"ଦୁଆର ବନ୍ଧକୁ ଡେଇଁ, ପଡଇ ମୋ ପାଦ,

ଚାଖିବାକୁ ହୁଏ ମନ ,ଜୀବନର ସ୍ବାଦ ।

ଆଲିଙ୍ଗନ କରି ଆଜି ମୁକ୍ତ ସମୀରକୁ,

ପରଖିବି ଦୁନିଆକୁ, ଖୋଲି ମୋ ଆଖିକୁ।"

କେନ୍ଦୁଝର ଜିଲ୍ଲା ,ମୋ ଜିଲ୍ଲା ର ଏକ ପଡୋଶୀ ଜିଲ୍ଲା। ଜୁଲାଇ ୨୦ ରେ କୋଚିଂ ଷ୍ଟାଫ୍ ମାନଙ୍କ ସହ ଏକ ବୋଲେରୋ ରେ ବାହାରିଲୁ କେନ୍ଦୁଝର ଭ୍ରମଣ ରେ। ସୂର୍ଯ୍ୟ ବିଛଣା ଛାଡ଼ିବା ପୁର୍ବରୁ ଆମେ ଯାଇ ପହଞ୍ଚି ଯାଇଥିଲୁ ବନ୍ତ ରେ। ବନ୍ତ ହେଉଛି ଭଦ୍ରକ ଓ କେନ୍ଦୁଝର ଜିଲ୍ଲାର ମଧ୍ୟବର୍ତ୍ତୀ ସ୍ଥାନ। ବନ୍ତ ବଜାରରେ ଗାଡି କୁ ରଖି ଟିଫିନ୍ ପାଇଁ ଓହ୍ଲାଇଲୁ଼। ଏକ ଢାବାରେ ଗରମ୍ ଗରମ୍ ପୁରୀ ସହ ଘୁଗୁନି ଖାଇ ପେଟ ଶାନ୍ତି କଲୁ। ତାପରେ ପୁନର୍ବାର ଆମେ ଆମ ଅଭିଯାନ‌ରେ ଲାଗି ପଡିଲୁ।ଗାଡିରେ ବସି ଥିବା ବେଳେ ଆମେ ସମସ୍ତେ ମିଶି ଗୀତ ଗାଉ ଥାଉ-

"ହାରିଥିବା ମନକୁ ମୋ ,ଜିତେଇ ତୁ ଦେବୁ,

ଘଟଗାଁ ରାଣୀ ତୁ, ସବୁ ବୁଝି ନେବୁ।"

କାରଣ , କେନ୍ଦୁଝର ଭ୍ରମଣ ର ପ୍ରଥମ ଭ୍ରମଣ ସ୍ଥାନ ଥିଲା ମା ତାରିଣୀ ଙ୍କ ପୀଠ। ଆମ ଗାଡି ଯେତେବେଳେ ଯାଇ ଆନନ୍ଦପୁର ରେ ପହଞ୍ଚିଲା ସେତେବେଳେ ଆମର ଉତ୍କଣ୍ଠା ଶିଖରରେ ପହଞ୍ଚି ଯାଇଥିଲା। କାରଣ ସେହି ଆନନ୍ଦପୁର ରେ ଆମେ ଦେଖିଲୁ ଓଡ଼ିଶାର ଗଙ୍ଗା ବୈତରଣୀ କୁ। ଏହି ସେହି କେନ୍ଦୁଝର,ଯିଏ ବୈତରଣୀ ଭଳି ପବିତ୍ର ନଦୀ କୁ ଉତ୍ପତ୍ତି କରିଛି।

"ଧରଣୀ ଵକ୍ଷରେ ସୁପ୍ତ ହୋଇ ତରଙ୍ଗିଣୀ,

ହସ ବଦନରେ ମୋତେ ଚାହେଁ ବୈତରଣୀ।"

