ସୁବିଚାର ୧ :-

" କର୍ତ୍ତବ୍ୟ କର୍ମେ ଗୁଣ ଦେଇ

ନିଷେଧ ଦୋଷ ଉପୁଜଇ ।"

ଉଦ୍ଦୃତି ର ବର୍ଣ୍ଣନା:- ଭାଗବତରେ କୁହାଯାଇଥିବା ଏହି ଉଦ୍ଦୃତି ର ଅର୍ଥ ହେଉଛି ଏହି ନିଚ୍ଛକ ଜୀବନ କର୍ମମୟ। କର୍ମ ବିନା ଜୀବନ ର ସ୍ଥିତି ଅପରିକଳ୍ପନୀୟ । କରଣୀୟ କର୍ମ ହିଁ କର୍ତ୍ତବ୍ୟ। ଯଦି ଆମ ଜୀବନ ର କର୍ତ୍ତବ୍ୟ ବା କର୍ମ ସମାଜ ଉପରେ ସକାରାତ୍ମକ ପ୍ରଭାବ ପକାଏ ତେବେ ପ୍ରଶଂସା ମିଳିଥାଏ, ନଚେତ୍ ନକାରାତ୍ମକ ପ୍ରଭାବ ପାଇଁ ନିନ୍ଦା , ଲାଞ୍ଛନା , ଅପମାନ ମିଳିଥାଏ। ନିଜ ଜୀବନ ପ୍ରତି ମନୁଷ୍ୟ ର କର୍ତ୍ତବ୍ୟ ନିର୍ଦ୍ଧିଷ୍ଟ। ତେଣୁ କର୍ତ୍ତବ୍ୟ ପରାୟଣ ହେଲେ ହିଁ ଜୀବନ ର ଦ୍ୟୁତି ବିଭାସିତ ହୁଏ।

ସୁବିଚାର ୨:-

"କର୍ମ ହିଁ ଭଗବାନ।"

ଉଦ୍ଦୃତି ର ବର୍ଣ୍ଣନା:- 'Duty is God ' ମନୁଷ୍ୟ ସର୍ବଦା କର୍ମରେ ବିଶ୍ବାସ କରିବା ଉଚିତ୍। ଯେ ନିଜର କର୍ତ୍ତବ୍ୟ ସମ୍ପାଦନା କରେ, ଭଗବାନ ତା ଉପରେ ସନ୍ତୁଷ୍ଟ ହୁଅନ୍ତି । ସଂସାର ରେ ପ୍ରତ୍ୟେକ ବ୍ୟକ୍ତି ର କିଛି କର୍ତ୍ତବ୍ୟ ରହିଛି। ତାକୁ ସେ ନିଷ୍ଠା ସହାୟକ ସହ କରିବା ଉଚିତ୍। ଯାହା ଦ୍ଵାରା ଭଗବାନ ଙ୍କ ଆଶୀର୍ବାଦ ସେମାନଙ୍କ ସହ ରହିଥାଏ।

ସୁବିଚାର ୩:-

" କରମ କରିବୁ ଅଳସ ନୋହି

ହେବୁ ନାହିଁ ନିଜ ଧରମ ଦ୍ରୋହୀ

ଯାହା ଯିବୁ ତୁହି କରି

କର୍ମ ଅନୁସାରେ ଫଳ ଦେବେ ତୋତେ

ସରବ ଜାଣନ୍ତା ହରି।"

