ପୃଷ୍ଠଭୂମି -

***********

ଭାରତର ଜାତୀୟ ଖେଳ ହେଉଛି ହକି,ମାତ୍ର କ୍ରିକେଟ୍ ର ପ୍ରଭାବ ହକି ତୁଳନା ରେ ଅଧିକ ଦେଖିବାକୁ ମିଳିଥାଏ।ଏହାର ପ୍ରଧାନ କାରଣ ହେଉଛି ସମ୍ରାଜ୍ୟବାଦ। ଏହି ଖେଳ ଇଂରେଜ ମାନଙ୍କ ଦ୍ବାରା ଭାରତରେ ଆରମ୍ଭ ହୋଇଥିଲା।ଦେଶ ସ୍ବାଧୀନତା ପରେ ଇଂରେଜମାନେ ଦେଶ ଛାଡି ଚାଲିଗଲେ କିନ୍ତୁ ତାଙ୍କର ଏ ଖେଳ ଭାରତରେ ଆଧିପତ୍ୟ ବିସ୍ତାର କରିସାରିଥିଲା।ଏହି ଖେଳ ଲୋକ ପ୍ରିୟ ହେବାର ଅନ୍ୟ ଏକ ପ୍ରମୁଖ କାରଣ ହେଉଛି ଏହାର ଖେଳାଳୀ।ପ୍ରତ୍ୟେକ ଙ୍କ ର ଯୋଗଦାନ , ଖେଳ ପ୍ରତି ସମ୍ମାନ ,ଖେଳ ପ୍ରତି ସମର୍ପଣ ଏହାକୁ ଆଜି ଶ୍ରେଷ୍ଠ କ୍ରୀଡା ର ପରିଚୟ ପ୍ରଦାନ କରିପାରିଛି।

ଅନେକ ମହାନ ଖେଳାଳି ଏ ପୃଥିବୀ ପୃଷ୍ଠରେ ଜନ୍ମ ଗ୍ରହଣ କରି ଅପସରି ଗଲେଣି। କ୍ରିକେଟ୍ ଖେଳ ର ଆରମ୍ଭ ରୁ ଆଜି ଯାଏଁ ପ୍ରତ୍ୟେକ ଦେଶରେ ଶତ ଶତ ଖେଳାଳି ନିଜର ପ୍ରତିଭା ପ୍ରଦର୍ଶନ କରି ଚାଲିଛନ୍ତି। ସଂପ୍ରତି ଭାରତ କ୍ରିକେଟ୍ ର ଏକ ଶକ୍ତିଶାଳୀ ଦେଶ। ଏ ଦେଶରେ ମଧ୍ୟ କ୍ରିକେଟ୍ ଲୋକପ୍ରିୟ ହେବାରେ ଏହାର ଖେଳାଳୀ ମାନଙ୍କ ର ବିଶେଷ ଯୋଗଦାନ ରହିଛି।

ଅନେକ ଖେଳାଳି କିଛି ଦିନ କିମ୍ବା କିଛି ମାସ କିମ୍ବା କିଛି ବର୍ଷ ପାଇଁ କ୍ରିକେଟ୍ ଖେଳିବାର ସୁଯୋଗ ପାଇଥାନ୍ତି। କିନ୍ତୁ ଏପରି ଅନେକ ଖେଳାଳି ଥାଆନ୍ତି, ଯିଏ କି ଦୀର୍ଘ ଦଶ ,ବାର ବର୍ଷ କ୍ରିକେଟ୍ ଖେଳିବାର ସୁଯୋଗ ପାଇଥାନ୍ତି।ଅନେକ ଖେଳାଳି ଘରୋଇ ସ୍ତରରେ ଖେଳି ନିଜର ପ୍ରତିଭା ପ୍ରଦର୍ଶନ କରିଥାନ୍ତି,ଅନ୍ୟ କେତେକ ସଂଘର୍ଷ କରି କରି ଆନ୍ତର୍ଜାତିକ ସ୍ତରରେ ଖେଳ ପ୍ରଦର୍ଶନ ର ସୁଯୋଗ ପାଇଥାନ୍ତି।

ଅନେକ ଖେଳାଳି କିଛି ଦିନ ପର୍ଯ୍ୟନ୍ତ ନିଜ ର ପ୍ରତିଭାରେ ଅନ୍ୟ ମାନଙ୍କୁ ପ୍ରଭାବିତ କରିପାରିଥାନ୍ତି। ମାତ୍ର ଅନେକ ଖେଳାଳି ଏପରି ଥାଆନ୍ତି , ଯେଉଁମାନଙ୍କ ର ପ୍ରଭାବ ବର୍ଷ ବର୍ଷ ପାଇଁ ରହିଥାଏ, ସେମାନେ ଅବସର ନେଲେ ସୁଦ୍ଧା ସେମାନଙ୍କ ର ଚର୍ଚ୍ଚା ସର୍ବଦା ଚାଲିଥାଏ। ନିଜର ସ୍ବତନ୍ତ୍ର ଖେଳ ଶୈଳୀ, ନିଜର ପାରଦର୍ଶିତା, ଦେଶ ସ୍ବାର୍ଥରେ ନିଜକୁ ସମର୍ପଣ, ଖେଳରେ ଦେଶକୁ ଶୀର୍ଷ ସୋପାନ ପହଞ୍ଚାଇବାରେ ସଫଳ ହୋଇଥିବା ଖେଳାଳି ମାନେ ହିଁ ଏକ ଅନନ୍ୟ ପରିଚୟ ସୃଷ୍ଟି କରିପାରିଥାନ୍ତି। ଏହି ଖେଳାଳି ମାନଙ୍କ ମଧ୍ୟରେ ସର୍ବୋଚ୍ଚ ସ୍ଥାନ ରେ ବିରାଜମାନ କରିଥିବା ,ବଡ ପଞ୍ଚାୟତ ରେ ସରପଞ୍ଚ ହେବାର ଯୋଗ୍ୟତା ସାବ୍ୟସ୍ତ କରିଥିବା ଖେଳାଳି ହେଉଛି - _The legend, the Myth ,The captain cool, Everyone's favourite Mahendra Singh Dhoni_.

ବିଷୟ ପ୍ରବେଶ-

****************

ମହେନ୍ଦ୍ର ସିଂ ଧୋନି ଙ୍କ ଜନ୍ମ ଝାଡଖଣ୍ଡ ର ରାଞ୍ଚି ଠାରେ ହୋଇଥିଲା।ସେ ୨୦୦୭ ମସିହାରେ ଆନ୍ତର୍ଜାତୀୟ ଖେଳରେ ଅଧିନାୟକ ଭାବରେ ପଦାର୍ପଣ କରିଥିଲେ‌। ସେ ୨୦୦୭ ରୁ ୨୦୧୭ ପର୍ଯ୍ୟନ୍ତ ଏକଦିବସୀୟ ଓ ଟି-ଟ୍ବେଣ୍ଟି ଫର୍ମାଟ ଏବଂ ୨୦୦୮ ରୁ ୨୦୧୪ ପର୍ଯ୍ୟନ୍ତ ଟେଷ୍ଟ କ୍ରିକେଟ୍ ରେ ଭାରତୀୟ କ୍ରିକେଟ୍ ଦଳର ଅଧିନାୟକ ଥିଲେ। ସେ କ୍ରିକେଟ୍ ଇତିହାସରେ ସର୍ବଶ୍ରେଷ୍ଠ ଅଧିନାୟକ, ୱିକେଟ୍ କିପର ଏବଂ ବ୍ୟାଟ୍ସମ୍ୟାନ୍ ଭାବରେ ବିଶ୍ବକୁ ଚକିତ କରିପାରିଥିଲେ।୨୦୦୮ ମସିହାରେ ଭାରତରେ ଆୟୋଜିତ ହୋଇଥିବା ଇଣ୍ଡିଆନ ପ୍ରିମିୟର ଲିଗରେ ଧୋନି ଚେନ୍ନାଇ ସୁପର କିଙ୍ଗ୍ସ ତରଫରୁ ଅଧିନାୟକ ଭାବରେ ଯୋଗ ଦେଇଥିଲେ। ନିଜର ସ୍ବତନ୍ତ୍ର ଶୈଳୀର ଖେଳ ପାଇଁ ନିଜର ହେଲିକପ୍ଟର ସଟ୍ ପାଇଁ ସେ କେବଳ ଭାରତରେ ନୁହେଁ ସମଗ୍ର ବିଶ୍ବରେ ଅଦ୍ୱିତୀୟ ଖେଳାଳି ଭାବେ ପରିଗଣିତ ହୋଇଥିଲେ।

