ମୋର୍ ସମଲେଇ ମା' ଗୋ ତୋର୍

ଅପାର୍ ମହିମା,

ଆର୍ ତୋର୍ ମନ୍ଦିରର୍ ପୁନି

ଗୁର୍ଦ୍ଦୁ ଟେ ଗାରିମା।

ପଚିମ୍ ଓଡ଼ିଶାର୍ ତୁଇ ତ'

ଇଷ୍ଟଦେବୀ ଅଟୁ,

ଦୁଃଖେ ସୁଖେ ମା' ତୋର୍ ପନତ୍

ଢାକି ଦଉ ଥିବୁ ।

ମନ୍ଦିର୍ ଗାଥା ପହିଲା କେନୁ

କହେମି ହେଲେ,

ନି' ସରେ ନ' ଗୋ ତୋର୍ କରୁନା

ଯେତେ ଗାଉ ଥିଲେ ।

ଝଲସୁ ଥି ସି କେଡେ ସୁନ୍ଦର୍

ମନ୍ଦିରର୍ ବେଢ଼ା,

କଲା ଗ୍ରାନାଇଟ୍ ନୁ ଖୁଦି ଖୁଦି

ତୋ ମୂର୍ତ୍ତି ଗଢା ।

କାନ୍ଥର୍ ସୁରୁ ମୂର୍ତ୍ତି ସବୁ

ମୋଫେଟ୍ ନେ ହେଇଛେ,

ପୁର୍-ବଜ୍ ଆର୍ ପୁରାନ୍ କଥା

ସୋର୍ ପକେଇ ଦଉଛେ ।

ବୁଢ଼ା ଦାଦା କହେମା ହିସାବ୍ ଥି

ଦିନେ ବଲ୍ ରାଜା,

ମନେ ତାକର୍ ଟୁକ୍ ଟୁକାଲା

ଶିକାରର୍ ମଜା ।

ବନେ ବିଚାର୍ କଲା ପରେ

ମହାନଦୀ ଡେଗ୍ ଲେ,

ସେନୁ ଭୁଜ୍-ନି ଆଡେ ରାଜା

ଭାବି କରି ଗଲେ ।

ଶିକାର୍ କଲା ଠାନେ ଦେଖ୍ ଲେ

କେଡେ ଚମତ୍କାର୍,

ରାଜା ନେସ୍-ମି ଗଲେ ଆର୍

କାଣା କର୍ ବେ ଶିକାର୍ ।

ଯେନ୍ ଶିକାରୀ କୁକୁର୍ ସବ୍ କେ

ସାଙ୍ଗେ ନେଇ ଥିଲେ,

ଖରିଆ ଗୁଠେ ଦଉଡେଇ ନେଲା

ସବ୍ ଡର୍-ହେ ମଲେ ।

ତାର୍ ପର୍ହର କଥା ଶୁନି ମନ୍

ଛାନିଆ ହେ ସି,

ହେ ଖରିଆ, ସିମେଲ୍ ମୂଲେ

ଜୁହାର୍ କରୁ ଥି ସି ।

୧୫୪୨ ନେ ରାଜା ବଲ୍ ରାମ୍ ଦେବ୍

ତୋର୍ କୁର୍-ପା ଜାନ୍ ଲେ,

ସମଲ୍-ପୁରର୍ ରାନୀ ବୋଲି

ତୋତେ ମାନି ନେଲେ ।

ସିମେଲ୍ ଗଛ୍ ମୂଲେ ମାଆ ଗୋ

ପୂଜା କରି ତୋତେ,

ରାଇଜ୍ ରକ୍ଷା ଲାଗି ମନ୍ଦିର୍ ଟେ

ଥାପି ଦେଲେ ସଥେ ।

କିମ୍ବଦନ୍ତୀ କହେ ସି ଯେଭେ

ରାମାୟନ୍ କଥା,

ମହୀ ରାବନ୍: ରାମ୍ ଆର୍ ଲକ୍ଷ୍ମନ୍ କେ

ଦେଇ କରି ବଥା।

ବଲି ଦେବାର୍ ଲାଗି ଦୁହି କୁ

ମା' ଲଙ୍କେଶ୍ଵରୀ ପାଶେ,

ଲଙ୍କାଗଡ ର୍ ଇଷ୍ଟ ଦେବୀ

ସେନୁ ଗଲେ ରୁଷେ ।

ଅପମାନ୍ ସହି ନାଇ ପାରି କରି

ତୁଇ ଚାଲି ଆଇଲୁ,

ସମଲେଶ୍ଵରୀ ମାଆ ଭାବେ

ଚର୍ଚ୍ଚିତା ହେଲୁ ।

ମହାଲୟା ଦିନେ ତୋତେ ଧବଲ୍ ମୁଖୀ

ନାମେ ଜନା ଯାଏ ସି,

ନୂଆଁଖାଇ ଦିନେ ସମଲପୁର୍

ବନେ ଚମ୍-କୁ ଥି ସି ।

ମୋର୍ ସମଲେଇ ମା' ଗୋ ତୋର୍

ଅପାର୍ ମହିମା,

ଆର୍ ତୋର୍ ମନ୍ଦିରର୍ ପୁନି

ଗୁର୍ଦ୍ଦୁ ଟେ ଗାରିମା।

ନାମ : ଭାଗ୍ୟଲକ୍ଷ୍ମୀ ସାହୁ

ମା' ସମଲେଇ ମନ୍ଦିରର୍ ଗୁର୍ଦ୍ଦୁ ଟେ ଗାରିମା

ମା' ସମଲେଶ୍ୱରୀ ମନ୍ଦିର: Samaleswari Temple (Odisha Tourism)