"ବ୍ରଜେ ପ୍ରସିଦ୍ଧମ୍ ନବନିତ ଚୋରମ୍,

ଗୋପାଙ୍ଗନାମ୍ ଚ ଦୁକୁଲ ଚୋରମ୍;

ଅନେକ ଜନ୍ମର୍ଜିତ ପାପ ଚୋରମ୍,

ଚୋରାଗ୍ର ଗଣ୍ୟମ୍ ପୁରୁଷମ୍ ନମାମି।"

ସିଏ ବ୍ରଜପୁରରେ ଲହୁଣୀ ଚୋର ଆଉ ଗୋପପୁରେ ଗୋପୀମାନଙ୍କ ବସନ ଚୋର, ଆଉ ଜନ୍ମଜନ୍ମାନ୍ତର ପାପ ଚୋର ବି, ସେ ଚୋରମାନଙ୍କ ମଧ୍ୟରେ ଅଗ୍ରଗଣ୍ୟ ପୁରୁଷୋତ୍ତମଙ୍କୁ ପ୍ରଣାମ। ଚୋରୀ କରିବା କଳାଟି ଯଦି ଶିଖିବାର ଅଛି, ତେବେ ସେ କଳା କହ୍ନେଇଠାରୁ ଶିଖ। ସେ କଳା କହ୍ନେଇ କେତେବେଳେ କାହାଠାରୁ କ'ଣ କ'ଣ ଚୋରି କରିଛି ସେକଥା ତ ପୁରାଣ ପୋଥିରେ ଲେଖା। ଆମ ପାଖରେ କ'ଣ ଦିବ୍ୟଦୃଷ୍ଟି ଯେ ତାଙ୍କ ଲିଳାକୁ ଦେଖିପାରିବା ସେ ଅତୀତର ଘଟଣାବଳୀକୁ। କିନ୍ତୁ, ସେ କେମିତିକା ଚୋର ଥିଲେ ତାହା ଜାଣିବାକୁ ଛାଡ଼ିଯାଇଛନ୍ତି ଏକ ଜ୍ୱଳନ୍ତ ଉଦାହରଣ। ଇତିହାସର ପୃଷ୍ଠାକୁ ଓଲଟାଇ ଦେଖିଲେ ଗଙ୍ଗ ବଂଶର ରାଜା ଲାଙ୍ଗୁଳା ନରସିଂହ ତୋଳିଥିବା କ୍ଷୀରଚୋରା ଗୋପୀନାଥ ମନ୍ଦିର ଏହାର ପ୍ରମାଣ ସ୍ବରୂପ।

ଅବସ୍ଥିତି ଓ ଉତ୍ପତ୍ତି : ଏହି ଐତିହାସିକ ଓ ବିଶ୍ଵ ପ୍ରସିଦ୍ଧ ମନ୍ଦିରଟି ପୂର୍ବ ଓଡ଼ିଶାର ବାଲେଶ୍ବର ଜିଲ୍ଳା ଅନ୍ତର୍ଗତ ରେମୁଣା ବ୍ଲକ୍ ରେ ଅବସ୍ଥିତ। ଯାହାକି ବାଲେଶ୍ୱର ଟାଉନ୍ ରୁ ପାଖାପାଖି ୧୧ କି.ମି. ଦୂରରେ ଆସିଥାଏ। ଏହା ବାଲେଶ୍ୱରଠାରୁ ୯ କିମି ପୂର୍ବରେ ହାଉଡ଼ା ଓ ଭୁବନେଶ୍ୱର ମଝିରେ ପଡ଼େ। ଏହା ୧୩୦୦ ଖ୍ରୀଷ୍ଟାବ୍ଦରେ ଉତ୍କଳର ଗଙ୍ଗ ବଂଶର ରାଜା କୋଣାର୍କ ମନ୍ଦିର ନିର୍ମାତା ଶ୍ରୀ ଶ୍ରୀ ଲାଙ୍ଗୁଳା ନରସିଂହ ଦେବ ତୀର୍ଥଯାତ୍ରା ଯାଇଥିବା ସମୟରେ ସ୍ୱପ୍ନାଦେଶ ପାଇ ଚିତ୍ରକୁଟ ପର୍ବତରୁ ପୁରୀ ନେଇଯାଉଥିବା ବେଳେ ପୁଣି ସ୍ୱପ୍ନାଦେଶ ପାଇ ରେମୁଣାରେ ପ୍ରତିଷ୍ଠା କଲେ ।