ଉଦ୍ଦୃତି ର ବର୍ଣ୍ଣନା :- ମନୁଷ୍ୟ ର କର୍ମ ସର୍ବଦା ହିଁ ହେଉଛି ଶିଖରତମ କିମ୍ବା ନିମ୍ନତମ କରାଇବା ର ଏକ ମାଧ୍ୟମ। ଯେଉଁ ବ୍ୟକ୍ତି ଅଳସ ନ ହୋଇ ଧର୍ମ ବିଦ୍ରୋହୀ ନ ହୋଇ କର୍ମଠ ହୋଇ ତା ଜୀବନ ର ପ୍ରତିଟି କର୍ତ୍ତବ୍ୟ ବିଷୟରେ ସଚେତନ ଓ ଅବଗତ ହୋଇ ପାଳନ କରେ , ତା କର୍ମ ଅନୁଯାୟୀ ଈଶ୍ୱର ହିଁ ତାକୁ ଫଳ ଦେଇଥାନ୍ତି। ଭଲ କର୍ମ ଓ କର୍ତ୍ତବ୍ୟ ପାଇଁ ପ୍ରଶଂସା ଓ ପୁରସ୍କାର ଠିକ୍ ସେପରି ମନ୍ଦ କର୍ମ ଅନୁଯାୟୀ ନିନ୍ଦା ,ଲାଞ୍ଛନା ଓ ତିରସ୍କାର ମିଳିଥାଏ। ତେଣୁ ପ୍ରତ୍ୟେକ ବ୍ୟକ୍ତି ନିଜ କର୍ତ୍ତବ୍ୟ କୁ ସଚ୍ଚୋଟତା ଭାବେ ପାଳନ କରିବା ଉଚିତ୍।

ସୁବିଚାର ୪:-

' ସମ୍ପର୍କ ର ରଜ୍ଜୁ ସେତେବେଳେ ସୁଦୃଢ଼ ହୁଏ

ଯେତେବେଳେ ମଣିଷ କର୍ତ୍ତବ୍ୟ ରୂପକ ଗଣ୍ଠି କୁ

ଠିକ୍ ଭାବେ ବାନ୍ଧି ଥାଏ '।

ଉଦ୍ଦୃତି ର ବର୍ଣ୍ଣନା:- ସଂସାର ର ଏଇ ମାୟ ବନ୍ଧନ ରେ ପ୍ରତ୍ୟେକ ଟି ମଣିଷର ପରିବାର ସହ ଯେଉଁ ସମ୍ପର୍କ ସୂତା ବନ୍ଧା ହୋଇଥାଏ। ସେ ସୂତା ସେତେ ଯାଏ ମଜବୁତ୍ ରହିବ ଯେତେ ଯାଏ ଉଭୟ ପରସ୍ପର ପ୍ରତି ଥିବା କର୍ତ୍ତବ୍ୟ ଠିକ୍ ଭାବେ ପାଳନ କରିବା, ନଚେତ୍ କର୍ତ୍ତବ୍ୟ ର ଅବହେଳା ଯୋଗୁଁ ସେ ସୂତା କେତେ ବେଳେ ଯେ ଛିଣ୍ଡିଯିବ କହି ହେବନି। ତେଣୁ ସମ୍ପର୍କ ର ରଜ୍ଜୁ କୁ ସୁଦୃଢ଼ କରିବା ପାଇଁ କର୍ତ୍ତବ୍ୟ ପରାୟଣ ହେବା ଆବଶ୍ୟକ।

ସୁବିଚାର ୫:-

' କର୍ତ୍ତବ୍ୟ ସାଧନ ରୁ ହୋଇବୁ ଯେବେ ବିମୁଖ

ଜାଣିବୁ ମିଳିବନି କେବେ ସଂସାର ର ଯେତେ ସୁଖ।'