କିଛି ବାଟ ଗାଡି ଗଲା ପରେ ଆମେ ଯାଇ ପହଞ୍ଚି ଗଲୁ ଘଟଗାଁ ରେ। କେନ୍ଦୁଝର ଭ୍ରମଣ ରେ ଯାତ୍ରାର ଆରମ୍ଭ ପ୍ରଥମେ ଘଟଗାଁ ରାଣୀ ଙ୍କ ଦର୍ଶନ ରୁ ହିଁ ହୋଇଥାଏ।ତେଣୁ ଆମେ ମଧ୍ୟ ଆମ ଗାଡି ମା ତାରିଣୀ ଙ୍କ ପୀଠ ରେ ଅଟକାଇଲୁ।କେନ୍ଦୁଝର ର ଅଧିଷ୍ଠାତ୍ରୀ ଦେବୀ ହେଉଛନ୍ତି ମାଆ ତାରିଣୀ । ପ୍ରବାଦରେ ଅଛି ଘଟଗାଁଠାରେ ଥିବା ମା ତାରିଣୀ ମନ୍ଦିରକୁ ୧୪୮୦ ମସିହାରେ କେନ୍ଦୁଝରର ତତ୍କାଳୀନ ରାଜା ଗୋବିନ୍ଦ ଭଞ୍ଜଦେଓ ନିର୍ମାଣ କରେଇଥିଲେ । ପୁରୀର ତତ୍କାଳୀନ ଗଜପତି ମହାରାଜାଙ୍କ ଆଦେଶକ୍ରମେ ମା ତାରିଣୀ ନୂଆ ମନ୍ଦିର ଘଟଗାଁଠାରେ ଶକ୍ତିପୀଠ ଭାବରେ ସ୍ଥାପିତ ହୋଇପାରିଥିଲା । ବିଶ୍ବାସ କରାଯାଏ ଯେ ମା ତାରିଣୀଙ୍କଠାରେ ମନାସିକ କାଲେ ତାହା ନିଶ୍ଚୟ ପୂରଣ ହୋଇଥାଏ। ତେଣୁ ଆମେ ମଧ୍ୟ ନିଜର ମାନସିକ ଫିତା ବାନ୍ଧିଲୁ । ପାଖ ଦୋକାନ ରୁ ମିଠା କିଣି ଭକ୍ତ ଗହଳି ଭିତରେ ପଶି ବହୁ କଷ୍ଟରେ ଭୋଗ କଲୁ। ବିଶ୍ବାସ କରାଯାଏ ଯେ ମାଆ ତାରିଣୀ ପ୍ରଥମେ ବନବାଈ କନ୍ଧଙ୍କଦ୍ୱାରା ପୂଜା ପାଇ ଆସୁଥିଲେ। ମାଆ ଦୁର୍ଗା ଦଶଭୁଜା ହୋଇଥିବା ବେଳେ ଏବଂ ମାଆ ତାରିଣୀ ଚତୁର୍ଭୁଜା ହୋଇଥାନ୍ତି। ମାଆ ତାରିଣୀଙ୍କର ଚାରି ହାତରୁ ବାମପାଖ ଉପର ହସ୍ତରେ ସେ ଚକ୍ର ଧାରଣ କରିଛନ୍ତି। ତଳ ହସ୍ତରେ ତ୍ରିଶୁଳ ରହିଥାଏ। ସେହିପରି ଦକ୍ଷିଣ ପାଖ ଉପର ହସ୍ତରେ ଖଡ୍‌ଗ ଏବଂ ତଳ ହସ୍ତଟି ତାଙ୍କର ଶୂନ୍ୟ ଥାଏ। ଏହି ହାତରେ ମାଆ ତାରିଣୀ ଭକ୍ତଙ୍କୁ ଆଶୀର୍ବାଦ ପ୍ରଦାନ କରିଥାନ୍ତି ।