ଲୋକମାନଙ୍କ ମତରେ - ତ୍ରେତୟା ଯୁଗରେ ଭଗବାନ ଶ୍ରୀରାମ, ଲକ୍ଷ୍ମଣ ଓ ମାତା ସୀତା ଯେତେବେଳେ ୧୪ବର୍ଷ ବନବାସ ଯାଇଥିଲେ, ସେମାନେ ଦଣ୍ଡକାରଣ୍ୟରେ ବୁଲୁଥିବା ସମୟରେ ପ୍ରଭୁ ଶ୍ରୀରାମଚନ୍ଦ୍ର ଜଣେ ଗୋପାଳକଙ୍କୁ ଦେଖି ହସିଥିଲେ। ଏହାକୁ ଦେଖି ମାତା ସୀତା ହସର କାରଣ ଜାଣିବାକୁ ଇଚ୍ଛା ପ୍ରକାଶ କଲେ। ଯାହାଫଳରେ ସେ ଦ୍ୱାପର ଯୁଗରେ ନେବାକୁ ଯାଉଥିବା ଶ୍ରୀକୃଷ୍ଣ ଅବତାର କଥା ମାତା ସତୀଙ୍କୁ ବୁଝାଇଥିଲେ। ମାତା ସୀତା ସେଇ ଶ୍ରୀକୃଷ୍ଣଙ୍କ ଦିବ୍ୟ ସ୍ବରୂପକୁ ଦେଖିବାକୁ ଜିଦ୍ ଧରିଥିଲେ। ମାତାଙ୍କ କଥା ରକ୍ଷାକରି ଭଗବାନ ଶ୍ରୀରାମ ଏକ କଳା ମୁଗୁନି ପଥର ଉପରେ ଶର ମୁନରେ ଶ୍ରୀକୃଷ୍ଣଙ୍କର ଚିତ୍ର ଆଙ୍କିଥିଲେ। ଯାହାକି ମାତା ସୀତାଙ୍କ ସ୍ପର୍ଶରେ ଜୀବନ୍ତ ହୋଇଯାଇଥିଲା। ଆଉ ସେତେବେଳେ ସ୍ବୟଂ ଚତୁରାନନ ତାଙ୍କୁ ପୂଜା କରୁଥିଲେ।

ରେମୁଣା ନାମଟି ରମଣୀୟ ଶବ୍ଦରୁ ଆସିଛି ଯାହାର ଅର୍ଥ ସୁନ୍ଦର। କ୍ଷୀରଚୋରା ଗୋପୀନାଥ ମନ୍ଦିର ଓଡ଼ିଶାର ହିନ୍ଦୁ ମନ୍ଦିରମାନଙ୍କ ଭିତରେ ଏକ ଜଣାଶୁଣା ଏବଂ ପ୍ରସିଦ୍ଧ ଆନ୍ତର୍ଜାତୀୟ ମନ୍ଦିର।

ମନ୍ଦିରର କଳା ସ୍ଥାପତ୍ୟ : ମନ୍ଦିରଟିକୁ ଘେରି ରହିଛି ଏକ ସୁଉଚ୍ଚ ପ୍ରାଚୀର। ଯେଉଁଠି ପ୍ରଭୁ ଶ୍ରୀକୃଷ୍ଣଙ୍କ ଜନ୍ମଠାରୁ କଂସ ବଧ ଯାଏଁ ସବୁକିଛି ଘଟଣାବଳୀକୁ ସୁନ୍ଦର କଳା ଓ କାରୁକାର୍ଯ୍ୟରେ ଉପସ୍ଥାପନା କରାଯାଇଛି।