ନିଜର ଉଲ୍ଲେଖନୀୟ ସଫଳତା ପାଇଁ ନିଜର ପାରଦର୍ଶିତା ପାଇଁ ସେ ୨୦୦୮ ମସିହାରେ ମେଜର ଧ୍ୟାନ୍ ଚାନ୍ଦ ଖେଳ ରତ୍ନ‌ ପୁରସ୍କାର ପାଇଥିଲେ ।ଭାରତ ସରକାର ଦ୍ବାରା ତାଙ୍କୁ ୨୦୦୯ ମସିହାରେ ପଦ୍ମଶ୍ରୀ ଏବଂ ପଦ୍ମଭୂଷଣ ରେ ସମ୍ମାନିତ କରାଯାଇଥିଲା। ଧୋନି ହେଉଛନ୍ତି ବିଶ୍ୱର ଏକମାତ୍ର ଅଧିନାୟକ ଯିଏ କି ତିନୋଟି କ୍ରିକେଟ୍ ବିଶ୍ୱକପ୍ ଦେଶକୁ ଜିତାଇବାରେ ସକ୍ଷମ ହୋଇପାରିଥିଲେ ଯଥା- ଏକଦିବସୀୟ ବିଶ୍ବକପ୍ ଆଇସିସି ପୁରୁଷ ଟି -ଟ୍ବେଣ୍ଟି ବିଶ୍ୱକପ୍ ଏବଂ ଆଇସିସି ଚାମ୍ପିଅନ୍ସ ଟ୍ରଫି । କ୍ରିକେଟ୍ ସହ ଧୋନି ଭାରତୀୟ ସେନାର ପାରାଚ୍ୟୁଟ୍ ରେଜିମେଣ୍ଟ ର ଲେଫ୍ଟନାଣ୍ଟ କର୍ଣ୍ଣେଲଙ୍କ ସମ୍ମାନଜନକ ପଦବୀରେ ରହିଛନ୍ତି। ବିଶ୍ବାସ କରାଯାଏ ଯେ ୨୦୧୧ ମସିହାରେ ଦେଶ ପାଇଁ ତାଙ୍କର ମହାନ ଅବଦାନ ଯୋଗୁଁ ତାଙ୍କୁ ଭାରତୀୟ ସେନା ଙ୍କ ଦ୍ବାରା ଏହି ସମ୍ମାନ ପ୍ରଦାନ କରାଯାଇଥିଲା।

୨୦୧୭ ମସିହା ଜାନୁଆରି ୪ ତାରିଖରେ ଧୋନି ୱାନ୍ ଡେ ଇଣ୍ଟରନ୍ୟାସନାଲ ଏବଂ ଟି-ଟ୍ୱେଣ୍ଟି ଫର୍ମାଟ ରୁ ଅଧିନାୟକ ପଦରୁ ଇସ୍ତଫା ଦେଇଥିଲେ ଏବଂ ୨୦୨୦ ଅଗଷ୍ଟ ୧୫ ରେ ଅନ୍ତର୍ଜାତୀୟ କ୍ରିକେଟରୁ ଅବସର ଘୋଷଣା କରିଥିଲେ। ପରବର୍ତ୍ତୀ ସମୟରେ ତାଙ୍କୁ ଟି-୨୦ ବିଶ୍ୱକପ୍ ପାଇଁ ଭାରତୀୟ ଦଳର ପରାମର୍ଶଦାତା ଭାବେ ନିଯୁକ୍ତି କରାଯାଇଥିଲା।ଧୋନି ଙ୍କ ଅବସର ପରେ ତାଙ୍କ ଜର୍ସି ନଂ ୭ କୁ ମଧ୍ଯ ବି.ସି.ସି.ଆଇ ଦ୍ବାରା ଅବସର କରିଦିଆ ଯାଇଛି।ଅର୍ଥାତ୍ ଭବିଷ୍ୟତ ରେ କୌଣସି ବି ଖେଳାଳି ୭ ନଂ ଜର୍ସି କୁ ବ୍ଯବହାର କରି ପାରିବେ ନାହିଁ।ମହେନ୍ଦ୍ର ସିଂ ଧୋନି କେବଳ ଜଣେ ଚତୁର ୱିକେଟ କିପର୍ ନଥିଲେ କିମ୍ବା ଅଧିନାୟକ ନଥିଲେ, ସେ ଜଣେ ବିସ୍ଫୋଟକ ବ୍ୟାଟ୍ସ ମ୍ୟାନ୍ ମଧ୍ୟ ଥିଲେ। ବିଶାଳକାୟ ଛକା ମାରିବାରେ ସେ ଧୁରନ୍ଧର ଥିଲେ। ମ୍ୟାଚ୍ କୁ ଅନ୍ତିମ ପର୍ଯ୍ୟନ୍ତ ନେଇ ବିଜୟ ଦେବାରେ ,ଆବଶ୍ୟକ ସମୟରେ ରନ୍ କରିବାରେ , ବିପଦଜନକ ପରିସ୍ଥିତିରୁ ଟିମ୍ କୁ ବାହାର କରିବାରେ ସେ ସିଦ୍ଧହସ୍ତ ହାସଲ କରିଥିଲେ। ଚଳିତ ବର୍ଷ ଆଇ.ପି.ଏଲ୍ ରେ ୧୧୦ ମିଟର୍ ଲମ୍ବା ଛକା ମାରି ସମସ୍ତ ସମାଲୋଚକ ଙ୍କୁ ଶବ୍ଦ ଶୂନ୍ୟ କରିଦେଇଥିଲେ। ଶାନ୍ତ ସ୍ବଭାବ ଓ ନିଶ୍ବାର୍ଥପର ମନୋଭାବ ତାଙ୍କୁ ଲୋକପ୍ରିୟ କ୍ରିକେଟର କରାଇପାରିଛି। ବ୍ୟାଟ୍ସମ୍ୟାନ୍ ର ସମସ୍ତ ଯୋଗ୍ୟତା ଥାଇ ମଧ୍ୟ ସେ ପଛରେ ବ୍ୟାଟିଂ କରିବାକୁ ଯାଇ ଅନ୍ୟ ଖେଳାଳି ମାନଙ୍କୁ ଆଗରେ ସୁଯୋଗ ଦେଇଥାନ୍ତି। ନିଜ ପାଇଁ ନ ଖେଳି ଦେଶ ର ସ୍ବାର୍ଥ କୁ ପ୍ରାଧାନ୍ୟ ଦେଉଥିବା ସେହି ମହାନ୍ ଖେଳାଳି ସର୍ବଦା କ୍ରିକେଟ୍ ପ୍ରେମୀ ଙ୍କ ହୃଦୟ ରେ ଆବେଗ ହୋଇ ରହିଥିବେ।

