ଶ୍ରୀଯୁକ୍ତ ପ୍ରଭାକର ପ୍ରଧାନ ତା ୨୨-୦୯-୧୯୩୮ରିଖରେ ଗଞ୍ଜାମ ଜିଲ୍ଲାର କନିଆରୀ ଗ୍ରାମରେ ଜନ୍ମଗ୍ରହଣ କରିଛନ୍ତି। ସମୟକ୍ରମେ ତାଙ୍କ ପିତାଙ୍କ ସ୍ଥାନାନ୍ତରଣ ଯୋଗୁଁ ସେ ଆମ୍ଭ ଗ୍ରାମ ବି. ନୂଆଁପଲ୍ଲୀର ସ୍ଥାୟୀ ବାସିନ୍ଦା ହୋଇଛନ୍ତି। ସେ ଏକାଧାରରେ ଜଣେ ସଫଳ ଚାଷୀ, ବାୟକ, ଜ୍ୟୋତିଷୀ ଏବଂ ରାଜନୀତିଜ୍ଞ। ସେ ଆମ୍ଭ ଗ୍ରାମରେ ୨୭.୦୧.୧୯୮୪ ରୁ ୨୭.୦୧.୧୯୯୫ ପର୍ଯ୍ୟନ୍ତ ଲଗାତାର ଦୁଇଥର ତୃଣମୂଳ କଂଗ୍ରେସ ଅଧିନରେ ଆମ୍ଭ ଗ୍ରାମର ସରପଞ୍ଚ ରହି ଗ୍ରାମର ସର୍ବାଙ୍ଗୀନ ଉନ୍ନତି କରିଥିଲେ। ଗ୍ରାମ ପାଇଁ ବିଜୁଳି, ରାସ୍ତାଘାଟର ସୁବିଧା, ପାନୀୟ ଜଳ ଯୋଗାଣ ତଥା କୃଷିମାନଙ୍କର ସର୍ବାଙ୍ଗୀନ ଉନ୍ନତି ପାଇଁ ବହୁ ଜନହିତକର କାର୍ଯ୍ୟ କରି ଜନମାନସରେ ରହିଛନ୍ତି। ଚାଷ ଉପରେ ତାଙ୍କର ଗଭୀର ଜ୍ଞାନର ପଟାନ୍ତର ନାହିଁ। ଜନ୍ମ ହେବାର ପନ୍ଦର ବର୍ଷରୁ ସେ ଜଣେ ଆଦର୍ଶ ଚାଷୀ ରୂପେ ପରିଗଣିତ ହୋଇ ଆସୁଛନ୍ତି। ଜୀବନ ପାହାଚର ୮୬ବର୍ଷରେ ପଦାର୍ପଣ କଲାପରେ ବି ଦରକାର ପଡ଼ିଲେ ଏବେ ମଧ୍ୟ କୃଷି ଉପକରଣ ଧରି ଜମିକୁ ଯିବାକୁ ପଛଘୁଞ୍ଚା ଦେଉ ନାହାଁନ୍ତି। ଏବେ ଶ୍ଵାସରୋଗରେ ପୀଡ଼ିତ ଥାଇ ବି କୃଷୀକାର୍ଯ୍ୟକୁ କେବେ ଅବହେଳା କରି ନାହାଁନ୍ତି। ନିଜ ଜମିରେ ଚାଷ ନ କରି ପାରିଲେ ମଧ୍ୟ ଅନ୍ୟଦ୍ୱାରା ଚାଷ କରାଇ ସୁନାର ଫସଲ ଉପୁଜାଇ ପାରୁଛନ୍ତି। ଜଣେ ଆଦର୍ଶ ଚାଷୀ ହିସାବରେ ସେ ଏକ ବିଶିଷ୍ଟ ସ୍ଥାନର ଅଧିକାରୀ। ତାଙ୍କୁ ଏବେବି ରାଜନୀତି ଓ କୃଷୀ କାର୍ଯ୍ୟରେ ଏକ ବିଜ୍ଞ ଉପଦେଷ୍ଟା କହିଲେ ଅତ୍ୟୁକ୍ତି ହେବ ନାହିଁ।

ତାଙ୍କ ମତରେ - ଜମିକୁ ଉର୍ବର କରିବ କେବଳ ଜୈବିକ ଔଷଧ। ରାସାୟନିକ ଔଷଧ ପ୍ରୟୋଗରେ ଫସଲ ବିଷାକ୍ତ ହେବା ସହ ଜମିର ଉର୍ବରତା ହ୍ରାସ ହେଉଛି। ତେଣୁ ଫସଲରେ ଜୈବିକ ଔଷଧ ପ୍ରୟୋଗ କରି ରୋଗ ଓ ପୋକ ପ୍ରତିରୋଧ କରିବାକୁ ପଡ଼ିବ।