ମା’ତାରିଣୀଙ୍କର ମୂର୍ତ୍ତିରେ ଆବିର୍ଭାବ ସମ୍ବନ୍ଧରେ ଅନେକ କିମ୍ବଦନ୍ତୀ ରହିଛି। ତନ୍ମଧ୍ୟରୁ ଅନେକ କିମ୍ବଦନ୍ତୀ ବହୁ ଲୋକପ୍ରିୟ।‌ ବିଶ୍ବାସ କରାଯାଏ ତ୍ରେତୟା ଯୁଗରେ ପ୍ରଭୁ ଶ୍ରୀରାମଚନ୍ଦ୍ର ଓ ମାତା ସୀତାଙ୍କର ବନବାସ ସମୟରେ ଦୁଷ୍ଟ ରାକ୍ଷସ ରାବଣଦ୍ୱାରା ସୀତାଙ୍କୁ ହରଣ କରି ନେଇଯିବା ପରେ ରାମ, ଲକ୍ଷ୍ମଣ ଶୋକାତୁର ହୋଇ ସର୍ବଶକ୍ତିମୟୀ ମାଆ ଦୁର୍ଗାଙ୍କୁ ଆରାଧନା କରିଥିଲେ। ପୂଜାରେ ସନ୍ତୁଷ୍ଟ ହୋଇ ଦେବୀ ଶୂନ୍ୟବାଣୀ କରିଥିଲେ- ‘ବତ୍ସ’ । ମୁଁ ତୁମ ସମ୍ମୁଖରେ ସଙ୍କଟ ହାରିଣୀ ତାରିଣୀ ରୂପେ ଆବିର୍ଭୂତ ହେବି। ମାତ୍ର ତୁମେ ଯଦି ମୋତେ ଦେଖିବାକୁ ପ୍ରୟାସ କରିବ ତେବେ ମୁଁ ପାଷାଣରେ ପରିଣତ ହେବି। ଦେବୀଙ୍କ ଅଭୟ ବାଣୀ ପାଇ ଶ୍ରୀରାମ ଓ ଲକ୍ଷ୍ମଣ ପୂଜାରେ ଧ୍ୟାନମଗ୍ନ ହେଲେ। ଦେବୀଙ୍କ ଉପସ୍ଥିତିକୁ ଅନୁଭବ କରି ପ୍ରଭୁ ଶ୍ରୀରାମଚନ୍ଦ୍ର ଚରଣ ସ୍ପର୍ଶ କରିବା ଉଦ୍ଦେଶ୍ୟରେ ମାତାଙ୍କ ପାଦ ସ୍ପର୍ଶ କରିବା ସମୟରେ ଅଜ୍ଞାତରେ ତାଙ୍କର ଚକ୍ଷୁ ଖୋଲି ଯାଇଥିଲା। ଦେବୀଙ୍କୁ ସ୍ୱଚକ୍ଷୁରେ ଦର୍ଶନ କରିଥିଲେ ରାମଚନ୍ଦ୍ର । ଦେବୀ ସ୍ମିତହାସ୍ୟ ପୂର୍ବକ ସମସ୍ତ ସଙ୍କଟ ହରଣ କରିବାର ଅଭୟ ପ୍ରତିଶ୍ରୁତି ଦେଇ ପୂର୍ବ ସର୍ତ୍ତ ଅନୁସାରେ ପାଷାଣରେ ପରିଣତ ହୋଇଯାଇଥିଲେ । ସେହିଦିନରୁ ମାଆ ଦୁର୍ଗା, ମାଆ ତାରିଣୀ ନାମରେ ସାର୍ବଜନ ବିଦିତା।

ଅନ୍ତିମରେ ମାଆ ଙ୍କ ଠାରୁ ଆଶିର୍ବାଦ ପ୍ରାପ୍ତ କରି ଗାଡି ଛୁଟାଇଲୁ। ଘଟଗାଁ ଠାରୁ ୧୨ କିମି ଦୂରରେ ରହିଛି ଗୁଣ୍ଡିଚାଘାଗି ଜଳ ପ୍ରପାତ । ସଡକ ଠାରୁ ବହୁ ଦୂରରେ ରହିଥିଲେ ମଧ୍ୟ ଏହା ଏକ ଲୋକ ଭ୍ରମଣୀୟ ସ୍ଥାନ ଭାବରେ ବହୁ ଲୋକ ପ୍ରିୟତା ହାସଲ କରିପାରିଛି।

