Baccho, especially ladkiyo ko haath jodne ki bajaye haath todna seekhaya jaye, ye hai aazadi.

Har insaan ke pet mein roti aur sar pe chhat ho, ye hai aazadi.

Deshbhakti sirf 15 August aur 26 January ke din nahi, 365 din manayi jaye, ye hai aazadi.

Har ghar tiranga sirf ek din nahi, har din tiranga manaya jaye, ye hai aazadi.

"Jai Hind, Inquilab Zindabad, Bharat Mata ki Jai" kehne wale ko cringe aur cliched ka khitaab de dena aur uska mazak udana hai aazadi??

Jis tirange ko pakad ke hum garvit hote hain ki hum Bhartiya hain, usi tirange ko 16 August aur 27 January ke din sadak se utha ke seene se lagane mein sharam aana hai aazadi??

Jab kisi ke sath galat ho to use apni complaint likhane mein sharm aur darr na lage, ye hai aazadi.

Kisi aur ke sath galat hone par apni awaaz sahi samay par na uthana aur chup rehna, ye nahi hai aazadi.

Desh mein dharm ko leke koi dange-fasaad na ho, ye hai aazadi.

Luxury gaadiyon mein interest 9.5% aur tractor mein interest 23.95%... kya ye hai aazadi?

Aazadi ye hai ki jab kisi ladki ya ladke ke sath kuch bhi galat ho, to use sahi samay par nyay mile.

Politics ke chakkar mein nyay ko undekha karna aur politics ke liye hi nispaksh nyay na dena, ye nahi hai aazadi.

Aazadi ye hai ki jab ek fauji ya sipahi shaheed ho, to use uske haqq ki izzat mile, na ki uske shahadat ka mazak banaya jaye.

Aazadi ye hai ki jab bhasha ko leke kisi ka mazak na udaya jaye, ya kisi ko alag na dekha jaye.

Angrezi ko ooncha aur khud ke desh ke bhashaon ko neecha na dekha jaye.

Equality ke naam pe kisi ek varg ko itna kuch de diya jaye ki doosre varg ke sath na-insaafi ho, ye nahi hai aazadi.

Jab koi ameer ka ladka ya bade neta ka ladka koi crime kare to use chhod diya jaye ye kehke ki vo naabalik hai, juvenile justice ka sahi istemal hai aazadi?

Aazadi sirf candle march nikalne mein nahi, par uss aag ko dil mein jalaye rakhne ka hai, jo desh mein koi badlaav la sake, taaki jo ek ke sath hua vo kisi aur ke sath na ho, ye hai aazadi.

Apne itihaas ko samman dena hai aazadi, aakranton ki jagah rakshakon ko samman dena hai aazadi.

Aazadi vo hai ki ek bachhe ko sirf doctor, engineer, ya IAS, government job ke peeche na bhagwa kar, uski marzi jo bhi karna chahta hai, use support karna hai aazadi.

Aazadi modernization ke naam par westernization ka nahi, balki apne culture ko kaise duniya ke saamne rakhna hai, ye seekhna hai aazadi.

Dhoti aur shikha rakhne wale ko gawar aur buzz cut aur phate hue jeans pehne wale ko educated manna, ye nahi hai aazadi.

Har banda khul ke apne culture ka palan kar sake, ye badhava dena hai aazadi.

Ek samaj banana jahan democracy, justice, equality aur unity ka sahi matlab samjha jaye,

jahan kisiko bhi kisi bhi samay kahin bhi aane jaane mein darr na lage,

jahan bachhon ko bhed-chal mein na bhatkaya jaye,

jahan maa-baap ko budhe hone par ghar se na nikala jaye,

jahan ek certificate se kisike hunar ko na maapa jaye,

jahan khud ko educated, modern aur woke dikhane ke chakkar mein desh ko bura ya desh ki beizzati na kiya jaye.

Yeh hai sahi maayne mein aazadi.

by

Subrat Mohapatra

Kya hai Aazadi?

"Samyak Dristhi"- Cetadel