ସୁନ୍ଦର ମନ୍ଦିର ମଣ୍ଡିତ ବେଶା

ଚାରୁ କଳା ବୋଳି ଶୋଭିତ ଦେଶା .......

ପୁଣ୍ୟମୟୀ ଉତ୍କଳ ର କୋଣ କୋଣ ରେ ଅବସ୍ଥାପିତ ଏହାର ଆସ୍ଥା ର ପ୍ରତୀକ ମନ୍ଦିର ସେଥିପାଇଁ ତ ଏହାକୁ ମନ୍ଦିର ଶୋଭିତା ବୋଲି ବର୍ଣ୍ଣନା କରାଯାଇଛି। ମନ୍ଦିର ମାଳିନୀ ଉତ୍କଳ ର ପ୍ରତି ମନ୍ଦିର ରେ ଏକ ସ୍ବତନ୍ତ୍ର ଭାବ ଓ କାହାଣୀ ଲୁଚି ରହିଛି।

ଆଜି ଆମେ ବର୍ଣ୍ଣନା କରିବାକୁ ଯାଉଛୁ ଉତ୍କଳୀୟ ମନ୍ଦିର ର ଏକ ସୁବର୍ଣ୍ଣ ମୟ ସ୍ଥାନ କୁ ବାଲେଶ୍ଵର ଜିଲ୍ଲା ଅବସ୍ଥିତ ରେମୁଣା ର କ୍ଷୀର ଚୋରା ଗୋପୀନାଥ ମନ୍ଦିର। ସାଂସ୍କୃତିକ ଓ ପର୍ଯ୍ୟଟନ ର ଏକ ସଂଗମସ୍ଥଳି ଏହି ମନ୍ଦିର ପ୍ରଭୁ ଶ୍ରୀ କୃଷ୍ଣ ଙ୍କୁ ଉତ୍ସର୍ଗୀକୃତ ହୋଇଛି।

ଲୋକ କଥା ରୁ ଶୁଣାଯାଏ ପ୍ରଭୁ ଶ୍ରୀ ରାମ ନିଜ ଧନୁ ଦ୍ଵାରା ପଥର କୁ କାଟି ନିଜ ପର ଜନ୍ମ ରେ ନେବାକୁ ଅବତାର ସମ୍ପର୍କରେ ଦେଖାଇଥିଲେ ଶ୍ରୀ କୃଷ୍ଣ ଙ୍କ ମୂର୍ତ୍ତି ରୂପରେ। ଓଡ଼ିଶାର ରାଜା ଲାଙ୍ଗୁଳା ନରସିଂହ ଦେବ ଏହି ମୂର୍ତ୍ତି କୁ ଚିତ୍ରକୂଟ ରୁ ଆଣି ସ୍ଥାପନା କରିଥିଲେ ଓ ମନ୍ଦିର ନିର୍ମାଣ କରିଥିଲେ। ସମ୍ପୂର୍ଣ ଉତ୍କଳୀୟ ମନ୍ଦିର ନିର୍ମାଣ ଶୈଳୀ ରେ ଏହାକୁ ନିର୍ମାଣ କରାଯାଇ ଅଛି।

ଆପଣ ଜାଣିଛନ୍ତି କି ତାଙ୍କ ର ନାମ କ୍ଷୀର ଚୋରା ଗୋପୀନାଥ କାହିଁକି ବୋଲି । ପ୍ରଭୁ ଗୋପୀନାଥ ଙ୍କ ପାଖରେ ଅମୃତ କେଳି ତଥା କ୍ଷୀରା ଭୋଗ ହୋଇଥାଏ। ଏକଦା ମାଧବେନ୍ଦ୍ର ପୁରୀ ଗୋପୀନାଥ ଙ୍କ ଦର୍ଶନ ନିମନ୍ତେ ଆସିଥାନ୍ତି ସେ ତାଙ୍କର ଗୋପାଳ ମନ୍ଦିର ରେ ଅବିକଳ କ୍ଷିରା ଭୋଗ ପାଇଁ ଥରେ ଅମୃତ କେଳି କୁ ଚାଖି ବାକୁ ମନ କରିଥିଲେ। ହେଲେ ପରବର୍ତ୍ତୀ ସମୟରେ ନିଜ ର ଦୋଷ କୁ ସ୍ବୀକାର କରି ଚାଲି ଯାଇଥିଲେ। ହେଲେ ଭକ୍ତ ବତ୍ସଳ ଗୋପୀନାଥ ପୂଜାରୀ ଙ୍କୁ ସ୍ୱପ୍ନାଦେଶ ଦେଲେ କି ପ୍ରଭୁ ତାଙ୍କ ଭକ୍ତ ପାଇଁ ଗୋଟେ ଖୀରା ଭୋଗ ଲୁଚାଇ ଦେଇଛନ୍ତି। ତେଣୁ ଏଥିରୁ ପ୍ରଭୁ ଙ୍କୁ କ୍ଷୀରଚୋରା ଗୋପୀନାଥ କୁହାଯାଏ ବୋଲି କେତେକ ଙ୍କ ମତ।