ଗୁଣ୍ଡିଚାଘାଗି ଜଳପ୍ରପାତ ସବୁଜ ଜଙ୍ଗଲ ପରିବେଷ୍ଟିତ ପ୍ରକୃତି ର କୋଳ ରେ ଅବସ୍ଥିତ। ବୈତରଣୀ ର ଶାଖା ନଦୀ ମୁସଳ ନଦୀରେ ଏହି ଜଳପ୍ରପାତ ଟି ସୃଷ୍ଟି ହୋଇଛି।ଏହା ର ଉଚ୍ଚତା ୫୦ ଫୁଟ । ଏହାର ଆକର୍ଷଣୀୟ ଗର୍ଜନ ଏବଂ ଜଳକଣାର ଧୂସର ପରିବେଶ ପର୍ଯ୍ୟଟକଙ୍କୁ ଅପାର ଆନନ୍ଦ ପ୍ରଦାନ କରେ । ଏହି ସୌନ୍ଦର୍ଜ୍ୟମୟ ବଣଭୋଜି କ୍ଷେତ୍ର ବାସ୍ତବରେ ପ୍ରକୃତି ପ୍ରେମୀଙ୍କ ପାଇଁ ସ୍ଵର୍ଗ ଏବଂ ଅବିସ୍ମରଣୀୟ ସ୍ମୃତି ସ୍ତବକ ।

ଏଠାରେ ଆମେ ପହଞ୍ଚି ଜଳ ପ୍ରପାତ ର ଜଳକଣା କୁ ଦେହରେ ସ୍ପର୍ଶ କରି ଅପାର ଆନନ୍ଦ ଲାଭ କଲୁ। ବାସ୍ତବରେ ଏହାର ସୌନ୍ଦର୍ଯ୍ୟ ମୟ ଦୃଶ୍ୟ ମନ ବିମୋହିତ କରି ଦେଉଥିଲା। ଜଳ ପ୍ରପାତ ଦେଖିବା ସହ ମୁସଳ ନଦୀ ର ମଝିରେ ପଡିଥିବା ବଡ ବଡ ପାଷାଣ ଉପରେ ଠିଆ ହୋଇ କ୍ୟାମେରା ରେ ସ୍ମୃତିକୁ ସାଇତିଲୁ। ସେଠାରେ ଅନ୍ୟ ଏକ ଆକର୍ଷଣ ର କେନ୍ଦ୍ରବିନ୍ଦୁ ଥିଲା ଲୌହ ବ୍ରିଜ୍। ଏହା ମୁସଳ ନଦୀ ଉପରେ ଦୁଇଟି ଉଚ୍ଚ ଭୁଖଣ୍ଡ କୁ ଯୋଗ କରୁଥିଲା। ଜଳ ପ୍ରପାତ ସମ୍ମୁଖରେ ଲୌହ ବ୍ରିଜ୍ ର ଦୃଶ୍ୟ ବେଶ୍ ଆକର୍ଷଣୀୟ ଥିଲା। କିଛି ସମୟ ସେଠାରେ ଅତିବାହିତ କରି ଆମେ ଚାଲିଲୁ ଅନ୍ୟ ଏକ ରମଣୀୟ ଜଳପ୍ରପାତ ଦର୍ଶନ ରେ ।

