ମନେପଡେ ଆଜି ଗାଁ ଚାଟଶାଳୀ ଗୋଧୂଳି ବେଳାର ମେଳ,

ମିଳିମିଶି ବସି ଖେଳୁଥିଲୁ ହସି ଅନାମିକା କିଛି ଖେଳ ll୧ll

ଦଣ୍ଡକନ୍ଦୁକର ଆଡ୍ଡା ଜମୁଥିଲା କୋଠଘର ବାଡ଼ିପଟେ,

ବେଟ ବଲ ଥିବ ଯଦି ଲୋଡ଼ା ଉଇକେଟ ବାଡ଼ି ଗୋଟେ ll୨ll

କେବେ ଖେଳ ଚାଲେ ସତସଙ୍ଗ ଆଗେ ବିଲ ମାଳେ ଚାଲେ ଖେଳ,

ରାଧାକୃଷ୍ଣଙ୍କର ମନ୍ଦିର ଭିତରେ ଖେଳୁ ହେଲେ ସଞ୍ଜ ବେଳ ll୩ll

କେବେ କା ପିଣ୍ଡାରେ କନ୍ଦୁକ ପଡିଲେ ପଡୁଥାଏ ବହେ ଗାଳି,

ଗାଳି ଶୁଣିବାରେ ଦୁଃଖ ଯେ ନଥିଲା ବାଜୁଥିଲା ବହୁ ତାଳି ll୪ll

ସେ ବରଗଛର ଓହଳ ରେ ଝୁଲି ବନ୍ଧରେ ଡେଇଁବା ମଜା,

ଆଉ ନାହିଁ କିଛି ବଢିଆଉସ୍ତାରେ ରହିଗଲେ କିଛି ପ୍ରଜା ll୫ll

ଖଣିରୁ ଖଣିକୁ ଡେଇଁବାର ମଜା ଖୋଜେ ଆଜି ବସି ମନ,

ଆଜି ତ ସଂଜରେ ଗାଁ ଶାନ୍ତ ହୁଏ ସତେ ଯେହ୍ନେ ଗୋଟେ ବନ ll୬ll

ଗାଁ ଦାଣ୍ଡେ ଯେବେ ଖରା ଦିନଟାରେ ପିଁ ପିଁ ଶବ୍ଦ ଶୁଭେ,

ଦୁଇ ଟଙ୍କା ମାଗି କୁଲ୍ଫି ଖାଇବାକୁ ମନ ସଭିଙ୍କର ଭାବେ ll୭ll

ଆରମ୍ଭ ଘରରୁ ଅନ୍ତିମ ଯାଏଁ ତ ପରିବାର ଗୋଟେ ସେହି,

ଦାଦା ଖୁଡି ମାମୁଁ ଡାକୁ ପରସ୍ପର କିଏ ହୁଏ କାହା ଭାଇ ll୮ll

ସକାଳ ପହଁରୁ ଟଗର ଫୁଲରୁ ଆରମ୍ଭ ହୁଅଇ ଦିନ,

କିଏ କିଣେ ପରେ ଜହ୍ନି ପୋଟଳ ତ କିଏ କିଣେ ଶାଗ ମୀନ ll୯ll

ଆସେ ରେ କିଣିବୁ ଶସ୍ତାରେ ମିଳୁଛି ଶାଗ ଦୁଇ ବିଡା ଆଜି,

ଡକାଡକି ହୋଇ ପରିବା କିଣନ୍ତି ପରସ୍ପରେ ବାଣ୍ଟି କାଞ୍ଜି ll୧୦ll

ଆମ ଘରେ ଆଜି ପଖାଳକୁ କାଞ୍ଜି ତୁମ ଘରେ ମାଛ ଭଜା,

ବାଣ୍ଟିଣ ଖାଆନ୍ତି ଘରେ ଘରେ ସବୁ ନାହିଁ ଆଉ ସେଇ ମଜା ll୧୧ll

ଅଷ୍ଟପ୍ରହରୀ ରେ ମିଳିମିଶି ସବୁ କରୁଥିଲୁ ସଂକୀର୍ତନ,

ଆଜି ନାହିଁ କେହି ନାମ ଗାଇବାକୁ ହେଲା କି ପରିବର୍ତ୍ତନ ll୧୨ll

ବାପା ତମେ ଟିକେ ମୃଦଙ୍ଗ ବଜାଅ ମୁଁ ବଜାଉଛି ଗିନି,

ମାମୁଁ ତମେ ଧର ଘଣ୍ଟଥଳ ଆଜି ମୁଁ ଦେବି ଡାକ ଧ୍ୱନି ll୧୩ll

ଚଇତି ଆସିଲେ ଦୂରରୁ ସମସ୍ତେ ଡାକନ୍ତି ବନ୍ଧୁବାନ୍ଧବ,

ମଙ୍ଗଳବାରର ଯାତରା ଦେଖିବ ଆମରି ଗାଁ ରେ ହବ ll୧୪ll

ପିଲାଦିନ ଖେଳ ପିଲାଦିନ ବେଳ ଫେରାଇ ଦିଅରେ ମତେ,

ଗାଁ ସାଙ୍ଗସାଥି ମନେ ପଡେ ଆଜି ଭାଗ୍ୟ କି ବର୍ଣ୍ଣିବି ତତେ ll୧୫ll

ତଥାପି ଖୁସିରେ ଉନ୍ମାଦ ଏ ମନ ହୋଇଯାଏ ଦେଖି ଗାଁ,

ମୋ ଗାଁ ମାଟିକୁ ସଦା ସାହା ହେବୁ ଆଗୋ ପିତାମ୍ବରୀ ମାଁ ll୧୬ll

ଖେଳିଉଠୁ ସେଇ ଗାଁ ଦାଣ୍ଡ ମୋର ଖୁସିରେ ରୁହନ୍ତୁ ସବୁ,

ସଭିଙ୍କ ଉପରେ ସହାୟକ ହୁଅ ଆହେ ରାଧାକୃଷ୍ଣ ପ୍ରଭୁ ll୧୭ll

ପରିବର୍ତ୍ତନର ଦୁନିଆ ଭିତରେ ଆଧୁନିକତାର ଆଶା,

ତଥାପି ରହିବ ମୋ ଗାଁ ସଦା ଏକଜୁଟ ଏ ଭରସା ll୧୮ll

ଆଗକୁ ବଢିବା ଗାଁ କୁ ତୋଳିବା, ଗଢିବା ସୁପରିବାର,

ବଢିଆଉସ୍ତା ରହିଥିଲା ରହିଥିବା ହୋଇଣ ଆମର ll୧୯ll

ଜାଗ ଗ୍ରାମବାସୀ ସୁଦୂର ଦେଶରୁ ଜାଗ୍ରତ କର ମନ,

ପୁଣି ଆମ ଗାଁ ହସିବ ନାଚିବ ଶୁଭିବ ମଧୁର ସ୍ଵନ ll୨୦ll

ମୋ ଗାଁ ବଢିଆଉସ୍ତା