ଘନ ଘନ ବନଭୂମି ରାଜିତ ଅଙ୍ଗେ

ନୀଳ ଭୂଧରମାଳା ସାଜେ ତରଙ୍ଗେ

କଳ କଳ ମୁଖରିତ ଚାରୁ ବିହଙ୍ଗେ

ଜନନୀ ଜନନୀ ଜନନୀ

ବନ୍ଦେ ଉତ୍କଳ ଜନନୀ।

କାନନ କୁନ୍ତଳା, ତଟିନୀ ମେଖଳା ଓଡ଼ିଶାର କୋରାପୁଟ ହେଉଛି ନୈସର୍ଗିକ ସୋନ୍ଦର୍ଯ୍ୟ ର ଗନ୍ତାଘର। କୋରାପୁଟ କୁ ଓଡ଼ିଶା ମାଆ ନିଜ କାନିରେ ଲୁଚେଇକି ରଖିଛି ସିନା ଯିଏ ତାକୁ ଦେଖିଛି ସେ ତା ସୁନ୍ଦରତା ରେ ଲାଖି ଯାଇଛି। କୋରାପୁଟ ଠିକ୍ ଗୋଟେ ଭରା ଯୌବନ ରେ ପାଦ ଥାପିଥିବା ତରୁଣୀ ଭଳି ସୁନ୍ଦର। କୋରାପୁଟ ର ଶୀତଳ ପରିବେଶ ଠାରୁ ଗରମ କଫି ପର୍ଯ୍ୟନ୍ତ ସବୁ କିଛି ମନଛୁଆଁ।

ତେବେ ଆଜି ଜାଣିବା କୋରାପୁଟ ରେ ଥିବା ପାଞ୍ଚଟି ପର୍ଯ୍ୟଟନ ସ୍ଥଳୀ। ଯାହାକୁ କି ପର୍ଯ୍ୟଟକ ମାନେ ଆସି ଦେଖିବା ଆବଶ୍ୟକ।

ପ୍ରଥମେ ଆମେ ଆରମ୍ଭ କରିବା ଜଗତର ନାଥ ମହାପ୍ରଭୁ ଶ୍ରୀ ଜଗନ୍ନାଥଙ୍କ ପାଖରୁ। କୋରାପୁଟ ର ଜଗନ୍ନାଥ ମନ୍ଦିର ବହୁତ ପ୍ରସିଦ୍ଧ ଏହାକୁ ସାବର ଶ୍ରୀକ୍ଷେତ୍ର ତଥା ଗୁପ୍ତ ଶ୍ରୀକ୍ଷେତ୍ର ବୋଲି କୁହାଯାଏ। ଏହା ପାହାଡ଼ ଉପରେ ଅବସ୍ଥିତ ଯେଉଁଠାରୁ ସୁନ୍ଦର ପ୍ରକୃତି ର ଦୃଶ୍ୟମାନ ହୁଏ। ଏହି ବର୍ତ୍ତମାନ ର ମନ୍ଦିର ବିଂଶ ଶତାବ୍ଦୀର ନିର୍ମାଣ ଅଟେ ଯାହାକି ନିକଟ ଅତୀତରେ ନିଜର ସୁବର୍ଣ୍ଣ ଜୟନ୍ତୀ ପାଳନ କରିଛି। ଏଥିରେ ଶବର ମାନେ ଦାୟିତ୍ଵ ନେଇଛନ୍ତି ଯେଉଁମାନେ କି ମହାପ୍ରଭୁ ଙ୍କ ର ଆଦ୍ୟ ସେବକ ବୋଲି ବିଶ୍ୱାସ କରାଯାଏ। ଏହି ମନ୍ଦିର ରେ ପ୍ରଭୁ ଜଗନ୍ନାଥ, ବଳଭଦ୍ର ଓ ଶୁଭଦ୍ରା ଙ୍କ ସହିତ ଅନେକ ଦେବଦେବୀ ଅଛନ୍ତି। ଜଗନ୍ନାଥ ସଂସ୍କୃତି କୁ ଏକ ମ୍ୟୁଜୀୟମ ଆକାରରେ ଉପସ୍ଥାପନ କରାଯାଇଛି ମନ୍ଦିର ବେଢ଼ା ରେ। ଏହି ମନ୍ଦିର ର ବିଶେଷତ୍ଵ ହେଉଛି ଏହା କୌଣସି ଜାତି ଓ ଧର୍ମ କୁ ବାରଣ କରେ ନାହିଁ। ଧଳା ଫରଫର ଦେଖା ଯାଉଥିବା ଏହି ମନ୍ଦିର ଶବର ମାନଙ୍କ ର ଜଗନ୍ନାଥ ସଂସ୍କୃତି ର ବାର୍ତ୍ତା ବହନ କରୁଅଛି।