ବୃନ୍ଦାବନର ତିନି ଠାକୁର ଶ୍ରୀ ମଦନମୋହନ(ସମ୍ବନ୍ଧ ତତ୍ତ୍ୱ), ଶ୍ରୀ ଗୋବିନ୍ଦ(ଅବିଧେୟ ତତ୍ତ୍ୱ), ଶ୍ରୀ ଗୋପୀନାଥ(ପ୍ରୟୋଜନ ତତ୍ତ୍ୱ)ଭଳି ଏଠାରେ ଏହି ତିନି ଠାକୁର ବିରାଜିତ ହୋଇଥିବାରୁ ଏହାକୁ ପୂର୍ବ ଭାରତର ଗୁପ୍ତ ବୃନ୍ଦାବନ ଧାମ ମଧ୍ୟ କୁହାଯାଏ। ରେମୁଣାର ଗଛଲତା ଭରା ଏକ ଶୀତଳ ପରିବେଶ ଭିତରେ ଗୋପୀନାଥ ପୂଜା ପାଇଥାନ୍ତି । ଭଗବାନ ଗୋପୀନାଥଙ୍କ ଡାହାଣରେ ମଦନମୋହନ ଓ ବାମରେ ଗୋବିନ୍ଦ ଅଛନ୍ତି । ମଦନମୋହନ ଓ ଗୋବିନ୍ଦଙ୍କୁ ଶ୍ରୀ ରସିକାନନ୍ଦ ପ୍ରଭୁ ୩୫୦ ବର୍ଷ ତଳେ ତାଙ୍କର ଶିଷ୍ୟ ତିହିଡି ସାମନ୍ତ ରାଜାଙ୍କଦ୍ୱାରା ପ୍ରତିଷ୍ଠା କରାଇଥିଲେ । ତା' ପୂର୍ବରୁ କେବଳ ଶ୍ରୀ ଗୋପୀନାଥ ଥିଲେ । ଏହି ବିରାଟ ସ୍ୱୟଂଭୂ ମୂର୍ତିଙ୍କ ପାଦତଳେ ଚାରି ଶଖାଙ୍କ ସହିତ ଗୋଚାରଣ ଦୃଶ୍ୟ, ତାହାତଳେ ଅଷ୍ଟସଖୀ ସେବାରତ ଥିବାର ଦୃଶ୍ୟ ଅଛି । ତାଙ୍କ ମସ୍ତକରେ ଶେଷଦେବ ଅଛନ୍ତି, ତିନୋଟି ଜମ୍ବୂ ଫଳ ଅଛି, ମସ୍ତକର ଉପରି ଭାଗରେ ବାମ ଓ ଡାହାଣପାର୍ଶ୍ୱରେ ଚାଣୁର ଏବଂ ମୁଷ୍ଟିକ ସହିତ ଯୁଧ୍ୟ କରୁଥିବାର ଦୃଶ୍ୟ ଅଛି । ତାଙ୍କର ନଟବର ବେଶରେ ଛନ୍ଦା ଚରଣରେ ମୁରଲୀ ବଜାଉଥିବାର ମୂର୍ତ୍ତିଙ୍କୁ ଯିଏ ବି ଦେଖୁନା କାହିଁକି ମୁଗ୍ଧ ହୋଇ ଚାହିଁ ରହିବ।

ଏଠାରେ କ୍ଷୀର ଭୋଗ 'ଅମୃତ କେଳି' ନମରେ ଦିଅଁଙ୍କ ପାଖରେ ଅର୍ପଣ କରାଯାଇଥାଏ। କ୍ଷୀର, ଚିନି, ଖୁଆ ଓ ଗୁଜୁରାତି ଅଳେଇଚରେ ଏହା ତିଆରି କରାଯାଏ। ଏଠାରେ ନିତି ଅନ୍ନ ପ୍ରସାଦ ମଧ୍ୟ ମିଳେ।