ଉଦ୍ଦୃତି ର ବର୍ଣ୍ଣନା :- ପ୍ରତି ଟି ବ୍ୟକ୍ତି ର ଯେଉଁ କର୍ତ୍ତବ୍ୟ ଥାଏ ତା ପିତାମାତା ଙ୍କ ପ୍ରତି, ସନ୍ତାନ ସନ୍ତତି ଙ୍କ ପ୍ରତି, ଦେଶ ଓ ଜାତି ପ୍ରତି, ସମାଜ ପ୍ରତି ଏବଂ ନିଜ ଜୀବନ ପ୍ରତି ଏସବୁ ମନୁଷ୍ୟର କର୍ତ୍ତବ୍ୟ ନିର୍ଦ୍ଧିଷ୍ଟ। ଯେଉଁ ମାନେ କର୍ତ୍ତବ୍ୟ ପଥ ରୁ ବିଚ୍ୟୁତ ହୁଅନ୍ତି, ସେମାନେ ସଂସାର ର ସୁଖ ପ୍ରାପ୍ତ କରି ପାରନ୍ତି ନାହିଁ। ଏହା ଭାଗବତ ପୁରାଣ ରେ ଉଲ୍ଲେଖ କରାଯାଇଛି ମଧ୍ୟ। ତେଣୁ କର୍ତ୍ତବ୍ୟ ପଥରେ ଅଗ୍ରସର ହୋଇ ଈଶ୍ୱର ଙ୍କ ନିର୍ଦ୍ଦେଶ ଅନୁଯାୟୀ କର୍ମ କରିବା ଦ୍ଵାରା ସଠିକ୍ ଫଳ ଓ ସୁଖ ପ୍ରାପ୍ତ ହୁଏ।

ସୁବିଚାର ୬:-

'ସଂସାରରେ ଥିବା କର୍ତ୍ତବ୍ୟ ପ୍ରତି ଅନୁରାଗ ଯିଏ ରହେ

ଏ ଜଗତ ତାକୁ କର୍ତ୍ତବ୍ୟପରାୟଣତା ବୋଲି କହେ ।'

ଉଦ୍ଦୃତି ର ବର୍ଣ୍ଣନା :- କର୍ତ୍ତବ୍ୟ ସମ୍ପାଦନ ପ୍ରତି ଅନୁରାଗ ଓ ନିଷ୍ଠା କୁ କର୍ତ୍ତବ୍ୟପରାୟଣତା କୁହାଯାଏ। କର୍ତ୍ତବ୍ୟ ନିଷ୍ଠ ବ୍ୟକ୍ତି ସେତେବେଳେ ପରିଗଣିତ ହୁଏ ଯେତେ ବେଳେ ସେ ତା କର୍ତ୍ତବ୍ୟ ରେ କେବେ ଅବହେଳା କରି ନଥାଏ। ଏହା ଯୋଗୁଁ ବ୍ୟକ୍ତି ର ନୈତିକ ବଳ ବୃଦ୍ଧି ହୁଏ। ହୃଦୟ ଓ ମନରେ ବିମଳ ଭାବ ଉଦ୍ରେକ ହୁଏ ଓ ଅପୂର୍ବ କର୍ମପ୍ରେରଣା ରେ ଉଦବୁଦ୍ଧ ହୁଏ। କର୍ତ୍ତବ୍ୟ ପରାୟଣତା ଯୋଗୁଁ ବ୍ୟକ୍ତି ଲକ୍ଷ୍ୟ ସ୍ଥଳୀରେ ପହଞ୍ଚି ପାରେ।

ସୁବିଚାର ୭:-

'ଜୀବନ ରେ ଆସୁଥିବା ପ୍ରତି ଟି ସମ୍ପର୍କ ର ମୂଳ ଭିତ୍ତି

ସମୟଧାରିତ କର୍ତ୍ତବ୍ୟ ଭିତ୍ତି ପ୍ରସ୍ତର ଉପରେ ନିର୍ମିତ।'