ବ୍ୟକ୍ତିଗତ ଜୀବନ-

******************

ମହେନ୍ଦ୍ର ସିଂ ଧୋନି ଝାଡଖଣ୍ଡ ରାଜ୍ୟର ରାଞ୍ଚି ଠାରେ ଏକ ମଧ୍ୟବିତ୍ତ ପରିବାରରେ ଜନ୍ମଗ୍ରହଣ କରିଥିଲେ। ତାଙ୍କ ପିତାଙ୍କ ନାମ ପାନ ସିଂ ଏବଂ ମାତାଙ୍କ ନାମ ଶ୍ରୀମତୀ ଦେବକୀ ଦେବୀ ଥିଲା। ରାଞ୍ଚି ଠାରେ ତାଙ୍କ ପିତା ପାନ ସିଂ ମେକୋନ୍ କମ୍ପାନୀର ଜୁନିଅର ମ୍ୟାନେଜମେଣ୍ଟ ବର୍ଗରେ କାମ କରିବା ଆରମ୍ଭ କରିଥିଲେ।ଏହି କଂପାନୀ କେନ୍ଦ୍ର ସରକାର ଙ୍କ ମାଲିକାନା ଅନ୍ତର୍ଭୁକ୍ତ ଥିଲା। ତେଣୁ ପାନ ସିଂ ଏବଂ ତାଙ୍କ ପରିବାର ସହିତ ରାଞ୍ଚିରେ ରହିବା ପାଇଁ ଏକ ସରକାରୀ ବାସଭବନ ପ୍ରଦାନ କରାଯାଇଥିଲା। ଧୋନିଙ୍କ ମାତା ଶ୍ରୀମତୀ ଦେବକି ଦେବୀ ଜଣେ ସାଧାରଣ ଗୃହିଣୀ ଥିଲେ। ଧୋନିଙ୍କର ଜୟନ୍ତୀ ନାମକ ଏକ ଭଉଣୀ ଏବଂ ନରେନ୍ଦ୍ର ନାମକ ଜଣେ ଭାଇ ମଧ୍ୟ ଥିଲେ। ଧୋନିଙ୍କ ବଡ ଭାଇ ନରେନ୍ଦ୍ର ସିଂ ରାଜନୀତିରେ କାମ କରିବା ଆରମ୍ଭ କରିଥିବା ବେଳେ ତାଙ୍କ ଭଉଣୀ ଜୟନ୍ତୀ ଗୁପ୍ତା ଶିକ୍ଷକତା କରୁଥିଲେ।ବଲିଉଡ୍ ତାରକା ଜନ୍ ଆବ୍ରାହିମ୍ , ଧୋନିଙ୍କ ର ବହୁତ୍ ପ୍ରିୟ ଥିଲା। ସେ ତାଙ୍କ ପରି ଦେଖା ଯିବାକୁ ଚାହୁଁଥିଲେ ,ତେଣୁ ପ୍ରାରମ୍ଭିକ ସମୟରେ ସେ ଲମ୍ବା କେଶ ରଖୁଥିଲେ।

ଧୋନି ଦି ଏ.ବି ଜବାହର ବିଦ୍ୟାଳୟ ମନ୍ଦିର୍ ଶ୍ୟାମଲି, ରାଞ୍ଚି ଠାରେ ଅଧ୍ୟୟନ ଆରମ୍ଭ କରିଥିଲେ। ଧୋନି ପ୍ରାରମ୍ଭିକ ସମୟରେ ବ୍ୟାଡମିଣ୍ଟନ ଏବଂ ଫୁଟବଲ ପ୍ରତି ବିଶେଷ ଆଗ୍ରହ ଦେଖାଇଥିଲେ। ବିଦ୍ୟାଳୟ ରେ ଆଯୋଜିତ ପ୍ରତିଯୋଗିତା ମାନଙ୍କରେ ଧୋନି ଉଭୟ କ୍ରୀଡ଼ାରେ ପ୍ରତିନିଧିତ୍ୱ କରୁଥିଲେ ଯେଉଁଥିରେ ସେ ବ୍ୟାଡମିଣ୍ଟନ ଏବଂ ଫୁଟବଲରେ ଭଲ ପ୍ରଦର୍ଶନ ପ୍ରଦର୍ଶନ କରିଥିଲେ। ଯାହା ଦ୍ବାରା ସେ ଜିଲ୍ଲା ତଥା କ୍ଲବ ସ୍ତରରେ ମଧ୍ୟ ମନୋନୀତ ହୋଇଥିଲେ। ତାଙ୍କୁ ସ୍ଥାନୀୟ କ୍ରିକେଟ୍ କ୍ଲବରେ କ୍ରିକେଟ୍ ଖେଳିବାକୁ ତାଙ୍କ ଫୁଟବଲ୍ ପ୍ରଶିକ୍ଷକ ପଠାଇଥିଲେ। ଯଦିଓ ସେ କେବେବି କ୍ରିକେଟ୍ ଖେଳି ନଥିଲେ,ମାତ୍ର ୱିକେଟ୍ କିପର୍ ଭାବରେ ନିଜର ଚମତ୍କାରିତା ପ୍ରଦର୍ଶନ କରିଥିଲେ ଯଦ୍ବାରା ସମସ୍ତେ ତାଙ୍କ ଖେଳରେ ବିଶେଷ ଭାବେ ପ୍ରଭାବିତ ହୋଇଥିଲେ।କ୍ରିକେଟ୍ କ୍ଲବରେ ତାଙ୍କର ଭଲ ପ୍ରଦର୍ଶନ ଯୋଗୁଁ ତାଙ୍କୁ ୧୯୯୭ ମସିହାରେ ବିନୋ ମଙ୍କଡ୍ ଟ୍ରଫି ଅଣ୍ଡର-୧୬ ଚାମ୍ପିଅନସିପ୍ ପାଇଁ ମନୋନୀତ କରାଯାଇଥିଲା।ସେ ଏହି ମ୍ୟାଚ ଗୁଡିକରେ ଚମତ୍କାର ଖେଳ ପ୍ରଦର୍ଶନ କରିଥିଲେ। ଦଶମ ଶ୍ରେଣୀ ଶେଷ ପରେ ଧୋନି କ୍ରିକେଟ୍ ପ୍ରତି ବିଶେଷ ଧ୍ୟାନ ଦେଇଥିଲେ ଏବଂ ପରବର୍ତ୍ତୀ ସମୟରେ ଜଣେ ପ୍ରସିଦ୍ଧ କ୍ରିକେଟ୍ ତାରକା ଭାବରେ ଉଭା ହୋଇଥିଲେ। ଟି.ଟି.ଆଇ ପରି ସରକାରୀ ଚାକିରି ପାଇବା ସତ୍ତ୍ୱେ ସେ ଚାକିରି ପରିତ୍ୟାଗ କରି ଖେଳ ରେ ମନୋନିବେଶ କରିଥିଲେ। ପରିବାରର ଅସନ୍ତୋଷ ତାଙ୍କୁ ହାର୍ ମାନିବାକୁ ଦେଇନଥିଲା। ସେ ଜାଣିଥିଲେ କିଛି ପାଇବାକୁ ହେଲେ କିଛି ହରେଇବା ନିତାନ୍ତ ଜରୁରୀ ହୋଇଥାଏ।ତେଣୁ ସେ ସବୁକିଛି ଛାଡି କ୍ରିକେଟ୍ କୁ ନିଜର କ୍ୟାରିଅର ରୂପେ ବାଛି ନେଇଥିଲେ।

