ଏଇ ଗଲା କେଇ ଦିନ ତଳେ ମୁଁ ପାରାଦୀପ ରୁ ଜଗତସିଂହପୁର ଟାଉନ୍ ଯାଉଥିଲି। ସାଙ୍ଗରେ ଥଲେ ଅଫିସ୍ ର କିଛି ବରିଷ୍ଠ ସହକର୍ମୀ। ଅଫିସ୍ କାମରେ ବ୍ୟସ୍ତ ରହି ଗୁଡ଼େ ଦିନ ହେବ ବାହାରକୁ ଯାଇ ନ ଥିଲି। ମଧ୍ୟାହ୍ନ ସମୟ ଥିଲା। ବାଟରେ ନିଷ୍ପତ୍ତି ହେଲା କି ତିର୍ତ୍ତୋଲ ରେ ମଧ୍ୟାହ୍ନ ଭୋଜନ କରିବା।

ଆଗରୁ ଶୁଣିଥିଲି ପାରାଦୀପ ରୁ କଟକ ଯିବା ବାଟରେ ତିର୍ତ୍ତୋଲ ଆସେ ଏବଂ ଖାଇବା ପାଇଁ ସବୁ ସେଇଠି ପ୍ରାୟ ରୁହନ୍ତି। ପାରାଦୀପ ଆସିବା ଦିନ ଠୁ ଶୁଣୁଥିଲି ସେଠି କୁଆଡ଼େ ଗୌରୀଶଙ୍କର ନାମରେ ଏକ ହୋଟେଲ ଅଛି ଯାହାର ଖାଇବା ଖୁବ୍ ଭଲ। ଚାକିରୀ ଜୀବନ ଭିତରେ ପ୍ରାୟ ଉପକୂଳବର୍ତ୍ତୀ ସବୁ ଅଞ୍ଚଳ ବୁଲିଛି, ବିଭିନ୍ନ ହୋଟେଲ ଆଉ ଭିନ୍ନ ଧରଣର ଖାଇବା ଖାଇଛି। ମନେ ମନେ ଖୁସି ହେଲି ଆଜି ଆଉ ଏକ ଅନୁଭୁତି ହେବ ଏତେ ବେଶୀ ଶୁଣିଥିବା ହୋଟେଲ ରେ ଖାଇ କରି।

କାର୍ ଯାଇ ହୋଟେଲ ସାମ୍ନା ରେ ଅଟକିଲା। ଠିକ୍ 'ଗୌରୀଶଙ୍କର' କୁ ଲାଗି କରି ଆଉ ଏକ ହୋଟେଲ, 'ହୋଟେଲ ମାଉସୀମା Kichen'। ନିଜ ପ୍ରସିଦ୍ଧି ଅନୁଯାୟୀ ଅନେକ ଛୋଟ ବଡ଼ କାର ସବୁ ଧାଡ଼ି ବାନ୍ଧି ଠିଆ ହୋଇଥାନ୍ତି ଗୌରୀଶଙ୍କର ହୋଟେଲ ଆଗେ। ଆମ ର ଜଣେ ସହକର୍ମୀ ଯାହାଙ୍କର ଦୀର୍ଘ ବର୍ଷ ଧରି ପାରାଦୀପ ରେ ରହିବାର ଆଉ ଏଇ ଦୁଇଟି ଯାକ ହୋଟେଲ ରେ ଖାଇବାର ଅଭିଜ୍ଞତା ଅଛି, ସେ ମାଉସୀମା ହୋଟେଲ ରେ ଖାଇବା ପାଇଁ ପ୍ରବର୍ତ୍ତାଇଲେ। ଗୌରୀଶଙ୍କର ହୋଟେଲରେ ନାହିଁ ନ ଥିବା ଭିଡ଼, ବିଳମ୍ବତା ଆଉ ଅନୁରୂପ ଖାଦ୍ୟ ମାଉସୀମା ରେ ବି ଉପଲବ୍ଧ ହେବ ବୋଲି ଭରସା ଯୋଗାଇଲେ।

(ଛବିଟି ଇଣ୍ଟରନେଟ୍ ରୁ ସଂଗୃହୀତ)

