ଆମ ଓଡିଆଙ୍କ ଛଅ ତରକାରୀ ନଅ ଭଜା ପ୍ରାୟ ବନ୍ଧା,

ତୁଣ ବିନା ଆମ ଭାତଟା ଯେମିତି ନାଣ୍ଡିମୁଣ୍ଡି ପରି ଅଧା॥

ତା' ସଙ୍ଗେ ଆମର କେତେ ପରକାର ସୁଆଦିଆ ଜିନିଷ,

ଖାଉ ଆମେ ସବୁ ବରଷ ଜାକ ଖାଲି ନୁହେଁ ମାସ ମାସ॥

ବୋଉ ମୋର ପଚାରିଲା ମତେ ଖାଇବୁକି କାନ୍ଜି ତୁହି,

କାନ୍ଜି ଟା ମୋର ଭାରି ମନଲାଖି ବୋଉ ଜାଣିଥାଉ ତୁହି॥

ପଚାରେନା ବୋଉ ଶୀଘ୍ର ଘେନିଆ କାନ୍ଜି ଖାଇଦିଏ ମୁହିଁ,

ପଚାରିଦେଲା ବୋଉ କାନ୍ଜି ର ପ୍ରସ୍ତୁତି ଅନେଇ ରହିଗଲି ତାକୁ ଚାହିଁ॥

ବୋଉ କୁ କହିଲି ବୋଉ ଲୋ ମୋର ତୁ କହିଦେ ପ୍ରସ୍ତୁତି ପ୍ରଣାଳୀ,

ମୁଁ ପରା ତୋର ଅଜଣା ପିଲାଟି ଛୋଟ ଝିଅଟି ଭଳି॥

ତରତର ହୋଇ ବୋଉ ଯେ କହିଲା ମୋର ପଡିଛି ବହୁତ କାମ,

ପୁଣି ସବୁ ଭୁଲି ମୋ ପାଖେ ବସିଲା କହିଲା ଓଃ କି ଆରାମ॥

ଅରୁଆ ଭାତକୁ ରାନ୍ଧି ସାରିଲେ ଯେ ରଖିବ ତାକୁ ବଞ୍ଚାଇ,

କହୁଥିଲା ବୋଉ ବଳକା ଅରୁଆ ଭାତରେ ଯେ ଭଲ ସ୍ୱାଦ ଯାଏ ହୋଇ॥

ବାସି ଭାତଟିକୁ ତା ପରଦିନ ଦିଅନ୍ତି କାନ୍ଜି କରି,

ଭାତକୁ ହାତରେ ଚକଡି ଗରମ ପେଜ ଦିଅନ୍ତି ଭର୍ତ୍ତି କରି॥

ସେଥିରେ ଟିକେ ଲୁଣ ପକାଇ ହଳଦୀ ଦେଇ ଦେବା ଘୋଡାଇ,

କଢାଇ ବସାଇ ଚୁଲି ଲଗାଇ ଫୁଟିବାକୁ ଛାଡିଦେଇ॥

ପରିବା ସବୁ ରଖିଥିବା କାଟି ଅନ୍ୟ ଏକ ପାତ୍ର ରେ,

ବଢି,ସାରୁ,ଖଡା,ବାଇଗଣ,ସିମ୍ବ ଯାହା ଥିବ ନିଜ ପାଖରେ॥

ବସେଇଥିବା ଭାତଟା ଫୁଟିଲେ ପରିବା ସବୁ ଦବ ପକାଇ,

ସିଝିବାକୁ ସେଥିରେ ଛାଡିଦେବା,ଦେବା ଘୋଡାଇ॥

କଖାରୁ ବଢିଟି ଭାରି ସୁଆଦିଆ ପକାଇଲେ କାନ୍ଜି ରେ,

ବୋଉ ତ କହିଲା ନ ପକାଇଲେ ସ୍ୱାଦ ଟିକେ କମିଯାଏ ଏଥିରେ॥

କଞ୍ଚା ଚାଉଳ କୁ ବତୁରାଇ ଥୋଇ ବାଟିବା ତାକୁ ସଅଳ,

ମରିଚ ରସୁଣ ର ବଟାକୁ ସେଥିରେ ମିଶାଇ ଦେବା ଅଳପ॥

ରସୁଣ,ଫୁଟଣ,ଟମାଟର,ଲଙ୍କା ସବୁ ଦେବା ଥାଳି ରେ ସଜାଡି,

ଭୁସଡଙ୍ଗ ପତ୍ର ଯେ ଭାରି ମୁଖ୍ୟ ଏଠି ନହେଲେ କାନ୍ଜି ଯିବ ବିଗିଡି॥

କଢେଇରେ ଟିକେ ତେଲ ପକାଇ ଚୁଲିରେ ଦେବା ବସେଇ,

ତେଲ ଗରମ ହେଲେ ଫୁଟଣ ଦେଇ ଲଙ୍କା ରସୁଣ ଦେବା ପକାଇ॥

ଭୁସଡଙ୍ଗ ପତ୍ର ଦେଇ ଭାଜିବା ତାକୁ ଦରକାର ଅନୁଯାୟୀ,

ହେଙ୍ଗୁ ଦେଇ ଟମାଟର ମିଶାଇ ଲୁଣ ଟିକିଏ ସ୍ୱାଦ ଅନୁଯାୟୀ॥

ପ୍ରସ୍ତୁତ ଥିବା କାନ୍ଜି ରେ ଏସବୁ ଜରା ଦେଇ ଶେଷ କରିବା କାନ୍ଜି,

ବୋଉ ଲୋ ତୁହି କୋଉଠୁ ଶିଖିଲୁ ଏତେ ସୁଆଦିଆ ପ୍ରସ୍ତୁତି॥

ମହାପ୍ରଭୁ ଙ୍କ ପାଖେ ଭୋଗ ଲାଗେ ପୁଣି ଏଇଟି ଆମ୍ବିଳ ହୋଇ,

ଆତ୍ମା ମନ ତୃପ୍ତ ହେଇଯାଏ ଆମ ଓଡିଆ ବ୍ୟନ୍ଜନ ଖାଇ॥

କାନ୍ଜି-ଓଡିଆ ବ୍ୟନ୍ଜନ/Kanji-An authentic odia delicacy