ଘଟଗାଁ ଠାରୁ ପ୍ରାୟତଃ ୫୦ କିମି ଦୂରରେ ଏବଂ କେନ୍ଦୁଝର ସଦର ମହକୁମା ଠାରୁ ମାତ୍ର ୬ କିମି ଦୂରରେ ରହିଛି ସାନଘାଗରା ଜଳପ୍ରପାତ। ସାନଘାଗରା ଏକ ଚିରସ୍ରୋତା ଜଳପ୍ରପାତ । ଅର୍ଥାତ୍ ଏହା ବର୍ଷ ର ପ୍ରତ୍ୟେକ ଦିନ ପ୍ରବାହିତ ହୋଇଥାଏ। ଏହା ବୈତରଣୀ ନଦୀର ଏକ କ୍ଷୁଦ୍ର ଉପନଦୀ ମାଛକାନ୍ଦଣା ମଧ୍ୟରେ ଅବସ୍ଥିତ । ଏହି ସ୍ଥାନରେ ଜଳସ୍ରୋତଟି ହାରାହାରି ୩୦ ଫୁଟ ଉଚ୍ଚତାରୁ ନିମ୍ନକୁ ଗତିକରିଛି । ୪୮୮ ହେକ୍ଟର ଆୟତନ ବିଶିଷ୍ଟ ଏହି ସ୍ଥାନଟି ଏକ ଜଣାଶୁଣା ପର୍ଯ୍ୟଟନ କ୍ଷେତ୍ର ଭାବରେ ପ୍ରସିଦ୍ଧି ଲାଭ କରିଛି । ଶାଳଜଙ୍ଗଲ ପରିବେଷ୍ଟିତ ଏହି ସ୍ଥାନକୁ ବର୍ଷସାରା ସହସ୍ରାଧିକ ପର୍ଯ୍ୟଟକ ଆସିଥାନ୍ତି ।ପର୍ଯ୍ୟଟକମାନଙ୍କ ପାଇଁ ଏଠାରେ ଏକ କୃତ୍ରିମ ହ୍ରଦ ନିର୍ମାଣ କରାଯାଇ ନୌ-ବିହାରର ବ୍ୟବସ୍ଥା କରାଯାଇଛି ।ଏଠାରେ ଆମେ ବହୁ ସମୟ ଧରି ବୁଲାବୁଲି କଲୁ ।କ୍ୟାମେରା ରେ ଏଭଳି ଅମୂଲ୍ୟ ସ୍ମୃତି କୁ ସାଇତିଲୁ। ସୁନ୍ଦର ଜଳ ପ୍ରପାତ ଦେଖିବା ସହ , କୃତ୍ରିମ ହ୍ରଦ ରେ ନୌକା ବିହାର କଲୁ।

"ପହଞ୍ଚିଲି ଯେବେ ଯାଇ ,ଝରଣା ପାଖରେ,

ଓଦା କରେ ବଦନ ମୋ ,ଶୀତଳ ଜଳରେ।

ସତେକି ପବନ ଆଣେ,ମୋ ପ୍ରିୟା ସମ୍ବାଦ,

ଦୂର ନଭ ଭେଦି ଆସେ ପ୍ରେମର ଶବଦ।"

ସେଠାରେ ନିର୍ମିତ ହୋଇଥିବା ପାର୍କ ରେ ବୁଲା ବୁଲି କରି ରମଣୀୟ ଦୃଶ୍ୟ କୁ ଉପଭୋଗ କଲୁ। ଏହା ପରେ ଶାଳ ବଣ ମଧ୍ୟ ରେ ସାଙ୍ଗ ରେ ନେଇଥିବା ବ୍ରେଡ୍ ,ବଟର୍, ଆଇସକ୍ରିମ,ଅଣ୍ଡା କୁ ଖାଇଲୁ। କିଛି ସମୟ ବିଶ୍ରାମ ନେଇ ଆଗକୁ ଚାଲିଲୁ । ଏଥର ଆମର ଲକ୍ଷ୍ୟ ଥିଲା ଗୋନାସିକା।