ଆଉ କିଛି ଲୋକ କଥା ହିସାବରେ ଥରେ ପୂଜାରୀ ବାହାରକୁ ଯିବାର ଥିବାରୁ ତାଙ୍କ ପୁତ୍ର ଙ୍କୁ ପ୍ରସାଦ ଅର୍ପଣ କରିବାର ଦାୱିତ୍ଵ ଦେଇ ଯାଇଥିଲେ। ପ୍ରଭୁ ତାଙ୍କ ନାବାଳକ ପୁତ୍ର ପାଖରୁ ଖିରା ଭୋଗ ଲୁଚେଇ ଖାଇଥିଲେ ବୋଲି ତାଙ୍କୁ କ୍ଷୀର ଚୋରା ଗୋପୀନାଥ ମଧ୍ୟ ଅନେକ କୁହନ୍ତି।

ମନ୍ଦିର ନିର୍ମାଣ ଓଡ଼ିଶା ଶୈଳୀ ତଥା ଉତ୍କଳୀୟ ଶୈଳୀ ରେ ହୋଇଅଛି। ମୁଖ୍ୟ ଗର୍ଭଗୃହ ରେ ପ୍ରଭୁ ଗୋପୀନାଥ ଙ୍କ ବିଗ୍ରହ ସହିତ, ରାଧାଙ୍କ ଓ ମଦନମୋହନ ଙ୍କ ର ବିଗ୍ରହ ସ୍ଥାପିତ ହୋଇଅଛି। ଏହା ବ୍ୟତୀତ ଅନ୍ୟ ଦେବଦେବୀଙ୍କ ପ୍ରତିମା ମଧ୍ୟ ସ୍ଥାନିତ ହୋଇଅଛି। ମନ୍ଦିର ର କାନ୍ଥ ରେ ପୌରାଣିକ ଗାଥା ଗୁଡ଼ିକୁ ସୁନ୍ଦର ଭାବରେ ସଜା ଯାଇ ଅଛି। ମନ୍ଦିର ର ଖୋଦିତ ଚିତ୍ରକଳା ଓଡ଼ିଶା କଳା ଭାସ୍କର୍ଯ୍ୟ କୁ ପ୍ରତିପାଦିତ କରୁଅଛି।

ବୈଷ୍ଣବ ମାନଙ୍କ ମୁଖ୍ୟ ୧୦୮ ସ୍ଥାନ ମଧ୍ୟରୁ ଏହା ଏକ ଅନ୍ୟତମ। ଗୌଡିୟ ବୈଷ୍ଣବ ର ଏକ ପ୍ରମୁଖ ଧାର୍ମିକ ସ୍ଥଳୀ ଭାବରେ ଏହା ଉଜ୍ଜୀବିତ ହେଉଛି। ଷୋଡ଼ଶ ଶତାବ୍ଦୀରେ ପ୍ରଭୁ ଶ୍ରୀ ଚୈତନ୍ୟ ଦେବ ମଧ୍ୟ ଆଗମନ କରିଥିଲେ। ବିଭିନ୍ନ ପର୍ବ ପର୍ବାଣୀ ସହ ଏହା ସାଂସ୍କୃତିକ ଭାବାବେଗ କୁ ବହନ କରୁଅଛି। ଏହାର ପ୍ରମୁଖ ଆକର୍ଷଣ ହେଉଛି କ୍ଷୀରା ଭୋଗ ତଥା ଅମୃତ କେଳି।