ଘରୋଇ କ୍ୟାରିୟର -

*********************

ଜୁନିୟର କ୍ରିକେଟ୍ -

************

ଧୋନି ପ୍ରଥମଥର ୧୯୯୮ ମସିହାରେ ରେ ବିହାର ର ଅଣ୍ଡର -୧୯ ଦଳ ରେ ଅନ୍ତର୍ଭୁକ୍ତ ହୋଇଥିଲେ।ଅଣ୍ଡର-୧୯ ବିଶ୍ବକପ୍ ରେ ଧୋନି ସେ ୫ ଟି ମ୍ୟାଚରେ ତଥା ୭ଟି ଇନିଂଶ ରେ ମୋଟ ୧୭୬ ରନ୍ ସଂଗ୍ରହ କରିବାରେ ସକ୍ଷମ ହୋଇଥିଲେ। ଦୁର୍ଭାଗ୍ୟ ବଶତଃ ଦଳ କ୍ୱାର୍ଟର ଫାଇନାଲରେ ପ୍ରବେଶ କରିପାରି ନଥିଲା। ଏହି କାରଣ ପାଇଁ ଧୋନିଙ୍କୁ ଇଷ୍ଟ ଜୋନ୍ ର ଅଣ୍ଡର-୧୯ ଦଳ ଖେଳିବାକୁ ଯାଉଥିବା ସି.କେ ନାଇଡୁ ଟ୍ରଫି, ଏମ ଚିଦାମ୍ବରମ୍ ଟ୍ରଫି ଏବଂ ଭିନୁ ମାଙ୍କଡ୍ ଟ୍ରଫି ପାଇଁ ଚୟନ କରାଯାଇ ନଥିଲା।

୨୦୦୦ ମସିହାରେ ବିହାର ର ଅଣ୍ଡର -୧୯ କ୍ରିକେଟ୍ ଦଳ ଫାଇନାଲରେ ପହଞ୍ଚିଥିଲା।ଫାଇନାଲ୍ ରେ ଧୋନି ବିହାର ପାଇଁ ୮୪ ରନ୍ ସଂଗ୍ରହ କରିଥିଲେ ଏବଂ ଦଳ ପାଇଁ ମୋଟ ୩୫୭ ରନ୍ ସ୍କୋର୍ କରିବାରେ ସକ୍ଷମ ହୋଇଥିଲେ। ଏହି ସମୟରେ ପଞ୍ଜାବ ଅଣ୍ଡର -୧୯ ଦଳ ସମୁଦାୟ ୮୩୯ ରନ ସ୍କୋର କରିଥିଲା ଯେଉଁଥିରେ ଯୁବରାଜ ସିଂ ୩୫୮ ରନ ସ୍କୋର କରିଥିଲେ । ଧୋନି ଙ୍କ ସ୍କୋର ଯୁବରାଜ ସିଂ ଙ୍କ ୩୫୮ ରନ୍ ଆଗରେ ଫିକା ପଡିଯାଇଥିଲା। ସମଗ୍ର ଟୁର୍ଣ୍ଣାମେଣ୍ଟରେ ଧୋନି ୯ ଟି ମ୍ୟାଚରେ ୧୨ ଟି ଇନିଂସରେ ମୋଟ ୫ ଅର୍ଦ୍ଧଶତକ ହାସଲ କରିଥିଲେ । ଏହା ସହ ସେ ୧୭ ଟି କ୍ୟାଚ୍ ଏବଂ ୭ ଟି ଷ୍ଟମ୍ପିଂ ମଧ୍ୟ କରିବାରେ ମଧ୍ୟ ସଫଳ ହୋଇଥିଲେ। ସେ ୨୦୦୦ ମସିହାରେ ବିହାର ଦଳ ପକ୍ଷରୁ ରଣଜୀ ଟ୍ରଫି ଖେଳିବାର ପ୍ରଥମ ସୁଯୋଗ ପାଇଥିଲେ। ଏହି ଖେଳର ଗୋଟିଏ ଇନିଂସରେ ସେ ଅପରାଜିତ 68 ସ୍କୋର କରି ଅପରାଜିତ ରହିଥିଲେ। ପରବର୍ତ୍ତୀ ଶୃଙ୍ଖଳା ରେ ସେ ପଶ୍ଚିମ ବଙ୍ଗ ବିପକ୍ଷ ରେ ନିଜର ପ୍ରଥମ ଶତକ ହାସଲ୍ କରିଥିଲେ। କିନ୍ତୁ ଦୁର୍ଭାଗ୍ୟବଶତଃ ତାଙ୍କ ଦଳ ଏହି ଖେଳ ହାରିଯାଇଥିଲା। ଏହା ପରେ ସେ ସି.କେ ନାଇଡୁ ଟ୍ରଫି ପାଇଁ ଖେଳାଯାଇଥିବା ଇଷ୍ଟ ଜୋନ୍ ଅଣ୍ଡର-୧୯ ମ୍ୟାଚ୍ ରେ ଅଂଶଗ୍ରହଣ କରିଥିଲେ, କିନ୍ତୁ ସେ ଚାରୋକି ମ୍ୟାଚ୍ ରେ ମାତ୍ର ୯୭ ରନ୍ ସଂଗ୍ରହ କରିବାରେ ସକ୍ଷମ ହୋଇଥିଲେ। ଯେଉଁଥିପାଇଁ ଇଷ୍ଟ ଜୋନ୍ ସମସ୍ତ ଚାରିଟି ମ୍ୟାଚ୍ ହାରିଯାଇଥିଲା। ଟିମ୍ ର ସହଯୋଗ ରୁ ବଞ୍ଚିତ ହୋଇ ସୁଦ୍ଧା ଏକୁଟିଆ ସଂଘର୍ଷ କରି ଦଳ କୁ ଜିତାଇବାରେ ଧୋନି ପୂର୍ଣ୍ଣ ଭାବରେ ପ୍ରୟାସ କରିଥିଲେ। ବିଫଳତା ସତ୍ତ୍ୱେ ଧୋନିଙ୍କ ଖେଳ ପ୍ରତି ନିଷ୍ଠା ଦୃଶ୍ୟମାନ ହୋଇଥିଲା।

ବିହାର୍ ଟିମ୍ ରେ କ୍ୟାରିୟର ଆରମ୍ଭ-

*************************

୧୯୯୯ ମସିହାରେ ୧୮ ବର୍ଷ ବୟସରେ ଧୋନି ବିହାର ପାଇଁ ରଣଜୀ ଟ୍ରଫି ଖେଳରେ ଅଂଶଗ୍ରହଣ କରି ନିଜ କ୍ୟାରିୟର୍ ର ଶୁଭାରମ୍ଭ କରିଥିଲେ । ଏହି ଟ୍ରଫିର ପ୍ରଥମ ମ୍ୟାଚ୍‌ରେ ସେ ଆସାମ ଦଳ ବିପକ୍ଷରେ ଦ୍ୱିତୀୟ ଇନିଂସରେ ୬୮ ରନ୍‌ର ଇନିଂସ ଖେଳିଥିଲେ। ପରେ ସେ ୨୦୦୦ ମସିହାରେ ବଙ୍ଗଳା ବିପକ୍ଷରେ ପ୍ରଥମ ଥର ଶତକ ହାସଲ କରିଥିଲେ। ଏହା ବ୍ୟତୀତ ଧୋନି ଏହା ପରବର୍ତ୍ତୀ ମ୍ୟାଚ ରେ ସୁଫଳ ହାସଲ କରିପାରିନଥିଲେ।୨୦୦୨ ରେ ଖେଳାଯାଉଥିବା ଚାରୋଟି ରଣଜୀ ମ୍ୟାଚରେ ପାଞ୍ଚଟି ଅର୍ଦ୍ଧଶତକ ଏବଂ ଦେଓଧର ଟ୍ରଫିରେ ଦୁଇ ଅର୍ଦ୍ଧଶତକ ହାସଲ କରିବାରେ ସକ୍ଷମ ହୋଇଥିଲେ।ଧୋନି ନିଚ କ୍ରମରେ ଦଳକୁ ମଜବୁତ କରିବା ପାଇଁ ଏକ ଉପଯୁକ୍ତ ଚୟନ ଭାବେ ପରିଗଣିତ ହୋଇପାରିଲେ।୨୦୦୩ ରେ ଆସାମ ବିପକ୍ଷରେ ରଣଜୀ ଟ୍ରଫି ଡେବ୍ୟୁରେ ଧୋନି ଏକ ଅପରାଜିତ ୧୩୮ ରନ୍ ସଂଗ୍ରହ କରିଥିଲେ।ସେହି ବର୍ଷ ଦେଓଧର ଟ୍ରଫିରେ ଚାରୋଟି ମ୍ୟାଚ୍ ରେ ମୋଟ ୨୪୪ ରନ୍ ସ୍କୋର କରିଥିଲେ | ଧୋନି ଟ୍ରଫିର ଅନ୍ତିମ ମ୍ୟାଚରେ କ୍ରିକେଟର ଦୀପ ଦାସ ଗୁପ୍ତାଙ୍କ ସ୍ଥାନରେ ଇଷ୍ଟ ଜୋନ୍ କୁ ପ୍ରତିନିଧିତ୍ୱ କରିବାକୁ ମନୋନୀତ ହୋଇଥିଲେ ଏବଂ ସେ ସେହି ମ୍ୟାଚର ଦ୍ୱିତୀୟ ଇନିଂସରେ ଆକ୍ରମଣାତ୍ମକ ଅର୍ଦ୍ଧଶତକ ହାସଲ କରିଥିଲେ।