ଗୋନାସିକା ହେଉଛି ଓଡିଶାରେ ପ୍ରବାହିତ ହେଉଥିବା ବୈତରଣୀ ନଦୀର ଉତ୍ପତ୍ତି ସ୍ଥଳ। ଏହା କେନ୍ଦୁଝର ସହରଠାରୁ ୩୦ କି:ମି ଦୂରତା ରେ ଅବସ୍ଥିତ।ଗୋନାସିକା ଏକ ଦର୍ଶନୀୟ ସ୍ଥାନ ହେବା ସହ ଏହା ଏକ ତୀର୍ଥସ୍ଥଳୀ ମଧ୍ୟ। ଏଠାରେ ରହିଛି ଗଙ୍ଗା ମାତା ଙ୍କର ମନ୍ଦିର।ଏହି ମନ୍ଦିର ମନୋରମ ସବୁଜ ଉପତ୍ୟକା ଏବଂ ନାନାବିଧ ରଙ୍ଗର ଉଚ୍ଚ ତରଙ୍ଗାୟିତ ପାହାଡ଼ ପରିବେଷ୍ଟିତ ରହିଛି। ଏହି ପ୍ରସିଦ୍ଧ ମନ୍ଦିର ସ୍ଵୟଂ ବ୍ରହ୍ମାଙ୍କ ଦ୍ଵାରା ପ୍ରତିଷ୍ଠା କରାଯାଇଥିଲା ବୋଲି ବିଶ୍ଵାସ କରାଯାଏ। ଏଠାରେ ଚିରସ୍ରୋତା ବୈତରଣୀ ନଦୀ ଏକ ପାଷାଣ ଗାଈର ଦୁଇ ନାକପୁଡା ଦେଇ ବାହାରିଅଛି । ଆଶ୍ଚର୍ଯ୍ୟର ବିଷୟ, ନଦୀଟି କିଛିଦୂର ବହିଆସି ହଠାତ୍ ଗୁପ୍ତହୋଇ ପୁଣି ବ୍ରହ୍ମାକୁଣ୍ଡରେ ଆବିଭୃତ ହୋଇଥିବାରୁ ଏହାର ନାମ ‘ଗୁପ୍ତଗଙ୍ଗା’ ରଖାଯାଇଛି । ମହାଦେବ ବ୍ରହ୍ମେଶ୍ଵରଙ୍କୁ ଉତ୍ସର୍ଜିତ ଏହି ମନ୍ଦିରଟି ଖ୍ରୀଷ୍ଟାବ୍ଦ ୧୬୫୪-୧୬୫୮ ମଧ୍ୟରେ ରାଜା ଲକ୍ଷ୍ମୀନାରାୟଣ ଭଞ୍ଜଙ୍କ ଦ୍ଵାରା ନିର୍ମିତ ହୋଇଥିଲା । ଏହି ରମଣୀୟ ସ୍ଥାନ ଦୁର୍ଲଭ ଉଦ୍ଭିଦ ଏବଂ ବନ୍ୟ ପଶୁପକ୍ଷୀଙ୍କ ଦ୍ଵାରା ପରିପୂର୍ଣ ।ଏଠାରେ ଅନେକ ପ୍ରାଚୀନ ଜନଜାତି ବସବାସ କରୁଥିବାର ଦେଖିବାକୁ ପାଇଲୁ। ପାହାଡ କୁ କଟା ଯାଇ ନିର୍ମିତ ହୋଇଥିବା ରାସ୍ତାରେ ଯେତେବେଳେ ଆମେ ଯାଉଥିଲୁ ସେତେବେଳେ ଆଖି ପଲକ ସତେ ପ୍ରକୃତି ର ସୌନ୍ଦର୍ଯ୍ୟ ରେ ସମ୍ମୋହିତ ହୋଇ ପଲକ ନେବାକୁ ଭୁଲି ଯାଇଥିଲା।