ମୋର ଅନୁଭୂତି। ମୋର ସୌଭାଗ୍ୟ ଯେ ମୁଁ ଦୁଇଥର ଦର୍ଶନ କରିବାର ସୁଯୋଗ ପାଇଛି। ପ୍ରଥମ ଥର ତୃତୀୟ ଶ୍ରେଣୀ ରେ ସ୍କୁଲ ପିକନିକ ସମୟରେ ଯାଇଥିଲି। ମନ୍ଦିର ର ଏକ ଆଧ୍ୟାତ୍ମିକ ଓ ଅଲୌକିକ ପରିବେଶ ମନ କୁ ମୁଗ୍ଧ କରିଥିଲା। ଏତେ ଭିଡ଼ ହୋଇଥିବା ସତ୍ତ୍ଵେ ଧାଡ଼ି କରି ଆମେ ସମସ୍ତେ ବହୁତ୍ ସୁନ୍ଦର ଭାବରେ ଦର୍ଶନ କରିବାର ସୁଯୋଗ ପାଇଥିଲୁ। ଦ୍ଵିତୀୟ ଥର ପାଇଁ ୨୦୧୭ ମସିହା ରେ ମୋର ସଂପୂର୍ଣ୍ଣ ପରିବାର ସହିତ ଯାଇଥିଲି। ବହୁତ୍ ବର୍ଷ ପରେ ଦର୍ଶନ କରି ମନ ଆନନ୍ଦ ରେ ନାଚି ଉଠୁଥାଏ। ଏହି ସମୟରେ କଳା ଭାସ୍କର୍ଯ୍ୟ କୁ ବେଶୀ ଭଲ ଭାବରେ ବୁଝି ହେଲା। ମନ୍ଦିର ପରିସର ରେ ଆମେ ସମସ୍ତେ ଭୋଜନ ମଧ୍ୟ କରିଲୁ ଯାହା ଅତ୍ୟନ୍ତ ସ୍ଵାଦିଷ୍ଟ ଥିଲା। ଏହା ଥିଲା ମୋର ସୁନ୍ଦର ଅନୁଭୂତି କ୍ଷୀର ଚୋରା ଗୋପୀନାଥ ଙ୍କୁ ନେଇ।

ମନ୍ଦିର ପରିସରରେ ସମସ୍ତ ପର୍ବ ପର୍ବାଣୀ ପାଳନ ହୋଇଥାଏ। ବିଶେଷ ଭାବରେ ହୋଲି , ଜନ୍ମାଷ୍ଟମୀ, ରାଧାଷ୍ଟମୀ ଓ ଅନ୍ୟାନ୍ୟ ବୈଷ୍ଣବ ପର୍ବ ପର୍ବାଣୀ ଆଡ଼ମ୍ବର ରେ ଅନୁଷ୍ଠିତ ହୁଏ।

ମନ୍ଦିର କୁ ଯାତାୟାତ ନିମନ୍ତେ କଷ୍ଟ କରିବାକୁ ପଡ଼ିବନି। ବାଲେଶ୍ଵର ର ସହର ଠାରୁ ମାତ୍ର ନଅ ରୁ ଦଶ କିମି ଦୂରରେ ମନ୍ଦିର ଅବସ୍ଥିତ। ଯାତାୟାତ ପଥ ସୁଗମ । ଏହି ସ୍ଥାନ ର ନାମ ରେମୁଣା ଯାହା ରମଣୀୟ ତଥା ସୁନ୍ଦର ରୁ ଆସିଅଛି।

ଓଡ଼ିଶାର ପର୍ଯ୍ୟଟନ କହିଲେ କେବଳ ପୁରୀ କୋଣାର୍କ ଓ ଭୁବନେଶ୍ୱର ନୁହେଁ ଜାଣିବା ଆବଶ୍ୟକ। ଓଡ଼ିଶାର ଅନେକ ଦର୍ଶନୀୟ ସ୍ଥାନ କୁ ଲୋକ ଲୋଚନ କୁ ଆଣିବା ଆବଶ୍ୟକ। କ୍ଷୀର ଚୋରା ଗୋପୀନାଥ ମନ୍ଦିର ଆମ ସାଂସ୍କୃତିକ, ଐତିହାସିକ ଓ ଧାର୍ମିକ ସଙ୍ଗମ ର ଏକ ମୁକସାକ୍ଷୀ। ଏହା କେବଳ ଓଡ଼ିଶା ନହୋଇ ବାହାର ରାଜ୍ୟ ରେ ବି ସମ୍ପ୍ରସାରିତ ହୋଇପାରିଲେ ପର୍ଯ୍ୟଟନ ଶିଳ୍ପ ର ବିକାଶ ମଧ୍ୟ ହୋଇ ପାରିବ। ଶେଷ ରେ ଏତିକି କାମନା ପ୍ରଭୁ କ୍ଷୀର ଚୋରା ଗୋପୀନାଥ ସମସ୍ତଙ୍କ କଲ୍ୟାଣ କରନ୍ତୁ।

ପଢ଼ିଥିବା ପାଇଁ ଧନ୍ୟବାଦ।

କୈବଲ୍ୟ ନାୟକ

Kaibalya Nayak

କ୍ଷୀର ଚୋରା ଗୋପୀନାଥ ମନ୍ଦିର Khirachora Gopinath temple

କ୍ଷୀରଚୋରା ଗୋପୀନାଥ।