ସମସ୍ତଙ୍କୁ ଦଣ୍ଡବତ ପ୍ରଣାମ ବା।

ଆକାଶବାଣୀ ଖୁଣ୍ଟିକୁଣ୍ଟାପୁରକୁ କେରେକେରା ସ୍ବାଗତ କରୁଛି। ଖବର ଜବର । ଖବର ପଢ଼ିବାକୁ ଯାଉଛନ୍ତି ଶ୍ରୀ ଶ୍ରୀ ଶ୍ରୀ.... (୧୦୮ ଶ୍ରୀ) ଶ୍ରୀଯୁକ୍ତ ଖଣ୍ଡିକୁଣିଆ ଖନା ଖଟେଇ। ବିଦ୍ୟୁତ ବିଭ୍ରାଟ ଯୋଗୁଁ ନୟାନବେ ଘଣ୍ଟ ନପନ ମିନିଟ୍ ରେ ପ୍ରସାରିତ ହେବାକୁ ଥିବା ନ୍ୟୁଜ୍ ଟିକେ ବିଳମ୍ବ ହୋଇଗଲା। ତେଣୁ ସମ୍ପାଦ ବକ୍ତାଙ୍କ ଆଖିରୁ ଅନବରତ ଅଶ୍ରୁ ବହି ଗଣିଆନାଳ ଗଣ୍ଡ ଭରିଗଲାଣି।

ଆଜିର ହଟ୍ ମସଲାଦାର୍ ଏକ୍ସନ୍ ନ୍ୟୁଜ୍ ରେ ସର୍ବ ପ୍ରଥମେ ରହିଛି ଷଣ୍ଢ ଓ ଛେଳି ଛୁଆମାନଙ୍କ ମଧ୍ୟରେ କୁମ୍ଫୁ କରାଟେ ପ୍ରତିଯୋଗିତା। ପ୍ରତିଯୋଗିତାରେ ଛେଳି ପ୍ରତିଯୋଗୀମାନେ ଏକ ଅଦ୍ଭୁତ ଧରଣର ମାର୍ଶାଲ ଆର୍ଟସ୍ ଦେଖାଇ ଷଣ୍ଢଦଳର କେତେକଙ୍କ ନାକ ଦଣ୍ଡା ବାରଷ୍ଟ୍ ତେରଷ୍ଟ୍ କରିଦେଇଛନ୍ତି। କିନ୍ତୁ, ଷଣ୍ଢ ଦଳର ମଧ୍ୟ ପ୍ରତିଯୋଗୀମାନେ ଏହାର ପ୍ରତି ଜବାବରେ ଷ୍ଟ୍ରେଇଟ୍ ଫରୱାର୍ଡ ଲାତ ମାରି ଥୋମୁଣୀ ବାଙ୍କେଡ଼ା କରିଦେଇଛନ୍ତି। ଏହି ପ୍ରତିଯୋଗିତା ହିଂସାତ୍ମକ ଓ ପ୍ରତିଶୋଧମୂଳକ ଭୟାନକ ରୂପ ନେବାରୁ ମଶାଦଳ ଓ ଡାଆଁଶଦଳ ଆସି ପ୍ରତିଯୋଗିତା ବନ୍ଦ କରିଥିଲେ। ଶେଷରେ ରେଫେରି ଜନ୍ଦା ପ୍ରତିଯୋଗିତା ବାତିଲ୍ କରିବାକୁ ସଭାପତି ବେଙ୍ଗକୁ ଅନୁରୋଧ କରିଥିଲେ।