ଭାରତୀୟ ଦଳରେ ପ୍ରବେଶ -

*****************************

୨୦୦୩ ମସିହାରେ ତାଙ୍କର ଦୃଢ ପ୍ରୟାସ ରେ ଧୋନି ଏକଦିବସୀୟ ମ୍ୟାଚ୍ ରେ ଜିମ୍ବାୱେ ଏବଂ କେନିଆ ପାଇଁ ଇଣ୍ଡିଆ ଏ ଦଳରେ ପ୍ରଥମ ଥର ମନୋନୀତ ହୋଇଥିଲେ ।ଏହି ଶୃଙ୍ଖଳା ରେ ଧୋନି ନିଜର ୱିକେଟ କିପର ଦକ୍ଷତା ପ୍ରଦର୍ଶନ କରିଥିଲେ। ହାରାରେ ସ୍ପୋର୍ଟସ କ୍ଲବରେ ଜିମ୍ବାୱେ ବିପକ୍ଷରେ ୭ ଟି କ୍ୟାଚ୍ ଏବଂ ୪ ଷ୍ଟମ୍ପିଂ କରିବାରେ ସମର୍ଥ ହୋଇଥିଲେ। ଏହାପରେ ସେ ପାକିସ୍ତାନ ଏ ବିପକ୍ଷରେ ଅର୍ଦ୍ଧଶତକ ହାସଲ କରିଥିବାବେଳେ ପାକିସ୍ତାନର ୨୨୩ ରନ୍ କୁ ଚେଜ୍ କରି ଭାରତକୁ ବିଜୟ ହାସଲ କରିବାରେ ସାହାଯ୍ୟ କରିଥିଲେ। ଏହି ଟୁର୍ଣ୍ଣାମେଣ୍ଟରେ ସେ ୧୨୦ ଏବଂ ୧୧୯ ରନ୍ ସ୍କୋର କରି ଦୁଇଟି ଶତକ ହାସଲ କରିଥିଲେ। ଧୋନି ୭୨.୪୦ ହାର ରେ ୭ ଟି ମ୍ୟାଚରେ ମୋଟ ୩୬୨ ରନ୍ ସ୍କୋର କରିଥିଲେ । ଏହି ସିରିଜରେ ତାଙ୍କର ପ୍ରଦର୍ଶନ ତତ୍କାଳୀନ ଭାରତର ଅଧିନାୟକ ସୌରଭ ଗାଙ୍ଗୁଲିଙ୍କ ଦୃଷ୍ଟି ଆକର୍ଷଣ କରିଥିଲା । ଭାରତ 'ଏ' ଦଳର ପ୍ରଶିକ୍ଷକ ଧୋନିଙ୍କୁ ୱିକେଟ୍ କିପର ତଥା ବ୍ୟାଟ୍ସମ୍ୟାନ୍ ଭାବରେ ଭାରତୀୟ ଦଳରେ ଚୟନ କରିବାକୁ ସୁପାରିଶ କରିଥିଲେ।

ଆନ୍ତର୍ଜାତିକ କ୍ଯାରିୟର୍ -

****************

ମହେନ୍ଦ୍ର ସିଂ ଧୋନି ନିଜ ଆନ୍ତର୍ଜାତିକ କ୍ରିକେଟ୍ କ୍ୟାରିୟର ରେ ଏକ ସଫଳ ବ୍ୟାଟ୍ସମ୍ୟାନ୍ ଭାବରେ ସମୁଦାୟ ୯୦ ଟି ଟେଷ୍ଟ ମ୍ୟାଚ ଖେଳି ୩୮.୦୯ ହାରାହାରି ରେ ୪୮୭୬ ରନ୍ ସଂଗ୍ରହ କରିଥିଲେ ।ଏଥିରେ ୬ ଟି ଶତକ ଏବଂ ୩୩ ଗୋଟି ଅର୍ଦ୍ଧ ଶତକ ସାମିଲ୍ ଥିଲା। ଟେଷ୍ଟ ମ୍ୟାଚ ରେ ତାଙ୍କର ସର୍ବାଧିକ ସ୍କୋର ୨୨୪ ରହିଥିଲା। ଏକ ସଫଳ ୱିକେଟ କିପର ଭାବରେ ଟେଷ୍ଟ ମ୍ୟାଚ୍ ରେ ୨୫୬ ଗୋଟି କ୍ୟାଚ୍ ଏବଂ ୩୮ ଟି ଷ୍ଟମ୍ପିଂ କରିଥିଲେ।

ସେହିପରି ସେ ୩୫୦ ୱାନ୍ ଡେ ମ୍ୟାଚ ଖେଳି ୫୦.୫୩ ହାର ରେ ୧୦,୭୭୩ ରନ୍ ସଂଗ୍ରହ କରିଥିଲେ ।ଏଥିରେ ୧୦ ଟି ଶତକ ଏବଂ ୭୩ ଅର୍ଦ୍ଧ ଶତକ ସାମିଲ୍ ଥିଲା।ଏକ ଦିବସୀୟ ମ୍ୟାଚ ରେ ତାଙ୍କର ସର୍ବାଧିକ ସ୍କୋର ୧୮୩ ରହିଥିଲା।ୱିକେଟ କିପର ଭାବରେ ୱାନ୍ ଡେ ମ୍ୟାଚ୍ ରେ ୩୨୧ ଟି କ୍ୟାଚ୍ ଏବଂ ୧୨୩ ଟି ଷ୍ଟମ୍ପିଂ କରିବାର ସଫଳତା ଅର୍ଜନ କରିଥିଲେ।

