂତି ଦେଖାଇବା ଆବଶ୍ୟକ ନାହିଁ।ମଣିଷର ଭୂମିକା ଏକ ପ୍ରକାରର ତାହା ନୁହଁ,ମଣିଷ ନିଜକୁ ବିଭିନ୍ନ ଢାଞ୍ଚା ରେ ଗଢି ତୋଳି ପାରେ।ବର୍ଷା କୁ ସଂପୂର୍ଣ୍ଣ ରୂପେ ନ ରୋକି ପାରିଲେ ବି,ଛତା ହୋଇ ବର୍ଷାରୁ ଅଳ୍ପକେ ରକ୍ଷା ତ କରାଇ ପାରିବା।

ଭାବନାରେ ପୂର୍ଣ୍ଣଛେଦ ଲଗାଇ,ବ୍ୟାଗ୍ ଟାକୁ ଖୋଲି କମ୍ବଳ ଟିକୁ ବାହାର କଲା।ସ୍ବାମୀ ର ଏପରି ଆଚରଣ କେଜାଣି କାହିଁକି ଚିନ୍ତା ର କାରଣ ସାଜୁଥିଲା।ତଥାପି ସ୍ତ୍ରୀ ନୀରବ ଦ୍ରଷ୍ଟା।ଏ ଅମାନବିକ, ଅବିବେକ,ଅନ୍ୟାୟ, ନିଷ୍ଠୁର ସଂସାର ଭିତରୁ ଏ ସରଳ,ଦୟାଳୁ ଓ ମାନବିକତାର ଢାଂଚା କୁ ଦେଖି ବୋଧୁଏ ଶବ୍ଦହୀନ ହୋଇ ଯାଇଥିଲା ସେ।

ମଦନ କିଛି ସମୟ ପାଇଁ ତା କମ୍ବଳ ଟିକୁ ଚାହିଁଲା,କବାଟ ଖୋଲି ଵାହାରକୁ ଚାଲିଗଲା।

ସୌମ୍ୟ ରଂଜନ ରାୟ

କମ୍ବଳ || Odia Short Story

କାହାକୁ ଲୋଡା ଏ କମ୍ବଳ?