ଏଥର ଆସନ୍ତୁ ସମ୍ପୂର୍ଣ୍ଣ ଖବର ଭିତରକୁ ଯିବା।

କଙ୍କଡ଼ାଖୋଳ ନିକଟସ୍ଥ ପାଡୁରା ପଲ୍ଲୀ ଗ୍ରାମରେ ମରୁଡ଼ି ହେବା ଦ୍ବାରା ସେଠି ବାସ କରୁଥିବା କାରୁଆ କୁକୁରମାନଙ୍କର ଜୀବନ ମୃତ୍ୟୁ ମୁଖରେ ପଡ଼ିଛି। ସେମାନଙ୍କୁ ସାହାଯ୍ୟ କରିବା ପାଇଁ ସେଠାକାର କୁଜିନେତା ଶ୍ରୀମାନ୍ କୋରକୋଷ୍ଟିଆ ମହାପାତ୍ର ବହୁତ ଦୁଃଖ ପ୍ରକାଶ କରି ଘୋଷଣା କରିଛନ୍ତି ଯେ - ଏଥିପାଇଁ କାରୁକୁଣ୍ଡିଆ ମୁଣ୍ଡାଙ୍କ ରିଲିଫ୍ ପାଣ୍ଠିରୁ ମୂଷାଲେଣ୍ଡି ମିଶା ଓ ପାରାଘୁଅ ମିଶା ଏକ ଅବ୍ୟର୍ଥ ଔଷଧ ଏବଂ ଅତ୍ୟାବଶ୍ୟକୀୟ ବିଷ୍ଠା ପ୍ୟାକେଟ୍ ମାନ ବଣ୍ଟନ କରାଯିବ।

ଗତକାଲି ମଧ୍ୟାହ୍ନ ୧୩ ଘ ନୟାନବେ ମିନିଟ୍ ସମୟରେ ହୋଟେଲ୍ ଛିଃ ଛିଃ ରେ ଗୋଟିଏ ପୁରୀ ଛାଣିବା ଫଳରେ ଘମାଘୋଟ ବିସ୍ଫୋରଣ ଘଟି ପୁରିଟି ଫାଟିଯାଇଛି। ଯାହାଫଳରେ ସେ ପାଖରେ ସୁଆଦ ଚାଖୁଥିବା ୧୫ଟି ମାଛି, ୧୦ଟି ମଶା, ୫ଟି ଜନ୍ଦା ଓ ପ୍ରାୟ ୧୦୦ରୁ ଅଧିକ ପିମ୍ପୁଡ଼ିଙ୍କ ଗରମ ତେଲ ଛିଟିକା ମାଡ଼ରେ ଚାଞ୍ଚମ୍ପେଇ ନାଡ୍ରା ହେଇଯାଇଛନ୍ତି। ଏମାନଙ୍କ ମୃତ୍ୟୁ ଖବର ଶୁଣି ମୂଷିକ ପୋଲିସ୍ ଟିମ୍ ଖୋଳତାଡ଼ ଆରମ୍ଭ କରିଦେଇଛି। ପୋଲିସ୍ ସୂତ୍ରରୁ ଜଣାପଡ଼ିଛି ଯେ ଅଟା ଓ ମଇଦାରେ ବିସ୍ଫୋରକ ରାସାୟନିକ ପଦାର୍ଥ ମିଶାଯାଇଥିଲା। ତେବେ ଏପରି ଦୟନୀୟ କାଣ୍ଡ କିଏ ଘଟାଇଛି ତାହାର ପ୍ରମାଣ ମିଳିନାହିଁ।

ଆସନ୍ତାକାଲି ଠିକ୍ ରାତ୍ର ୨ଟାରେ ଗନ୍ଧିଆ ପାଣି ନିକଟସ୍ଥ ବାୟା ପାହାଡ଼ରେ କରୋନା କଟକଣା ଯୋଗୁଁ ଦୀର୍ଘଦିନ ଧରି ବନ୍ଦ ଥିବା ମା' ପିତେଈଙ୍କ ମନ୍ଦିର ଖୋଲିବାକୁ ଯାଉଛି। ଏଥିପାଇଁ ଗାଞ୍ଜିଆକଟା ପଞ୍ଚାୟତ ସମିତିର ବିଧାୟିକା ଭୃକୁଣ୍ଡି ଚମ୍ପେଇତରାୟ ସର୍ବ ପ୍ରଥମେ କରୋନା ରୋଗର ମୁକାବିଲା ପାଇଁ ମା'ଙ୍କ ପାଖରେ ପେଚା ବଳିଦାନ ଦେବେ। ଏଥିରେ ବ୍ଲକ୍ ର ବି.ଡ଼ି.ଓ ମାନ୍ୟବର ଧଡ଼ିଆ ଧପଡ଼ ପଢ଼ିହାରୀ ସମେତ ଅନ୍ୟାନ୍ୟ କର୍ମଚାରୀମାନେ ମଧ୍ୟ ଯୋଗଦାନ କରିବେ।

ଖେଳ ଖବର ପରିବେଷଣ କରିବା ପୂର୍ବରୁ ନେଇ ନେବା ଏକ ଛୋଟିଆ କମର୍ସିଆଲ୍ ବ୍ରେକ୍...।

ଯନ୍ତ୍ରଣା!... ଯନ୍ତ୍ରଣା!... ଯନ୍ତ୍ରଣା!...