ପର୍ଯ୍ୟଟକମାନେ ପ୍ରଭୁ ଗୋପୀନାଥଙ୍କ ଦର୍ଶ ସହ ଏଠାରେ ମିଳୁଥିବା ମୁଖ୍ୟ ପ୍ରସାଦ ଖୀରାର ଆନନ୍ଦ ନେଇପାରିବେ।

ବର୍ଷ ସାରା ଏହି ମନ୍ଦିରକୁ ଅନେକ ଭକ୍ତଙ୍କ ସୁଅ ଛୁଟିଥାଏ। କିମ୍ବଦନ୍ତୀ ଅନୁସାରେ ରାମଚନ୍ଦ୍ର ସୀତାଙ୍କୁ ଗଙ୍ଗାରେ ସ୍ନାନ କରାଇବା ଉଦ୍ଦ୍ୟେଶ୍ୟରେ ଏଠାରେ ଗଙ୍ଗାଙ୍କୁ ସ୍ମରଣ କରି ସାତଟି ଶର ମୁନରେ ସପ୍ତରେଖା ନଦୀ ଖନନ କରିଥିଲେ , ଅଧୁନା ଏହା ନାଳରେ ପରିଣତ ହୋଇଛି।

କାହିଁକି ଏହାର ରହସ୍ୟମୟ ନାମକରଣ?