ଟି-ଟ୍ବେଣ୍ଟି ଫର୍ମାଟ ରେ ମଧ୍ୟ ସେ ବହୁତ୍ ସଫଳତା ହାସଲ କରିଥିଲେ। ୯୮ ଟି ଟି-ଟ୍ବେଣ୍ଟି ମ୍ୟାଚ ଖେଳି ୩୭.୬୦ ହାର ରେ ୧୬୧୭ ରନ୍ ସଂଗ୍ରହ କରିଥିଲେ ।ଏଥିରେ ସେ କେବଳ ଦୁଇଟି ଅର୍ଦ୍ଧ ଶତକ ହାସଲ୍ କରିପାରିଥିଲେ।ଏହା ପାଇଁ ମଧ୍ଯ ଅନେକ କାରଣ ରହିଅଛି। ତାଙ୍କ ପାରଦର୍ଶିତା ଏକ ସର୍ବଶ୍ରେଷ୍ଠ ବ୍ୟାଟ୍ସମ୍ୟାନ୍ ର ସମସ୍କନ୍ଧ ଥିଲା।ମାତ୍ର ସେ ଖେଳ ର ଅନ୍ୟ ଯୁବ ଖେଳାଳି ମାନଙ୍କୁ ଅଧିକ ସୁଯୋଗ ଦେଉଥିଲେ , ଯେଉଁଥିପାଇଁ ତାଙ୍କୁ ଖେଳ ଅନ୍ତିମରେ ଆସିବାକୁ ପଡୁଥିଲା ।ସେ ୭ କିମ୍ବା ୮ ନମ୍ବର ରେ ବ୍ୟାଟିଂ କରିବାକୁ ଆସୁଥିଲେ ଯଦ୍ବାରା ଅଧିକ ସମୟ ଖେଳିବାକୁ ସେ କମ୍ ସୁଯୋଗ ପାଇଥିଲେ।ଏହି ଫର୍ମାଟ ରେ ତାଙ୍କର ସର୍ବାଧିକ ସ୍କୋର ୫୬ ରହିଥିଲା। ଏକ ସଫଳ ୱିକେଟ କିପର ଭାବରେ ଟି-ଟ୍ବେଣ୍ଟି ମ୍ୟାଚ୍ ରେ ୫୭ ଗୋଟି କ୍ୟାଚ୍ ଏବଂ ୩୪ ଟି ଷ୍ଟମ୍ପିଂ କରିପାରିଥିଲେ।

ଭାରତୀୟ ପ୍ରିମିୟର୍ ଲିଗ୍ ରେ ସେ ଚେନ୍ନାଇ ସୁପର କିଙ୍ଗ୍ସ ଦଳ ପକ୍ଷରୁ ଖେଳ ଆରମ୍ଭ କରିଥିଲେ। ନିଜ ଅଧିନାୟକତ୍ବ ରେ ସେ ପାଞ୍ଚ ଥର ନିଜ ଦଳ କୁ ଚାମ୍ପିଅନ କରେଇବାରେ ସଫଳ ହୋଇ ପାରିଥିଲେ। ଏହି ପ୍ରିମିୟର୍ ଲିଗ୍ ଏବଂ ଟି-ଟ୍ୱେଣ୍ଟି ଫର୍ମାଟ ରେ ସେ ସମୁଦାୟ ୩୦୨ ଟି ମ୍ୟାଚ ଖେଳି ୩୮.୫୪ ହାର ରେ ୬୨୦୫ ରନ୍ ସଂଗ୍ରହ କରିଥିଲେ ।ଏଥିରେ ୨୪ ଟି ଅର୍ଦ୍ଧ ଶତକ ସାମିଲ୍ ଥିଲା।ଏହି ଟି-ଟ୍ବେଣ୍ଟି ମ୍ୟାଚ ରେ ତାଙ୍କର ସର୍ବାଧିକ ସ୍କୋର ୮୪ ରହିଥିଲା। ୱିକେଟ କିପର ଭାବରେ ଟେଷ୍ଟ ମ୍ୟାଚ୍ ରେ ୩୬୪ ଟି କ୍ୟାଚ୍ ଏବଂ ୫୭ ଟି ଷ୍ଟମ୍ପିଂ କରିଥିଲେ।

ଉପରୋକ୍ତ କ୍ୟାରିୟର ବିଶ୍ଲେଷଣ ରୁ ତାଙ୍କର ଖେଳ ପ୍ରତି ନିଷ୍ଠା ଓ ତାଙ୍କ ପ୍ରତିଭାର ଝଲକ ଦେଖିବାକୁ ମିଳିଥାଏ।

ଧୋନିଙ୍କ ଟେଷ୍ଟ କ୍ୟାରିୟର ର ଶୁଭାରମ୍ଭ -

******************************************

ଶ୍ରୀଲଙ୍କା ବିପକ୍ଷରେ ଭଲ ଏକଦିବସୀୟ ପ୍ରଦର୍ଶନ ପରେ ଧୋନି ୨୦୦୫ ମସିହା ଡିସେମ୍ବର ଶ୍ରୀଲଙ୍କା ବିରୁଦ୍ଧରେ ଟେଷ୍ଟ ଖେଳ ଆରମ୍ଭ କରିଥିଲେ। ପ୍ରଥମ ମ୍ୟାଚର ରେ ସେ 30 ରନ୍ ସଂଗ୍ରହ କରିଥିଲେ,ଏହି ମ୍ୟାଚ ଟି ବର୍ଷା ଦ୍ୱାରା ବହୁ କ୍ଷତିଗ୍ରସ୍ତ ହୋଇଥିଲା । ୧୦୯ ରନ୍ ରେ ୫ ଟି ୱିକେଟ୍ ଯିବା ପରେ ଦଳ କୁ ସଂଘର୍ଷ ପଥରୁ ମୁକ୍ତ କରିବାକୁ କ୍ରିଜ୍ ରେ ଓହ୍ଲାଇ ଥିଲେ ଧୋନି।ଏହାପରେ ସେ ଏକ ଆକ୍ରମଣାତ୍ମକ ଇନିଂସ ଖେଳିଥିଲେ ଯେଉଁଥିରେ ସେ ଶେଷ ବ୍ୟକ୍ତି ଭାବେ ଦଣ୍ଡାୟମାନ ହୋଇଥିଲେ। ଦ୍ୱିତୀୟ ଟେଷ୍ଟରେ ଧୋନି ନିଜର ପ୍ରଥମ ଅର୍ଦ୍ଧଶତକ ହାସଲ କରିଥିଲେ ଏହା ଭାରତକୁ ୪୩୬ ରନ୍ ରେ ଦଳ କୁ ପହଞ୍ଚାଇବାରେ ସହାୟକ ହୋଇଥିଲା ।ଅପରପକ୍ଷରେ ଶ୍ରୀଲଙ୍କା ୨୪୭ ରନ୍ କରି ଆଉଟ୍ ହୋଇଯାଇଥିଲା।୨୦୦୬ ମସିହା ଜାନୁଆରୀ-ଫେବୃଆରୀ ମାସରେ ଭାରତ ପାକିସ୍ତାନ ଗ୍ରସ୍ତ କରିଥିଲା। ଧୋନି ଇସଲାମାବାଦର ଦ୍ୱିତୀୟ ଟେଷ୍ଟରେ ନିଜର ପ୍ରଥମ ଶତକ ହାସଲ କରିଥିଲେ। ଧୋନି ବ୍ୟାଟିଂ ସମୟରେ ଦଳକୁ ୧୦୭ ରନ୍ ର ଆବଶ୍ୟକତା ଥିଲା। ଧୋନି ନିଜର ଆକ୍ରମଣାତ୍ମକ ଶୈଳୀ ରେ ଖେଳି ମାତ୍ର ୩୪ ଟି ବଲରେ ପ୍ରଥମ ପଚାଶ ସ୍କୋର କରିବା ପରେ ମାତ୍ର ୯୩ ଟି ବଲରେ ନିଜର ପ୍ରଥମ ଟେଷ୍ଟ ଶତକ ହାସଲ କରିଥିଲେ।

