ଉତ୍କଳ ପ୍ରଦେଶେ ସର୍ବଶ୍ରେଷ୍ଠ ଯାତ୍ରା ରଥଯାତ୍ରା ତାର ନାମ,

ଶ୍ରୀମନ୍ଦିରୁ ଆସି ମାଉସୀଘରକୁ ଯିବେ ଜଗା ବଳରାମ |

ଭଉଣୀ ସୁଭଦ୍ରା ହଳଦୀ ମୁଖୀକୁ ମଝିରେ ଦେଇ ସୁରକ୍ଷା,

ଆଗରେ ପଛରେ ପଥ ପ୍ରାଙ୍ଗଣରେ ଜନତାଙ୍କୁ କରି ରକ୍ଷା |

ସୁରକ୍ଷାର ବେଢ଼ି ସୁଦର୍ଶନ ଦିଏ ନନ୍ଦିଘୋଷେ ପାଏ ଶୋଭା,

ବଳରାମଙ୍କର ହଳମୁଷଳକୁ ସୁଭଦ୍ରା ମାତାଙ୍କ ପ୍ରଭା |

ପଛେ ପଛେ ଆସେ ଲୁଚି ଲୁଚି ଆସେ ହସି ହସି ଆସେ ଜଗା,

ହଲି ହଲି ଆସେ ଝୁଲି ଝୁଲି ଆସେ ସାତରଙ୍ଗେ ସେତ ରଙ୍ଗା |

ସଭିଙ୍କୁ ଦେଖେ ସେ କଜ୍ଵଳ ନୟନେ ଓଠ ଯେହ୍ନେ ନାଲି ପାନ,

କାଳିଆ ବଦନ ବଡଦାଣ୍ଡେ ଆଜି କିଣିଲା ସଭିଙ୍କ ମନ |

ଦୋଳି ଖେଳି ଖେଳି ଆସଇ କାଳିଆ ଚଢିବାକୁ ନନ୍ଦିଘୋଷ,

ମନେ ଚାଲିଥାଏ କିପରି ଭାଙ୍ଗିବି ମହାଲକ୍ଷ୍ମୀଙ୍କର ରୋଷ |

ମାଉସୀ ସ୍ନେହରେ ଭାରିଜା କୁ ଛାଡି ଚାଲିଲେ ଚଳାଇ ରଥ,

ଭକତ ଭାବର ଭାବଗ୍ରାହୀ ସିଏ ଜଗତର ଜଗନ୍ନାଥ |

ମନେ ପଡେ ଆଜି ଭକ୍ତ ସାଲବେଗ ଦାସିଆ ନଡ଼ିଆ କଥା,

ମନେ ପଡେ ସେଇ ଭଜନ ସମ୍ରାଟ ଭିକାରି ବଳଙ୍କ ଗାଥା |

ନନ୍ଦିଘୋଷ ରଥ ବଡଦାଣ୍ଡ ପଥ ତହିଁପରେ ଜଗନ୍ନାଥ,

ଆଜି ବଡଦାଣ୍ଡେ ଛିଡା ହୋଇ ଭକ୍ତ ହୋଇଯାଏ ସେ ନିସ୍ଵାର୍ଥ |

ମହାମେରୁ ତୁମେ ଅଟଳ ହେ ପ୍ରଭୁ ତଥାପି ଗଡ଼ାଇ ରଥ,

ଭକତ ଭାବର ଭାବଗ୍ରାହୀ ବୋଲି କଲ ତୁମେ ପ୍ରମାଣିତ |

କି କଳା ରଖିଛ କାଳିଆ ଠାକୁର ମୋହିଦିଅ ଭକ୍ତ ପ୍ରାଣ,

ଆ' ରେ କାଳିଆ ସପନରେ ମୋର ରହିଲା ଭକତ ରାଣ |

କାହିଁ କେତେ ଦୂରୁ ଟେକିଦେଲି ହାତ ବିଶ୍ୱାସରେ ଭାବଗ୍ରାହୀ,

ଏ ସଂସାର ଜ୍ୱାଳା ଅତିଷ୍ଠ କଲାଣି କରିଦିଅ ପ୍ରଭୁ ତ୍ରାହି |

ରଥ ଯାତରାରେ ଆତୁର ତୃଷ୍ନା ରେ ଭକ୍ତ କରାଇ ଚିତ୍କାର,

ତୁମ ରାଇଜରେ ପଡ଼ିଅଛି ପ୍ରଭୁ ଅରାଜକ ହାହାକାର |

ରକ୍ଷା କର ଜଗା ରଖ ରେ ବଳିଆ ସୁଭଦ୍ରା ଭାଙ୍ଗିବ ଦର୍ପ,

ବଡ ଦାଣ୍ଡେ ରହି ରଚିଥାଅ ଲୀଳା ଗଂଜନ କରିଣ ଗର୍ବ |

ନୟନେ ନୟନ ମିଶାଇ ଦିଅ ହେ ହରିଦିଅ ମୋର ପାପ,

ତୁମରି ନିର୍ମାଲ୍ୟ ତୁମରି ତୁଳସୀ ଭାଙ୍ଗିଦେବ ଅଭିଶାପ |

ପ୍ରତିବର୍ଷ ଆସି ଆଶୀର୍ବାଦ ଦେଇ ଭକତଙ୍କ ମନ କିଣି,

ଲୁଚିଯାଅ ପୁଣି ବଡଦେଉଳରେ ନ ପାରିବେ କେହି ଜାଣି |

ଆଶିଷ ଲେଖୁଛି ଆଶିଷ ଆଶାରେ ଆସ ପ୍ରଭୁ ମୋର ପାସ,

ଜଗତର ନାଥ ଜଗନ୍ନାଥ ତୁମେ ସଦା ମୋ ହୃଦୟେ ବାସ |

ମୋ ଜଗନ୍ନାଥ