ଅଗତ୍ୟା ସେଇଆ ହେଲା, ଆମ କାର୍ ହୋଟେଲ ମାଉସୀମା Kichen ସାମ୍ନାରେ ପାର୍କ ହେଲା। ଏଠି ବି କାର୍ ମାନଙ୍କର ଭିଡ଼ ଥିଲା କିନ୍ତୁ ଅପେକ୍ଷା କୃତ କମ୍ ଭିଡ଼ ଥିଲା ଗୌରୀଶଙ୍କର ଠାରୁ। କାର୍ ରୁ ଓହ୍ଲାଇବା କ୍ଷଣି ଦୁଇଟି ଯାକ ହୋଟେଲ ପାଖକୁ ପାଖ ନଜର ଆସିଲା। ଗୌରୀଶଙ୍କର ର ଟିକେ ଅତ୍ୟାଧୁନିକ ଲୁକ କିନ୍ତୁ ହୋଟେଲ ମାଉସୀମା ର ଗୋଟେ ସ୍ୱାତନ୍ତ୍ରତା ବାରି ହୋଇ ପଡ଼ୁଥିଲା।ବଡ଼ ବଡ଼ ଓଡ଼ିଆ ଅକ୍ଷର ରେ ଲେଖା ହୋଇଥଲା ମାଉସୀମା। ହୋଟେଲ ଗେଟ୍, ସାଇନ୍ ବୋର୍ଡ଼ ଠୁ ଆରମ୍ଭ କରି ହୋଟେଲ ର ଭିତର ଯାଏଁ ସବୁଠି ଏକ ଓଡ଼ିଆ ଛୁଙ୍କ ଥିଲା। ଯାହା ସବୁ ହୋଟେଲ୍ ଠୁ ଖୁବ୍ ନିଆରା ଥିଲା।

ଭିତରେ ଖାଇବା ଅର୍ଡର୍ କଲୁ। ଆମେ ତିନି ଜଣ ମଟନ୍ ଆଉ ଜଣେ ନିରାମିଷ ପାଇଁ ଅର୍ଡର୍ କଲୁ। ଖାଦ୍ୟ ଆସିଲା। ବଡ଼ କଂସା ଥାଳିରେ ଭାତ, କଂସା ଗିନା ରେ ମଟନ୍ ଆଉ କଂସା ଗ୍ଲାସ ରେ ପାଣି। ହୋଟେଲ ର କାନ୍ଥ ଆଉ ଚଟାଣ ଖୁବ୍ ସାଧାରଣ ଥିଲା। କିନ୍ତୁ କାନ୍ଥରେ ସବୁ ସୁନ୍ଦର ଚିତ୍ରକଳା ରେ ସଜା ହୋଇଛି। ଚେୟାର ସବୁ କାଠ ରେ ଓ ପ୍ରସସ୍ଥ ସିଟ୍, ମୋଟା ଲୋକଟିଏ ଆରାମ ସ୍ୱଛନ୍ଦ ରେ ବସି ଖାଇ ପାରିଲା ପରି। ଖାଇବାର ସ୍ଵାଦ ଅତ୍ୟନ୍ତ ଉଚ୍ଚ ମାନ ର ନ ହେଲେ ବି ଖରାପ ନ ଥିଲା।

ମୋଟ ଉପରେ କହିବା କଥା ହେଉଛି କି ହୋଟେଲ ର ଖାଇବା ସ୍ଵାଦ ଅପେକ୍ଷା ହୋଟେଲ ର ସାମଗ୍ରିକ ପରିପାଟୀ ଖୁବ୍ ସୁନ୍ଦର ଥିଲା। ଖୁବ୍ ପରିଷ୍କାର ପରିଚ୍ଛନ୍ନ ଥିଲା ସବୁକିଛି। ଇଚ୍ଛା, ଆଗ୍ରହ ଥିଲେ ସାଧାରଣ କାନ୍ଥ ଆଉ ଚଟାଣ କୁ ବି ଏକ ରୁଚିକର ପରିବେଶ ରେ ରୂପାନ୍ତରିତ କରି ହେବ ତାହା ବୋଧଗମ୍ୟ ହେଲା।

