ଆରମ୍ଭ:-

******

ମୁଁ ଯଦି କବିଟିଏ ହେଲି

ଯଦି ରକ୍ତର ହିମୋଗ୍ଲୋବିନ୍ ଭଳି

କଲମର ବହଳିଆ ସ୍ୟାହିକୁ ନିଜର କଲି

ଆଉ ଯଦି ଅତୀତର ଇତିହାସ

ବର୍ତ୍ତମାନର ଭୂଗୋଳ, ଭବିଷ୍ୟତର ମାଳିକାକୁ

ନିଜ ଜୀବନ ସହ ଯୋଡ଼ି

ଯୋଡେ ଅଧେ କବିତା ଲେଖିଲି

ତେବେ ନିଶ୍ଚିତ ତମକୁ ଲେଖିବି

ଅପ୍ରାପ୍ତିର ସାମିଆନା ତଳେ

ମୋ ପ୍ରତି ଥିବା ତମ ଭର୍ତ୍ସନାର ସଂକ୍ରମଣରେ

ସେ କବିତାକୁ କିଏ ପଢିବ କି ନ ପଢିବ

ମୁଁ ଜାଣେନା

ସେ କବିତା କେବେ ପୁରସ୍କୃତ ହେବ କି ନ ହେବ

ମୁଁ ଜାଣେନା

କି ଜାଣେନା ସେ କବିତା ପାଠକକୁ ଛୁଇଁବ

କି ବେକାର୍ କବିତାର ଆଖ୍ୟା ପାଇ

ତୁଣ୍ଡ ବାଇଦ ସହସ୍ର କୋଶ ପରି ମାଡ଼ିଯିବ

ହେଲେ ହଁ, ଏତିକି ଜାଣିଛି

ତମେ ମୁଁହ ମୋଡ଼ି ଚାଲିଯିବା ଦିନଠୁ

' ଥୁ ' କହି ମୋ ପୁରୁଷତ୍ଵକୁ ଘୃଣା କରିବା ପରଠୁ

' ଧିକ୍ ' କହି ମୋ ଚରିତ୍ର , ମୋ ସଂସ୍କାର ଉପରେ

ମିଥ୍ୟା ଆରୋପ ଲଦି ଦେବା ବେଳଠୁ

ମୁଁ କିନ୍ତୁ ପାଲଟିନି ସ୍ଥାଣୁ

ହାଇ ମାରି ବସିନି ପରିବର୍ତ୍ତନଶୀଳ ବିଶ୍ଵରେ

ସମୟ ଆଖିରେ ଧୂଳି ଦେଇ

ନିଜକୁ ବନ୍ଦ କରିନି ନିଭୃତ କୋଠରୀରେ

କି କାନ୍ଦିନି ମଥାକୋଡ଼ି ଛାତିପିଟି

କି ପ୍ରତ୍ୟୁତ୍ତର ଦେଇନି ତୁମ କୁତ୍ସାରଟନାର

କି ଥରେ ହେଲେ ବି ଭାବିନି

ଫାଶୀ ଦଉଡ଼ିରେ ଓହଳେଇଦେବାକୁ ନିଜକୁ

ଛାଡ଼ , କି ହବ ସ୍ମୃତିଚାରଣ କରି

ପରାଜିତର ଅଲିଖିତ ଇତିହାସ

ନିଶ୍ଚିତ ତମ ଚୁଗୁଲି, ଅପବାଦ

ନିନ୍ଦା, ଟାହିଟାପରାକୁ

ପ୍ରେରଣାର ଅସରନ୍ତି ଉତ୍ସ ସଜେଇ

କଲମ ମୁନରେ ଉଖୁରେଇବି

ବିଗତ ଦିନର ପୁଜ ମିଶା କ୍ଷତକୁ

ଆଉ ଅଲୋଡ଼ା ପୁଜ, ବଦରକ୍ତକୁ

ଭରିଦେବି ଭାବନାର ଫାଉଣ୍ଟେନ୍ ପେନ୍ ରେ

ଲେଖିଦେବି ଖଣ୍ଡେ ଅସରନ୍ତି କବିତା

ପ୍ରପଞ୍ଚ, ପ୍ରତାରଣା ର ଶବ୍ଦକୁ ଯୋଖି

କିନ୍ତୁ, ମନେରଖ

ମୁଁ ସେଥିରେ ଭରିବି ଚାଙ୍ଗୁଡ଼ିଏ ଫୁଲ

ତୁମ କଣ୍ଟକିତ ଉପହାର ପରିବର୍ତ୍ତେ

ଭରିବି ପୂର୍ଣ୍ଣଚ୍ଛେଦ ସବୁ ପ୍ରଶ୍ନର ଶେଷରେ

ତୁମ କୈଫିୟତ୍ କୁ ଅପେକ୍ଷା ନ କରି

ଆଉ ହଁ, ବିନା ଦ୍ଵିଧାରେ ଭରିଦେବି

ଏକତରଫା ସ୍ନେହ, ପ୍ରେମ, ସମର୍ପଣ

ତୁମ ଉପହାସ, ତାଚ୍ଛଲ୍ଯ, କୂଟଚକ୍ରାନ୍ତ ବଦଳରେ

ଯଦି ମୁଁ କବିଟିଏ ହେଲି

ହଁ, ଯଦି ମୁଁ କବିଟିଏ ହେଲି

************

କମଳ ଲୋଚନ ବେହେରା

ଗୋପାଳପୁର,ବାଲେଶ୍ବର

ଦୁରଭାଷ -- 9077606469

ମୁଁ ଯଦି କବିଟିଏ ହେଲି

ଅପ୍ରାପ୍ତିର ସାମିଆନା ତଳେ ଲେଖା ହେଇଥିବା ଖଣ୍ଡେ କବିତା:-