ଦ୍ଵିତୀୟ ରେ ଡୁଡୁମା ଜଳ ପ୍ରପାତ ଯାହାକୁ ପର୍ଯ୍ୟଟକ ମାନେ ଯାଇ ପାରିବେ। ଡୁଡୁମା ଜଳପ୍ରପାତ ମାଛକୁଣ୍ଡ ନଦୀ ନିକଟରେ ଅବସ୍ଥିତ। ଏହା କୋରାପୁଟ ର ଏକ ପ୍ରମୁଖ ଦର୍ଶନୀୟ ସ୍ଥାନ ହୋଇ ପାରିଛି ଏଠାରେ ଓଡ଼ିଶା ସରକାର ଓ ଆନ୍ଧ୍ରପ୍ରଦେଶ ସରକାର ଙ୍କ ମିଳିତ ପ୍ରୟାସ ରେ ହାଇଡ୍ରୋ ଇଲେକ୍ଟ୍ରିାଲ ପ୍ଲାଣ୍ଟ ବସା ଯାଇଛି ଯାହାର ନାମ ମାଛକୁଣ୍ଡ। ଡୁଡୁମା ଜଳପ୍ରପାତ ର ଆକାର ଅଶ୍ୱ ର ଲାଞ୍ଜ ବା ଘୋଡ଼ା ଲାଞ୍ଜ ପରି। ଏଠାରେ ଅବସ୍ଥିତ ଜନଜାତି ଯେମିତି ବୋଣ୍ଡା, ଗରବା , ପରଜା ଏହାର ଶୋଭା ବର୍ଦ୍ଧନ କରନ୍ତି। ୧୭୫ ମିଟର ବିଶିଷ୍ଟ ଏହି ଜଳ ପ୍ରପାତ ର ସୁନ୍ଦରତା ଯୋଗୁଁ ଓଡ଼ିଶାର ଏକ ପ୍ରମୁଖ ପର୍ଯ୍ୟଟନ ସ୍ଥଳୀ ହୋଇ ପାରିଛି।

ତୃତୀୟ ରେ ଆଉ ଏକ ପର୍ଯ୍ୟଟନ ସ୍ଥଳୀ ହେଉଛି ଦେଓମାଳି ପର୍ବତ। ଦେଓମାଳୀ ପର୍ବତ ଶୃଙ୍ଗ ଓଡ଼ିଶାର ସବୁଠାରୁ ଉଚ୍ଚତମ ପର୍ବତ ଶୃଙ୍ଗ ଭାବରେ ପରିଚିତ। ପୂର୍ବ ପର୍ବତମାଳା ରେ ଅବସ୍ଥିତ ଦେଓମାଳୀ କୁ ଅନେକ ପର୍ଯ୍ୟଟକ ଆସନ୍ତି । ଟ୍ରେକିଂ ପାଇଁ ଓଡ଼ିଶା ଭିତରେ ଦେଓମାଳୀ ର ଚାହିଦା ମଧ୍ୟ ଅନେକ । ଶୀତ ଦିନରେ ଏଠି ଭିଡ଼ ପରିଲକ୍ଷିତ ହୁଏ। କୋଟିଆ ଗ୍ରାମ ପଞ୍ଚାୟତ ର ବରବନ୍ଧ ଗ୍ରାମ ନିକଟରେ ଏହା ଅବସ୍ଥିତ। ପ୍ରାକୃତିକ ସବୁଜ ବନାନୀ ରେ ଭରପୁର ଦେଓମାଳୀ ର ଉପର ଭାଗ ବିଭିନ୍ନ ପ୍ରାଣୀ ଓ ଉଦ୍ଭିଦ ବିଶେଷ ରେ ଶୋଭା ପାଉ ଅଛି। ଏଠାକାର ଜନଜାତି କନ୍ଧ , ପରଜା , ଭୁଇଆଁ ଇତ୍ୟାଦି ହେଉଛନ୍ତି ଏହାର ମାନବ ସମ୍ବଳ। ଏହାର ଶୀର୍ଷ ଭାଗକୁ ଯିବା ପାଇଁ ଲୋକଙ୍କ ର ଆଗ୍ରହ ଦେଖା ଯାଏ। ବକ୍ସାଇଟ , ଲାଇମଷ୍ଟନ , ଜେମ୍ ଷ୍ଟନ ଇତ୍ୟାଦି ରେ ଭରପୁର ଦେଓମାଳୀ କେବଳ କୋରାପୁଟ ର ନୁହଁ ସମଗ୍ର ଓଡ଼ିଶା ଓ ଆଖ ପାଖ ରାଜ୍ୟ ର ଏକ ପର୍ଯ୍ୟଟନ ସ୍ଥଳୀ ହୋଇ ପାରିଛି।