"ଡାକୁଥିଲି ହାତ ଠାରି ,ଦୂର ପାହାଡକୁ,

ଯେଉଁମାନେ ରହିଛନ୍ତି ,ମୋର ଅପେକ୍ଷାକୁ।

ବନପ୍ରିୟ ସତେ ଆଜି ,ପ୍ରଫୁଲ୍ଲିତ ହୁଏ,

ଡାଳେ ବସି ଆହ୍ଲାଦରେ,ସ୍ବରକୁ ମେଲାଏ।

ଗିରି ବନୁ ଭାସିଆସେ କୁସୁମ ମହକ,

ଘ୍ରାଣ କରି ମନ ମୋର ହୁଅଇ ପୁଲକ।"

ଏହା ପରେ ଏଠାରେ ଆମେ ଆରମ୍ଭ କଲୁ ଆମର ରୋଷେଇ କାର୍ଯ୍ୟ। ସାଙ୍ଗ ରେ ନେଇଥିବା ଭିନ୍ନ ଭିନ୍ନ ଖାଦ୍ୟ ସାମଗ୍ରୀ ରେ ରୋଷେଇ ଆରମ୍ଭ କଲୁ। ଏକ ବିଶାଳ ପଥର ଖଣ୍ଡ ଉପରେ ବସି ରୋଷେଇ କଲୁ । ଆମର‌ କିଛି ଷ୍ଟାଫ୍ ମାନେ ଯାଇ ଫୋଟ ଉଠାଇଲୁ ।ରୋଷେଇ ଶେଷ ହେବା ପରେ ଆମେ ମାଆ ଗଙ୍ଗା ଦେବୀ ଦର୍ଶନ ସକାଶେ ବାହାରିଲୁ। ଅନେକ ପାହାଚ ଚଢିବାକୁ ପଡିଲା। ପାହାଡ ର ଶୀର୍ଷ କୁ ଯାଇ ଗଙ୍ଗା ମାତା ଙ୍କର ଏବଂ ବୈତରଣୀ ନଦୀ ର ଉତ୍ପତ୍ତି ସ୍ଥଳ କୁ ମଧ୍ୟ ଦର୍ଶନ କଲୁ ।ଏହା ପରେ ଯାଇ ରୋଷେଇ ହୋଇଥିବା ଖାଦ୍ୟ ଖାଇଲୁ। କିଛି ସମୟ ବିଶ୍ରାମ ନେଇ ପ୍ରତ୍ୟାବର୍ତ୍ତନ କଲୁ। ଫେରିବା ସମୟରେ ଇଚ୍ଛା ହେଲା ଭୀମକୁଣ୍ଡ ବୁଲି ଯିବା ପାଇଁ। ସଂନ୍ଧ୍ୟା ହୋଇ ଆସୁଥାଏ। ଆମେ ଚାଲିଲୁ ଭୀମକୁଣ୍ଡ।