କୁହାଯାଏ ଯେ - ଥରେ ଜଣେ ଭକ୍ତ ମାଧବେନ୍ଦ୍ର ପୁରୀ, ବୃନ୍ଦାବନର ତାଙ୍କର ସେବିତ ଠାକୁର ଶ୍ରୀ ଗୋପାଳଙ୍କ ପାଇଁ ଜଗନ୍ନାଥ ପୁରୀରୁ ମଲୟ ଚନ୍ଦନ ନେବା ଉଦେଶ୍ୟରେ ବୃନ୍ଦାବନରୁ ଚାଲି ଚାଲି ଆସି ରେମୁଣା ଗୋପୀନାଥ ମନ୍ଦିରରେ ବିଶ୍ରାମ କରିଥିଲେ । ଗୋପୀନାଥଙ୍କଠାରେ ଲାଗିଥିବା କ୍ଷୀରଭୋଗ(ଅମୃତକେଳି)କୁ ଦେଖି ଭୋଗ ପାଇବାର ଇଚ୍ଛା ହୋଇଥିଲା । କିନ୍ତୁ ସେ ଅଯାଚିତ ହୋଇଥିବାରୁ ମନର ଇଚ୍ଛା ପ୍ରକାଶ କଲେ ନହିଁ । ଶ୍ରୀ ଗୋପୀନାଥ ଭକ୍ତର ମନକଥା ଜାଣିପାରି ବାରଟି କ୍ଷୀରଭୋଗ ମଧ୍ୟରୁ ଗୋଟିଏ କ୍ଷୀରଭୋଗ ତାଙ୍କ ପିନ୍ଧିଥିବା ଧୋତିତଳେ ଲୁଚାଇ ରଖି ପୂଜକକୁ ଅର୍ଦ୍ଧରାତ୍ରିରେ ଉଠାଇ ଭକ୍ତ ମାଧବେନ୍ଦ୍ରଙ୍କୁ କ୍ଷୀରଭୋଗ ଦେଇଆସିବା ପାଇଁ ନିର୍ଦ୍ଦେଶ ଦେଲେ । ପୂଜକ ଉଠି ସ୍ନାନକରି ସତକୁ ସତ ଦେଖିଲେ ଗୋପୀନାଥଙ୍କ ଧୋତିତଳେ କ୍ଷୀରଭୋଗଟିଏ ଅଛି । ସେ ତୁରନ୍ତ କ୍ଷୀରଭୋଗଟି ନେଇ ଅନତି ଦୂରରେ ବସି କୀର୍ତନ କରୁଥିବା ମାଧବେନ୍ଦ୍ରଙ୍କୁ ଦେଇଥିଲେ । ମାଧବେନ୍ଦ୍ର ପୁରୀ ସେଇ କ୍ଷୀରଭୋଗ ପାଇ ଆନନ୍ଦରେ ନୃତ୍ୟ କରି ମୁର୍ଚ୍ଛିତ ହୋଇପଡ଼ିଲେ, ପୁଣି ଉଠି ନିଜକୁ ଧିକାର କଲେକି ପ୍ରଭୁ ଗୋପୀନାଥ ତାଙ୍କ ପାଇଁ ରାତ୍ରି ଅନିଦ୍ରା ରହି ଏତେ କଷ୍ଟ କଲେ । ତତ୍ପରେ ସେ ପ୍ରତିଷ୍ଠା ଭୟରେ ସକାଳ ହେବା ପୂର୍ବରୁ ରେମୁଣା ଛାଡି ପୁରୀ ଅଭିମୁଖେ ପଳାୟନ କଲେ। ସେହିଦିନଠାରୁ ଶ୍ରୀ ଗୋପୀନାଥ କ୍ଷୀରଚୋରା ଗୋପୀନାଥ ନାମରେ ପ୍ରସିଦ୍ଧ ହେଲେ । ଭକ୍ତ ମାଧବେନ୍ଦ୍ର ପୁରୀରୁ ମଲୟ ଚନ୍ଦନ ଆଣି ରେମୁଣା ଦେଇ ଫେରିବା ବାଟରେ ଏଠାକାର ଭକ୍ତମାନେ ଏଠାରେ ରହିବା ପାଇଁ ଅନୁରୋଧ କଲେ । ସେ ଏଠାରେ ରହଣି ସମୟରେ ତାଙ୍କ ବୃନ୍ଦାବନର ଠାକୁର ଶ୍ରୀ ଗୋପାଳ ନିର୍ଦ୍ଦେଶ ଦେଲେ ଯେ ମୁଁ ଯିଏ ରେମୁଣାର ଗୋପୀନାଥ ସିଏ । ତୁମେ ଗୋପୀନାଥଙ୍କ ଶ୍ରୀଅଙ୍ଗରେ ମଲୟ ଚନ୍ଦନ ଲେପନ କରିଦେଲେ ମୁଁ ପାଇଯିବି । ସେହିଦିନଠାରୁ ଅକ୍ଷୟ ତୃତୀୟା ଓ ଚନ୍ଦନ ପୂର୍ଣ୍ଣମୀରେ ଗୋପୀନାଥଙ୍କ ସର୍ବାଙ୍ଗ ଚନ୍ଦନ ବେଶ ହୁଏ । ଏବଂ ଅକ୍ଷୟ ତୃତୀୟାଠାରୁ ୪୫ ଦିନଧରି ଭକ୍ତଶ୍ରେଷ୍ଠ ମାଧବେନ୍ଦ୍ର ପୁରୀ ଗୋସ୍ୱାମୀଙ୍କ ସ୍ମୃତି ଉଦେଶ୍ୟରେ ଚନ୍ଦନ ଲାଗି ହୁଏ । ତାଙ୍କୁ ଏହିଠାରେ ସ୍ଥୂଳ ସମାଧି ଦିଆଯାଇଛି ଓ ଏବେ ସେଠାରେ ତାଙ୍କର ସମାଧି ମନ୍ଦିର ମଧ୍ୟ ଅଛି।

ଅନ୍ୟାନ୍ୟ ଦର୍ଶନୀୟ ସ୍ଥାନ:

ରେମୁଣାରେ କ୍ଷୀରଚୋରା ଗୋପୀନାଥ ମନ୍ଦିର ବ୍ୟତୀତ ପର୍ଯ୍ୟଟକମାନେ ଆହୁରି ଅନେକ ସୁନ୍ଦର ସୁନ୍ଦର ଜାଗା ଦେଖିପାରିବେ। ମନ୍ଦିରରୁ ଟିକେ ଦୂରରେ ଭକ୍ତଶ୍ରେଷ୍ଠ ମାଧବେନ୍ଦ୍ର ପୁରୀଙ୍କ ସମାଧି ପୀଠ ରହିଛି।