ଚତୁର୍ଥ ରେ ଜନଜାତି ସଂଗ୍ରହାଳୟ ବା tribal museum ହେଉଛି ଆଉ ଏକ ଦର୍ଶନୀୟ ସ୍ଥାନ। ଏଥିରେ ଆମର ଓଡ଼ିଶାର ବିସ୍ତୃତ ଜନଜାତି ଙ୍କ ସମ୍ପର୍କ ରେ ତଥ୍ୟ ଅଛି। ତାଙ୍କର କଳା, ସଂସ୍କୃତି , ପରମ୍ପରା , ଖାଦ୍ୟ ପେୟ , ପର୍ବ ପର୍ବାଣୀ ଇତ୍ୟାଦି ଦର୍ଶାଇ ଦିଆଯାଇଛି। ଏହି ସଂଗ୍ରହାଳୟ ଆମର ଗୌରବ ମୟ ଜନଜାତି ଙ୍କ ର ଅନନ୍ୟ ଓ ସ୍ଵତନ୍ତ୍ର ପରମ୍ପରା କୁ ସ୍ଥାନ ଦେଇଛି। ଅନେକ ସ୍ଵତନ୍ତ୍ର ସଂସ୍କୃତି ଯାହା ଆଜି ବିଲୁପ୍ତ ପ୍ରାୟ ତାହା କୁ ଏଥିରେ ଜାଣି ହେବ। ଏହା ଐତିହ୍ୟ କୁ ସୁରକ୍ଷା ଓ ପ୍ରଚାର ପ୍ରସାର ରେ କାର୍ଯ୍ୟ କରୁଅଛି। ଏହା କୋରାପୁଟ ଡେଭଲପମେଣ୍ଟ authority ଦ୍ଵାରା ପ୍ରତିଷ୍ଠା କରାଯାଇଅଛି ଯାହା ଲୋକ ମାନଙ୍କ ମଧ୍ୟରେ ସଚେତନତା ସୃଷ୍ଟି କରିବାରେ ମଧ୍ୟ ସାହାଯ୍ୟ କରୁଅଛି। ଏହା ପର୍ଯ୍ୟଟକ ମାନଙ୍କୁ ଆକୃଷ୍ଟ କରିବାରେ ବେଶ୍ ସଫଳ ହୋଇ ପାରିଛି।

ପଞ୍ଚମ ରେ ଅନ୍ୟ ଏକ ପର୍ଯ୍ୟଟନ ସ୍ଥଳୀ ହେଉଛି ଗୁପ୍ତେଶ୍ୱର ପୀଠ। ଏହା ହେଉଛି ଭଗବାନ ଶିବ ଙ୍କୁ ସମର୍ପିତ ପୀଠ। ଏଠାରେ ପ୍ରଭୁ ଶିବ ସ୍ଵୟଂଭୂ ହୋଇ ପ୍ରାକୃତିକ ଭାବରେ ଶିବ ଲିଙ୍ଗ ର ରୂପ ନେଇଛନ୍ତି। ଗୁମ୍ଫା ମଧ୍ୟରେ ପ୍ରଭୁ ପୂଜା ପାଉଛନ୍ତି। ତାଙ୍କୁ ଦର୍ଶନ କରିବା ପାଇଁ ପ୍ରତ୍ୟେକ ଦିନ ଅନେକ ଶ୍ରଦ୍ଧାଳୁ ଆସିଥାନ୍ତି। ଏହା କେବଳ ଏକ ଧାର୍ମିକ ସ୍ଥଳୀ ନୁହେଁ ଏହାର ପ୍ରାକୃତିକ ସୌନ୍ଦର୍ଯ୍ୟ କୁ ଉପଭୋଗ କରିବାକୁ ମଧ୍ୟ ଅନେକ ପର୍ଯ୍ୟଟକ ଆସନ୍ତି। ପ୍ରାକୃତିକ ସୌନ୍ଦର୍ଯ୍ୟ ର ଗନ୍ତାଘର ଗୁପ୍ତେଶ୍ୱର ପୀଠ ଓଡ଼ିଶାର ଏକ ଅନ୍ୟତମ ଆକର୍ଷଣ ଭାବରେ ବେଶ୍ ପରିଚିତ। ଭକ୍ତି ଓ ପ୍ରାକୃତିକ ସୌନ୍ଦର୍ଯ୍ୟ ର ଅଦ୍ଭୁତ ସଙ୍ଗମ ହୋଇଥିବା ଏହି ସ୍ଥାନ ପର୍ଯ୍ୟଟକ ମାନଙ୍କୁ ବାନ୍ଧି ରଖିବାରେ ସକ୍ଷମ ହୋଇ ପାରିଛି।

ଏହା ବ୍ୟତୀତ କୋଲାବ ଜଳ ଭଣ୍ଡାର , ରାମକୃଷ୍ଣ ଆଶ୍ରମ , ସୁନାବେଡ଼ା , ଜଳପ୍ରପାତ ଆଦି କୋରାପୁଟ କୁ ରୂପବତୀ କରାଇଛି। କୋରାପୁଟ ର ପାଞ୍ଚଟି ପର୍ଯ୍ୟଟନ ସ୍ଥଳୀ ଆଶା କରେ ଆପଣଙ୍କୁ ପସନ୍ଦ ଆସିଥିବ।

ଧନ୍ୟବାଦ।

କୈବଲ୍ୟ ନାୟକ।

Kaibalya Nayak

କୋରାପୁଟ ର ପାଞ୍ଚଟି ପର୍ଯ୍ୟଟନ ସ୍ଥଳୀ|Tourism places in Koraput

କୋରାପୁଟ ପର୍ଯ୍ୟଟନ ସ୍ଥଳୀ