ଉଦ୍ଦୃତି ର ବର୍ଣ୍ଣନା :- ଜୀବନ ଆରମ୍ଭ ରେ ହିଁ ସମ୍ପର୍କ ସୃଷ୍ଟି ହୋଇଥାଏ। ପ୍ରତି ସମ୍ପର୍କ କୁ ସମ୍ମାନ ଦେବା କୁ ପଡେ । ଏହା ସେତେ ବେଳେ ସମ୍ଭବ ହୁଏ, ଯେତେବେଳେ କର୍ତ୍ତବ୍ୟ ସମ୍ପାଦନ କଲାବେଳେ ସମୟାନୁବତ୍ତିତା ପ୍ରତି ଆମେ ଦୃଷ୍ଟି ଦେଇଥାନ୍ତି। ଠିକ୍ ସମୟରେ କାର୍ଯ୍ୟ ସମ୍ପାଦନା ନ କଲେ ଆତ୍ମାମର୍ଯ୍ୟାଦା କ୍ଷୁର୍ଣ୍ଣ ହୁଏ। ତେଣୁ କର୍ତ୍ତବ୍ୟ ନାମକ ଭିତ୍ତି ପ୍ରସ୍ତର ନ ଭାଙ୍ଗିବା ପାଇଁ ଠିକ୍ ସମୟ ରେ ଉଚିତ୍ କର୍ମ କରିବା ଦରକାର।

ସୁବିଚାର ୮:-

"କର୍ତ୍ତବ୍ୟ ପରାୟଣତା ଏକ ସ୍ୱର୍ଗୀୟ ଗୁଣ

ପାଳନ କରିବା ଜୀବନେ ଏହାକୁ କରି ପଣ।"

ଉଦ୍ଦୃତି ର ବର୍ଣ୍ଣନା:- କାର୍ଯ୍ୟ ସମ୍ପାଦନା ପାଇଁ ଶୃଙ୍ଖଳା ଓ ସଂକଳ୍ପର ଆବଶ୍ୟକତା ରହିଛି। ଅନ୍ୟାୟ ଅନୀତି ବିରୋଧ ରେ ସ୍ୱର ଉତ୍ତୋଳନ କରିବାକୁ ପଡେ। ଯେମିତି ମହାପୁରୁଷ ମାନଙ୍କ ଜୀବନ ରେ ବହୁ ଅସାଧ୍ୟ ସାଧନ କରିଛନ୍ତି ସେପରି। ସବୁ ବାଧା ବିଘ୍ନକୁ ଅତିକ୍ରମ କରି ଧୈର୍ଯ୍ୟ ଧରି କର୍ତ୍ତବ୍ୟ ପଥରେ ଅଗ୍ରସର ହେବା ଉଚିତ୍। ଏହି ସ୍ୱର୍ଗୀୟ ଗୁଣ କୁ ପ୍ରାପ୍ତ କରି ପାରିବା ପାଇଁ ହେଲେ ଜୀବନ ରେ ଆମକୁ କିଛି ପଣ କରିବାକୁ ପଡ଼ିବ, ଯାହା ଆମକୁ ଆଳସ୍ୟ ଠାରୁ ଦୂରେଇ ରଖି କର୍ମମୁଖତା କରାଇ ଥାଏ।

ସୁବିଚାର ୯:-

"କର୍ମ ର ଅର୍ଥ ଚରମ ଉତ୍ତଦାୟିତ୍ଵ

ସେ ହିଁ ଜନ୍ମ ମୃତ୍ୟୁର ଅସ୍ପଷ୍ଟ ସାରସ୍ଵତ ମହତ୍ତ୍ଵ ।"

ଉଦ୍ଦୃତି ର ବର୍ଣ୍ଣନା :- କର୍ମ ହିଁ ଭଗବାନ। କରଣିୟ କର୍ମ ହିଁ କର୍ତ୍ତବ୍ୟ। କର୍ମ ର ଯେଉଁ ଉତ୍ତଦାୟିତ୍ଵ ରହିଛି , ସ୍ଵହସ୍ତ ରେ ସୁକର୍ମ କଲେ, ତାହା ବ୍ୟକ୍ତିର ଚରିତ୍ର କୁ ମହୀୟାନ କରେ। କର୍ମ ହିଁ ଜନ୍ମ ମୃତ୍ୟୁ ର ପ୍ରକୃତ ଉଦାହରଣ ଯାହା ସ୍ପଷ୍ଟ ନହେଲେ ବି ଏ ଦୁନିଆ ତାକୁ ଏକ ଅନନ୍ୟ ପରିଚୟ ଦିଏ। କାରଣ ଆମେ ଜାଣିଛୁ ଯେ କଠିନ ପରିଶ୍ରମ ଓ କର୍ମ ଦ୍ଵାରା ମନୁଷ୍ୟ ତାର ପରିଚୟ ସୃଷ୍ଟି କରିପାରେ। ଆମ କର୍ମ ଜୀବନ ର ମହତ୍ତ୍ଵ କୁ ପରିପ୍ରକାଶ କରେ। ତେଣୁ ଭଲ କର୍ମ କରିବା ଉଚିତ୍।