ଏହିଠାରେ ମାଧବେନ୍ଦ୍ର ତପସ୍ୟା କରୁଥିଲେ ବୋଲି ଲୋକକଥା ରହିଛି। ଶ୍ରୀପାଦ ମାଧବେନ୍ଦ୍ର ପୁରୀ ଗୋସାଇଁ, ଶ୍ରୀ ଶ୍ରୀ ରସିକାନନ୍ଦ ଦେବ ଗୋସାଇଁ ପ୍ରମୁଖ ସନ୍ଥ ଏଠାରେ ଅନେକ କାଳ କାଟିଛନ୍ତି । ମନ୍ଦିରଠୁ ୧ କି.ମି. ଦୂରରେ ରାଜା ଲାଙ୍ଗୁଳା ନରସିଂହ ଦେବ ଓ ରାଣୀଙ୍କ ଅବସ୍ଥାନର ପ୍ରତୀକ ସ୍ୱରୂପ ଦୁଇଟି ପୋଖରୀ, କୂଟପୋଖରୀ ଓ ବଜ୍ର ପୋଖରୀ ରହିଛି । ଏହା କୂଳରେ ଜଗନ୍ନାଥ ମନ୍ଦିର ଓ ଭାରତର ଦ୍ୱିତୀୟ ଅଷ୍ଟଭୁଜା ମନ୍ଦିର ଅବସ୍ଥିତ।

ଏହି ସ୍ଥାନରେ ଏକ ଆଧ୍ୟାତ୍ମିକ ବାତାରଣର ରହିଥିବା ଦେଖିବାକୁ ମିଳେ। ଅନ୍ୟପଟେ ବନବାସ ସମୟରେ ପ୍ରଭୁ ରାମଚନ୍ଦ୍ର ଅବସ୍ଥାନ କରିଥିବା ଚଣ୍ତିହାଟ ମଧ୍ୟ ଏହିଠାରେ ରହିଛି। ପୌରାଣିକ ମତ ଅନୁଯାୟୀ ପ୍ରଭୁ ରାମଚନ୍ଦ୍ର ଏଠାରେ ସାତଟି ଶର ମାରି ଏକ ଜଳସ୍ରୋତ ତିଆରି କରିଥିଲେ। ଯାହାକୁ ପରବର୍ତ୍ତୀ ସମୟରେ ସପ୍ତଧାରା ବୋଲି କୁହାଗଲା।

ଏହାର ଅନତି ଦୂରରେ ରହିଛି ଗାର୍ଗିମୁନିଙ୍କ ଦ୍ୱାରା ପ୍ରତିଷ୍ଠିତ ଗାର୍ଗେଶ୍ଵର ଶୈବ ପୀଠ। ଏହି ପୀଠରୁ ପ୍ରାୟ ଦେଢ଼ କିଲୋମିଟର ଦୂରରେ ରହିଛି ମା’ ଅଷ୍ଟଭୁଜା କନକ ଦୂର୍ଗା ମନ୍ଦିର। ଏଠାରେ ଥିବା ଦୂର୍ଗା ପ୍ରତିମା ୧୮ଟି ହସ୍ତଯୁକ୍ତ ଯାହା କିମ୍ବଦନ୍ତୀ ପ୍ରକାରରେ ବିରଳ ଅଟେ।

ଗମନାଗମନ ସୁବିଧା :