ଏହି ପରି ଭାବେ ଧୋନିଙ୍କ ଟେଷ୍ଟ କ୍ୟାରିୟର ର ଶୁଭାରମ୍ଭ ହୋଇଥିଲା।

ଧୋନିଙ୍କ ଏକଦିବସୀୟ କ୍ୟାରିୟର ର ଶୁଭାରମ୍ଭ -

****************************************

୨୦୦୪-୦୫ ମସିହାରେ ଭାରତୀୟ କ୍ରିକେଟ୍ ଦଳ ବାଂଲାଦେଶ ଗସ୍ତ କରିଥିଲା ଏବଂ ଏହି ଗସ୍ତରେ ରାହୁଲ ଦ୍ରାବିଡଙ୍କୁ ୱିକେଟ୍ କିପର ଭାବରେ ରଖାଯାଇଥିଲା ।ଏହା ବ୍ୟତୀତ ଭାରତୀୟ କ୍ରିକେଟ୍ ଦଳ ରେ ପାର୍ଥିବ ପଟେଲ ଏବଂ ଦୀନେଶ କାର୍ତ୍ତିକ ଙ୍କ ପରି ଦକ୍ଷ ୱିକେଟ୍ କିପର ତଥା ବ୍ୟାଟ୍ସମ୍ୟାନ୍ ମଧ୍ୟ ଥିଲେ।ସେହି ସମୟରେ ଧୋନି ଇଣ୍ଡିଆ ଏ ଦଳରେ ନିଜର ପରିଚୟ ସୃଷ୍ଟି କରିଥିଲେ । ଯଦ୍ୱାରା ତାଙ୍କୁ ମଧ୍ୟ ବାଂଲାଦେଶ ଯାତ୍ରା ପାଇଁ ଭାରତୀୟ ଦଳରେ ମନୋନୀତ କରାଯାଇଥିଲା। ଧୋନିଙ୍କ ଏକଦିବସୀୟ କ୍ୟାରିୟରର ଆରମ୍ଭ ପ୍ରଭାବଶାଳୀ ନଥିଲା। ସେ ପ୍ରଥମ ମ୍ୟାଚରେ ନିଜର ଖାତା ନ ଖୋଲିପାରି ଆଉଟ୍ ହୋଇଥିଲେ। ବାଂଲାଦେଶ ବିପକ୍ଷରେ ଖରାପ ପ୍ରଦର୍ଶନ ସତ୍ତ୍ୱେ ସେ ପାକିସ୍ତାନ ବିପକ୍ଷରେ ଭାରତୀୟ ଦଳରେ ମନୋନୀତ ହୋଇଥିଲେ। ସେହି ସିରିଜର ଦ୍ୱିତୀୟ ମ୍ୟାଚ୍, ତଥା ଧୋନିଙ୍କ ପଞ୍ଚମ ଏକଦିବସୀୟ ମ୍ୟାଚ୍ ଯାହା ବିଶାଖାପାଟନମ୍ ରେ ଖେଳାଯାଇଥିଲା। ଏହି ମ୍ୟାଚ ରେସଧୋନି ୧୨୩ ବଲରେ ୧୪୮ ରନ୍ ର ଚମତ୍କାର ଇନିଂସ ଖେଳି ମ୍ୟାଚ୍ ର ସର୍ବାଧିକ ରନ୍ ସ୍କୋର କରିଥିଲେ।ଏହାପରେ ୨୦୦୫ ମସିହା ଅକ୍ଟୋବର - ନଭେମ୍ବର ମାସରେ ଶ୍ରୀଲଙ୍କା ବିରୁଦ୍ଧରେ ଖେଳାଯାଉଥିବା ସିରିଜରେ ଧୋନି ପ୍ରଥମ ଦୁଇଟି ମ୍ୟାଚ୍ ରେ ବ୍ୟାଟିଂ କରିବାକୁ ଉପଯୁକ୍ତ ସମୟ ପାଇନଥିଲେ।ମାତ୍ର ତୃତୀୟ ମ୍ୟାଚ୍ ଯାହାକି ଜୟପୁର ଷ୍ଟାଡିୟମ ରେ ଖେଳାଯାଉଥିଲା । ସେଥିରେ ସେ ତୃତୀୟ ସ୍ଥାନକୁ ଆସି ବ୍ୟାଟିଂ କରିଥିଲେ। ଏହି ମ୍ୟାଚ୍ ରେ ସେ ୧୮୩* ରନ୍ ର ଚମତ୍କାର ଇନିଂଶ୍ ଖେଳିଥିଲେ।

୨୦୧୧ ବିଶ୍ବକପ୍ ବିଜୟ-

***************

୨୦୧୧ ମସିହାରେ କ୍ରିକେଟ୍ ବିଶ୍ୱକପ୍ ଭାରତ,ବାଙ୍ଗଲାଦେଶ ଏବଂ ଶ୍ରୀଲଙ୍କାରେ ଆୟୋଜିତ ହୋଇଥିଲା। ବିଶ୍ବକପ୍ ର ପ୍ରଥମ ମ୍ୟାଚ୍ ରେ ଭାରତ ବାଂଲାଦେଶକୁ ପରାସ୍ତ କରି ଟୁର୍ଣ୍ଣାମେଣ୍ଟ ରେ ଭଲ ଆରମ୍ଭ କରିଥିଲା । ଗ୍ରୁପ୍ ପର୍ଯ୍ୟାୟରେ ନେଦରଲ୍ୟାଣ୍ଡ, ଆୟର୍ଲାଣ୍ଡ, ୱେଷ୍ଟଇଣ୍ଡିଜ୍ ଏବଂ ଦକ୍ଷିଣ ଆଫ୍ରିକା ବିପକ୍ଷରେ ଭାରତ ବିଜୟ କରିଥିଲା କିନ୍ତୁ ଇଂଲଣ୍ଡ ସହ ମ୍ୟାଚ୍ ଡ୍ର ହୋଇଯାଇଥିଲା। ସେମିଫାଇନାଲରେ ଭାରତ ପାକିସ୍ତାନକୁ ପରାସ୍ତ କରିଥିଲା। ଫାଇନାଲ ମ୍ୟାଚରେ ଶ୍ରୀଲଙ୍କାକୁ ପରାସ୍ତ କରି ଭାରତ ବିଶ୍ୱକପ ଜିତିଥିଲା । ମୁମ୍ବାଇରେ ଶ୍ରୀଲଙ୍କା ସହିତ ଅନ୍ତିମ ମୁକାବିଲାରେ ଧୋନି ୯୧* ରନ୍ କରି ଭାରତକୁ ବିଶ୍ବକପ୍ ବିଜେତା କରିବାରେ ସାହାଯ୍ୟ କରିଥିଲେ।ଏହି ଫାଇନାଲ୍ ରେ ତାଙ୍କୁ ମ୍ୟାନ୍ ଅଫ୍ ଦି ମ୍ୟାଚ୍ ପୁରସ୍କାର ପ୍ରଦାନ କରାଯାଇଥିଲା। ୨୦୦୭ ମସିହାରେ ଧୋନି ଭାରତର ଅଧିନାୟକ ପଦବୀ ସମ୍ଭାଳି ଆସୁଥିଲେ। ୨୦୦୭ ଟି-ଟ୍ବେଣ୍ଟି ବିଶ୍ବକପ୍ ବିଜୟ ପରେ ଦ୍ବିତୀୟ ଥର ଧୋନି ଅଧିନାୟକ ରେ ୨୦୧୧ ରେ ବିଶ୍ବକପ୍ ବିଜେତା ହୋଇଥିଲା। ଏହା ସହ ଚାମ୍ପିଅନ ଟ୍ରଫି, ବହୁବାର ଏସିଆ କପ୍ ମଧ୍ୟ ଜିତିବାରେ ଧୋନି ସଫଳତା ହାସଲ୍ କରିଥିଲେ।