ଭୀମକୁଣ୍ଡ ,କେନ୍ଦୁଝର ଜିଲ୍ଲାର ଅନ୍ୟ ଏକ ଲୋକପ୍ରିୟ ଭ୍ରମଣୀୟ ସ୍ଥାନ।ଏହି ଜଳପ୍ରପାତ ଟି ସବୁଜ ବନାନୀ ପରିବେଷ୍ଟିତ ମନୋହର ଚିତାକର୍ଷକ ପରିବେଶ ମଧ୍ୟରେ ଅବସ୍ଥିତ। ଶୋଭାମୟ ଓ ପୁଣ୍ୟମୟ ବୈତରଣୀ ନଦୀର ଦୁଇଟି ଭୀମକାନ୍ତ ଜଳପ୍ରପାତ ସାନକୁଣ୍ଡ ଏବଂ ବଡ଼କୁଣ୍ଡ ପ୍ରକୃତି ପ୍ରେମୀଙ୍କୁ ଆକୃଷ୍ଟ କରିଥାଏ । ଏହାକୁ ଦର୍ଶନ କରି ଦିନ ସାରାର ଥକାପଣ କୁଆଡେ ଉଭେଇ ଯାଇଥିଲା ସତେ।ହୃଦୟ ସତେ କି ପ୍ରେମମୟ ଓ ଅମୃତମୟ ହୋଇଯାଇଥିଲା। ନଦୀଶଯ୍ୟାରେ ଥିବା ଦୁଇ ପାହାଡ଼ ମଧ୍ୟ ସଙ୍କୀର୍ଣ୍ଣ ଫାଙ୍କରେ କ୍ଷୀପ୍ରଗତିରେ ଜଳସ୍ରୋତ ଭୂଲମ୍ଫ ପ୍ରଦାନକରି ଧୂସର ପରିବେଶ ସୃଷ୍ଟି କରୁଥିଲା । ଏହି ଜଳପ୍ରପାତର ତୀବ୍ର ଶବ୍ଦ ଭୀମଗର୍ଜନ ପରି ଭୟଙ୍କର ଥିଲା । ଆଧ୍ୟାତ୍ମିକ ଦୃଷ୍ଟିରୁ ଏହି ଜଳପ୍ରପାତ ପବିତ୍ରସ୍ଥାନ ଭାବରେ ବିବେଚିତ ହୋଇଥାଏ । ଏଠାରେ ମକର ସଂକ୍ରାନ୍ତିରେ ସ୍ଥାନୀୟ ବାସିନ୍ଦା ପବିତ୍ର ବୁଡ଼ ପକାଇ ମେଳା ଓ ଶିବ ମନ୍ଦିର ପରିଦର୍ଶନ କରନ୍ତି । କିମ୍ବଦନ୍ତୀ ଅନୁସାରେ ବନବାସକାଳରେ ପାଣ୍ଡବମାନେ ଏଠାରେ କିଛିକାଳ ଅବସ୍ଥାନ କରିଥିଲେ ଏବଂ ଏହି କୁଣ୍ଡରେ ଭୀମ ସ୍ନାନ କରୁଥିଲେ ବୋଲି ଅନେକ ବିଶ୍ବାସ କରନ୍ତି।

ଦେଖିବାକୁ ପାଇଲୁ ଯେ , ପ୍ରତ୍ୟେକ ଭ୍ରମଣୀୟ ସ୍ଥାନ ରେ ଆବର୍ଜନା ସୃଷ୍ଟି କରିବା ଏକ ସାଧାରଣ କଥା। ସେଠାରେ କାର୍ଯ୍ୟରତ କର୍ମଚାରୀ ମାନଙ୍କୁ ଏ ବିଷୟରେ ସୂଚିତ କରେଇଲୁ।ଏହାକୁ କିପରି ପରିସ୍କାର ଓ ସୁରକ୍ଷିତ ରଖା ଯାଇପାରିବ, ସେ ସମ୍ବନ୍ଧରେ ମଧ୍ୟ ଆଲୋଚନା କଲୁ।ପ୍ରକୃତି କୋଳରେ କିଛି ସମୟ ଅତିବାହିତ କରି ଅନ୍ତିମରେ ଭ୍ରମଣ ରେ ପୂର୍ଣ୍ଣଚ୍ଛେଦ ଲଗାଇ ଘର ଲେଉଟି ଆସିଲୁ।

*********************************************

ଲେଖନୀ ଚାଳନା - ସୌମ୍ୟ ରଞ୍ଜନ ରାୟ

ଭୂୟାଁ ଉଆସ, ଗୁଆମାଳ, ଭଦ୍ରକ।

କେନ୍ଦୁଝର ଭ୍ରମଣ|| ଭ୍ରମଣ କାହାଣୀ

ସୌନ୍ଦର୍ଯ୍ୟ ର ଗନ୍ତାଘର କେନ୍ଦୁଝର ଭ୍ରମଣ ର ପୁନରାବୃତ୍ତି ଓ ଭ୍ରମଣୀୟ ସ୍ଥାନ ସମ୍ବନ୍ଧରେ ବିଶେଷ ତଥ୍ୟ ଉପସ୍ଥାପନା।