ବିମାନ ମାର୍ଗରେ ଯଦି ଆପଣ ଓଡ଼ିଶା ବାହାରୁ ଆସୁଛନ୍ତି, ତେବେ ଭୁବନେଶ୍ଵର ହିଁ ଏହି ପର୍ଯ୍ୟଟନ ସ୍ଥଳଠାରୁ ନିକଟତର ବିମାନ ବନ୍ଦର ଅଟେ। ଭୁବନେଶ୍ଵରରେ ବିମାନ ଯୋଗେ ପହଞ୍ଚି ସେଠାରୁ ଆପଣ ଟ୍ରେନ କିମ୍ଵା ସଡ଼କପଥ ଦେଇ ରେମୁଣା ଯାଇପାରିବେ। ରେଳ ଗାଡ଼ିରେ ବାଲେଶ୍ଵରକୁ ଉଭୟ ଭୁବନେଶ୍ଵର ଏବଂ କଟକରୁ ପ୍ରତିଦିନ ଟ୍ରେନ ଯାତାୟତ ହୋଇଥାଏ। ତେଣୁ ଟ୍ରେନ ଯୋଗେ ଆପଣ କ୍ଷୀରଚୋରା ଗୋପୀନାଥ ଯାଇପାରିବେ। ଏଥିପାଇଁ ଆପଣଙ୍କୁ ପ୍ରଥମେ ବାଲେଶ୍ଵର ଷ୍ଟେସନକୁ ଯିବାକୁ ପଡ଼ିବ। ସେଠାରୁ ରେମୁଣାର ଦୂରତା ହେଉଛି ୮ରୁ ୧୦ କିଲୋମିଟର। ବାଲେଶ୍ଵର ଷ୍ଟେସନରୁ ଓହ୍ଲାଇ ବସ୍ କିମ୍ଵା କାର୍ ଯୋଗେ କ୍ଷୀରଚୋରା ଗୋପୀନାଥ ମନ୍ଦିର ଯାଇପାରିବେ।

ସଡ଼କ ପଥରେ ଭୁବନେଶ୍ଵରରୁ କ୍ଷୀରଚୋରା ଗୋପୀନାଥ ମନ୍ଦିରର ଦୂରତା ହେଉଛି ପ୍ରାୟ ୨୨୦ କିଲୋମିଟର। ଯଦି ଆପଣ ଏଠାକୁ ବୁଲିଯିବାକୁ ଚାହୁଁଛନ୍ତି ତେବେ ଉଭୟ ବସ୍‌ ଏବଂ କାର୍‌ର ସାହାଯ୍ୟ ନେଇପାରିବେ।

ପର୍ଯ୍ୟଟକଙ୍କ ପାଇଁ ରହିବାର ସୁବିଧା : ଏହି ମନ୍ଦିରର କିଛି ଦୂରେ ଅନେକ ସୁନ୍ଦର ସୁନ୍ଦର ହୋଟେଲ୍ ମାନ ଅଛି। ଯେଉଁଠାରେ ଆପଣ ଉଚିତ ମୂଲ୍ୟ ଦେଇ ରହିପାରିବେ।

ମନ୍ଦିର ଛଡ଼ା ଯେଉଁଥିପାଇଁ ପ୍ରସିଦ୍ଧ, ରେମୁଣା? :

ରେମୁଣା ଓଡ଼ିଶାର ବାଲେଶ୍ୱରର ଏକ ବିଧାନ ସଭା ନିର୍ବାଚନ ମଣ୍ଡଳୀ ଓ ବିଜ୍ଞାପିତ ଅଞ୍ଚଳ ପରିଷଦ ।

ରେମୁଣା ଓଡ଼ିଶାରେ ଓ ସାରା ଭାରତରେ କଂସା ଓ ପିତ୍ତଳ ବାସନ ପାଇଁ ଜଣାଶୁଣା। ଏଠାକାର ସ୍ଥାନୀୟ କଳାକାର ସୂକ୍ଷ୍ମ କୋଟିର କାରୁକାର୍ଯ୍ୟ କରି, ଏହି ବାସନ ଏଠାକାର ବିପଣୀରେ ବିକ୍ରି କରିବା ସହିତ ବାହାରକୁ ମଧ୍ୟ ପଠାଇଥାଆନ୍ତି।

=×=×=×=

କ୍ଷୀରଚୋରା ଗୋପୀନାଥ ମନ୍ଦିର - ଏକ ରହସ୍ୟମୟୀ କିମ୍ବଦନ୍ତୀର ପର୍ଯ୍ୟଟନସ୍ଥଳୀ

ପର୍ଯ୍ୟଟନସ୍ଥଳୀର କେନ୍ଦ୍ରବିନ୍ଦୁ ଗୋପିନାଥ ମନ୍ଦିର