ମୋର ଦୀର୍ଘ ଚାକିରୀ ଜୀବନ ଭିତରେ ଓଡ଼ିଶା ଓ ପଶ୍ଚିମବଙ୍ଗ ର ଅନେକ ଗାଁ ଆଉ ସହର ବୁଲିଛି। ତା ସଙ୍ଗେ ସଙ୍ଗେ ଦକ୍ଷିଣ ଭାରତ ର ରାଜ୍ୟ ମାନଙ୍କ ର ବି ଅନେକ ଛୋଟ ସହର ଓ ଗାଁ କୁ ବି ଯାଇଛି। ଗୋଟିଏ ବିଲକ୍ଷଣ ଉପଲବ୍ଧି ହୋଇଛି, ଉଭୟ ଆମ ଓଡ଼ିଶା ଏବଂ ପଶ୍ଚିମବଙ୍ଗ ରେ ଖାଦ୍ୟର ମାନ ଆଉ ଖାଦ୍ୟର ପରିଷ୍କାର ପରିଚ୍ଛନ୍ନତା କୁ ନେଇ ଆମେ ଦକ୍ଷିଣ ଭାରତୀୟ ଙ୍କ ଠୁ ଢେର୍ ପଛରେ। ଧ୍ୟାନ ଦେବା କଥା କି ମୁଁ ଏଠି ଖାଦ୍ୟ ର ସ୍ଵାଦ କିମ୍ବା ଖାଦ୍ୟ ଭଲ ଖରାପ ବିଷୟ ରେ କହୁନାହିଁ। ମୁଁ ଲେଖୁଛି ଏଠି ଖାଦ୍ୟ ର ପରିଷ୍କାର ପରିଚ୍ଛନ୍ନତା ବିଷୟରେ, ଖାଦ୍ୟର ସାମଗ୍ରିକ ପରଷିବା ପ୍ରକ୍ରିୟା ଠାରୁ ଖାଦ୍ୟ ରଖିବା ର ସ୍ଥାନ ଆଉ ବାସନକୁସନ ବିଷୟରେ।

ଜାଣେ ଅନେକେ ହୁଏତ ମୋ ସଙ୍ଗେ ସହମତ ହେବେ ନାହିଁ ଆଉ ଏକଥା ବି ଜାଣେ କି ଅନେକ ଚାଳିଆ ହୋଟେଲ ରେ ଖୁବ୍ ଭଲ ଆଉ ସୁସ୍ୱାଦୁ ଖାଦ୍ୟ ମିଳେ ଆମ ଓଡ଼ିଶାରେ। କିନ୍ତୁ ପରିଷ୍କାର ପରିଚ୍ଛନ୍ନ ଖାଦ୍ୟ ଯେ ପ୍ରତ୍ୟେକ ମଣିଷର ଏକ ମୌଳିକ ଆବଶ୍ୟକତା।

ଫେରିଲା ବେଳେ କୌତୁହଳବସତଃ ପଚାରିବାରୁ ନିରାମିଷ ଥାଳି ର ମୂଲ୍ୟ ୧୦୦ ଟଙ୍କା ବୋଲି ଜାଣିବାକୁ ପାଇଲି। ବାଟରେ ଆସି ଭାବିଲି ଏମିତି ରେ ବି ଚାଳିଆ ହୋଟେଲ ମାନଙ୍କ ରେ ଆଜିକାଲି ୭୦-୮୦ ଟଙ୍କା ମିଲ ପିଛା ଆଦାୟ କଲେଣି ହୋଟେଲ ମାନେ। ଯିଏ ୭୦-୮୦ ଟଙ୍କା ଦେଉଛି ସେ ୧୦୦ ଟଙ୍କା ଦେବା ପାଇଁ ନିହାତି ପଶ୍ଚାତପଦ ହେବ ନାହିଁ ଏହି ପ୍ରକାର ର ଏକ ସୁନ୍ଦର ଖାଇବା ଉପଯୋଗୀ ପରିବେଶ ପାଇଁ।

ତା ପରେ ଇଏତ ହେଉଛି ଆମର ହୋଟେଲ ର ରନ୍ଧା ଖାଦ୍ୟ କଥା। ଯାହାର ପ୍ରସ୍ତୁତି ଆପାତତଃ ଆମ ଆଖି ସାମ୍ନାରେ ହେଉଛି। ଆମେ ନିତି ଦିନିଆ ଜୀବନରେ ଅନେକ ଥର ରାସ୍ତା କଡ଼ରେ ମିଳୁଥିବା ଫାଷ୍ଟ ଫୁଡ୍, ବିଭିନ୍ନ ଆଞ୍ଚଳିକ ସ୍ନାକ୍ସ, ଆଇସକ୍ରିମ, ବିଭିନ୍ନ ପ୍ରକାର ର ପାନୀୟ ଏହିପରି କେତେ କଣ ଖାଉଛୁ ଯାହାର ପ୍ରସ୍ତୁତି କେବଳ ଆମ ବିଶ୍ୱାସ ଆଉ ଭଗବାନ ଙ୍କ ଭରସା ରେ ଛାଡ଼ିଛୁ।

