ଜୀବନ ଚଲା ପଥରେ, ଆମେ ଅନେକ ଲୋକଙ୍କ ସହିତ ଭେଟ ହୋଇଥାଉ ,କେହି ଆମର ସାଥୀ ହୁଅନ୍ତି, ତ କେହି ହୁଅନ୍ତି ମାର୍ଗଦର୍ଶକ। ଏହି ଯାତ୍ରାରେ ଆମେ ଦୁଇ ପ୍ରକାରର ଲୋକଙ୍କ ମାର୍ଗ ଅନୁକରଣ କରିଥାଉଁ -

· ଯେଉଁମାନେ ସର୍ବଦା ମିଠା ମିଠା କଥା କହି ଆମକୁ ଖୁସି ରଖନ୍ତି।

· ଆଉ ଯେଉଁମାନେ ସିଧାସଳଖ ଆମ ଭୁଲ୍ ଗୁଡ଼ିକ ଆମ ଆଗେ ହି ଦେଖାଇ ଦେଇ ଆମକୁ ଖୁସି ରଖି ପାରନ୍ତି ନାହିଁ।

ପ୍ରଥମ ଧରଣର ଲୋକଙ୍କ ସହିତ ରହିବା ଭାରି ଆରାମ ଦାୟକ ଲାଗେ। କିନ୍ତୁ ବାସ୍ତବିକତା ହେଉଛି, ଯେଉଁମାନେ ଆପଣାର ମୁହଁରେ ଜବାବ ଦେଇପାରନ୍ତି, ସେମାନେ ହିଁ ଆପଣାର ସତ୍ୟହିତୈଷୀ। ସେମାନେ କଦାପି ଆପଣାର ଅନିଷ୍ଟ କରନ୍ତି ନାହିଁ, ବରଂ ସେମାନେ କେବଳ ସେହି ଲୋକଙ୍କୁ ଡରାନ୍ତି ଯେଉଁମାନେ ମିଠା କଥା କହି ଭିତରେ ଭିତରେ ଘୃଣା କରନ୍ତି।

ଆମ ଚାରିପାଖରେ ଅନେକ ଲୋକ ଅଛନ୍ତି ଯେଉଁମାନେ କେବଳ ଆମର ପ୍ରଶଂସା କରନ୍ତି। ସେମାନେ ଆମର କାର୍ଯ୍ୟକୁ ଭଲ ବୋଲି କହନ୍ତି, ଆମର ପୋଷାକକୁ ପସନ୍ଦ କରନ୍ତି, ଆମର ପ୍ରତ୍ୟେକ ନିଷ୍ପତ୍ତିକୁ ସମର୍ଥନ କରନ୍ତି। ଆମେ ଭୁଲ୍ କରିଦେଲେ ବି ସେମାନେ କହନ୍ତି, "ଚିନ୍ତା କରିବାର କିଛି ନାହିଁ, ସବୁ ଭଲ ହେବ।" ପ୍ରଥମେ ଲାଗେ ଯେମିତି ସେମାନେ ଆମର ଭଲ ଚାହୁଁଛନ୍ତି।

କିନ୍ତୁ ଏହି ମିଠା କଥାର ପଛରେ ଏକ କଠୋର ସତ୍ୟ ଲୁକ୍କାୟିତ ରହିଥାଏ। ଯେତେବେଳେ ଆମେ କୌଣସି ସମସ୍ୟାରେ ପଡିଥାଉଁ, ସେମାନେ ଆମର ସାହାଯ୍ୟ କରନ୍ତି ନାହିଁ। ଆମେ ଅସଫଳ ହେଲେ ସେମାନେ ପଛରେ ହସନ୍ତି। ଆମେ ସଫଳ ହେଲେ ସେମାନେ ଈର୍ଷା କରନ୍ତି। ଏହି ଲୋକଙ୍କ ମିଠା କଥା ହେଉଛି ଏକ ଜାଲ, ଯାହା ଆମକୁ ଫସାଇ ଆମର ସମୟ, ଶକ୍ତି ଓ ଭାବନା ନଷ୍ଟ କରିଥାଏ।