ବେକ ଯନ୍ତ୍ରଣା ହେଉଛି!...

କାନ୍ଧ ଯନ୍ତ୍ରଣା ହେଉଛି!...

ଅଣ୍ଟା ଯନ୍ତ୍ରଣା ହେଉଛି!...

ଆଣ୍ଠୁ ଯନ୍ତ୍ରଣା ହେଉଛି!...

ଏବେ ଆଉ ଡରିବାର କିଛି ନାହିଁ। କାରଣ ଚେରୁଆ କମ୍ପାନୀ ଆଣିଦେଇଛି ଆପଣମାନଙ୍କ ପାଇଁ 'ସୁଇ ସାଙ୍ଗ୍ ପେଇନ୍ ରିଲିଭ୍ ଅଏଲ୍' ଯାହାକୁ କେବଳ ଥରେ ମାତ୍ର ମାଲିସ୍ କରିଦେଲେ, ଆପଣଙ୍କ ସବୁ ବ୍ୟଥା ହୋଇଯିବ ଗାୟବ୍। ତେଣୁ ଆଜି ହିଁ କିଣି ନିଅନ୍ତୁ ପୁରୁଣା ଜଡ଼ିବୁଟିରେ ତିଆରି ସୁଇ ସାଙ୍ଗ୍ ପେଇନ୍ ରିଲିଭ୍ ଅଏଲ୍।

ଟିଙ୍ଗ୍ ଟିଣିଙ୍ଗ୍...

ବ୍ରେକ୍ ପରେ ଆପଣମାନଙ୍କୁ ପୁଣିଥରେ ସ୍ବାଗତ।

ଖେଳ ଖବର। ଧଣ୍ଡରାପଲ୍ଲୀ ଗ୍ରାମରେ ହୋଇଥିବା କାଣି ବିଲେଇ ଓ କୁଜି ଅସରପା ମଧ୍ୟରେ ହୋଇଥିବା ଘମାଘୋଟ ହକି ମ୍ୟାଚ୍ ଆଜି ଶେଷ ହୋଇଛି। ଏହି ଖେଳରେ ଜନ୍ଦା-ପିମ୍ପୁଡ଼ି ଠାରୁ ଆରମ୍ଭ କରି ହାତୀ ପର୍ଯ୍ୟନ୍ତ ସମସ୍ତ ପ୍ରାଣୀ ଦର୍ଶକ ଭାବେ ଯୋଗ ଦେଇ ଆକାଶଫଟା ତାଳି ବର୍ଷଣ କରିଥିଲେ। ଏଥିରେ କୁଜି ଅସରପାମାନଙ୍କ ଚମତ୍କାର କୌଶଳ ପ୍ରଦର୍ଶନ କରି କାଣି ବିଲେଇ ଦଳକୁ ୩-୦ ପରାସ୍ତ କରିଦେଇଥିଲେ। କ୍ଲିନ୍ ସୁଇପ୍ କରି କୁଜି ଅସରପା ଦଳ ଟ୍ରଫି ଅକ୍ତିଆର କରିନେଇଥିଲେ। ଆସନ୍ତା ସପ୍ତାହରେ ଧେଙ୍ଗିଡ଼ି ପାହାଡ଼ ନିକଟରେ ଥିବା ବିରାଟ ପଡ଼ିଆରେ ଅଲମ୍ପିକ୍ସ ଆରମ୍ଭ ହେବାକୁ ଯାଉଛି। ଏଥିରେ ସବୁ ଦେଶର ପଶୁ ପକ୍ଷୀ ଓ ସରିସୃପ ମାନଙ୍କୁ ନିଜର ପ୍ରତିଭା ସ୍ଫୁରଣ କରିବାକୁ ସୁଯୋଗ ଦିଆଯାଇଛି। ଏଥିପାଇଁ ତେଣ୍ଟେଇ ପଲ୍ଲୀ ନିକଟରେ ଥିବା ଜଙ୍ଗଲର ସମସ୍ତ ପଶୁପକ୍ଷୀ ଜୋର୍ ଦାର୍ ଅଭ୍ୟାସ ଚଳାଇଛନ୍ତି।