ଏହା ବ୍ୟତିରେକ ସେଦିନ ଫେସବୁକ୍ ରେ ପଢ଼ିଥିଲି ଜଣେ ବନ୍ଧୁ ଏକ ପ୍ରସିଦ୍ଧ ରେଷ୍ଟୋରାଁରେ ଖାଦ୍ୟ ଅର୍ଡର କରି ବାସି ଖାଦ୍ୟ ପାଇ କେମିତି ହଟହଟା ହୋଇଥିଲେ ଆଉ ଗୋଟିଏ ଭିଡିଓ ଦେଖିଥିଲି ଜଣେ ବ୍ୟକ୍ତି ପେଟିସ ଟିଏ ଅର୍ଡର କରି କେମିତି ବାସି ଫିମ୍ପି ହୋଇଯାଇଥିବା ପେଟିସ ଟିଏ ପାଇଛନ୍ତି। ମୁଁ ନିଶ୍ଚିତ ଯେ ଆମେ ସମସ୍ତେ ଏହି ପ୍ରକାର ର ଉଣା ଇଧିକେ ସମସ୍ୟା ର ସମ୍ମୁଖୀନ ହୋଇଥିବା। କିଛି ହୋଟେଲ ଏବଂ ରେଷ୍ଟୋରାଁ ପ୍ରସିଦ୍ଧି ଲାଭ କଲା ପରେ ସେମାନଙ୍କ ର ପୂର୍ବ ଖ୍ୟାତି ଅନୁଯାୟୀ ସେମାନଙ୍କର ଖାଦ୍ୟ ର ମାନ ରକ୍ଷା କରନ୍ତି ନାହିଁ। ଦୁଃଖର ବିଷୟ ଏ ପ୍ରକାରର ଗୁରୁତ୍ୱପୂର୍ଣ୍ଣ ଏବଂ ସମ୍ବେଦନଶୀଳ ଘଟଣା ସମସ୍ତଙ୍କ ଦୃଷ୍ଟି ଆଢ଼ୁଆଳରେ ରହିଯାଏ। ଆପଣ ଏହାର ପ୍ରତିବାଦ କରୁଥିବେ ଅନ୍ୟମାନେ ବେଧଢକ ଖାଇ ଚାଲିଥିବେ।

ଅସଲ କଥା ହେଉଛି ଏଇ ଖାଦ୍ୟର ପରିଷ୍କାର ପରିଚ୍ଛନ୍ନତା ଏବଂ ମାନ କୁ ନେଇ ଆମେ ନିଜେ ଖୁବ୍ ଉଦାସୀନ। ସେଥିପାଇଁ ହୁଏତ ଆମେ ଏହି ଭଳି ଖାଦ୍ୟ ଗ୍ରହଣ କରିବା ପାଇଁ ବାଧ୍ୟ ହେଉଛୁ। ମୋର ମନେ ହୁଏ ଯେପରି ଏକ ଭଲ ହୋଟେଲ କିମ୍ବା ରେଷ୍ଟୋରାଁ କୁ ଆମେ ପ୍ରଶଂସା କରିବା,ଭଲ ରେଟିଙ୍ଗ ଦେବା ପାଇଁ ଭୁଲି ନ ଥାଉ ସେହି଼ପରି ଏକ ଖରାପ ମାନ ଏବଂ ଅପରିଷ୍କାର, ଅସ୍ୱାସ୍ଥ୍ୟକର ଖାଦ୍ୟ ପରଷୁଥିବା ହୋଟେଲ କୁ ଦୃଢ଼ ପ୍ରତିବାଦ କରନ୍ତୁ।କାହିଁକି ନା ହୋଟେଲ୍ ଏବଂ ରେଷ୍ଟୋରାଁ ର ମାଲିକ ମାନେ ତ ଆମରି ଭିତରୁ ଜଣେ।

ଖାଦ୍ୟ ଆଉ ଖାଦକ

ଆମେ ଖାଉଥିବା ଖାଦ୍ୟ କେତେ ସୁରକ୍ଷିତ?