ସୁବିଚାର ୧୦:-

"କର୍ତ୍ତବ୍ୟ ଓ ପ୍ରେମ ଜୀବନ ର ଆଧାର, କିନ୍ତୁ

ସେ ଅଭିଶାପ ହେଉ ଅବା ଆଶର୍ବାଦ

ସବୁ ଆମ କର୍ମ ଉପରେ ନିର୍ଭର ।"

ଉଦ୍ଦୃତି ର ବର୍ଣ୍ଣନା :- ଯେକୌଣସି ପଦାର୍ଥ ପାଇଁ ଏକ ଆଧାର ଆବଶ୍ୟକ, ଠିକ୍ ସେପରି ଜୀବନ ପ୍ରାରମ୍ଭ ପାଇଁ କର୍ତ୍ତବ୍ୟ ସହ ସ୍ନେହ, ଆଦର, ପ୍ରେମ ଇତ୍ୟାଦି ହେଉଛି ଆଧାର । କିନ୍ତୁ ମଣିଷ ଜୀବନ ରେ ଆସୁଥିବା ଅଭିଶାପ କି ଆଶୀର୍ବାଦ ସବୁ ଆମ କର୍ମ ଦ୍ଵାରା ସୁସଜ୍ଜିତ ହୋଇ ଆସିଥାଏ। ଆମ କର୍ମ ହିଁ କେବଳ ଆଶୀର୍ବାଦ ଓ ଅଭିଶାପ ର ପଥ ନିର୍ଣ୍ଣୟ କରିପାରେ। ଯାହାର ଫଳାଫଳ ଆମେ ଭୋଗ କରୁ, ସେ ଭଲ ହେଉ କିମ୍ବା ମନ୍ଦ । କର୍ତ୍ତବ୍ୟ ସମ୍ପାଦନ କରିବା ପାଇଁ କେବେବି ସଂକୋଚ ହେବା ଉଚିତ୍ ନୁହେଁ। ଅନ୍ୟ ପ୍ରତି ଥିବା ଆମ କର୍ତ୍ତବ୍ୟ ରେ ଆମେ କେବେ ଅବହେଳା କରିବା ଉଚିତ୍ ନୁହେଁ ବରଂ ପ୍ରତିରକ୍ଷା ର ଚଉପାଢ଼ି ଘେର ରେ ରହି ସଭିଙ୍କ ପ୍ରତି ଅନୁରାଗ ସହକାରେ କର୍ତ୍ତବ୍ୟ ସମ୍ପାଦନ କରିବାକୁ ଚେଷ୍ଟା କରିବା।

ଧନ୍ୟବାଦ୍ ସହ କଲ୍ୟାଣୀ ନାୟକ 🙏🙏

ଯାଜପୁର, ଓଡ଼ିଶା

କର୍ମଠ ,କର୍ତ୍ତବ୍ୟପରାୟଣତା ( 10 Quotes on about duty and Responsibilities)

'କର୍ତ୍ତବ୍ୟ' ଜୀବନ ର ପ୍ରଥମ ସ୍ପଷ୍ଟ ଫଳକ ଯାହାର ପରିକଳ୍ପନା ନାହିଁ।