ସେ କିପରି ମାଟିକୁ ଉର୍ବର ରଖି ସୁନାର ଫସଲ ଉପୁଜାଇ ପାରୁଛନ୍ତି ତାହା ବିଷୟରେ ମୁଁ କିଛି ଆଲୋକପାତ କରୁଛି। ତାଙ୍କ ମତ ଅନୁସାରେ -

୧. ମାଟିକୁ ଭଲ ଭାବରେ କର୍ଷଣ କରି ହାଲୁକା ରଖିବା ଉଚିତ। ମାଟିରେ ଗୋବର ଖତ, ଜିଆ ଖତ ଓ ଜୈବିକ ପିଡ଼ିଆ ମିଶାଇ ଉର୍ବର କରାଯାଇ ପାରିବ।

୨. ସମୟ ସମୟେ କୃଷୀ ବିଜ୍ଞାନୀକୁ ଡ଼କାଇ ଆଣି ମାଟିର ପରୀକ୍ଷଣ (ଅମ୍ଳତ୍ୱ, କ୍ଷାରତ୍ବ ଓ ଉର୍ବରତା) କରାଇବା ଉଚିତ।

୩. କେଉଁ ମାଟିରେ କେଉଁ ଫସଲ ଭଲ ହୋଇପାରିବ ସେକଥା କୃଷି ପରାମର୍ଶଦାତାଙ୍କଠୁ ବୁଝିବା ନେବା ଦରକାର। ତା'ର ଅନୁସାରେ ସେଇ ଫସଲ ଚାଷ କଲେ ଭଲ ଅମଳ ହୋଇପାରିବ।

୪. ଉତ୍ତମ ଜଳସେଚନର ବ୍ୟବସ୍ଥା କରାଯିବା ଦରକାର।

୫. ଫସଲକୁ ରୋଗ-ପୋକ ଦାଉରୁ ରକ୍ଷା କରିବାକୁ ପ୍ରଥମେ ଜୈବିକ ଔଷଧ ପ୍ରୟୋଗ କରିବାକୁ ପଡ଼ିବ। ଆବଶ୍ୟକ ସ୍ଥଳେ ଯେତିକି ପରିମାଣର ସାର ବା ରାସାୟନିକ ଔଷଧ ଦରକାର ଠିକ୍ ସେତିକି ପରିମାଣରେ ପ୍ରୟୋଗ କରାଯାଇପାରେ।

ଏବେ ପ୍ରୟୋଗ କରୁଥିବା ଜୈବିକ ଔଷଧ ସମ୍ବନ୍ଧରେ କିଛି ଜାଣିବା।

ନିମ୍ବ : ନିମ୍ବ ଦ୍ବାରା ବିଭିନ୍ନ ରୋଗ ପୋକ ଦୂରିକରଣ କରାଯାଇପାରିବ।

ଉଦାହରଣ: -

# ୨୦ ଗ୍ରାମ୍ ଚୋପା ଛଡ଼ା ନିମ୍ବ ମଞ୍ଜି ଗୁଣ୍ଡକରି ଏହାକୁ ଏକ କନାରେ ବାନ୍ଧି ୬ରୁ ୧୦ ଘଣ୍ଟା ପର୍ଯ୍ୟନ୍ତ ପାଣିରେ ବୁଡ଼ାଇ ରଖି; ତା'ପରେ ନିମ୍ବ ଗୁଣ୍ଡକୁ ଭଲ ଭାବରେ ଚିପୁଡ଼ି ରସ ବାହାର କରି ୧ ଲିଟର ପାଣି କରି ଛିଞ୍ଚନ କଲେ ରୋଗ-ପୋକ ଦାଉରୁ ଫସଲକୁ ରକ୍ଷା ମିଳେ।

# ୨୦ ମିଲି ନିମ୍ବ ତେଲକୁ ସାମାନ୍ୟ ସର୍ଫ ସହ ମିଶାଇ ଫେଣ କରି ଉକ୍ତ ଫେଣକୁ ୧ ଲିଟର୍ ପାଣିରେ ମିଶାଇ ପୋକ ଲାଗିଥିବା ଫସଲରେ ଛିଞ୍ଚନ କଲେ ପୋକ ଦାଉରୁ ରକ୍ଷା ମିଳେ।