ଆଜିର ପାଣିପାଗ ଖବର। ଆଜି ରାତି ଠିକ୍ ବାରଟାରେ ଏକା ସାଙ୍ଗରେ ସୂର୍ଯ୍ୟ ଓ ଚନ୍ଦ୍ର ଦୃଶ୍ୟମାନ ହେବେ। ଗୋଟିଏ ପଟୁ ହାଲୁକା ଉଲ୍କାପାତ ହେବା ସହ ଅନ୍ୟ ପଟୁ ମିଠା ବରଫ କୋଲା ବୃଷ୍ଟିପାତ ହେବ। ଏଣୁ ଛାତ ଉପରେ ସମସ୍ତେ ଗିନା, ତାଟିଆ, ଥାଳି, ଡେକ୍ଚି, ହଣ୍ଡା ଆଦି ରଖିଦେଇ କନ୍ଥାପଟି ଘୋଡ଼ିହୋଇ ଘରେ ଶୋଇ ରହିବାକୁ ବଜବଜିଆ ପାଣିପାଗ ସୂଚନା କେନ୍ଦ୍ରରୁ ସମସ୍ତଙ୍କୁ ସତର୍କ କରାଇଦିଆଯାଉଛି। ଏହା ସଙ୍ଗେ ସଙ୍ଗେ ଘଣ୍ଟାକୁ ୨୦୦ କି.ମି. ବେଗରେ ପବନ ବହିବାର ସମ୍ଭାବନା ରହିଛି। କିନ୍ତୁ, କେଉଁଆଡୁ ଏହି ଉଲ୍କାପାତ, ମିଠା ବରଫକୋଲା ବୃଷ୍ଟିପାତ ହେବ ଓ କେଉଁ ଦିଗଆଡୁ ପବନ ବହିବ ସେ ସମ୍ପର୍କରେ କିଛି ସୂଚନା ମିଳିପାରି ନାହିଁ। ଏହା ସାରାଦେଶର ପାଣିପାଗ ବିଜ୍ଞାନୀ ଓ ପାଣିପାଗ ସୂଚନା କେନ୍ଦ୍ରର କର୍ମଚାରୀମାନଙ୍କ ମୁଣ୍ଡବ୍ୟଥାର କାରଣ ସାଜିଛି। ଏଣୁ ଘରୁ ନ ବାହାରିବାକୁ ସମସ୍ତ ଜନସାଧାରଣଙ୍କୁ ଚେତେଇ ଦିଆଯାଉଛି।

ଆଜିର ସମାଚାର ଆଜି ପାଇଁ ଏତିକି। ପରବର୍ତ୍ତୀ ସମାଚାର ଶୁଣିପାରିବେ ଡିସେମ୍ବର୍ ୩୨ତାରିଖ, ଏକେଣା ମଙ୍ଗଳବାର ଦିନ, ଦିନ ଠିକ୍ ୧୨ଘ. ନବାସି ମିନିଟ୍ ୬୨ ସେକେଣ୍ଡ୍ ରେ । ରିଲେ କରି ପ୍ରଚାର କରିବୁ ଆକାଶବାଣୀ ଚଡ଼ଚଡ଼ି କେନ୍ଦ୍ରରୁ। ସେତେବେଳ ଯାଏଁ ବିଦାୟ। ଲମ୍ବା ଚଉଡ଼ା ଦଣ୍ଡବତ... ପ୍ରଣାମ।

ନମସ୍ତେ... ହସରେ ଥାଆନ୍ତୁ ସମସ୍ତେ...।

•=><=><=><=•

ଖବର ଜବର, ଖାଣ୍ଟି ହାସ୍ୟ ସମାଚାର

ହସ ବଟିକା