ଏବେ ଆସିବା ସେମାନଙ୍କ କଥା ଯେଉଁମାନେ ଆମ ଭୁଲ୍ ଗୁଡ଼ିକ ସିଧାସଳଖ ଆମ ମୁହଁରେ କହି ଦେଇଥାନ୍ତି। ସେମାନଙ୍କ କଥା ଶୁଣି ପ୍ରଥମେ ଆମେ କ୍ରୋଧିତ ହୋଇଯାଉଁ, ଆମର ଗର୍ବକୁ ଆଘାତ ଲାଗେ। କିନ୍ତୁ ଯଦି ଆମେ ଧୈର୍ଯ୍ୟ ସହକାରେ ଚିନ୍ତା କରିବା, ତାହା ହେଲେ ଆମେ ବୁଝିବା ଯେ ସେମାନଙ୍କ କଥାରେ ଆମର ଭଲ ଛଡ଼ା ମନ୍ଦ ନାହିଁ।

ଉଦାହରଣ ସ୍ୱରୂପ, ଯେତେବେଳେ ଜଣେ ବନ୍ଧୁ ଆମକୁ କହେ, "ତୁମେ ଏହି କାମଟି ଭୁଲ୍ ଭାବରେ କରୁଛ," ତା’ର ଅର୍ଥ ହେଉଛି ସେ ଚାହୁଁଛି ଆମେ ଆମର ଭୁଲ୍ ସଂଶୋଧନ କରି ଭଲ କାମ କରିବା। ଯେତେବେଳେ ଜଣେ କଲିଗ୍ ଆମର ତ୍ରୁଟି ଦେଖାଇ ଦେଇଥାଏ, ସେ ଚାହୁଁଛି ଆମେ ଆମର କାର୍ଯ୍ୟରେ ଉନ୍ନତି କରିବା। ଏହି ଧରଣର ଲୋକଙ୍କ ସାହସ ଓ ସତ୍ୟତା ହେଉଛି ସେମାନଙ୍କର ସବୁଠୁ ବଡ଼ ଗୁଣ। ସେମାନେ ଆମକୁ ସତ୍ୟ ଦେଖାଇବାକୁ ଡରନ୍ତି ନାହିଁ, କାରଣ ସେମାନେ ଜାଣନ୍ତି ଯେ ସତ୍ୟ ହିଁ ଆମକୁ ଆଗକୁ ବଢିବାରେ ସାହାଯ୍ୟ କରିବ।

ଏଠାରେ ଏକ ମଜାର ବିଷୟ ହେଉଛି: ଯେଉଁମାନେ ମିଠା କଥା କହି ଛଳନା କରନ୍ତି, ସେମାନେ ପ୍ରକୃତରେ ଡରୁଥିବା ଲୋକ ହେଉଛନ୍ତି ଯେଉଁମାନେ ମୁହଁରେ ଜବାବ ଦେଇପାରନ୍ତି। କାରଣ?

· ସେମାନେ ଡରନ୍ତି ଯେ ଯଦି ସତ୍ୟ କଥା କହିଲେ, ଲୋକେ ସେମାନଙ୍କୁ ପସନ୍ଦ କରିବେ ନାହିଁ।

· ସେମାନେ ଡରନ୍ତି ଯେ ସେମାନଙ୍କର ଛଳନା ଫସରେ ପଡିଯିବ।

· ସେମାନେ ଡରନ୍ତି ଯେ ସେମାନଙ୍କର ମନ୍ଦ ଇଚ୍ଛା ପ୍ରକାଶ ପାଇଯିବ।

ଅର୍ଥାତ୍, ଯେଉଁମାନେ ମିଠା କଥା କହି ଘୃଣା କରନ୍ତି, ସେମାନଙ୍କ ମନରେ ଏକ ଗଭୀର ଡର ରହିଥାଏ। ପକ୍ଷାନ୍ତରେ, ଯେଉଁମାନେ ମୁହଁରେ ଜବାବ ଦେଇପାରନ୍ତି, ସେମାନେ କୌଣସି ପ୍ରକାରର ଡର କଣା ନୁହଁନ୍ତି। ସେମାନେ ନିର୍ଭୟ ଓ ସ୍ପଷ୍ଟବାଦୀ। ସେମାନେ ଜାଣନ୍ତି ଯେ ସତ୍ୟ କହିବା ଯୋଗୁଁ ଲୋକେ କ୍ରୋଧିତ ହୋଇପାରନ୍ତି, ତଥାପି ସେମାନେ ସତ୍ୟ କହିବାର ସାହସ ରଖନ୍ତି। ଏହି ସାହସିକତା ହିଁ ସେମାନଙ୍କୁ ଶକ୍ତିଶାଳୀ କରିଥାଏ।