# ମାଟିରୁ କୃମି ମାରିବା ପାଇଁ ନିମ୍ବ ପିଡ଼ିଆ ଏକ ଅବ୍ୟର୍ଥ ଔଷଧ।

# କଦଳୀ ଗଛ ପାଇଁ ୫୦ ଗ୍ରାମ୍, ହଳଦୀ ଓ ଅଦା ପାଇଁ ୨୫ ଗ୍ରାମ୍, ଟମାଟ ଗଛ ପାଇଁ ୧୫ ଗ୍ରାମ୍ ହିସାବରେ ନିମ୍ବ ପିଡ଼ିଆ ପ୍ରୟୋଗ କରି କୃମି ଓ ଜୀବାଣୁ ଜନୀତ ରୋଗ ଦାଉରୁ ଫସଲକୁ ରକ୍ଷା କରାଯାଇପାରିବ। ୧ କିଗ୍ରା ନିମ୍ବ ପିଡ଼ିଆକୁ ୫ଲିଟର୍ ପାଣିରେ ୧୨ଘଣ୍ଟା ଭିଜାଇ ଛାଣି ଗଛରେ ଛିଞ୍ଚିଲେ, ପୋକ ଦାଉରୁ ରକ୍ଷା ମିଳେ।

କରଞ୍ଜ : କରଞ୍ଜ ପିଡ଼ିଆ ସୂତ୍ରଜୀବ ଓ ଜୀବାଣୁ ନାଶକ ଅଟେ। ହେକ୍ଟର୍ ପ୍ରତି ୨.୫ ଟନ୍ ହିସାବରେ ପ୍ରୟୋଗ କଲେ ଝାଉଁଳା ରୋଗ ଦୂର ହୁଏ। ଅନ୍ୟାନ୍ୟ ପୋକମାନେ ବି ଦୂରେଇ ଯାଆନ୍ତି।

ବଣ ତୁଳସୀ : ଏହାକୁ ଶୁଖାଇ ଗୁଣ୍ଡ କରି ପାଣିରେ ଭିଜାଇ ପତ୍ରରେ ସିଞ୍ଚନ କଲେ ଶୋଷକ ପୋକ ଦାଉରୁ ରକ୍ଷା ମିଳେ। ଆଉ ଗଛ ମୂଳରେ ଏହି ପାଣିକୁ ଭିଜାଇ ରଖିଲେ ସୂତ୍ର ଜୀବ ଠାରୁ ରକ୍ଷା ମିଳେ।

ଶୁଖିଲା ଲଙ୍କା : ୧ ଲିଟର୍ ପାଣିରେ ୧୦ ଗ୍ରାମ୍ ହିସାବରେ ନାଲି ଲଙ୍କା ଗୁଣ୍ଡ ମିଶାଇ ସିଞ୍ଚନ କରି ଶୋଷକ ପୋକ ଓ ଜଉ ପୋକ ଦମନ କରା ଯାଇ ପାରିବ।

ପଶୁଜାତ ଦ୍ରବ୍ୟ : ୧ ଲିଟର୍ ପାଣିରେ ୧୦ ଗ୍ରାମ୍ କଞ୍ଚା ଗୋବର ମିଶାଇ ସିଞ୍ଚନ କଲେ ଧାନର ଜୀବାଣୁ ଜନିତ ପତ୍ରପୋଡ଼ା ରୋଗ ଭଲ ହୁଏ। ଲୁହା ପାତ୍ରରେ ଗୋମୂତ୍ରକୁ ଏକ ସପ୍ତାହ ରଖି ତାହାକୁ ୬ଗୁଣ ପାଣି ମିଶାଇ ପତ୍ରରେ ସିଞ୍ଚନ କଲେ ପୋକ ହେବା ରୋଗ କମ୍ ହୁଏ।

ସେବତୀ : ସେବତୀ ଗଛରେ ଷ୍ଟାଚାଇଡ୍ରିନ୍ ନାମକ ଏକ ପୋକ ରୋଧକ ରାସାୟନିକ ପଦାର୍ଥ ଥାଏ। ଏହାକୁ ଶୁଖାଇ ଗୁଣ୍ଡକରି ଛିଞ୍ଚିବା ଦ୍ବାରା ଛାରପୋକ, ପିମ୍ପୁଡ଼ି, ମାଛି, ଅସରପା, ମଶା, ଝିଣ୍ଟିକା, ପତ୍ର ଉକୁଣୀ, ଦହିହା ପୋକ ଦୂର କରାଯାଇପାରେ।

ଏହିପରି ବିଭିନ୍ନ ପ୍ରକାରର ଜୈବିକ ଔଷଧ ପକାଇ ରୋଗ-ପୋକ ଦାଉରୁ ଫସଲ ଅମଳ କରାଯାଇପାରେ। ଏହା ପାଇଁ କୃଷି ବିଶେଷଜ୍ଞ

ଙ୍କଠୁ ପରାମର୍ଶ ନେବା ଆବଶ୍ୟକ।

ମାଟି ମଟାଳର ମଣିଷଟିଏ : ଶ୍ରୀଯୁକ୍ତ ପ୍ରଭାକର ପ୍ରଧାନ

ସଫଳ ଚାଷୀ