ଧୋନି ଙ୍କ ଟି-ଟ୍ବେଣ୍ଟି କ୍ୟାରିୟର ର ଶୁଭାରମ୍ଭ -

*********************************************

ଭାରତର ପ୍ରଥମ ଟ୍ବେଣ୍ଟି- ଟ୍ବେଣ୍ଟି ଆନ୍ତର୍ଜାତୀୟ ମ୍ୟାଚରେ ଧୋନି ଅଂଶ ଗ୍ରହଣ କରିଥିଲେ। ୨୦୦୬ ମସିହା ଡିସେମ୍ବର ରେ ସେ ଦକ୍ଷିଣ ଆଫ୍ରିକା ବିପକ୍ଷରେ ଟି-ଟ୍ବେଣ୍ଟି କ୍ୟାରିୟର ର ଶୁଭାରମ୍ଭ କରିଥିଲେ। ଏହି ମ୍ୟାଚ ରେ ଧୋନି କୌଣସି ରନ୍ ସଂଗ୍ରହ କରିପାରିନଥିଲେ।ଏହା ସହ ତାଙ୍କ ଗୋଡରେ ଆଘାତ ମଧ୍ୟ ଲାଗିଥିଲା। ଧୋନିଙ୍କ ରନ୍ ନ କରିବା ସତ୍ତ୍ୱେ ଦଳ ଉପରେ କୌଣସି କୁପ୍ରଭାବ ପଡିନଥିଲା। ଏହି ମ୍ୟାଚ୍ କୁ ଭାରତ ଛଅ ୱିକେଟ୍ ରେ ଜିତିନେଇଥିଲା।୨୦୧୮ ଫେବୃଆରୀ ୧୮ ରେ ଭାରତ ଏବଂ ଦକ୍ଷିଣ ଆଫ୍ରିକା ମ୍ୟାଚ୍ ରେ ଧୋନି ହେନ୍ରିକ୍ସ ର କ୍ୟାଚ୍ ଧରି ବିଶ୍ବର ପ୍ରଥମ ୱିକେଟ୍ କିପର୍ ହୋଇଥିଲେ ଯିଏକି ୨୭୫ ଟି ଟି-ଟ୍ବେଣ୍ଟି ରେ ୧୭୫ ଟି କ୍ୟାଚ୍ ଧରିବାର ରେକର୍ଡ଼ କରିଥିଲେ।ଏହି ଶ୍ରୀଲଙ୍କା ର କୁମାର୍ ସାଙ୍ଗାକାରା ନାମରେ ନାମିତ ଥିଲା।ମାତ୍ର ଧୋନି ଏହାକୁ ଭଙ୍ଗ କରିଥିଲେ।

୨୦୦୭ ବିଶ୍ବକପ୍ ବିଜୟ-

****************

୨୦୦୭ ମସିହାରେ ଧୋନି ରେ ପ୍ରଥମ ଥର ପାଇଁ ଅଧିନାୟକ ହେବାର ସୁଯୋଗ ପାଇଥିଲ। ପ୍ରଥମଥର ପାଇଁ ଆୟୋଜିତ ଟି-ଟ୍ବେଣ୍ଟି ବିଶ୍ବକପ୍ ରେ ସେ ଅଧିନାୟକ ଭାବରେ ମନୋନୀତ ହୋଇଥିଲେ। ତାଙ୍କର ଏହି ଅଧିନାୟକ ଯାତ୍ରା ସେ ସ୍କଟଲ୍ୟାଣ୍ଡ ବିପକ୍ଷରେ ଆରମ୍ଭ କରିଥିଲେ। କିନ୍ତୁ ବର୍ଷା ଯୋଗୁଁ ଏହା ବାଧାପ୍ରାପ୍ତ ହୋଇ ଖେଳ ହୋଇ ପାରିନଥିଲା। ପରବର୍ତ୍ତୀ ସମୟରେ, ଦକ୍ଷିଣ ଆଫ୍ରିକାରେ ଚାଲିଥିବା ଆଇସିସି ବିଶ୍ୱ ଟ୍ବେଣ୍ଟି-ଟ୍ବେଣ୍ଟି ବିଶ୍ୱକପ୍‌ରେ ଭାରତର ନେତୃତ୍ୱ ନେଇଥିଲେ।ଏହି ବିଶ୍ବ କପ୍ ରେ ଭାରତ ଅତି ଉତ୍ତମ ପ୍ରଦର୍ଶନ କରିଥିଲା ଯଦ୍ବାରା ସେ ଫାଇନାଲ୍ କୁ ଉତ୍ତୀର୍ଣ୍ଣ ହୋଇଥିଲା। ୨୦୦୭ ସେପ୍ଟେମ୍ବର ୨୪ ରେ ପାକିସ୍ତାନ ବିପକ୍ଷରେ ଫାଇନାଲ ଖେଳି ଭାରତ ବିଜୟ ଲାଭ କରିଥିଲା।୧୯୮୩ ର କପିଲ ଦେବଙ୍କ ପରେ ଧୋନି ଦ୍ୱିତୀୟ ଅଧିନାୟକ ଥିଲେ ଯିଏ କି ଭାରତକୁ ବିଶ୍ବ ଚାମ୍ପିଅନ କରିବାରେ ସଫଳ ହୋଇଥିଲେ।

ବିଷୟ ପ୍ରସ୍ଥାନ-

***************

ଧୋନି ପ୍ରାୟତଃ ଦଶ ବର୍ଷ ସକ୍ରିୟ ଭାବେ ଦଳ ରେ ରହି ଦଳକୁ ତିନୋଟି ଫର୍ମାଟ ରେ ଉଚ୍ଚ ସୋପାନ ରେ ପହଞ୍ଚାଇ ପାରିଥିଲେ। ତାଙ୍କ ଭିନ୍ନ ଶୈଳୀ ର ଖେଳ ଦର୍ଶକ ମାନଙ୍କୁ ଆକୃଷ୍ଟ କରିପାରିଥିଲା। ସେ ଜଣେ ଧୁରନ୍ଧର ୱିକେଟ କିପର ଏବଂ ବିଚକ୍ଷଣ ଅଧିନାୟକ ଥିଲେ। ଖେଳ କୁ ସଠିକ୍ ପଥରେ ପରିଚାଳନା ସହ ଖେଳାଳି ର ଖେଳ ର ବିକାଶ ମଧ୍ୟ କରିପାରିଥାନ୍ତି। ନିଚ କ୍ରମରେ ବ୍ୟାଟିଂ କରି ଅନ୍ୟ ଖେଳାଳି ଙ୍କୁ ସୁଯୋଗ ଦେବା , ନିଜୟ ବିଜୟ ର ଦାୟୀ ଅନ୍ୟ ଖେଳାଳି ଙ୍କୁ ଦେବା ଏକ ସଚ୍ଚୋଟ ଅଧିନାୟକ ର ପରିଚୟ ହୋଇଥାଏ। ବିଜୟ ରେ ଦଳ ପଛରେ ଏବଂ ପରାଜୟ ରେ ଆଗରେ ରହିବା ତାଙ୍କର ମହାନତା ପ୍ରଦର୍ଶନ କରିଥାଏ। କେତେକ କ୍ଷେତ୍ରରେ ତାଙ୍କର ସମାଲୋଚନା କରାଯାଇଥାଏ।ମାତ୍ର ସେ କେବଳ ଭାରତରେ ନୁହେଁ ବିଶ୍ବ କ୍ରିକେଟ୍ ର ଜଣେ ବହୁ ଚର୍ଚ୍ଚିତ ଚେହେରା ଏବଂ କ୍ରିକେଟ୍ ଜଗତ ର ଏକ ଉଜ୍ଜ୍ୱଳ ତମ ତାରକା ।

______________________________________________

ପ୍ରସ୍ତୁତି - ସୌମ୍ୟ ରଞ୍ଜନ ରାୟ

ଭୂୟାଁ ଉଆସ, ଗୁଆମାଳ, ଭଦ୍ରକ

ମହେନ୍ଦ୍ର ସିଂ ଧୋନି || Mahendra Singh Dhoni

କ୍ରିକେଟ୍ ଜଗତର ଉଜ୍ଜ୍ୱଳ ତମ ତାରକା ମହେନ୍ଦ୍ର ସିଂ ଧୋନି ଙ୍କ ଜୀବନୀ//Complete life sketch and Career analysis of Mahendra Singh Dhoni