ଆମେ କିପରି ଜାଣିବା କିଏ ଭଲ ଆଉ କିଏ ଛଳନାକାରୀ? ଏହାର କିଛି ସହଜ ଉପାୟ ରହିଛି:

· କାର୍ଯ୍ୟ ଦେଖନ୍ତୁ, କଥା ନୁହେଁ: ଯେଉଁମାନେ କେବଳ କଥା କହନ୍ତି କିନ୍ତୁ କାର୍ଯ୍ୟ କରନ୍ତି ନାହିଁ, ସେମାନଙ୍କଠାରୁ ସତର୍କ ରହିବା ଉଚିତ୍।

· ସମୟ ହେଉଛି ସର୍ବଶ୍ରେଷ୍ଠ ପରୀକ୍ଷକ: ସମୟ ବିତିବା ସହିତ ଭଲ ଲୋକଙ୍କ ଗୁଣ ଆପେ ଆପେ ପ୍ରକାଶ ପାଇଯାଏ।

· ସଙ୍କଟର ସମୟ ପରୀକ୍ଷା: ଯେତେବେଳେ ଆପଣ ସମସ୍ୟାରେ ପଡି ଥାଆନ୍ତି, ସେତେବେଳେ କିଏ ଆପଣାର ସାହାଯ୍ୟ କରେ ତାହା ଲକ୍ଷ୍ୟ କରନ୍ତୁ।

ତେଣୁ, ଆମ ଜୀବନରେ ଆମେ ଯେଉଁମାନଙ୍କୁ ଭେଟୁଛେ ଯେଉଁମାନେ ଆମ ମୁହଁରେ ଜବାବ ଦେଇପାରନ୍ତି, ସେମାନଙ୍କୁ ଦୂରରେ ରଖିବା ଉଚିତ୍ ନୁହେଁ। ବରଂ ସେମାନଙ୍କୁ ଆଦର କରିବା ଉଚିତ୍, କାରଣ ସେମାନେ ହିଁ ଆମର ଭଲ ବନ୍ଧୁ। ସେମାନଙ୍କ କଥା କଠୋର ଲାଗିପାରେ, କିନ୍ତୁ ଏହି କଠୋରତା ହିଁ ଆମ ଜୀବନକୁ ସଫଳ କରିବାର ମାର୍ଗ ଦେଖାଏ।

ଆଉ ଯେଉଁମାନେ କେବଳ ମିଠା କଥା କହନ୍ତି, ସେମାନଙ୍କ ପ୍ରତି ସତର୍କ ରହିବା ଉଚିତ୍। ସଦାବେଳେ ଆଶା କରିବା ଭୁଲ୍। ସେମାନେ କେବଳ ସେମାନଙ୍କର ସ୍ୱାର୍ଥ ପାଇଁ ଆମ ପାଖରେ ରହିଥାନ୍ତି।

ଶେଷରେ ଏହି କଥାଟି ମନେ ରଖିବା ଉଚିତ୍: "ମୁହଁରେ ଜବାବ ଦେଉଥିବା ଲୋକେ କଦାପି ଠକନ୍ତି ନାହିଁ, ସେମାନେ କେବଳ ସେହି ଲୋକଙ୍କୁ ଡରାନ୍ତି ଯେଉଁମାନେ ମିଠା କଥା କହି ଭିତରେ ଭିତରେ ଘୃଣା କରନ୍ତି।"

ଏହି ସଚେତନତା ଆମ ଜୀବନକୁ ଅଧିକ ସୁରକ୍ଷିତ, ସଫଳ ଓ ସାର୍ଥକ କରିପାରିବ।

! ସୁଶାନ୍ତ କୁମାର ସାସମଲ

ହନୁମାନ ନଗର ଆସ୍କା ରୋଡ଼

ବ୍ରହ୍ମପୁର ଗଞ୍ଜାମ !

ମୁହଁରେ ଜବାବ: ନିର୍ବୀକତାର ଅସ୍ତ୍ର

ମୁହଁରେ ଜବାବ: ନିର୍ବୀକତାର ଅସ୍ତ୍ର